Tabangan an mga Tawo na Magdangog sa Dios
1. Anong mga brosyur an ilinuwas sa ‘Dumatong Logod an Kahadean nin Dios!’ na Pandistritong Kombension, asin paano iyan kapakipakinabang na mga kasangkapan?
1 Sa ‘Dumatong Logod an Kahadean nin Dios!’ na Pandistritong Kombension, duwang bagong brosyur an ilinuwas, an Magdangog sa Dios Asin Mabuhay nin Daing Katapusan asin an pinasimpleng bersion kaiyan na Listen to God. Huling kadikit sanang tataramon an ginamit dian, iyan marikas asin madaling ikakatradusir. Sa katunayan, kan iluwas sa Ingles an Magdangog sa Dios Asin Mabuhay nin Daing Katapusan inaprobaran nang itradusir iyan sa 431 lenguahe.
2. Sairisay an makikinabang sa mga brosyur na ini?
2 Sairisay partikularmente an makikinabang sa mga brosyur na ini? Estudyare an minasunod na mga situwasyon na parateng nangyayari sa bilog na kinaban:
• Sarong parahayag na nakikipag-olay sa kagharong, magsalang sa enot na pagsongko o sa pagdalaw liwat, an makakarisa na an kagharong dai tataong magbasa o maluyang magbasa.
• Sarong parahayag an naghuhulit sa mga tawong nagtataram nin lenguahe na pipira sanang publikasyon an ikinatradusir niato o mayo pa ngani. O an kadaklan sa teritoryo dai nakakabasa sa mismong lenguahe na ginagamit ninda.
• Sarong parahayag an naggagamit nin lenguaheng pasenyas tanganing maghulit sa mga pula sa teritoryo nia.
• Sarong magurang an nagmamawot na itokdo an katotoohan sa saiyang aking sadit na dai pa tataong magbasa.
3. Paano dinisenyo an Listen to God?
3 Kun Paano Iyan Dinisenyo: Kadikiton sanang tataramon an ginamit sa Listen to God, na sa pangkagabsan simple sanang sentence asin sarong sitadong teksto na yaon sa ibabang parte kan kada pahina, na nagtatampok kan pangenot na mga punto. Taano? Imahinara na inalok kamo nin brosyur na nakasurat sa lenguaheng dai nindo aram basahon, na tibaad igwa nin mga letrang dai nindo masabotan. Magigin interesado daw kamo dian, dawa ngani igwa iyan nin magagayon na ilustrasyon? Posibleng marhay na dai. Kaagid kaiyan, an mga dai tataong magbasa madalion madesganar sa mga publikasyon na igwa nin nakasurat na mga tataramon. Sa dahelan na iyan, hiling-hiling sa kada pahina an mga ilustrasyon na maingat an pagkagibo, na may mga arrow tanganing giyahan an pag-oolay hale sa sarong ilustrasyon pasiring sa sunod.
4. Paano dinisenyo an Magdangog sa Dios Asin Mabuhay nin Daing Katapusan?
4 Pareho an mga ilustrasyon sa Magdangog sa Dios Asin Mabuhay nin Daing Katapusan saka sa Listen to God. Dinisenyo ini para sa pagkondukta nin pag-adal sa mga limitado an abilidad sa pagbasa o sa mga nag-aadal magbasa. An brosyur na ini puede man gamiton bilang kopya kan paratokdo sa pagkondukta nin pag-adal sa saro sa brosyur na Listen to God. Sa itaas sa walang parte kan lambang duwang pahinang leksion, igwa nin hapot na sinisimbag sa mga pahinang iyan. Kaiba sa mga ilustrasyon an mga paliwanag asin sitadong mga teksto. Sa gilid kan parteng ibaba kan dakol sa mga pahina, igwa nin shaded na kahon na may dagdag na mga punto asin sitadong mga teksto na puedeng pag-olayan, depende sa kakayahan kan tinotokdoan.
5. Noarin asin paano niato puedeng ialok an mga brosyur na ini?
5 Kun Paano Iyan Gagamiton: Puede nindong ialok an arin man sa duwang brosyur sa paghuhulit sa harong-harong kun sa hiling nindo kapakipakinabang iyan, dawa bako an mga brosyur an alok para sa bulan na iyan. (Hilingon an kahon na “Kun Paano Iyan Puedeng Ialok.”) Puede nindong iintrodusir iyan sa pagdalaw liwat paagi sa pagsabi sana sa interesadong indibiduwal na may gusto kamong ipahiling sa saiya dangan iabot an brosyur.
