Areglo nin Pag-adal sa Libro kan Kongregasyon
Kabtang 3: Sentro Para sa Ministeryo sa Langtad
1 Apuwera sa pagtao nin lugar para sa pangrupong pag-adal, an lugar kan Pag-adal sa Libro kan Kongregasyon puwedeng magserbing tagbuan para sa paglilingkod sa langtad. An mga oras para sa siring na pagtiripon maninigong kombenyente sa kadaklan na parahayag, asin an mga pagtiripon maninigong tumao nin praktikal na tabang sa pag-organisar sa mga parahayag para sa paglilingkod sa langtad.
2 An mga grupo na naorganisar nin tama para sa pag-adal asin paglilingkod nakaparirigon sa espirituwalidad. Siisay an dai nakinabang sa pagpakosog o mga suhestion sa kun paano aatubangon an mga pagtumang, kun paano poponan an pakipag-olay, kun paano mag-aalok nin pag-adal sa Biblia, o kun ano an sasabihon sa pagdalaw liwat? An mga kapwa parahayag asin payunir na nagtitiripon sa lugar kan pag-adal sa libro nakatatao kan tabang na iyan.—Gal. 6:9, 10.
3 An Kabtang kan Nangengenot: An nangengenot sa Pag-adal sa Libro kan Kongregasyon iyo an nangengenot asin may paninimbagan sa pag-organisar kan aktibidad kan grupo. Sia regular na nakikiiba sa mga parahayag sa langtad. (1 Ped. 5:2, 3) Sa kadaklan mas marahay na an kada grupo nin pag-adal sa libro may sadiring pagtiripon sa paglilingkod sa langtad imbes na pagtiriponon an gabos na grupo sa saro sanang lugar. Minsan siring, an duwang sadit na grupo puwedeng pagsaroon kun kaipuhan. Kun may paglilingkod sa langtad na kasunod kan pag-adal sa Torrengbantayan, maninigong halipot sana an pagtiripon bago an paglilingkod sa langtad.
4 Kun an mga pagtiripon bago maglingkod ginigibo sa nakaiskedyul na oras asin lugar, an mga parahayag nagpaplano sono dian, ta aram ninda na may teritoryo asin makakaiba. (Ikomparar an Lucas 10:1.) Dawa kun dai makakaabot an nangengenot sa pag-adal, sia nagtatagama nin teritoryo asin naggigibo nin mga areglo para sa grupo. (om p. 44-5) Kun mayo nin kuwalipikadong tugang na lalaki na mangengenot sa pagtiripon bago maglingkod, an nangengenot sa pag-adal puwedeng mag-asignar nin tugang na babae. (om p. 77-8) Nalilikayan an karibarawan kun an grupo regular na nagtataragbuan sa dating oras asin lugar para sa paglilingkod. An ano man na temporaryong pagliliwat maninigong ipaisi sarong semana bago pa kun mapupuwede.
5 Kaipuhan an Kooperasyon: An gabos maninigong maghingoa na makikabtang sa laen-laen na kabtang kan ministeryo sa langtad. An mga parahayag puwedeng iribang mag-andam paagi sa mga pagpraktis, na ginagamit an mga pagtumang na posibleng lumataw sa lokal na teritoryo.—Tal. 27:17.
6 Boot daw nindo na tabangan kamo nin eksperyensiadong parahayag na magin mas matibay sa paggibo nin disipulo? Kun iyo, kaolayon an nangengenot sa saindong Pag-adal sa Libro kan Kongregasyon. Tibaad ikaareglo nia na tabangan kamo nin kuwalipikadong parahayag. Tanganing makinabang, maimbod na iaplikar an inaakong mga suhestion asin otobon an mga tagbuan.
7 An mga naasignaran kan nangengenot sa pag-adal sa libro na tumabang maninigong rasonable an laoman. Ipinaheling nin kabatidan na an mga may positibo asin timbang na punto-de-vista sa paglilingkod sa langtad an pinakamatibay na magtokdo sa iba. Maninigo na perming itao an komendasyon mantang nagigibo an pag-oswag. Dangan puwedeng magbugtak nin iba pang pasohan.—Ikomparar an Lucas 19:17-19.
8 Boot niatong magtinabangan na magin epektibo sa paghuhulit kan maogmang bareta asin paggibo nin mga disipulo. An naggagrabeng mga kamugtakan sa kinaban nagpapatunay na apretado an gibohon na ini. Mga buhay an nakataya, asin pinaririkas ni Jehova an pagtipon. (Isa. 60:22) Mantang ginigirumdom niato an ministeryong itinao sa sato, kita makikipagtabangan sa satong grupo sa Pag-adal sa Libro kan Kongregasyon tanganing lubos na mahaman an asignasyon sa sato mantang nagsisinadolan asin nagpapakinosogan sa lambang saro.—Roma 12:6-8; 2 Tim. 4:1, 2, 5.