Pagpauswag kan Satong Kakayahan sa Ministeryo—Pagkaigwa nin Ruta nin Magasin

Kun Taano ta Mahalaga: Dakul na tawo na nawiwiling magbasa kan satong mga magasin an habong makipag-adal sa sato sa Bibliya. Tibaad kontento na sinda sa relihiyon ninda, o pagmati ninda dai sindang panahon na mag-adal. Minsan siring, mantang regular nindang binabasa an mga magasin ta, puwedeng magkaigwa sinda nin pagmawot sa Tataramon nin Diyos. (1 Ped. 2:2) Tibaad may artikulong makapahiro sa sainda o magbago an saindang kamugtakan. Paagi sa regular asin halipot na pagdalaw magigin mas pamugtak an buot ninda sa sato saka maaaraman ta man an mga pinagkakainteresan asin ikinakahadit ninda. Pag-abot nin panahon, tibaad makipag-adal na sinda sa Bibliya.

Kun Paano Gigibuhon:

Kada bulan, iiskedyul na matawan siya kan pinakabagong isyu kan An Torrengbantayan asin Awake! Tibaad puwede mo siyang dalawon sa ibang pagkakataon durante kan bulan para mas pukawon an interes niya na basahon an sarong artikulo sa mga magasin na iwinalat mo o para tawan siya kan publikasyon na alok sa bulan na iyan. Magkaigwa nin kumpletong rekord.—Hilingon an Enero 2014 na An Satong Ministeryo sa Kahadian, p. 3.
Mag-andam sa kada pagdalaw. Imbes na magwalat sana nin magasin, makipag-ulay sa kagharong asin hinguwahon na amiguhon siya para mapatalubo an interes niya.
Magin alisto sa mga oportunidad na makapuon nin pag-adal. Kun maghapot siya dapit sa sinasabi kan Bibliya sa sarong tema, darahan siya nin publikasyon na ginagamit sa pag-adal na igwa kan simbag, dangan pag-ulayan nindo iyan. Bago maghali, magwalat nin konektadong hapot asin simbagon iyan sa sunod na pagdalaw. Kun regular asin sistematiko an pakikipag-ulay mo, dawa halipot sana, gamit an Bibliya o saro sa mga publikasyon na ginagamit sa pag-adal, nagkokondukta ka na nin pag-adal sa Bibliya. Natawan mo na daw an kagharong kan brosyur na Maogmang Bareta asin naidemonstrar an halipot na pag-adal sa Bibliya? Naipahiling mo na daw sa saiya an videong Ta’no ta Kaipuhan Mag-adal nin Bibliya? asin Paano Ginigibo an Pag-adal sa Bibliya? Dawa nagsayuma na siya kaidto na mag-adal, nagbabago an mga kamugtakan. Puwede mo daw siyang alukan giraray?

Purbaran Ini Ngunyan na Bulan:

Ilista an puwede mong magin mga ruta nin magasin. Tawan sinda kan pinakabagong isyu kan mga magasin, asin sabihon na dadarahan mo sinda kan sunod na isyu.