Hapot

● Siisay an maninigong tumao kan mga paisi sa Pagtiripon sa Paglilingkod?

An katuyohan kan kabtang na ini kan Pagtiripon sa Paglilingkod ipaaram sa kongregasyon an mga detalye na mahalaga sa pag-otob sa iinasignar na ministeryo. An ibang paisi nagseserbing mga pagirumdom asin parareho serosemana. Minsan siring, an gabos na paisi maninigong ipahayag nin malinaw. Mayo nin maninigong itao nin kaswal o ibilang na rutina na sana.

An klase nin pirang paisi tibaad humagad na iyan itao nin magurang. Kun siring an kaso, paninimbagan kan nangengenot na paraataman na iareglo na itao nin kuwalipikadong tugang an impormasyon, dawa kun may ibang tugang na matao kan ibang nakaiskedyul na paisi.

Kun an surat na may laog na impormasyon para sa kongregasyon may iba man na impormasyon para sana sa kamagurangan, sarong magurang an maninigong tumao kan impormasyon. An nagkapirang surat hale sa Sosyedad na may espisipikong paggiya para sa kongregasyon tibaad pinakamarahay na basahon nin sarong kuwalipikadong magurang. An siring na mga surat tibaad may koneksion sa espesyal na kampanya nin pagsurat para sa satong mga tugang na pinaglalamag. An ibang surat may detalyadong impormasyon manongod sa maabot na teokratikong mga aktibidad, arog baga kan mga pagsongko kan paraataman sa sirkito, asamblea, asin kombension.

Tibaad may mga panahon na kaipuhan an mahalagang paisi mapadapit sa kapakanan kan kongregasyon, asin an impormasyon dapat na ikaatubang nin malinaw. An siring na mga paisi pinakamarahay na gibohon kan saro sa kamagurangan.

Baga man itinao nin kamagurangan o ministeryal na lingkod, an mga paisi maninigong itao nin klaro asin direkta sa punto. An pagsunod sa mga giyang ini makasisierto na tama an pagtao nin instruksion sa kongregasyon tanganing an gabos umabante na may pagkasararo.​—Sal. 133:​1; 1 Cor. 14:​8, 9, 40.