Pagpauswag kan Satong Kakayahan sa Ministeryo—Pagdalaw Liwat

KUN TAANO TA MAHALAGA: An dakul na nagpapahiling nin interes sa mensahe kan Kahadian naghahanap nin katotoohan manungod sa Diyos. (Isa 55:6) Tanganing padagos ta sindang matukduan, kaipuhan man na padagos ta sindang balikan. Iba-iba an mga kadipisilan na inaagihan kan mga tawo, kaya iba-iba man an pamamaagi ta sa pagpatalubo kan saindang interes. Pero magigin mas epektibo kita kun mag-aandam kitang marhay asin kun may pasuhan kita sa kada pagdalaw liwat, sagkod na makapuon kita nin pag-adal sa Bibliya.

KUN PAANO GIGIBUHON:

• Hinguwahon na makabalik tulos, tibaad pakalihis sana nin pirang aldaw.—Mat 13:19

• Magin mainamigo asin magalang. Hinguwahon na magin relaks sana

• Punan paagi sa maugmang pagtaong galang. Apudon sa pangaran an kagharong. Ipagirumdom sa saiya kun taano ta nagbalik ka—tibaad para simbagon an sarong hapot, tawan siya kan pinakabagong magasin, ipahiling an satong website, mag-play nin sarong video, o idemonstrar kun paano ginigibo an pag-adal sa Bibliya. Kun sa ibang tema siya interesado, ibagay diyan an saimong sasabihon.—Flp 2:4

• Baribion an banhi nin katotoohan na nakatanom sa saiyang puso paagi sa pagpaliwanag nin sarong punto hali sa Kasuratan o pagwalat nin literatura. (1Co 3:6) Hinguwahon na amiguhon siya

• Magwalat nin punto na pag-uulayan sa sunod na pagdalaw