“Mahalagang Marhay” Ka sa Paghiling ni Jehova!

1-2. Ano an makakatabang sa sato na magin sigurado na mahalagang marhay kita sa paghiling ni Jehova?

AN MGA lingkod ni Jehova mahalagang marhay sa saiya, pero igwang nagkapira sa sainda na hababa an paghiling sa sadiri ninda. Tibaad dahil sa trinatar sinda sa paaging garo baga mayo sindang halaga. Arog daw kaiyan an sitwasyon mo? Kun iyo, ano an makakatabang sa saimo na magin sigurado na mahalagang marhay ka sa paghiling ni Jehova?

² Tibaad makatabang sa saimo na pag-isipan an mga salaysay sa Bibliya na naghahayag kun ano an gusto ni Jehova na magin paghiling asin pagtratar sa mga tawo. An saiyang aki na si Jesus, trinatar an mga tawo nin may dignidad asin respeto. Paagi kaiyan, ipinahiling niya na pinapahalagahan nindang marhay kan saiyang Ama an mapakumbabang mga tawo na nakakamating bako sindang mahalaga. (Juan 5:19; Heb. 1:3) Sa artikulong ini, pag-uulayan ta: (1) kun paano tinabangan ni Jesus an mga tawo na masabutan na talagang mahalaga sinda asin (2) kun paano ta makukumbinsir an satong sadiri na talagang mahalagang marhay kita sa paghiling nin Diyos.​—Hag. 2:7.

KUN PAANO TINABANGAN NI JESUS AN MGA TAWO NA MASABUTAN NA MAHALAGA SINDA

3. Paano trinatar ni Jesus an mga taga Galilea na nagdurulok sa saiya para sa tabang?

³ Durante kan ikatulong pagbiyahe ni Jesus para maghulit sa Galilea, dakul na tawo sa lambang lugar na dinudumanan niya an nagdudurulok sa saiya para magdangog asin para mapaumayan an saindang mga kamatian. Sinabi ni Jesus na “naanitan sinda asin napabayaan arog nin mga karnero na daing pastor.” (Mat. 9:36; hilingon an mga study note.) An mga lider kan saindang relihiyon ibinibilang sindang bakong mahalaga huling grabe daa sinda kaignorante, inapod pa ngani sindang “mga tawong isinumpa.” (Juan 7:​47-49; study note) Alagad si Jesus, trinatar sinda nin may dignidad paagi sa pagtao sa sainda nin panahon para tukduan asin paumayan kan saindang mga hilang. (Mat. 9:35) Urog pa diyan, tanganing matabangan an dakul pa, sinanay niya an saiyang mga apostol na makikabtang sa gibuhon na paghuhulit asin tinawan sinda kan awtoridad na magpaumay nin mga hilang asin kamatian.​—Mat. 10:​5-8.

4. Ano an manunudan ta sa kun paano trinatar ni Jesus an mapakumbabang mga tawong nagdadangog sa saiya?

⁴ Paagi sa pagtratar nin may dignidad asin konsiderasyon sa mga nagdadangog sa saiya, ipinahiling ni Jesus na mahalagang marhay sa saiya asin sa saiyang Ama an mga tawong sa parati minemenos kan sosyedad. Kun naglilingkod ka ki Jehova alagad nagdududa ka kun baga mahalaga ka sa saiya, isip-isipon kun paano tinawan nin atensiyon ni Jesus an mapakumbabang mga tawo na gustong makanuod sa saiya. Makakatabang iyan sa saimo na masabutan kun gurano ka kahalaga sa paghiling ni Jehova.

5. Iladawan an sitwasyon kan babaying taga Galilea na nanuparan ni Jesus.

⁵ Bako lang mga grupo nin tawo an tinukduan asin tinabangan ni Jesus kundi pati man mga indibidwal. Halimbawa, durante kan saiyang ministeryo sa Galilea, may nanuparan si Jesus na sarong babayi na 12 taon nang pigdudugo. (Mar. 5:25) Sigun sa Katugunan, maati siya dahil sa hilang niya, asin magigin maati man an siisay man na magduta sa saiya. Posibleng marhay na huli kaiyan parati siyang nagsosolo-solo ta dai man siya puwedeng makiasosyar nin buwelo sa mga tawo. Apuwera kaiyan, dai man siya puwedeng makiibanan sa iba para magpartisipar sa mga okasyon asin mga selebrasyon na isinasagibo para sa pampublikong pagsamba. (Lev. 15:​19, 25) Daing duda na nagsasakit nin grabe an babaying ini bako lang sa pisikal kundi pati man sa emosyon.​—Mar. 5:26.

