Gamiton an Satong Web Site sa Ministeryo​—“Simbag sa mga Hapot sa Bibliya”

Sa jw.org/bcl, mahihiling sa irarom kan seksiyon na “Tukdo kan Bibliya” an “Simbag sa mga Hapot sa Bibliya.” Kun pamilyar kita sa parating mga ihinahapot na ini, ikakatukdo ta sa mga naghahapot an simbag kan Bibliya hali sa satong Web site. Puwede man gamiton ini para makapuon nin pakikipag-ulay sa ministeryo. Puwede kitang pumili nin interesanteng hapot, hagadon an opinyon kan kagharong asin sabihon sa saiya an simbag kan Bibliya gamit an pangangatanusan na yaon sa jw.org/bcl. Dangan, puwede tang sabihon o ipahiling sa saiya kun sain ta nakua an impormasyon. O puwede ta man direktang ipabasa sa saiya an simbag na nasa Web site. Epektibong nagibo ini kan agom nin sarong nagbibiyaheng paraataman. Sinasabi niya: “Iniisip-isip nin dakul, ‘An Diyos daw an dapat basulon sa satong pagdusa?’ Gusto mong maaraman an simbag sa laog sana nin 51 segundo?” Dangan, ipinapadangog niya an audio kan simbag na pig-download niya sa saiyang mobile device. Bilang pantapos, iniintrodusir niya an kapitulo 11 kan librong Itinotokdo kan Bibliya.