An Pinakadakulang Tawo na Nabuhay Kasuarin Pa Man
1 Kan maresibi ta an bagong librong ini, naintriga kita kan titulo kaiyan na The Greatest Man Who Ever Lived. An pagsabi na sasaro sanang tawo an pinakadakula mangangahulogan na sia nangongorog sa gabos na binilyon na tawo na nabuhay kasuarin pa man. Nangangahulogan an “dakula” na “marahayon an karakter o kuwalidad.”
2 Si Jesu-Cristo, an Aki nin Dios, biyong kaangay-angay sa pagmidbid na iyan. An saiyang ginibo sa daga daing koneksion sa kayamanan, sekular na mga ginibo, o politikal na pamamahala. Hale sia sa hababang pamilya asin ginamit an kadaklan kan saiyang buhay sa bakong popular na paagi. Pero kan sia 30 anyos na an edad, nagpoon siang maghayag kan personalidad asin mga katuyohan ni Jehova Dios sa paagi na dai pa lamang naeksperyensiahan nin tawo. Nagibo nia an pinakadakulang paghuhulit na ginibo nin sarong tawo, naggibo nin pambihirang mga milagro, asin nagtogdok nin pundasyon para sa sarong bagong kinaban na sosyedad.
3 Taano ta Maninigong Mag-adal Dapit ki Jesus? Matatabangan niato an mga kagharong na apresyaron an libro paagi sa pagsabing: “Kadakol ngonyan an nagsasabing nagtutubod sinda ki Jesus. Pero sinasadol kita kan Biblia na “magheling nin maingat” sa saiya. [Heb. 12:2] Ano sa paghona nindo an manonodan niato sa pag-adal kan saiyang buhay asin ministeryo? [Pakomentohon.] Iyo, sia an satong modelo asin arogan asin dinadagka kita na “sunodon nin estrikto an saiyang lakad.” [Basahon an 1 Pedro 2:21.] Pira an aram nindo na odok sa boot na naggigibo kaini sa saindang buhay sa aroaldaw? [Pakomentohon.] Kaya bako sanang tama na mamidbid si Jesus kundi kaipuhan ta na ioyon an satong buhay tanganing arogon sia, mantang sia an solamenteng dalan sa kaligtasan. [Basahon an Juan 14:6.]” Dangan puwede niatong ialok an libro, na ginagamit an iba sa minasunod na suhestion.
4 Nangongorog na mga Kabtang: Kun iinaalok an libro, puwede nindong ihapot: “Ano an guminibo ki Jesus na pinakadakulang tawo sa bilog na kinaban?” Puwede nindong simbagon iyan paagi sa pagtokdo sa pira sa 133 na kapitulo manongod sa saiyang buhay, personalidad, mga katokdoan, asin mga gibo. Nagpapaliwanag an kapitulo 24 kan saiyang katuyohan sa pagpadigdi sa daga. Rinirepaso kan kapitulo 35 an saiyang popular na Sermon sa Bukid. Itinatampok kan kapitulo 43 an makangangalas na abilidad ni Jesus sa pagtotokdo sa iba paagi sa mga ilustrasyon. Ipinatatanaw kan kapitulo 133 an mga bendisyon na kakamtan nin katawohan kun tapuson na nia an saiyang gibohon. Puwedeng makatabang saindo an paggamit kan mga hapot sa katapusan kan kada kapitulo tanganing mapukaw an pag-orolay. Puwede nindong idoon an magayon na mga ilustrasyon na nagpapahayag kan puwersa kan personalidad ni Jesus, kan rarom kan saiyang pagkaherak sa iba, asin kan saiyang daing kapagalan na kaigotan sa paghuhulit.—Mangnohon an kapitulo 44, 95, 117, asin 123.
5 Iaalok niato an bagong librong ini sa Hunyo. Igwa kita nin marahay na mga dahelan na ialok iyan sa iba na may dakulang entusiasmo. An lambang nagmamawot nin buhay na daing katapusan maninigo na kumua nin kaaraman dapit ki Jesu-Cristo. (Juan 17:3) An maigot niatong paghihingoa na idistribuwir an librong ini gigibohon na posible para an buhay kan dakol na sinsero maimpluwensiahan kan pinakadakulang tawo na nabuhay kasuarin pa man.