6. Paano naumayan an babaying pigdudugo?

⁶ Buot kan nagsasakit na marhay na babaying ini na paumayan siya ni Jesus. Pero dai siya direktang nagdulok ki Jesus. Taano? Tibaad nasusupog siyang marhay dahil sa kondisyon niya. O posibleng natatakot siya na tibaad pahalion siya ni Jesus dahil nagduman pa man giraray siya sa matawong lugar dawa maati siya. Kaya dinutan niya lang an pang-ibabaw na bado ni Jesus huling kumbinsido siya na maski paagi lang kaiyan mauumayan na siya. (Mar. 5:​27, 28) Binalusan an saiyang pagtubod—naumayan siya. Dangan naghapot si Jesus kun siisay an nagduta saiya, tapos nagtuga an babayi kan ginibo niya. Paano siya trinatar ni Jesus?

7. Paano trinatar ni Jesus an babaying nagsasakit nin grabe? (Marcos 5:34)

⁷ Trinatar ni Jesus an babayi nin may kabuutan asin respeto. Narisa niya na “natatakot saka nagtatakig” ini. (Mar. 5:33) Bilang pagkonsiderar sa namamatian kan babayi, mabuot na nagtaram si Jesus sa saiya asin pinakusog siya. Inapod niya pa ngani siyang “aking babayi”—sarong mapagpadangat na apod na dai lang basta nagpapahiling nin respeto kundi pati man nin kabuutan asin pagkamuot. (Basahon an Marcos 5:34 asin nota sa ibaba.) Sinasabi sa study note kan terminong iyan na ini “an solamenteng pagkakataon na direktang inapod ni Jesus na ‘aki’ [o ‘aking babayi’] an sarong babayi, tibaad dahil sa masakit na sitwasyon kaini asin dahil ‘nagtatakig’ ini sa takot.” Imahinara kun gurano nanggad kanaginhawahan an babayi! Kun nagtaram nin bakong mabuot si Jesus, siguradong makukulgan an buot kan babayi asin makokonsiyensiya nin grabe maski ngani tibaad narahay man an hilang kaini. Imbes, tinabangan siya ni Jesus na mahiling an sadiri niya sa kun ano talaga siya—sarong namumutan na marhay na aki nin sarong mamumuton na Ama sa langit.

8. Anong mga kadipisilan an napaatubang sa sarong sister sa Brazil?

⁸ Sa ngunyan, may mga lingkod man nin Diyos na igwa nin mga kamatian na puwedeng makaapektar sa saindang emosyon asin mamatian nindang mayo sindang halaga. Si Mariaa na sarong regular payunir sa Brazil ipinangaking mayong mga bitis saka walang kamot. Sinabi niya: “Pirmi akong pigbu-bully kan nag-eeskuwela pa ako dahil sa diperensiya ko sa pisikal. Nakakakulog an mga ibinabansag ninda sako. Pati ngani sadiri kong pamilya may mga pagkakataon na trinato ako nin may diskriminasyon.”

9. Ano an nakatabang ki Maria na mahiling na mahalagang marhay siya ki Jehova?

⁹ Ano an nakatabang ki Maria? Kan siya magin Saksi ni Jehova, rinanga siya kan mga kapwa niya Kristiyano saka tinabangan na hilingon an sadiri niya arog kan paghiling sa saiya ni Jehova. Sinabi niya: “Kulang an mga pahina kan notebook ko para isurat an gabos na nagtabang sa sako! Bilog na puso akong nagpapasalamat ki Jehova sa pagtao sa sako nin marahayon na espirituwal na pamilya.” Tinabangan si Maria kan saiyang mga tugang sa espirituwal na mamatian na mahalagang marhay siya sa paghiling nin Diyos.

10. Anong mga kadipisilan an nagpasakit na marhay ki Maria Magdalena? (Hilingon man an mga ritrato.)

¹⁰ Pag-isipan kun paano tinabangan ni Jesus an saro pang indibidwal—si Maria Magdalena. Sinaniban siya nin pitong demonyo! (Luc. 8:2) Posibleng marhay na kakaiba asin bakong normal an mga iginagawi niya huling nasa kontrol siya kan mga demonyo asin, bilang resulta, rinarayuan siya kan iba. Durante kan miserableng panahon na iyan sa saiyang buhay, posibleng marhay na namatian niyang isinisikwal siya kan mga tawo, mayong nagpapadangat sa saiya, asin na mayong makakatabang sa saiya. Minalataw na pinalayas ni Jesus an mga demonyong nagpapasakit na marhay sa babaying ini, asin nagin ining maimbod na disipulo niya. Sa ano pang paagi tinabangan ni Jesus si Maria Magdalena tanganing masabutan niya na mahalagang marhay siya sa Diyos?

