Pagpasan kan Satong Paninimbagan na Gumibo nin Marahay sa Iba
1 Si apostol Pablo nagsadol sa mga Kristiano kan enot na siglo: “Dai nindo paglingawan an paggibo nin marahay asin pagwaras nin mga bagay sa iba.” (Heb. 13:16) An saindang mga paghihingoa na tabangan an saindang mga tugang minsan sa masakit na mga kamugtakan maparigon sa saindang pagkamoot sa Dios asin sa lambang saro. (Juan 13:35) Kita man sinasadol na gumibo nin marahay asin magwaras sa iba.
2 Sa katuyohan na ini, si Jehova nagtao nin probisyon tanganing kita mabasog asin masangkapan sa espirituwal. Mayamanon na impormasyon an nakakamtan niato sa kada Torrengbantayan asin Magmata! Kanigoan na kagayagayahan an namamatean niato sa pagbasa sa kada luwas sa pinakamadaling panahon pagkaresibi kaiyan! Sa paghorophorop sa Makakasuratan na impormasyon, puwede niatong tandaan an mga puntong magagamit sa ministeryo sa langtad saka sa satong pakikipag-olay sa iba. Siring man, puwede niatong tuboson an panahon tanganing makaandam para sa kada pagtiripon asin nangorogna para sa semanal na pag-adal sa An Torrengbantayan. An personal na pag-adal sa Tataramon nin Dios nakatatabang sato na makultibar an “kaisipan ni Cristo” asin nagpapangyari sato na ihiras an marahay sa mga nanonompongan niato.—1 Cor. 2:14-16; Sal. 19:14.
3 Mga Paninimbagan na Maninigong Akoon: An gabos na nakakanood na kamotan si Jehova idinudusay an saindang buhay sa saiya. Paagi sa pag-ako sa mga paninimbagan na konektado sa pagdusay, ipinaheheling niato na kita sa lado ni Jehova asin suminiblag na sa kinaban ni Satanas asin sa maraot na mga gibo kaiyan. Paagi sa pag-arog sa modelong iwinalat ni Cristo Jesus, kita nagtatao nin marahay na halimbawa sa iba. (1 Ped. 2:21) An mga programa sa pansirkitong asamblea arog kan para sa 1992, na may temang “Pagpasan kan Sadiri Niatong Paninimbagan,” nagsasadol sato na otobon an satong pagdusay.
4 An regular na pag-atender sa mga pagtiripon kan kongregasyon minatogot sato na ihiras sa lambang saro an nakapakokosog na mga kaisipan. An satong personal na pag-adal asin pag-andam para sa mga pagtiripon nagtatao sato nin kadakol na marahay na impormasyon na ikahihiras niato. An pagpaheling nin siring na personal na interes sa iba nagpapaoswag sa mainit, makikatood na espiritung pampamilya. Paagi sa pakikikabtang sa mga pagtiripon, ipinaheheling niato na kita talagang minaoyon sa mga tataramon ni Pablo na nasusurat sa Hebreo 10:24, 25 asin inaako an satong paninimbagan na pakosogon an iba.
5 Pag-aaboton an Dugang Pang mga Paninimbagan: Sa 1992 na taon nin paglilingkod, puwede daw niatong pag-aaboton an dugang pang mga paninimbagan, arog baga kan pag-auxiliary o pagregular payunir? Imbes na idoon nin sobra an kahagadan sa oras, taano ta dai isentro an atension sa orog na oportunidad na makikabtang sa gibong pagtitipon? (Juan 4:35, 36) An regular na pag-iba sa iba pang kuwalipikadong parahayag asin payunir makatatabang sato na paoswagon an satong abilidad sa ministeryo. An mas dakol na auxiliary payunir nagseserbi man na marahay na pampabagsik sa kongregasyon. Kun puwede, taano ta dai mag-aplay bilang regular payunir o iareglo na magin auxiliary payunir nin regular o sa pinakaparateng mapupuwede sa taon na ini?
6 An mga paninimbagan maogmang itinatao sa kuwalipikadong nagdusay asin bautisadong mga lalaking miembro kan kongregasyon. (1 Tim. 3:1-10, 12, 13) An gabos ikapaheheling an saindang pagigin andam na maglingkod paagi sa saindang inisip na marhay na mga komento sa mga pagtiripon, pagpartisipar sa Teokratikong Paadalan sa Pagmiministro, asin pag-ako sa mga asignasyon na mag-atubang nin demonstrasyon o gibohon an ibang kabtang sa Pagtiripon sa Paglilingkod. Pati mga aki puwedeng magin arogan sa mga paaging ini asin sa saindang gawe sa Kingdom Hall. Puwede sindang magin matinabang sa pagtrabaho kaiba kan saindang grupo sa pag-adal sa libro kun naasignaran na maglinig sa Kingdom Hall o asikasohon an ibang kaagid na mga pangangaipo.
7 Ipinahayag ni Jesus an pagigin andam niang akoon an paninimbagan na gumibo nin marahay sa iba paagi sa mga tataramon na: “Boot ko.” (Luc. 5:12, 13) Sa pag-arog sa saiya, puwede man niatong pakosogon asin tabangan an satong mga tugang, an mga interesado, asin sinserong mga tawo na nanonompongan niato sa paglilingkod sa langtad na regular na makiasosyar sa organisasyon ni Jehova. An pag-ako sa satong paninimbagan na ‘gumibo nin marahay sa iba’ nagkakaipo nin determinadong paghihingoa asin tibaad personal na pagsasakripisyo niato. (Gal. 6:10) Alagad kun naheheling niato an nagigibong karahayan, makakaoyon kita ki Pablo, na nagsabi: “Sa siring na mga atang naoogmang gayo an Dios.”—Heb. 13:16.