Kun Taano ta Nagpapadagos an Giyera Asin Ralaban
Sinasabi kan Bibliya an panginot na mga dahilan kan giyera saka ralaban asin kun taano ta padagos na nangyayari an mga iyan.
KASALAN
Linalang nin Diyos an inot tang mga magurang, si Adan asin Eva, uyon sa saiyang ladawan. (Genesis 1:27) Kaya natural sanang maipapahiling ninda an mga kuwalidad nin Diyos arog nin katuninungan asin pagkamuot. (1 Corinto 14:33; 1 Juan 4:8) Pero, dai sinunod ni Adan asin Eva an Diyos kaya nagkasala sinda. Huli kaiyan, gabos kita nagmana nin kasalan asin nagagadan. (Roma 5:12) Dahil sa satong minanang kasalan, igwa kita nin tendensiya na mag-isip nin maraot asin gumibo nin madahas na mga bagay.—Genesis 6:5; Marcos 7:21, 22.
GOBYERNO NIN TAWO
Dai kita linalang nin Diyos para pamahalaan an satong sadiri. Sinasabi kan Bibliya: “Bako para sa tawong naglalakaw dawa an giyahan an sadiring lakad niya.” (Jeremias 10:23) Huli kaiyan, dai biyong mahahali kan mga gobyerno nin tawo an giyera asin kadahasan.
SI SATANAS ASIN AN SAIYANG MGA DEMONYO
Sinasabi kan Bibliya na “an bilog na kinaban nasa kapangyarihan kan saro na maraot.” (1 Juan 5:19) An “saro na maraot” na iyan inaapod na Satanas na Diyablo, asin saro siyang paragadan. (Juan 8:44) Siya asin an iba pang maraot na espiritung mga linalang iyo an dai nahihiling na mga promotor nin giyera asin kadahasan.—Kapahayagan 12:9, 12.
Dai ta kayang halion an panginot na mga dahilan kan giyera asin kadahasan, pero kaya iyan gibuhon nin Diyos.