Pag-aatubang kan Maogmang Bareta—Pagpoon nin mga Pag-adal Paagi sa Direktang Pagdolok
1 Pinagbotan kita ni Jesus na ‘gumibo nin mga disipulo.’ (Mat. 28:19) Tanganing magibo ini parateng kaipuhan na ponan an pag-adal sa Biblia sa mga interesado. An paggamit sa direktang pagdolok tanganing makapoon nin pag-adal sa Biblia sa pagharongharong makatatabang sato na magibo ini sa madali.
2 Ano an puwede niatong sabihon kun ginagamit an direktang pagdolok sa pagpopoon nin mga pag-adal sa Biblia? Pinakamarahay an simpleng marhay na pagdolok. Puwede niatong sabihon: “Interesado akong matabangan an mga tawo na masabotan an Biblia asin maoogma akong makipag-adal sa saindo asin sa saindong pamilya digdi sa saindong harong na dai kamo nin babayadan o obligasyon. Puwede niatong gamiton an saindong Biblia. Kun mayo pa kamo, puwede ko kamong darahan.”
3 An saro pang pagdolok puwedeng arog kaini: “An katuyohan ko sa pagsongko ngonyan dagkahon kamo na mag-adal sa Biblia, na makatatabang saindong masabotan kun pasaen an kinaban na ini asin kun ano an itinatagama sato nin Dios. Ikaoogma kong ipaheling saindo kun paano nindo makakamtan an pinadakulang pakinabang sa saindong Biblia. Mayo kamo nin obligasyon o babayadan.” Kun magusto an kagharong, puwede nindong gamiton an tract na Life in a Peaceful New World o an brochure na “Uya!” poon sa pahina 3, parapo 1. An enot na mga pahina kan brochure na ini nagtatampok kan panuga ni Jehova na ibalik an Paraiso.
4 Gamiton an mga Tract sa Biblia: Dakol an nanompongan na nakatatabang an mga tract kun ginagamit an direktang pagdolok. Pagluwas sa tata kan kagharong, gamiton an tract na Life in a Peaceful New World na buka tanganing maheling nia an kompletong ilustrasyon. May kapot man kamong tract, asin basahon o sumaryohon an mga hapot sa enot na duwang parapo. Pag-olayan an simbag, asin bumasa nin saro o duwang tekstong nagsusuportar. Dangan iareglong bumuwelta. Ipaliwanag sa halipot an satong daing bayad na programa nin pag-adal sa Biblia, o iareglo sanang bumuwelta asin pag-olayan an iba pang punto sa tract.
5 Kun nag-aareglong bumuwelta, marahay na magsabi nin sarong bagay na sa paghona nindo pagkakainteresan kan kagharong. Ini puwedeng hapot. Babayaan kaiyan an kagharong na naghahalat sa saindong masunod na pagsongko na an hapot sisimbagon.
6 Kaya kita gabos mag-aprobetsar sa gabos na oportunidad na makapoon nin mga pag-adal asin makikabtang sa sugo satong ‘gumibo nin mga disipulo.’—Mat. 24:14; 28:19, 20; Mar. 13:10.