Pagrekomendar kan Tataramon nin Dios
1 An dakol ngonyan an pagheling sa Biblia lipas na asin bakong realistiko. Pero, an Tataramon nin Dios may puwersang makapabago sa buhay. (Heb. 4:12) Ini nahayag sa kaisipan asin gawe-gawe nin kadakol na laen-laen na tawo. (Efe. 4:24) An pag-aplikar kan hatol kan Biblia nakakokontribuwir sa maogmang pamilya. Iyan nakapaooswag sa marahay na relasyon nin magkataraed, ano man an rasa, kolor, o sosyal na posisyon.—Luc. 10:29-37.
2 An personal na eksperyensia niato sa Tataramon nin Dios maninigong magpahiro sato na sadolon an iba na siyasaton man ninda an tunay na halaga kan Biblia. An marahayon na pantabang na magibo ini iyo an satong Topikong Mapag-oolayan, “Taano ta Dapat na Basahon an Biblia?” Paano daw niato magagamit an topikong ini kaiba kan New World Translation asin kan librong Word of God sa Nobyembre?
3 Paggamit kan Topikong Mapag-oolayan: Pakalihis nin halipot na introduksion, puwede niatong sabihon: “Huling kadakol kan problema na napapaatubang sa mga pamilya ngonyan, nagsongko kami tanganing apodon an saindong atension sa solamenteng tunay na gikanan nin praktikal na tabang. Kaidto, an mga tawo parateng sa Biblia naglalaom para sa giya, pero nagliwat na an mga panahon, bako daw? Sa paghona daw nindo makatatabang an Biblia na maresolberan an mga problema ngonyan, arog baga kan salang paggamit nin droga, delingkuensia, asin laglag na mga pamilya? [Pasimbagon.] Helinga an sinasabi kan Biblia sa 2 Timoteo 3:16. [Basahon.] Sa paghona daw nindo an Biblia makatatao nin arog kaiyan na kapakipakinabang na impluwensia? [Pasimbagon.] An kadaklan nagkakaipo asin gusto nin paggiya kun napapaatubang sa mga problema o nagdedesisyon sa buhay, bako daw? Horophoropa kun saen kita dadarahon kan pagsunod sa Tataramon nin Dios. [Basahon an Juan 17:3.] An Biblia nagtatao nin klarong paggiya sa pagresolber sa personal na mga kadepisilan asin nagtatao nin seguradong paglaom sa ngapit.” Dangan puwede niatong idemonstrar an halaga kan New World Translation o kan librong Word of God.
4 Kun iiniintrodusir an New World Translation, puwede nindong apodon an atension sa ibang kabtang kaiyan, kaiba na an paggamit kaiyan nin modernong tataramon asin an pagbabalik kan banal na ngaran. Tibaad marisa man nindong nakatatabang na gamiton an saro o duwang punto hale sa pahina 276-80 kan librong Reasoning. Mag-alok nin personal na pag-adal sa Biblia sa mga nagpaheling nin interes.
5 Kun dinadara an atension sa librong Word of God, tibaad boot nindong darahon an atension sa Kapitulo 13 sa “The Word of God Is Alive,” na ipinaheheling kun paano nabakle an mga buhay paagi sa pag-aplikar kan mga prinsipyo sa Biblia. Tibaad boot nindong basahon an sarong kabtang kan parapo 1 kan kapitulong iyan tanganing mapukaw an interes dian.
6 Ngonyan na Nobyembre, mag-alisto sa mga oportunidad na dagkahon an mga tawo na magbasa kan Biblia. Mag-alisto na dalawon liwat an mga nagpahayag nin interes. Tabangan sindang mapatalubo an tunay na pag-apresyar sa puwersa kan Tataramon nin Dios. Paagi sa pag-aplikar kan mga prinsipyo kaiyan sa saindang buhay, magkakamit sinda nin nagdadanay na mga pakinabang ngonyan asin sa buhay na maabot.—1 Tim. 4:8.