Inaatraso daw Nindo Iyan?

Inaatraso an ano? An pagsurat kan hinahagad na impormasyon sa DPA (durable power of attorney) card na itinatao sa bautisadong mga Saksi. Huling “dai nindo aram kun ano an magigin buhay nindo sa aga,” importante na magdesisyon kamo nin patienot asin isurat an mga pagbolong saka prosedimiento na aakoon nindo kun may medikal na emerhensia. (Sant. 4:14; Gibo 15:28, 29) Tanganing matabangan kamo, ginibo an video na Transfusion-Alternative Health Care—Meeting Patient Needs and Rights. Dalanon nindo iyan, dangan mapagngayongayong repasohon an nanodan nindo sa tabang kan minasunod na mga hapot.

(1) Taano an nagkapira sa langtad nin pagbolong ta sinisiyasat giraray an pag-ineksion nin dugo? (2) Magtao nin tolong halimbawa nin komplikadong mga operasyon na nagibo nang mayo nin pag-ineksion nin dugo. (3) Taano ta andam an dakol na doktor asin siruhano sa bilog na kinaban na bolongon an mga pasyente na mayong pag-ineksion nin dugo? (4) Ano an ihinayag kan dai pa sana nahahaloy na mga pagsiyasat sa ospital manongod sa paggamit nin dugo? (5) Anong mga peligro sa pagpabolong an kalabot sa pag-ineksion nin dugo? (6) Ano an nagin kongklusyon nin dakol na eksperto mapadapit sa mga pakinabang kan mga alternatibo sa pag-ineksion nin dugo? (7) Ano an dahelan nin kakulangan nin pulang selula kan dugo (anemia)? Sagkod saen iyan makakayanan nin mga tawo na mayo nin nakakadanyar na mga epekto? Ano an puedeng gibohon tanganing maremedyohan iyan? (8) Paano mapapadakol an produksion nin pulang selula kan dugo sa hawak nin pasyente? (9) Anong mga pamamaagi an ginagamit tanganing mainaan an pagkawara nin dugo durante nin operasyon? (10) Taano ta mahalaga na magdesisyon na nin patienot an mga Kristiano kun arin na mga pagbolong na dai magamit nin dugo an saindang aakoon? Paano niato ini magigibo?

An pag-ako sa nagkapira sa mga pagbolong na itinampok sa video personal na desisyon nin saro oyon sa saiyang konsensia na sinanay sa Biblia. Kamo daw nakagibo na nin malinaw na desisyon kun arin na mga pagbolong asin medikal na mga prosedimiento an andam nindong akoon para sa saindo asin sa saindong mga aki dangan isinurat an impormasyon na iyan sa DPA card? Para sa kompletong pagtokar sa mga bagay na ini, maingat na repasohon an kapitulo 7 kan librong “Pagkamoot nin Dios” asin an mga reperensiang sinambit dian. Helingon man an suplementong “Paano Ko Dedesisyonan an Manongod sa mga Fraction nin Dugo Asin an Medikal na mga Prosedimiento na Kalabot an Sadiri Kong Dugo?” sa isyu kan An Satong Ministeryo sa Kahadean na Enero 2007. Ultimo, seguradohon na ikinasurat nindo nin eksakto an saindong mga desisyon sa saindong DPA card. An pinili nindong mga representante sa pagpabolong asin an siisay man na mga kapamilyang bakong Saksi maninigong impormaran nin lubos manongod sa saindong mga desisyon.

[Kahon sa pahina 2]

• Kamo daw nakapagdesisyon na kun arin na mga pagbolong asin medikal na mga prosedimiento an andam nindong akoon para sa saindo asin sa saindong mga aki?

• Igwa daw kamong darang DPA card na may kompletong impormasyon enkaso magkaigwa nin emerhensia?