Magayon na Disenyo Para sa Bagong mga Tract!
1. Anong mga pantabang sa ministeryo an may magayon na bagong disenyo?
1 Limang bagong tract an ilinuwas sa “An Tataramon nin Diyos Katotoohan!” na Pandistritong Kumbensiyon kan 2013. Idinagdag man sa serye nin mga tract an Kingdom News Num. 38, na may titulong “Puwede Daw Talagang Mabuhay an mga Gadan?” Magayon an bagong disenyo kan anom na tract na ini. Taano ta binago an disenyo? Pag iinaalok ta iyan sa pagharong-harong, paano ta magagamit na marhay an mga laog kaiyan?
2. Ano an katuyuhan kan bagong disenyo?
2 Kun Taano ta Binago an Disenyo: Sa epektibong mga presentasyon sa pagharong-harong, parating kaiba an apat na paaging ini: (1) Magbangon nin punto de vistang hapot tanganing makapuon nin pag-uulay. (2) Magsabi nin sarong punto hali sa Kasuratan. (3) Mag-alok nin literatura sa kagharong. (4) Magwalat nin sarong hapot na sisimbagon sa sunod, asin iareglo an pagdalaw liwat. An bagong disenyo kan mga tract nakakatabang sa sato na madaling masundan an gabos na ini.
3. Paano ta puwedeng ialok sa ministeryo an saro sa bagong mga tract?
3 Kun Paano Iyan Gagamiton: (1) Pakatapos na kumustahon an kagharong, ipahiling an interesanteng hapot na may pagpipilian na simbag na nasa atubangan kan tract, dangan hagadon an opinyon niya. (2) Buksan an tract, asin pag-ulayan an yaon sa “An Sabi kan Bibliya.” Basahon mismo sa Bibliya an teksto kun itinutugot kan kamugtakan. Kun may oras pa an kagharong, pag-ulayan an yaon sa “An mga Pakinabang Mo Diyan.” (3) Ialok an tract, asin dagkahon siya na basahon an iba pang laog kaiyan. (4) Bago maghali, ipahiling sa saiya an hapot sa ibaba kan “Pag-isipan” na nasa likod kan tract asin iareglo na pag-ulayan sa masunod an simbag kan Bibliya.
4. Kun may magpahiling nin interes, ano an puwede tang gibuhon sa sunod na pagdalaw?
4 Pasil man an pagdalaw liwat. Gamiton sana an sitadong mga teksto na nasa likod kan tract tanganing simbagon an iwinalat mong hapot. Bago maghali, itukdo an ritrato kan brosyur na Maogmang Bareta, ipahiling sa kagharong an brosyur asin an sinambit na leksiyon na nagtatao nin dagdag pang impormasyon dapit sa tema kan tract, dangan ialok an brosyur. Kun akuon, iareglo na pag-ulayan iyan sa sunod na pagdalaw. Nakapuon ka na nin pag-adal sa Bibliya! O imbes na ialok an brosyur, puwede kang mag-alok nin ibang tract asin sabihon na mabalik ka para pag-ulayan nindo iyan.
5. Taano ta mahalaga an mga tract sa satong ministeryo?
5 Labing 130 taon nang ginagamit sa satong ministeryo an mga tract. Maski ngani iba-iba an pagkadakula saka pagkadisenyo kaiyan, epektibong marhay iyan na pantabang sa paghuhulit. Lugod na gamiton tang marhay an bagong disenyong ini tanganing padagos na ikapaabot sa bilog na daga an kaaraman sa Bibliya.—Tal. 15:7a.