Doseng Dahelan Kun Taano ta Naghuhulit
Taano ta naghuhulit asin nagtotokdo kita kan maogmang bareta? Iyan daw sa pangenot tanganing tabangan an mga sadiosan an puso sa dalan pasiring sa buhay? (Mat. 7:14) Iyan an primerong dahelan na sinambit digdi, alagad bako iyan an pangenot. Arin sa minasunod na 12 dahelan kun taano ta nakikikabtang sa ministeryo an sa paghona nindo iyo an pinakamahalaga?
1. Iyan nakakatabang na magligtas nin buhay.—Juan 17:3.
2. Iyan nagseserbing patanid sa mga maraot.—Eze. 3:18, 19.
3. Iyan nakakakontribwir sa kaotoban kan hula sa Biblia.—Mat. 24:14.
4. Iyan sarong kapahayagan kan katanosan nin Dios. Dai puedeng sahotan si Jehova na linaglag nia an mga maraot na dai nguna sinda tinatawan nin oportunidad na magsolsol.—Gui. 17:30, 31; 1 Tim. 2:3, 4.
5. Paagi kaiyan, nagigibo niato an satong obligasyon na magtao nin espirituwal na tabang sa mga tawo, na binakal paagi sa dugo ni Jesus.—Roma 1:14, 15.
6. Paagi kaiyan, malilikayan niato an pagkakasala sa dugo.—Gui. 20:26, 27.
7. Iyan sarong kahagadan tanganing maligtas kita.—Eze. 3:19; Roma 10:9, 10.
8. Ipinapahiling kaiyan an pagkamoot sa kapwa.—Mat. 22:39.
9. Ipinapahiling man kaiyan an satong pagkuyog ki Jehova asin sa saiyang Aki.—Mat. 28:19, 20.
10. Iyan kabtang kan satong pagsamba.—Heb. 13:15.
11. Iyan kapahayagan kan satong pagkamoot sa Dios.—1 Juan 5:3.
12. Iyan nakakatabang sa pagpakangbanal kan ngaran ni Jehova.—Isa. 43:10-12; Mat. 6:9.
Siempre, bako sana ini an mga dahelan kun taano ta kita nakikikabtang sa ministeryo. Halimbawa, an paghuhulit nakakapakosog sa satong pagtubod asin nagtatao man sa sato nin pribilehio na magin mga kapwa trabahador nin Dios. (1 Cor. 3:9) Minsan siring, an pinakamahalagang dahelan na makikabtang sa ministeryo iyo an ika-12 nasambit. Ano man an magin reaksion sa sato nin mga tawo, nakakatabang an ministeryo sa pagpakangbanal kan ngaran nin Dios asin nagtatao ki Jehova nin isisimbag sa nagduduhagi sa saiya. (Tal. 27:11) Tunay nanggad na igwa kita nin nakakamotibar na mga dahelan na ‘magpadagos na daing ontok sa pagtokdo asin pagpahayag kan maogmang bareta.’—Gui. 5:42, NW.