Padagos na Magsabing “Madia!” sa mga Gustong Maghinanyog
1 Idinoon ni Jesus an pangangaipo na an tawo atentong maghinanyog sa mensahe kan katotoohan. (Mat. 11:15; 13:9, 43) Aram nia na mahalaga para sa sainda na masabotan an saiyang katokdoan, ta sia nagtatao nin kaaraman na puwedeng gumiya pasiring sa buhay na daing sagkod.—Juan 17:3.
2 An nagtataong-buhay na kaaraman na iyan mahalagang kabtang kan “tubig nin buhay” na ngonyan itinatao sa mga napapaha. (Kap. 22:17) An gabos na napapaha ngonyan sa katanosan kaipuhan na madagka na aprobetsaran an libreng balaog na ini ni Jehova. (Isa. 55:1) Kabilang daw kamo sa minilyon ngonyan na nagsasabing, “Madia!” sa mga gustong maghinanyog?
PAANO KAMOMAKASASABING, “MADIA!”
3 An Mayo iyo an ikaduwang bulan sa satong kampanya sa suskripsion sa Watchtower. Anong instrumento an maorog pa digdi para sa pag-apod nin atension sa makangangalas na probisyon ni Jehova para sa buhay? An The Watchtower makatatabang sa dakol na makatalingkas sa relihiyosong mga superstisyon asin kaputikan. Ano an mga oportunidad nindo na ialok an suskripsion sa Watchtower?
4 An marahay na paagi na ialok an suskripsion iyo an pagharongharong. Pero igwa man nin pira pang ibang paagi, arog baga kun minadalaw liwat o naghahatod nin bagong isyu sa mga nasa saindong ruta sa magasin. An ibang parahayag mapanggana sa pagkua nin suskripsion sa mga interesado na nanonompongan ninda sa paghuhulit sa tinampo. Puwede niatong dagkahon an dati nang mga suskritor na magpadara nin regalong suskripsion sa mga katood o paryentes. Tibaad boot man nindong magpadara nin pirang regalong suskripsion. Puwede man na ialok an suskripsion sa mga kamidbid sa negosyo, katrabaho, o kaklase. Tibaad may maisip pa kamong ibang posibilidad.
MAGPADAGOS SA PAGSABING, “MADIA!”
5 Magpadagos sa pagpaheling nin interes sa pagtabang sa mga nagsuskriber kan Abril. Seguradohon na dumalaw liwat sa madaling panahon. Tibaad puwede nindong ponan an pakipag-adal sa sainda sa Biblia asin isuherir na umiba sinda sa saindo sa pag-atender sa mga pagtiripon kan kongregasyon. Sa pagpaheling nindo nin sinserong interes sa sainda, tibaad magin marahay an saindang reaksion asin mapahiro na umoswag sa espirituwal.
6 An pag-agdang, “Madia!” itinatao sa mga tawo hale sa gabos na nasyon. Paagi sa saiyang Aking si Jesus, maboot na iinoopresir ni Jehova an balaog na buhay sa gabos na maako kan pag-agdang, “Madia!” asin “kumua kan tubig nin buhay na daing bayad.” Magkakaigwa daw kamo nin lubos na pakikikabtang sa pagpaabot sa iba kan pag-agda ngonyan na Mayo?