Hapot

● Ano an maninigong ibugtak sa information board kan kongregasyon?

An information board sa Kingdom Hall nagtatao nin impormasyon manongod sa mga aktibidad kan kongregasyon. Mayo nin maninigong ibugtak dian na mayo kan pag-aprobar kan nangengenot na paraataman.

An nagkapira sa mga ibinubugtak iyo an: mga iskedyul asin asignasyon sa Pagtiripon sa Paglilingkod asin Teokratikong Paadalan sa Pagmiministro, lista kan mga pahayag-publikong nakaiskedyul, mga asignasyon kan tsirman sa Pagtiripon-Publiko asin parabasa sa Torrengbantayan, mga kabilang sa asin lugar kan mga Pag-adal sa Libro kan Kongregasyon, paisi sa masunod na pagsongko kan paraataman sa sirkito, impormasyon manongod sa nagdadangadang na asamblea o kombension, asin iskedyul sa paglinig sa Kingdom Hall. Kun beses sinasabihan kan Sosyedad an kamagurangan na ibugtak an sarong surat o iba pang bagay.

Minsan ngani puwedeng itao an halipot na paisi manongod sa sarong kasal na nakaiskedyul sa Kingdom Hall sa saro sa mga pagtiripon, dai ibubugtak sa information board an sarong pormal na paisi sa kasal. Ni magigin tama man na magbugtak nin mga paisi manongod sa mga sosyal na katiriponan, ta ini daing koneksion sa mga aktibidad kan kongregasyon.

An information board maninigong papagdanayon na malinig asin nakaaakit. Iyan maninigo na dakula tanganing magkaigo an kinakaipuhan na mga bagay na sinasabi digdi. An nakalihis nang mga iskedyul asin paisi maninigong haleon tolos. Kun bako sanang sarong kongregasyon an nagtiripon sa lugar na iyan, an lambang kongregasyon maninigo na magkaigwa nin sadiring information board o kabtang kaiyan. Irinirekomendar mi na an nangengenot na paraataman, o an saro na iinasignar nia, helingon an information board sa panapanahon tanganing masierto na an mga yaon dian napapanahon, angay, asin areglado.