Mga Green Initiative na Nakakatabang sa Satong mga Tugang Saka sa Planeta

Bilang mga Saksi ni Jehova, aram ta na madali nang maghiro an Diyos na Jehova para iligtas an satong planeta sa pagkaraot na gibo kan katawuhan. (Kapahayagan 11:18) Pero dawa arog kaiyan, ginigibo ta man an satong makakaya para atamanon an satong planeta. Halimbawa, dakul kitang ginigibo na mga green initiative sa satong mga pasilidad.

An mga green initiative, o mga green solution, nanunungod sa mga proyektong ginigibo sa mga paagi na dai gayong nakakaapektar sa kapalibutan. Anong mga green initiative an nagibo ta na? Asin paano nakatabang an mga ini para magamit ta sa madunong na paagi an mga donasyon?

Mapreskong Solusyon Para sa Sarong Assembly Hall

Kan inot, an Matola Assembly Hall sa Mozambique mayong mga lanob asin sim sana an atop. Naglalagbas sa atop an init kan saldang, kaya nagigin mainiton sa laog kan awditoryum. Sinabi kan sarong brother duman: “Ginagaranot kami sa init! Pagkatapos kan programa, minaruluwas tulos an mga tugang para magpaduros saka magpapresko.” Paano niyato magigibong magin mas komportable an Assembly Hall para makapokus an satong mga tugang?

Sarong green solution an napagdesisyunan: magbugtak nin mga exhaust fan na pinapadalagan nin duros, pati nin insulasyon. Nababawasan an init na minalagbas sa atop paagi sa insulasyon, asin nagkakaigwa nin preskong duros huli sa mga exhaust fan. Dai kaipuhan nin kuryente para magamit an mga exhaust fan kundi duros an nagpapadalagan sa mga iyan. Paagi kaiyan, nahihigop paluwas an mainit na aire sa laog kan awditoryum. An kada saro sa mga exhaust fan na iyan nagkakantidad nin mga $50.a

Nakatabang na marhay an ginibong solusyon na ini para magin mapresko sa laog kan Assembly Hall. Dahil dagos-dagos na nasasalidahan an aire, dai nang gayo nagkakaigwa nin alumaad (moisture) asin alamag sa laog. Dai na man gayong natitipon an carbon dioxide saka mas marahay na an sirkulasyon kan oxygen. Bilang resulta, mas nakakapokus asin mas komportable na an mga nag-aatender. Sinabi kan brother na sinambit kasubago: “Ngunyan, dai na kami naghihidali na magluwas pagkatapos tulos kan programa. Imbes, pag lunch break, yaon lang kami sa laog kan awditoryum saka nakikipag-istoryahan. Dahil sa bagong atop, pagmati mi garo kami nakatukaw sa irarom nin sarong dakulang kahoy!”

Paggamit nin Dai Nauubos na Enerhiya

Naglaag kita nin mga photovoltaic (PV) system sa dakul tang pasilidad sa bilog na kinaban. Naggagamit an mga iyan nin mga solar panel para gibuhon na kuryente an enerhiya na hali sa saldang—sarong gikanan nin dai nauubos na enerhiya. Bilang resulta, dai kita gayong nagdedepende sa kuryente na napoprodusir hali sa mga fossil fuel (karbon, krudo, asin gas), na mas grabe an epekto sa kapalibutan. Mas nakakatipid man kita dahil sa mga PV system.

Kan 2022, linagan nin sarong PV system an sangang opisina sa Slovenia. Hali diyan an 30 porsiyento kan kuryente na ginagamit kan pasilidad. Kun an kuryente na napoprodusir kaiyan labi sa kaipuhan kan pasilidad, an sobrang kuryente puwedeng ipagamit sa power network kan lokal na komunidad. An PV system na ini nagkakantidad nin $360,000. Pero, mababawi man sa laog nin apat na taon an ginastos para diyan dahil sa mas hababang bayadan sa kuryente.

