An mga Banhi Dapat Baribian Tanganing Magtalubo
1. Ano an dapat baribian tanganing magtalubo?
1 An mga banhi na itinanom sa hardin dapat baribian tanganing magtalubo. Totoo man iyan kun dapit sa mga banhi nin katotoohan na itinanom sa puso nin mga tawo sa teritoryo niato. (1 Cor. 3:6) Dapat tang dalawon liwat asin baribian an piguratibong mga banhing ini na ginagamit an Tataramon nin Dios kun gusto niato na iyan magkagamot, magtalubo, asin magin maoswag.
2. Paano niato pupukawon an interes para sa sunod na pagdalaw?
2 Magbangon nin Hapot: Kun nag-aandam kamo nin presentasyon, taano ta dai man mag-andam nin nakakapukaw nin interes na hapot na puede nindong simbagon pagdalaw nindo liwat? Ibangon an hapot na iyan sa katapusan kan enot nindong pag-oolay, asin gumibo nin depinidong mga areglo na magbalik. Para sa dakol, nagin kapakipakinabang an pagpili nin hapot hale sa librong Itinotokdo kan Biblia na magagamit ninda sa pagdemonstrar nin pag-adal sa Biblia.
3. Anong impormasyon an puedeng iiba sa rekord nindo dapit sa sarong interesado?
3 Gumibo nin Rekord: Pakatapos tolos kan enot na pagdalaw, magtao nin panahon na gumibo nin rekord. Isurat an ngaran asin adres kan nakaolay. Marahay man na isurat an petsa asin oras kan pag-oolay nindo, an pinag-olayan nindo, asin an literaturang ikinapasakamot nindo, kun igwa. Sinabi daw nia kun ano an relihion nia? May pamilya daw sia? Sinabi daw nia kun ano an saiyang mga pinagkakainteresan asin ikinakahadit? Makakatabang an siring na impormasyon tanganing ibagay an masurunod na ipapakipag-olay sa saiya. Isurat man nindo kun noarin an napagkaoyonan nindo na mabalik kamo asin an hapot na sisimbagon nindo.
4. Kun mapadapit sa pagkultibar nin interes, taano ta maninigo kitang magmaigot?
4 Magmaigot: Si Satanas dai mapondo sa paghihingoa nia na ‘kuanon an tataramon’ na itinanom sa puso nin saro. (Mar. 4:14, 15) Kun siring, dai sumuko kun nadedepisilan kamong manompongan giraray an interesado. Puede daw kamong magpadara sa saiya nin surat o magwalat nin nota sa pinto ninda? Sarong payunir an nakapoon nin pag-adal sa sarong babae sa may pinto alagad dai na nia ini nanompongan giraray sa harong, kaya sinuratan nia ini. Kan sa huri maabotan nia sa harong an babae, ipinahayag kaini na napahiro nanggad sia kan personal na interes na ipinaheling sa saiya. Mantang binabaribian niato an mga banhi nin katotoohan, maeeksperyensiahan niato an kagayagayahan na maheling sinda na nagtatalubo, nag-ooswag sa pagkamaygurang, asin ‘nagbubunga nin manolong polo, asin manganom na polo, patin mananggatos.’—Mar. 4:20.