Pagpauswag kan Satong Kakayahan sa Ministeryo—Pagtao nin Ideya Kun Ano an Pag-uulayan sa Pagdalaw Liwat

KUN TAANO TA MAHALAGA:

Gusto tang baribion an mga banhi nin katotoohan na itinatanom niyato. (1Co 3:6) Pag may nagpahiling nin interes, marahay na magwalat kita nin hapot na puwede tang ipakipag-ulay pagbalik niyato. Sa siring, aabangan niya ini asin mas mapapasimple an pagpreparar niyato para sa pagdalaw liwat. Sa pagbalik niyato, puwede tang sabihon na nagduman kita para simbagon an iwinalat tang hapot kan nakaaging pagdalaw niyato.

KUN PAANO GIGIBUHON:

• Pag nag-aandam nin presentasyon na gagamiton sa pagharong-harong, iiba an sarong hapot na sisimbagon mo sa sunod na pagdalaw. Puwede iyan na sarong hapot na sinisimbag sa publikasyon na iinaalok mo. O puwede man na an simbag kaiyan yaon sa saro sa mga publikasyon na ginagamit ta sa pagtutukdo sa Bibliya na pinaplano mong ialok sa saiya pagbalik mo.

• Sa pagtatapos kan pakikipag-ulay mo sa saro na nagpahiling nin interes, ipaaram sa saiya na gusto mong makaulay siya giraray dangan iwalat sa saiya an inandam mong hapot. Kun posible, aramon kun paano siya makokontak.

• Kun nagsabi ka na babalikan mo siya sa sarong espesipikong aldaw asin oras, utubon mo iyan.—Mat 5:37.