Kan 2024, linagan ta nin mga PV panel saka sarong dakulang bateriya an sangang opisina sa Sri Lanka. An proyektong iyan nagkakantidad nin mga $3 milyon asin hali diyan an 70 porsiyento kan kuryente na ginagamit kan pasilidad. Pero mababawi man an ginastos diyan sa laog nin tulong taon. Kan taon man na iyan, linagan ta man nin PV system an sangang opisina sa Netherlands. Hali diyan an 35 porsiyento kan kuryente na ginagamit kan pasilidad. An PV system na ini nagkakantidad nin $1.1 milyon, pero mababawi man iyan sa laog nin siyam na taon.

Naglaag man kita nin mga PV system sa manlain-lain na remote translation office (RTO) sa Mexico. An sarong halimbawa iyo an Tarahumara (Central) RTO na nasa Chihuahua. Pag tiglipot, an temperatura puwedeng magin mas hababa pa sa 0 degrees Celsius, asin pag tig-init, puwede iyan na umabot nin labi pa sa 40 degrees Celsius! Pero dahil mahal an kuryente, sagkod sa mapupuwede, dai naggamit an mga tugang duman nin mga heating saka cooling system. Si Jonathan, na naglilingkod duman, nagsabi: “Naggagamit kami nin mga tamong saka mahibog na mga bado pag tiglipot tapos pigbubukasan mi an mga bintana pag tig-init.”

Kan 2024, linagan nin PV system an RTO. Nagkakantidad ini nin $21,480, pero mababawi man iyan sa laog nin limang taon. Mas parati nang magagamit ngunyan kan satong mga tugang an mga heating saka cooling system. Sinabi ni Jonathan: “Nadagdagan an kaugmahan mi sa paglilingkod saka mas dakul na an nagigibo mi ngunyan. Maugma man kami ta aram ming nagagamit sa madunong na paagi an pondo kan organisasyon saka sa paaging dai gayong nakakaapektar sa kapalibutan.”

Paggamit kan Tubig-uran

Sa Africa, problema sa nagkapirang Kingdom Hall an suplay nin tubig. Huli kaiyan, kaipuhan kan mga tugang na magkua nin tubig hali sa harayong lugar asin darahon iyan sa Kingdom Hall. Sa ibang lugar, an mga tugang nagbabakal nin tubig na ihinahatod nin trak sa mga Kingdom Hall, pero mahal ini asin nakakaapektar sa kapalibutan.

Tanganing magkaigwa nin suplay nin tubig an satong mga tugang, linagan ta nin mga sagurong asin nin darakulang tangke nin tubig an dakul na Kingdom Hall sa Africa. Bago ninda iyan ginibo, pinag-adalan kan mga tugang an panahon asin klima sa mga lugar na iyan para maaraman an pinakaepektibong paagi nin pagtipon nin tubig para sa Kingdom Hall. An paglaag kan mga ini sa sarong Kingdom Hall nagkakantidad nin mga $600 sagkod $3,000. Pero, nakakatabang man ini sa parati na mabawasan an mga gastusan sa mga Kingdom Hall huling dai na kaipuhan kan mga tugang na magbayad para sa tubig.

Nakinabang digdi an satong mga tugang. Si Noemia, sarong sister sa Mozambique, nagsabi: “Dati, harayuon na marhay an pigdudumanan mi para makakua nin tubig. Kaya pagal-pagal na kami pag-abot mi sa Kingdom Hall. Saka dahil kulang an suplay nin tubig kaidto, dipisil para samo na mapagdanay an personal na kalinigan. Ngunyan, gabos kami nakakahanaw na nin kamot. Bako na kaming pagal-pagal pag-abot sa Kingdom Hall saka mas nae-enjoy mi na an pagtiripon. Salamat na marhay!”

Sain hali an pondo na ginagamit para sa mga proyektong ini? Sa mga donasyon sa pambilog na kinaban na gibuhon, na dakul diyan ipinadara paagi sa manlain-lain na pamamaaging mahihiling sa donate.jw.org. Salamat sa bukas-palad nindong mga donasyon!