Kun Paano Tatapuson an Giyera Asin Ralaban

TATAPUSON NIN DIYOS AN MGA GOBYERNO NIN TAWO

Tatapuson nin Diyos an mga gobyerno nin tawo paagi sa inaapod kan Bibliya na giyera nin Armagedon.a (Kapahayagan 16:16) Sa panahon na iyan, titiripunon an “mga hadi sa bilog na daga” para “sa giyera kan dakulang aldaw kan Diyos na Makakamhan sa Gabos.” (Kapahayagan 16:14) An Armagedon iyo an giyera nin Diyos na matapos sa gabos na giyera.

Sasalidahan nin Diyos an mga gobyerno nin tawo kan saiyang Kahadian, o gobyerno, na mamamahala hali sa langit asin dai nuarin man malalaglag. (Daniel 2:44) Pinili nin Diyos an saiyang Aki, si Jesu-Cristo, na magin Hadi kaiyan. (Isaias 9:6, 7; Mateo 28:18) An gobyernong ini iyo an Kahadianb na itinukdo ni Jesus na ipamibi kan saiyang mga parasunod. (Mateo 6:9, 10) Magkakasararo an gabos na tawo sa enterong daga sa irarom kan sarong gobyerno na an Tagapamahala iyo si Jesus.

Bakong arog kan mga tawong tagapamahala, dai gagamiton ni Jesus an saiyang awtoridad para sa pansadiring interes. Huling patas siya asin mayo nin pinapalain, dai na mahahadit an siisay man na tibaad tratuhon siya nin bakong tama huling iba an saiyang lahi, nasyonalidad, o etnikong pinaghalian. (Isaias 11:3, 4) Dai na man ipapakipaglaban kan mga tawo an saindang mga deretso. Taano? Huling tatawan ni Jesus nin atensiyon an kapakanan kan lambang tawo. “Ililigtas niya an dukha na naghahagad nin tabang, siring man an hamak asin an siisay man na mayo nin paratabang. . . . Sa pang-aapi asin sa kadahasan ililigtas niya sinda.”—Salmo 72:12-14.

Hahalion kan Kahadian nin Diyos an gabos na armas sa daga. (Mikas 4:3) Hahalion man kaiyan an maraot na mga tawo na habong magpundo sa pakikilaban o gustong ipahamak an iba. (Salmo 37:9, 10) An gabos na tawo, lalaki man o babayi pati na an mga aki, makakamati na ligtas sinda sain man sinda sa kinaban.—Ezekiel 34:28.

Pag an gobyerno nin Diyos namamahala na sa daga, an gabos na tawo magkakaigwa na nin perpektong buhay. Hahalion kaiyan an mga problema na dahilan kan iriwal, arog kan pagtios, gutom, saka kawaran nin istaran. An gabos magkakaigwa nin abundang suplay nin masustansiyang kakanon asin komportableng istaran.—Salmo 72:16; Isaias 65:21-23.

Sa pamamahala kan Kahadian nin Diyos, hahalion an maraot na mga epekto kan giyera. Kaiba diyan bako sana an mga lugad sa pisikal kundi pati man an mental asin emosyonal na danyos sa mga tawo na resulta kan giyera. Dawa an mga nagkagaradan bubuhayon liwat digdi sa daga. (Isaias 25:8; 26:19; 35:5, 6) Magkakairibanan giraray an mga pamilya asin an maraot na mga pangyayari dahil sa giyera magigin parte na sana kan “mga dating bagay [na] nakalihis na.”—Kapahayagan 21:4.

HAHALION NIN DIYOS AN KASALAN

Pagkakasararuon kan Kahadian nin Diyos an gabos na tawo para sambahon an iyo sanang tunay na Diyos, si Jehovac, “an Diyos nin pagkamuot asin nin katuninungan.” (2 Corinto 13:11) Manunudan kan mga tawo kun paano iribang mamumuhay nin matuninong. (Isaias 2:3, 4; 11:9) An gabos na namumuhay kauyon kan saindang nanunudan mapapatalingkas sa epekto kan kasalan asin magigin nang perpekto.—Roma 8:20, 21.

LALAGLAGON NIN DIYOS SI SATANAS ASIN AN MGA DEMONYO

Lalaglagon kan Kahadian nin Diyos an mga promotor kan giyera, si Satanas asin an saiyang mga demonyo. (Kapahayagan 20:1-3, 10) Huling mayo na an saindang maraot na impluwensiya, “an katuninungan magigin abunda.”—Salmo 72:7.

Makakapagtiwala ka na magkakatotoo an ipinangako nin Diyos na tatapuson niya an giyera asin ralaban. Kayang-kaya niyang halion an giyera asin gustong-gusto na niyang gibuhon iyan.

• An Diyos igwa nin kadunungan asin kapangyarihan na kaipuhan para tapuson an giyera asin kadahasan. (Job 9:4) Bako nanggad imposible para saiya na gibuhon iyan.—Job 42:2.

• Namumundo an Diyos pag nahihiling niyang nagsasakit an mga tawo. (Isaias 63:9) “Ikinakaungis niya an siisay man na namumuot sa kadahasan.”—Salmo 11:5.

• Pirming inuutob nin Diyos an saiyang tataramon asin dai siya nagpuputik.—Isaias 55:10, 11; Tito 1:2.