Hapot

◼ Dapat daw na gamiton pirmi kan mga parahayag an Internet tanganing magpatotoo o magkondukta nin pag-adal sa sarong dai kamidbid na nakaistar sa ibang nasyon?

Ginagamit kan nagkapirang parahayag an Internet para magkaigwa nin mga tinutukduan sa Bibliya sa mga lugar na ipinagbabawal an satong gibuhon o dikit an mga parahayag. Sa nagkapirang kamugtakan, magayon an nagin resulta. Pero, igwa ini nin mga peligro kun an mga parahayag nakikipag-ulay paagi sa e-mail o chat room sa mga dai ninda kamidbid. (Hilingon An Satong Ministeryo sa Kahadean na Hulyo 2007, p. 3.) Minsan ngani an katuyuhan iyo na maipaabot sa mga tawong may sadiyosan na puso an mensahe kan Kahadian, puwede iyan magresulta sa pakikipag-ulay nin sarong brother o sister sa maraot na kairiba, pati sa mga apostata. (1 Cor. 1:19-25; Col. 2:8) Dugang pa, an komunikasyon sa mga nasyon na ipinagbabawal an gibuhon na pang-Kahadian tibaad sinusubaybayan kan mga awtoridad. Puwede ining ikapahamak kan mga tugang duman. Kun siring, dai dapat gamiton kan mga parahayag an Internet tangani sanang maghanap nin mga tawo na taga ibang nasyon para paabutan kan maugmang bareta.

Kun kita impormal na magpapatotoo sa sarong dai kamidbid na nagbibisita hali sa ibang nasyon, dai ta dapat hinguwahon na patalubuon an saiyang interes pagkabalik niya sa sainda apuwera kun may instruksiyon an lokal na sangang opisina. Imbes, puwede niyatong ipahiling sa saiya kun paano niya magagamit an jw.org para makakua nin dagdag na impormasyon o kun paano niya makokontak an sangang opisina duman sainda. Puwede man niyato siyang dagkahon na mag-atender sa Kingdom Hall na harani sa sainda. Siyempre sa nagkapirang nasyon mayo nin mga Kingdom Hall. Kun gusto niya na may magdalaw sa saiya na mga Saksi sa lugar ninda, dapat kitang mag-fill up nin Please Follow Up (S-43) form asin itao iyan sa sekretaryo, na iyo an mapadara kaiyan paagi sa jw.org. An sangang opisina na nangangataman sa gibuhon sa nasyon na iniistaran kan interesadong tawo an nakakaaram kan partikular na sitwasyon duman asin sinda an nasa pinakamarahay na kamugtakan na magtao nin espirituwal na tabang.​—Hilingon An Satong Ministeryo sa Kahadian na Hunyo 2014, p. 7, asin Nobyembre 2011, p. 2.

Kun an satong dinadalaw sa ngunyan maglipat sa ibang nasyon o kun igwa kitang tinutukduan sa Bibliya sa ngunyan na taga ibang nasyon na namidbid ta lang paagi sa Internet, dapat na sunudon niyato an nasabing instruksiyon. Pero, puwede pa man niyatong ipadagos na patalubuon an saiyang interes sagkod na makontak na siya kan mga parahayag sa lugar ninda. Minsan siring, kun siya nakaistar sa nasyon na ipinagbabawal an satong gibuhon, kaipuhan na mag-ingat na marhay kun nakikipag-ulay saiya sa Bibliya paagi sa surat, telepono, o elektronikong pamamaagi.—Mat. 10:16.