11. Paano ipinahiling ni Jesus ki Maria Magdalena na mahalaga siyang marhay sa Diyos? (Hilingon an mga ritrato.)

¹¹ Inimbitaran ni Jesus si Maria Magdalena na umiba sa saiya sa paglibot sa mga baryo para maghulit.b Bilang resulta, padagos siyang nakinabang mantang nadadangog niya si Jesus na nagtutukdo sa iba. Nagpahiling man sa saiya si Jesus kan mismong aldaw na binuhay liwat ini. Saro siya sa inot na mga disipulo na kinaulay ni Jesus kan aldaw na idto. Inasignaran pa ngani siya ni Jesus na baretaan an saiyang mga apostol na binuhay na siya liwat. Pambihirang mga indikasyon nanggad iyan na talagang mahalaga siyang marhay ki Jehova!—Juan 20:​11-18.

12. Ipaliwanag kun paano nagin dahilan an dinakulaan na pamilya ni Lidia na mamatian niyang dai siya angay na mamutan.

¹² Arog ki Maria Magdalena, dakul man ngunyan an nagsasakit dahil namamatian nindang dai sinda angay na mamutan o na mayo sindang halaga. Si Lidia na sarong sister sa Espanya nag-istorya na kan ipinagbabados pa lang siya pigplano kan saiyang ina na ipalaglag siya. Nagigirumduman ni Lidia na dawa kaidtong akion pa siyang marhay, pinapabayaan siya kan saiyang ina saka pigpaparataraman nin makukulog. Sinabi niya: “Mayo na akong ibang gusto sa buhay kundi an akuon saka mamutan nin mga tawo. Kaya lang, natatakot ako dahil iniisip kong maski ano an gibuhon ko nungka iyan na mangyayari huling napaniwala na ako ni Mama na maraot akong tawo.”

13. Ano an nakatabang ki Lidia na masabutan na mahalagang marhay siya ki Jehova?

¹³ Pagkatapos na maaraman an katotoohan, nakatabang ki Lidia an personal na pagpamibi pati man an kabuutan na ipinapahiling sa saiya kan mga tugang paagi sa tataramon asin gibo tanganing masabutan niyang mahalagang marhay siya sa paghiling ni Jehova. Sinabi niya: “Parati sakong sinasabi ni agom kun gurano niya ako kanamumutan. Pirmi niya sakong ipinapagirumdom an magagayon kong kuwalidad. Iyan man an ginigibo kan iba ko pang namumutan na mga amigo.” May naiisip ka daw na indibidwal na nangangaipo nin tabang tanganing masabutan niya kun gurano siya kahalaga sa paghiling ni Jehova?

KUN PAANO HIHILINGON AN SATONG SADIRI AROG KAN PAGHILING SA SATO NI JEHOVA

14. Paano kita tinatabangan kan 1 Samuel 16:7 na hilingon an satong sadiri arog kan paghiling sa sato ni Jehova? (Hilingon an kahon na “Taano ta Pinapahalagahan ni Jehova an Saiyang mga Lingkod?”)

¹⁴ Tandaan na an paghiling sa saimo ni Jehova bakong arog kan paghiling sa saimo kan kinaban. (Basahon an 1 Samuel 16:7.) An saimong halaga dai niya ibinabasar sa itsura mo, estado sa buhay, o inadalan. (Isa. 55:​8, 9) Kaya imbes na ibasar an halaga mo sigun sa mga pamantayan kan kinaban, ibasar mo iyan sigun sa mga pamantayan ni Jehova. Puwede mong basahon an mga salaysay sa Bibliya na nagpapahiling na pinapahalagahan ni Jehova an mga indibidwal na nagduda kaidto kun baga mahalaga sinda sa saiya, arog ni Elias, Noemi, asin Hana. Puwede mo man na isurat an mga pangyayari sa buhay mo na nagpapatunay na talagang namumutan asin pinapahalagahan ka ni Jehova. Apuwera kaiyan, puwede ka man magbasa sa mga publikasyon ta nin mga tema manungod sa paghiling ta sa satong sadiri asin sa paghiling sa sato ni Jehova.c

