Mga Ruta nin Magasin—Kapaki-pakinabang sa Pagpuon nin mga Pag-adal sa Bibliya
1. Taano ta haloy nang dinadagka kan organisasyon ni Jehova an mga parahayag na magkaigwa nin ruta sa magasin?
1 Dakul na tawo an habong makipag-adal sa sato sa Bibliya, pero gusto nindang magbasa kan mga magasin ta. Sa dahilan na iyan, haloy nang dinadagka kan organisasyon ni Jehova an mga parahayag na magkaigwa nin ruta sa magasin. Mantang regular na binabasa kan mga tawo an mga magasin ta, sa parati nagkakaigwa sinda nin pagmawot sa Tataramon nin Diyos. (1 Ped. 2:2) Pag-abot nin panahon, puwedeng mapukaw an saindang interes sa nababasa ninda, na magigin dahilan para mag-ako nin pag-adal sa Bibliya.
2. Paano ta mapapatalubo an interes kan satong mga ruta nin magasin?
2 ‘Baribian’ an Banhi nin Katotoohan: Imbes na basta sana itao sa kagharong an magasin, dagkahon siyang magtaram asin amiguhon siya. Matatabangan ka kaini na maaraman an saiyang kamugtakan, mga pinagkakainteresan, asin mga paniniwala, na magpapangyari sa saimo na magtaram na may pakarurop. (Tal. 16:23) Mag-andam sa kada pagdalaw. Kun posible, itampok sa halipot an sarong punto asin konektadong teksto sa mga magasin, na garo binabaribian an ano man na banhi nin katotoohan na nasa puso niya. (1 Cor. 3:6) Isurat an petsa kan kada pagdalaw, an literaturang naiwalat, asin an mga tema saka tekstong napag-ulayan.
3. Gurano kaparati kita maninigong bumalik para dalawon an satong mga ruta nin magasin?
3 Gurano Kaparati Kita Mabalik? Maninigo kang bumalik nin sarong beses kada bulan para darahan sinda nin pinakabagong mga magasin. Pero, puwede mo man sindang dalawon nin mas parati, depende sa saimong kamugtakan asin sa interes kan indibidwal. Halimbawa, saro o duwang semana pagkawalat mo kan mga magasin, puwede kang bumalik asin magsabing, “Naghapit ako para ipakipag-ulay an sarong bagay sa mga magasin na iwinalat ko sa saindo.” Sa paaging ini, gaganahan siyang basahon an artikulo. Pero kun nabasa na niya iyan, puwede mo siyang haputon kun ano an masasabi niya diyan asin pag-ulayan iyan sa halipot. O kun nauugma siyang magbasa kan mga literatura ta, puwede kang bumalik asin ialok sa saiya an tract, brosyur, o libro na alok ta sa bulan na iyan.
4. Sa pana-panahon, ano an puwede tang gibuhon para maaraman kun an satong mga ruta nin magasin gusto nang mag-adal sa Bibliya?
4 Dai paghalaton an kagharong na magpresentar na tukduan siya sa Bibliya. Magkaigwa nin inisyatiba. Dawa nagsayuma na siyang mag-adal sa Bibliya kan nakaagi, sa pana-panahon puwede mong ipakipag-ulay an “Simbag sa mga Hapot sa Bibliya” sa An Torrengbantayan asin aramon kun gusto niyang pag-ulayan iyan. Tibaad puwede kang makapuon nin pag-adal sa Bibliya sa may pinto nin harong. Pero, kun dai, padagos mo siyang darahan nin mga magasin tanganing mapatalubo an interes niya.