Tinotokdoan ni Jehova
1 An Isaias 50:4 nagsasabi: “An Soberanong Kagurangnan na si Jehova mismo nagtao sa sako kan dila nin mga madonong, tanganing makanood ako kun paano sisimbagon nin tataramon an napapagal.” An sarong paagi sa paggibo kaini ni Jehova iyo an pagpatood na itinatao kan Teokratikong Paadalan sa Pagmiministro. Alagad, kaipuhan man an paghihingoa kan indibiduwal. An School Guidebook sa pahina 39 nagsasabi: “Maski pirang beses na nindong nagibo an sarong klase nin asignasyon, perming mahalaga an pag-aandam.” Aplikado ini sa sato gabos, maski ngani kita nakikabtang na sa paadalan nin pira pa sanang bulan o kan magpoon an paadalan kan 1943.
2 Kabilang sa pag-aandam an pagigin mapagrisa sa oras. An instruksion nagsasabi: “Mayong pahayag an maninigong sumobra sa oras.” Kun an tugang na nagpapahayag kan Asignasyon Bil. 1 paorootrong nagsosobra sa oras, maninigo siang tawan nin pribadong sadol. An paraataman sa paadalan maninigo man na magpoon kan pagtiripon na nasa oras asin magdanay sa itinagamang panahon sa pagtao nia nin sadol.
3 An kabtang na mga tampok sa Biblia maninigong bako sanang basta repaso kan inasignar na materyal. Maninigong tabangan kan nagpapahayag an mga nagdadangog na apresyaron kun taano asin kun paano an impormasyon mahalaga sa sato.
4 Sa Pahayag Bil. 3 puwedeng gumamit nin manlaenlaen na eksena. Pero an pagsasaisip kan pangenot na katuyohan kan paadalan, na iyo an pagtabang sa sato na iatubang an katotoohan sa tama asin malinaw na paagi, mas marhay na gamiton an mga eksena manongod sa paglilingkod sa langtad o impormal na pagpatotoo.
5 An Pahayag Bil. 4, kun kinukua sa librong Questions Young People Ask—Answers That Work, iaasignar sa bagohan o hoben na mga estudyante. An mga pahayag na ini magsusurusalida kada sarong semana sa presentasyon hale sa librong Reasoning. Kapwa sa Pahayag Bil. 3 asin Pahayag Bil. 4, an estudyante maninigong gamiton an itinaong tema.
6 Maninigong mag-ingat sa paggamit nin dugang na materyal. Maski kun an materyal saro o duwang parapo sana, puwede man na epektibong ikaatubang iyan paagi sa pagbasa asin pagpaliwanag kan mga Kasuratan, paggamit nin mga ilustrasyon, asin iba pa. Sa pankagabsan, dai kita nangangaipong magdugang nin materyal na dai inasignar. An mga nagdadangog maninigong masubaybayan kamo sa publikasyon na dian basado an pahayag.
7 An Dios na sinasamba niato nagtatao nin dai nauubos na paghahalean nin kadonongan. (Roma 11:33) Kun siring, magin determinasyon nindo, na makinabang nin lubos sa probisyon na itinao ni Jehova sa sato paagi sa regular na pag-atender asin pakikikabtang sa Teokratikong Paadalan sa Pagmiministro sa 1991.