Gumibo nin Epektibong mga Pagdalaw Liwat
1 An paggibo nin mga pagdalaw liwat mahalagang kabtang kan satong paglilingkod bilang “mga katabang nin Dios.” (1 Cor. 3:6-9) Ipinaririsa kan satong marahay na pag-andam an odok sa boot na personal na interes sa dinadalaw mantang pinag-oolayan niato an nakaaakit na tema sa Biblia.
2 Magin espisipiko; maghapot nin mataktikang mga hapot.
Hale sa saindong nota kan enot na pagsongko, puwede nindong ihapot:
◼ “Namamatean daw nindo na an saindong pamibi na dumatong na logod an Kahadean nin Dios mas makahulogan magpoon kan pag-olayan niato an Biblia kan sarong semana?”
An makikatood na ekspresyon nin lauog asin tono nin boses nakatatabang nin dakula sa pagpapaheling kan satong odok sa boot na interes kun naghahapot nin siring.
3 Dai Maghidale; Maghinanyog sa Sinasabi kan Kagharong. Kun kita naghihinanyog sa sinasabi kan kagharong asin seryosong naghohorophorop bago sumimbag, maheheling an satong tunay na interes saiya bilang indibiduwal. Basado sa saiyang sinabi, puwede kamong tumao nin Makakasuratan na punto na konektado sa saindong enot na pagsongko. Magin andam na tokdoan an kagharong nin sarong bagay sa kada pagdalaw nindo. Kun ihapot an dai linalaoman na tema, gamiton an oportunidad na iluwas an saindong librong Reasoning tanganing hanapon an kinakaipuhan na impormasyon.
4 Kun ikinapasakamot nindo an Mayo 1, 1992 na “Torrengbantayan,” puwede nindong sabihon:
◼ “Kan nakaagi, napag-olayan niato an dapit sa taon 1914. Poon kaidto dakol na pagbabago an nangyari sa mga gobyerno. Pero an mga pagbabago daw na ini tunay na napanigoan an mga pangangaipo nin tawo, o ikagagarantiya daw ninda an permanenteng katoninongan? [Pakomentohon.] Mangnoha kun paano tinokdoan ni Jesus an saiyang mga parasunod na ipamibi an gobyerno na talagang makareresolber sa dakulang mga problema na inaatubang niato ngonyan. [Basahon an Mateo 6:9, 10.] Ano sa paghona nindo an gigibohon kan Kahadean nin Dios? [Pakomentohon.] Interesante man na gayo an paliwanag kan Biblia.” Dangan basahon an Daniel 2:44. Tibaad boot nindong gamiton an ilustrasyon sa pahina 12 asin 13 kan librong Mabuhay Sagkod Lamang tanganing ipaheling an klase nin kamugtakan na malalaoman sa irarom kan pagsakop kan Kahadean nin Dios.
5 Kun ikinapasakamot nindo an Mayo 8, 1992 na “Awake!,” puwede nindong sabihon:
◼ “Kan nakaagi kong pagbisita saindo, napag-olayan niato an manongod sa mga tawo na naghale sa saindang sadiring nasyon tanganing makalikay sa inhustisya asin kasakitan. Sa paghona daw nindo nagmamakolog talaga an Dios sa kun ano an kaipuhan na tagalan nin mga tawo sa kamot kan saindang kapwa?” Depende sa simbag, puwede nindong basahon sa tawo an Eclesiastes 4:1 o Salmo 72:12-14. Dangan puwede nindong buksan an pahina 15 kan brochure na “Uya” asin basahon o sumaryohon an tolong parapo sa pahinang iyan, na ihinahapot an mga hapot sa kada parapo.
6 Logod padagos niatong ipaheling an personal na interes asin magkaigwa sa isip nin nakaaakit na mga tema sa Biblia na ikapakikipag-olay tanganing an satong mga pagdalaw liwat magin mapanggana.