Magpayunir

Nagagamit ta sa madunong na paagi an satong kusog pag naggigibo kita nin espirituwal na mga pasuhan. (1Co 9:26) Nakakatabang sato an mga pasuhan para magamit ta sa pinakamarahay na paagi an panahon na natatada bago an katapusan kan sistemang ini. (Efe 5:15, 16) Sa panahon kan saindong pampamilyang pagsamba, taano ta dai maggibo nin mga pasuhan para sa maabot na bagong taon nin paglilingkod? Para matabangan ka, an isyung ini kan workbook sa pagtiripon igwa nin mga artikulo manungod sa nagkapirang pasuhan na puwede mong pag-isipan asin ipamibi.—San 1:5.

Halimbawa, sa pagtarabangan kan bilog na pamilya, puwede daw magregular payunir an kisiyera saro sa pamilya? Kun dai ka sigurado kun kaya mong maabot an kahagadan na oras, makipag-ulay sa mga payunir na kapareho mo an sitwasyon. (Tal 15:22) Tibaad puwede mong interbiyuhon an sarong payunir sa panahon kan saindong pampamilyang pagsamba. Dangan maggibo nin posibleng mga iskedyul. Kun nakapagpayunir ka na kaidto, pag-isipan kun itinutugot na giraray kan saimong kamugtakan na magibo iyan ngunyan.

Puwede daw na mag-auxillary payunir nin sarong bulan o labi pa an nagkapira sa saindong pamilya? Kun medyo nagluluya na an saimong kusog, puwede kang makapag-auxillary payunir paagi sa paggamit nin kadikit na panahon kada aldaw sa ministeryo. Kun limitado an panahon mo na maghulit sa laog kan semana dahil nagtatrabaho ka nin bilog na panahon o dahil nagkaklase ka, puwede kang pumili nin bulan na may holiday o may limang Sabado asin Domingo. Sa kalendaryo, markahan kun nuarin mo planong mag-auxiliary payunir asin maggibo nin iskedyul.—Tal 21:5.

HILINGON AN VIDEO NA MAGIN MAKUSOG AN BUOT NA . . . PAYUNIR, DANGAN SIMBAGON AN HAPOT NA INI:

• Ano an itinutukdo sato kan eksperyensiya ni Sister Aamand manungod sa mamumuton na pag-ataman ni Jehova sa mga naggigibo nin sakripisyo para makapagpayunir?