6. Paano kita makondukta nin pag-adal sa Biblia na ginagamit an mga brosyur na ini?
6 Huling an Listen to God mayo nin imprentadong mga hapot, an pakikipag-olay bakong arog kan hapot-simbagan na ordinaryong ginigibo sa pag-adal kan librong Itinotokdo kan Biblia. Sa lambang kultura, an mga tawo naoogmang makadangog nin mga estorya. Kaya gamiton an mga ilustrasyon tanganing isaysay an ipinasabong na mga estorya na nakasurat sa Biblia. Ipaliwanag kun ano an iiniilustrar. Magin entusiastiko. Hapoton an tinotokdoan kun ano an nahihiling asin naiisip nia. Basahon an mga teksto sa ibaba kan pahina, asin mangatanosan sa saiya basado sa sinasabi kaiyan. Magpalataw nin mga hapot tanganing magpartisipar sia sa pag-oolay asin tanganing masierto na nasasabotan nia iyan. Kun ginagamit nia an Magdangog sa Dios Asin Mabuhay nin Daing Katapusan, basahon na magkaibanan an imprentadong mga paliwanag asin teksto kun pinag-oolayan an kada ilustrasyon.
7. Paano niato matatabangan na umoswag an satong tinotokdoan sa Biblia?
7 Tabangan an Tinotokdoan na Umoswag: Linalaoman niato na mapupukaw kan pag-oolay nindo an pagmawot kan saindong tinotokdoan na makanood magbasa tanganing sia mismo an magkua nin kaaraman dapit ki Jehova. (Mat. 5:3; Juan 17:3) Kun siring, kun Listen to God an ginagamit nindo sa pakikipag-olay, tibaad pag-abot nin panahon puede kamong mag-alok na tokdoan siang magbasa, asin puede nindong ibalyo an pag-adal sa Magdangog sa Dios Asin Mabuhay nin Daing Katapusan. Ano man na brosyur an gamiton nindo, an saindong tinotokdoan dai pa magigin andam para sa bautismo kun matapos nindo an brosyur. Maninigo nindong ibalyo an pag-adal sa librong Itinotokdo kan Biblia o sa saro pang angay na publikasyon na makakatao sa saiya nin mas lubos na pakasabot sa Biblia.
8. Taano ta nagpapasalamat kamo sa bagong mga kasangkapan na ini sa ministeryo?
8 An mga tawo dapat na magdangog sa Soberano kan uniberso kun gusto nindang mabuhay sagkod lamang. (Isa. 55:3) Asin an kabotan ni Jehova iyo na “an gabos na klase nin tawo,” kaiba an mga dai tataong magbasa, makanood kun paano magdangog sa saiya. (1 Tim. 2:3, 4, NW) Dakulaon nanggad an pasasalamat niato sa bagong mga kasangkapan na ini na magagamit niato sa pagtotokdo sa mga tawo kun paano magdangog sa Dios!
[Kahon sa pahina 3]
Kun Paano Iyan Puedeng Ialok
Ipahiling sa kagharong an pahina 2-3, asin sabihon: “Gusto mo daw mabuhay sa sarong kinaban na arog kaini? [Pasimbagon.] An Biblia nangangako [o, an banal na librong ini nangangako] na madali nang gibohon nin Dios an daga na magin sarong magayon asin matoninong na lugar kun saen mayo nang dukha o may helang. Hilingon nindo kun ano an dapat niatong gibohon tanganing makaistar dian. [Basahon an Isaias 55:3, na sinitar sa itaas kan pahina 3.] Sinasabi kaini sa sato na ‘dumolok sa’ Dios asin ‘magdangog’ sa saiya. Pero paano kita nagdadangog sa Dios?” Buksan an pahina 4-5 asin ipakipag-olay sa saiya an simbag. Kun dai sia puede sa oras na iyan, iwalat an brosyur sa saiya asin iareglo na bumalik asin ipakipag-olay an simbag.