“Pagsabwag kan Banhi kan Kahadean” sa mga Ruta sa Magasin
1 An Awit 133 sa Umawit nin mga Pag-omaw ki Jehova may temang “Pagsabwag kan Banhi kan Kahadean.” Iyan basado sa ilustrasyon ni Jesus na iinaagid an paggibo nin mga disipulo sa pagsabwag nin banhi. (Mat. 13:4-8, 19-23) An liriko kan awit nagsasabi: “An pagkasabwag sa dagang mataba/Parateng nasa satuya.” Paano niato mapaooswag an pagigin epektibo kan satong ministeryo? An sarong paagi iyo an pag-establisar asin pagmantener nin ruta sa magasin.
2 Nagkapirang obheto an puedeng magibo paagi sa ruta sa magasin. (1) An regular na mga pagdalaw kada duwang semana pinangyayari kamong makapatalubo nin pakikipagkatood sa interesado. (2) Padagos nindo siang nasusuplayan nin regular kan nagliligtas-buhay na impormasyon na yaon sa An Torrengbantayan asin Awake! (3) Paagi sa saindong mga pag-orolay puede nindo siang matabangan na magkaigwa nin pagmawot sa katotoohan sa Kasuratan, na puedeng magbunga nin pag-adal sa Biblia.—1 Ped. 2:2.
3 Kun Paano Makapopoon nin Ruta sa Magasin: Kun may magpaheling nin interes sa mga magasin, ipaliwanag na may marahayon na mga artikulo sa kada luwas asin na maoogma kamong ihatod iyan kada duwang semana. Pakahale, isurat an saiyang ngaran asin adres, an petsa kan pagsongko, an mga petsa kan mga luwas na ikinapasakamot, an artikulong itinampok, asin an mga tema na nangorognang interesante sa saiya.
4 Puede kamong makapoon nin ruta sa magasin sa pira sanang tawo na yaon dian. Dangan hingoahon na padakolon iyan paagi sa pagdagdag kan iba pang napapasakamotan nindo nin mga magasin. Mantang nagdadakol an saindong ruta sa magasin, puede nindong organisaron iyan sono sa teritoryo tanganing mas pasil iyan na makobrehan. Magkaigwa nin maingat na rekord kun arin na mga luwas an ikinapasakamot sa kada pagsongko asin kun kasuarin. Idagdag an mga nota manongod sa saindong mga pag-orolay asin dapit sa kun paano padagos na patataluboon an saiyang interes sa katotoohan sa masunod na pagdalaw.
5 Iiba an mga Nasa Lugar nin Negosyo Asin Propesyonal: Ipinaheling nin mga eksperyensia na an mga tindero asin iba pang propesyonal posibleng marhay na mag-ako nin regular kan satong mga magasin. An sarong magurang sa kongregasyon iiniba pa ngani an alkalde kan saiyang banwaan sa saiyang ruta sa magasin. An sarong parahayag nakapoon nin pag-adal sa 80 anyos na kagsadiri nin sarong kompanya nin materyales sa konstruksion pakapagparadara sa saiya nin mga magasin sa laog nin sampulong sunod-sunod na taon!
6 An sarong tugang na babae naglaog sa sarong tindahan asin nakaolay an sarong mag-agom na bakong gayo mainit an pag-ako sa saiya. Minsan siring, mantang inako ninda an mga magasin, nagdesisyon siang idagdag an mag-agom sa saiyang ruta sa magasin. Pag-abot nin panahon, boot na kan tugang na babae na umontok sa pagsongko huli ta bako nanggad sindang makikatood asin daing gayo nagtataram, dawa kun naghahapot sia nin hapot sa punto de vista. Alagad ipinamibi kan tugang na babae an bagay na iyan asin sa kahurihurihi nakapasakamot sa mag-agom kan librong Mabuhay Sagkod Lamang. Pakabasa kaiyan, nagkagsing an agom na babae: “Sa katapustapusi, nanompongan ko na an katotoohan!” Naponan an pag-adal sa Biblia, asin sa huri nabautismohan an mag-agom. An pagmamaigot kan payunir tunay nanggad na nagbunga nin marahay.
7 Paggibo nin mga Pagdalaw Liwat: Kun maresibi nindo an bagong magasin, basahon an gabos na artikulo. Humanap nin mga punto na makaaakit sa kada saro na nasa saindong ruta sa magasin. Dangan pagbalik nindo, puede nindong sabihon: “Mantang binabasa ko an artikulong ini, naisip ko kamo asin kun paano iyan puedeng magin interesante sa saindo.” An mga parahayag ano man an edad puedeng magkaigwa nin ruta sa magasin. Maski an sadit na aki puedeng magsabi: “Naoogma po akong makaolay giraray kamo. Nag-abot na po an pinakahuri nindong kopya kan An Torrengbantayan asin Awake! Iniisip ko pong magugustohan nindo an artikulong ini na may temang . . .”
8 Pukawon an pag-antisipar sa maabot na mga artikulo paagi sa pagdara kan atension sa kahon na may temang “Sa Masunod na Luwas.” Kun an mga artikulo isineserye, sabihon ini asin enkaminaron an parabasa na dai paglipasan an arin man na kabtang kaiyan. Dai paglingawan na sa kada paghatod nindo kan mga magasin sa saindong ruta sa magasin, puedeng magreport nin pagdalaw liwat. Asin orog sa gabos, girumdomon na an satong pasohan iyo na gibohon an mga pagsongkong ini na magin mga pag-adal sa Biblia sa harong.
9 Dalawon nin Regular an mga Nasa Saindong Ruta sa Magasin: Puede nindong kobrehan an saindong ruta sa magasin sa ano man na panahon na praktikal—sa aga sa laog nin semana, sa mga oras bago sumolnop an saldang, sa amay na banggi, o sa Sabado asin Domingo pakatapos na magharongharong. Kun dai nindo makobrehan an saindong ruta sa magasin huli sa paghelang o pagbakasyon, pakiolayan an sarong parahayag sa saindong pamilya o kongregasyon na ihatod an mga magasin para sa saindo. Paagi kaiyan, an mga nasa saindong ruta sa magasin dai mahuhuri sa pagresibi kan saindang mga magasin.
10 An sarong paagi na ikasabwag an banhi kan Kahadean iyo an regular na pagdara kan An Torrengbantayan asin Awake! sa gabos na nasa saindong ruta sa magasin. Mantang tinotokdoan nindo sinda kan katotoohan sa Kasuratan, puedeng masabotan ninda an tataramon kan Kahadean asin sa kahurihurihi magpaluwas kan bunga nin Kahadean kaiba nindo.—Mat. 13:8, 23.