15. Taano ta para ki Jehova sarong “lalaking mahalagang marhay” si Daniel? (Daniel 9:23)

¹⁵ Isaisip na mahalaga ka ki Jehova dahil maimbod ka sa saiya. May panahon kaidto—posibleng kan madali nang mag-100 anyos si propeta Daniel—na nakamati siya nin grabeng ‘kapagalan’ asin pangluluya. (Dan. 9:​20, 21) Paano siya pinakusog ni Jehova? Isinugo nin Diyos an anghel na si Gabriel tanganing ipagirumdom ki Daniel na “saro [siyang] lalaking mahalagang marhay” asin na dinangog kan Diyos an saiyang mga pamibi. (Basahon an Daniel 9:23.) Taano ta mahalagang marhay si Daniel sa paghiling nin Diyos? Huli iyan sa saiyang kaimbudan asin sa pagkamuot niya sa katanusan, apuwera pa sa dakul niya pang ibang kuwalidad. (Ezek. 14:14) Iningatan ni Jehova sa saiyang Tataramon an salaysay na ini tanganing maranga kita. (Roma 15:4) Dinadangog man ni Jehova an saimong mga pamibi asin pinapahalagahan ka niya dahil sa pagkamuot mo sa katanusan asin sa maimbod mong paglilingkod sa saiya.​—Mik. 6:​8, mga nota sa ibaba; Heb. 6:10.

16. Ano an makakatabang sa saimo na mansayon si Jehova bilang mamumuton na Ama?

¹⁶ Mansayon si Jehova bilang Ama na namumutan ka. An gusto niya tabangan ka, bakong hanapan nin sala. (Sal. 130:3; Mat. 7:11; Luc. 12:​6, 7) An paghurop-hurop sa katotoohan na ini nakatabang sa dakul na may hababang paghiling sa sadiri. Halimbawa, pag-isipan an sister sa Espanya na an pangaran Michelle. Huli sa dakul na taon na pagparataram sa saiya kan saiyang agom nin mapang-abusong mga tataramon, namatian niyang dai siya namumutan asin na mayo siyang serbi. Sinabi niya, “Sa kada namamatian kong dai akong serbi, hinihinguwa kong imahinaron na kurukarga ako ni Jehova sa saiyang mga takyag asin pinapahilingan nin pagkamuot saka pinoprotektaran.” (Sal. 28:9) An sister na si Lauren, na taga Timog Aprika, ipinapagirumdom sa sadiri niya, “May kabuutan akong irinani ni Jehova sa saiya paagi sa mga pisi nin pagkamuot, pinagdanay niya akong harani sa saiya sa naglihis na mga taon, asin ginamit niya pa ngani para tukduan an iba, kaya siguradong para sa saiya mahalaga ako saka kapaki-pakinabang.”​—Os. 11:4.

17. Ano an makakatabang sa saimo na magin kumbinsido na inuuyunan ka ni Jehova? (Salmo 5:12) (Hilingon man an ritrato.)

¹⁷ Magin kumbinsido na inuuyunan ka ni Jehova. (Basahon an Salmo 5:12.) Iinagid ni David an pag-uyon ni Jehova sa “dakulang kalasag” na nagpoprotektar sa mga matanos. An pakaaram na inuuyunan asin sinusuportaran ka ni Jehova makakaprotektar sa saimo tanganing dai ka mapangibabawan nin mga pagduda manungod sa saimong halaga. Paano mo maaaraman kun baga inuuyunan ka ni Jehova? Arog kan naaraman ta, inaasigurar sa saimo ni Jehova paagi kan saiyang Tataramon na inuuyunan ka niya. Apuwera kaiyan, ginagamit niya an mga elder, dayupot na mga amigo, saka an iba pa tanganing ipagirumdom sa saimo na mahalagang marhay ka sa paghiling niya. Ano an dapat na magin reaksiyon mo sa siring na mga pampakusog?

18. Taano ta dapat mong akuon an komendasyon sa saimo kan iba?

¹⁸ Kun tinatawan ka nin sinserong komendasyon kan mga tawong nakakamidbid sa saimo asin namumutan ka, dai iyan pagsayumahan imbes akuon iyan. Isaisip na tibaad ginagamit sinda ni Jehova tanganing tabangan kang magin kumbinsido na inuuyunan ka niya. Si Michelle na sinambit kasubago nagsabi: “Padikit-dikit, nanunudan kong akuon sa sakuyang puso an mabuot na mga sinasabi sa sako kan iba. Nasasakitan akong magtubod diyan, pero aram ko na ini an buot ni Jehova na gibuhon ko.” Nakinabang si Michelle sa mamumuton na mga paghihinguwa kan mga elder. Asin ngunyan naglilingkod siya bilang payunir saka remote volunteer sa Bethel.

19. Taano ta makakapagtiwala ka na mahalagang marhay ka sa paghiling nin Diyos?

¹⁹ Mabuot na ipinapagirumdom sa sato ni Jesus na mahalagang marhay kita sa satong Ama sa langit. (Luc. 12:24) Kaya makakapagtiwala kita na talagang arog kaiyan an paghiling sa sato ni Jehova. Lugod na nungka niyatong paglingawan iyan! Asin lugod na gibuhon niyato an satuyang pinakamakakaya para tabangan an iba na masabutan na mahalagang marhay sinda sa paghiling nin Diyos!