An Satong mga Magasin—Dinisenyo na Magugustohan nin Dakol
1. Paano inaarog si apostol Pablo kan grupong maimbod asin mapagmansay na oripon?
1 Kun paanong ibinagay ni apostol Pablo an pag-atubang nia kan maogmang bareta tanganing madara an “gabos na [klase nin] tauo,” ginagamit man kan grupong maimbod asin mapagmansay na oripon an satong mga magasin tanganing magkaigwa nin impluwensia sa mga tawong laen-laen an pinaghalean asin paniniwala. (1 Cor. 9:22, 23) Tanganing magamit niato nin epektibo an Torrengbantayan asin Awake! maninigo niatong girumdomon kun para kiisay partikularmenteng ipinupublikar an mga magasin na ini.
2. Dinisenyo an Awake! tanganing magustohan niisay?
2 Awake!: An magasin na ini ginibo partikularmente para sa mga tawong siring kan kinaolay ni apostol Pablo na “magña taga Atenas.” (Gui. 17:22) An mga tawong idto bakong Kristiano an dinakulaan asin kakadikit sana an pakasabot sa Kasuratan. Siring man, an Awake! dinisenyo para sa mga may dikit sana o mayong kaaraman sa Biblia. Tibaad mayo sindang aram sa Kristianong mga katokdoan, medyo diskompiado sa relihion, o dai ninda aram na may praktikal na halaga an Biblia. An sarong pangenot na katuyohan kan Awake! iyo na kombensiron an mga nagbabasa kaiyan na nag-eeksister an tunay na Dios. Katuyohan man kan magasin na ini na pataluboon an pagtubod sa Biblia asin tabangan an nagbabasa na maheling na laen an Mga Saksi ni Jehova sa iba pang relihiosong grupo.
3. Para kiisay partikularmenteng ipinupublikar an lambang edisyon kan An Torrengbantayan?
3 An Torrengbantayan: An pampublikong edisyon kan magasin na ini partikularmenteng ipinupublikar para sa mga iginagalang minsan paano an Dios asin an Kasuratan. Igwa sinda nin kadikit na kaaraman sa Biblia alagad bakong tama an pakasabot ninda sa mga katokdoan kaiyan. Kapareho sinda kan mga tawong inapod ni Pablo na mga “natatakot sa Dios.” (Gui. 13:14-16) Sa pangenot, an pag-aadalan na edisyon kan An Torrengbantayan ipinupublikar para sa mga Saksi ni Jehova. Iniisip kaidto ni Pablo na an mga nagbabasa kan saiyang mga surat pamilyar sa Kasuratan asin igwa nin tamang kaaraman dapit sa katotoohan. (1 Cor. 1:1, 2) Kaagid kaiyan, an mga artikulo sa pag-aadalan na edisyon ipinupublikar para sa mga nag-aatender sa satong mga pagtiripon asin pamilyar sa mga termino saka tinutubod nin mga Saksi.
4. Taano ta maninigo kitang magin pamilyar sa kada isyu kan mga magasin na ginagamit niato sa ministeryo?
4 Minsan ngani pirme niatong iinaalok an mga magasin na magkaibanan, sa parate saro sana kaiyan an itinatampok niato sa satong presentasyon. Kaya, gibohon nindong pasohan na magin pamilyar sa lambang isyu. Sa siring, kamo an lubos na makakaaram kun ano an magugustohan kan saindong mga makakaolay.