Mga Misyonero “Sagkod sa Pinakaharayong Parte kan Daga”

Sinabi ni Jesus sa saiyang mga disipulo: “Magigin mga saksi ko kamo . . . sagkod sa pinakaharayong parte kan daga.” (Gibo 1:8) Maigot na inuutob ngunyan kan mga Saksi ni Jehova an sugong iyan. Pero may mga parte kan daga, kaiba na an ibang mahiwas saka matawong mga lugar, an dai pa lubos na napapatotoohan. May mga nasyon man na dikit sana an mga Saksi. (Mateo 9:37, 38) Ano an ginigibo mi para mapatotoohan an pinakadakul na tawong posible?

Tanganing magibo an pagbuot ni Jesus, an Service Committee kan Namamahalang Grupo kan Mga Saksi ni Jehova nag-aasignar nin mga misyonero sa mga lugar na nangangaipo nin mas dakul na parahayag. Sa ngunyan, igwa nin 3,090 misyonero sa bilog na kinaban.a An kadaklan sa sainda nag-ako nin pagsasanay sa sarong teokratikong paadalan, arog kan School for Kingdom Evangelizers. Handang bayaan kan mga misyonero an saindang harong asin magbalyo sa ibang mga nasyon. Dahil sa saindang pagkamaygurang, pagsasanay, asin eksperyensiya, an maimbod na mga misyonerong ini nakatabang sa pagpalakop kan maugmang bareta asin nagin marahay na halimbawa sa bagong mga disipulo.

Pagtabang sa mga Misyonero na Makatabang sa Iba

Sa kada sangang opisina, an Field Ministers Desk kan Service Department nakikipagtabangan sa Komite kan Sangay sa pag-asikaso kan mga pangangaipo kan mga misyonero, arog nin simpleng dagusan, health care, saka dikit na allowance para saindang panggastos. Kan 2020 taon nin paglilingkod, haros 27 milyon na dolyar an ginastos kan Mga Saksi ni Jehova sa pag-asikaso sa mga pangangaipo kan mga misyonero. Dahil sa tabang na ini na naaako ninda, naipopokus kan mga misyonero an saindang bilog na atensiyon saka kusog sa ministeryo, pati man sa pagpakusog sa saindang kongregasyon.

Paano nakatabang an mga misyonero sa gibuhon na paghuhulit? Si Frank Madsen, na miyembro kan Komite kan Sangay kan Malawi, nagsabi: “Dahil sa saindang kusog nin buot asin kasanayan, natabangan kan mga misyonero an mga kongregasyon na mapunan na makobrehan an mga teritoryo na masakit mapatotoohan, arog kan mga komunidad na mahigpit an seguridad saka mga lugar na dakul an nagtataram nin ibang lengguwahe. An pagmamaigot man ninda na manudan an lokal na lengguwahe saka kultura nagin marahayon na halimbawa sa iba, asin marahay sindang impluwensiya sa mga hoben kun manungod sa paglaog sa bilog na panahon na paglilingkod. Ipinagpapasalamat mi ki Jehova an mga misyonero.”

Sarong miyembro kan Komite kan Sangay sa saro pang nasyon an nagsabi: “Patunay an mga misyonero na nagkakasararo an mga lingkod ni Jehova sa bilog na kinaban. Hiling-hiling dawa kan bakong mga Saksi na maski ngani iba-iba an satong kultura, an mga katukduan kan Bibliya nakatabang sato na magkasararo bilang magturugang.”

Paano tinatabangan kan mga misyonero an lokal na mga parahayag? Si Paulo, na taga Timor-Leste, pinapahalagahan na marhay an mga misyonerong ipinadara sa saindang kongregasyon. Sinabi niya: “Mainiton na marhay sa lugar mi. Pero dawa ngani an mga misyonerong nakaasignar samo hali sa mga lugar na malipot an klima, dai iyan nakaulang sainda sa paghuhulit. Pirmi sindang yaon sa mga pagtiripon bago maglingkod sa langtad na ginigibo pag aga. Parati ko sindang nahihiling na nagdadalaw liwat sa bilog na maghapon, dawa pa mainiton, asin pati man sa banggi. Dakulon sindang natabangan na manudan an katotoohan, kaiba na ako. Ginagamit ninda an saindang bilog na buhay sa maigot na paglilingkod ki Jehova, asin napapakusog kaiyan an bilog na kongregasyon na mas lubos pang maglingkod sa saiya.”

Si Ketti, na regular payunir sa Malawi, nag-istorya kun paano tinabangan kan mag-agom na misyonero an saiyang pamilya: “Kan may iasignar na mag-agom na misyonero sa kongregasyon mi, ako lang an Saksi sa pamilya. Pero tinabangan akong marhay kan mag-agom, asin nagin close sindang marhay sa pamilya mi. An marahayon nindang halimbawa nakatabang sa mga aki ko na mahiling na nakakaugma asin nakakakontento an paglilingkod ki Jehova. Huli sa marahayon na impluwensiya kan mga misyonero, an tulo kong aking babayi naglilingkod na bilang mga regular payunir saka nagpuon na man na mag-atender sa mga pagtiripon an agom ko.”

Paano sinusuportaran an gastos na ginagamit sa pag-asikaso sa mga pangangaipo kan mga misyonero? Paagi sa mga donasyon sa pambilog na kinaban na gibuhon. An kadaklan sa mga donasyon na iyan nareresibi sa mga paaging mahihiling sa donate.jw.org. An bulaos na mga donasyon na iyan pinapahalagahan na marhay.