Mapusong Ipahayag an Maogmang Bareta
1 Sono sa kasaysayan, an tunay na mga Kristiano midbid sa saindang kapusoan. Si apostol Pedro asin Juan pangenot na mga halimbawa digdi. An mga apostol na ini daing takot asin mapusong nagpadagos sa pagtaram kan katotoohan. (Gibo 4:18-20, 23, 31b) Si Pablo man mapusong ipinagpadagos an saiyang ministeryo minsan sia nag-agi nin grabeng paglamag.—Gibo 20:20; 2 Cor. 11:23, 28.
2 Taano ta an mga apostol saka an ibang Kristiano sa bilog na kasaysayan mapusong nakapagpadagos na ipahayag an maogmang bareta? An 2 Tesalonica 2:2 minasimbag, “Kami nagmapuso nin huli sa samong Dios sa pagtaram sa saindo kan maogmang bareta nin Dios.” Sa kaparehong paagi, si Pedro asin Juan saka an iba pang disipulo mapusong nakapagbalangibog kan maogmang bareta.—Gibo 4:29, 31.
PAGPAHELING NIN PAGSARIG KI JEHOVA
3 May pagsarig an mga apostol na nasa likod ninda si Jehova. An gabos na ipinanuga ni Jehova paagi sa saiyang Tataramon nagigin totoo. Asin an mga maootob pa garantisado paagi ki Jesu-Cristo. Igwa man daw kita kan kaparehong pagsarig na mapusong ipahayag an maogmang bareta? Kun naheheling niato an kaotoban kan hula sa Biblia, napahihiro daw kitang itaram na may kapusoan an maogmang bareta kan Kahadean nin Dios?
4 Alagad, malalaoman na an siring na mapusong paghuhulit mapapaatubang sa pagtumang. (Juan 15:20) Iyan an nangyari ki Jesus asin sa mga Kristiano kan enot na siglo. Alagad ini dai nakaolang sa sainda ni nagpaluya man sa saindang paghuhulit. (Gibo 4:3, 8-13a) Huli sa satong Kristianong pangangapot sa Tataramon nin Dios manongod sa mahahalagang isyu, parate na inaapodan kitang tumao nin rason sa satong paninindogan. Ibinibilang niato an siring na mga okasyon na oportunidad na mapusong ipahayag an maogmang bareta. Sa paggibo kaiyan, inaarog niato si Jesu-Cristo asin an saiyang mga apostol.
5 An pag-auxiliary payunir nagtatao sato nin mas dakol na oportunidad na ipahayag an maogmang bareta. An dakol na nag-auxiliary payunir kan Abril magmamawot na ipagpadagos iyan sa bulan nin Mayo. Itotogot daw kan saindong kamugtakan na mag-aplay? Paagi sa paghihingoa na makikabtang sa pag-auxiliary payunir, pinatutunayan niato na kita kapareho ni Pablo asin Bernabe. Sa Gibo 14:3 sinasabi na “nagtao sinda nin dakol na panahon sa pagtaram na may kapusoan sa kapangyarihan ni Jehova.” Kun kaya niatong tuboson an panahon sa ibang aktibidad tanganing gumamit nin kisuerra 60 oras sa ministeryo sa langtad sa laog nin sarong bulan, daing duwa-duwa na madudugangan an satong mga bendisyon.
6 An pagigin mapuso sa ministeryo nangorognang nakatatabang kun nag-aalok nin suskripsion. An mga magasin may nagliligtas-buhay na mensahe basado sa Tataramon nin Dios. Kaya dai kita mag-alangan kundi maghulit kita na may kapusoan bilang pag-arog sa satong Arogan, si Jesus, asin sa saiyang mga apostol.