Pagkonektar kan Satong Introduksion sa Literatura
1 Kun nag-aandam kan saindong pag-aatubang ngonyan na bulan, puwedeng enot nguna nindong konsideraron an mayor na mga problema na napaaatubang sa mga tawo sa saindong lugar dangan pumili nin mga kapahayagan sa brochure na nagtotokdo sa Makakasuratan na solusyon.
2 Sa ibang pagtaraed, tibaad an mga tawo nahahadit sa kadaihan nin trabaho asin sa halangkaw na kantidad nin pamumuhay. Kun mapaatubang kamo sa siring na situwasyon, puwede nindong sambiton an problema nin espisipiko sa saindong introduksion.
Puwede kamong magsabi:
◼ “Padagos kaming nakikipag-olay sa samong mga kataed dapit sa kun ano an magigibo tanganing masierto na igwa nin trabaho asin harong para sa gabos. Naniniwala daw kamo na rasonableng maglaom na gigibohon ini kan mga gobyerno nin tawo? [Pasimbagon an kagharong.] Igwa nin saro na nakaaaram kun paano reresolberan an mga problemang ini; mangnoha an saiyang siniseguradong panuga sa Isaias 65:21-23. [Basahon.] Ipinasurat kan satong Kaglalang an panugang ini para sa pagpakosog sato, asin kita gabos nangangaipo kaiyan sa depisil na mga panahon na ini, bako daw?”—rs, p. 11.
3 Sa puntong ini kan saindong pag-aatubang, puwede nindong ikonektar an materyal na hale sa saro sa mga brochure. Kun kamo nag-aalok kan brochure na “Uya!,” taano ta dai ipaheling kun paano an ideya manongod sa pagharong asin trabaho para sa gabos iiniilustrar sa atubangan asin sa likod na tutob kan brochure. Puwede nindong buksan iyan tanganing sabay na maheling kan kagharong an bilog na ilustrasyon.
4 Sa mga teritoryo kun saen an mga kagharong igwa nin laen-laen na pinaghahaditan, makatatabang an mas nakababagay sa kamugtakan na introduksion. Tibaad boot nindong probaran an ikaduwang introduksion na nakasurat sa librong Reasoning sa temang “Kingdom.”
Puwede nindong sabihon:
◼ “Tinokdoan kita ni Jesus na mamibi na dumatong logod an Kahadean nin Dios asin gibohon an Saiyang kabotan digdi sa daga kun paano sa langit. Sa paghona daw nindo kun gigibohon an kabotan nin Dios digdi, an daga talagang magigin sarong paraiso?” Pakatapos na sumimbag an kagharong, ipaheling asin basahon an Kapahayagan 21:3-5.
Dangan, kun kamo nag-aalok kan brochure na Government, basahon an piniling mga kabtang kan nag-iintrodusir na parapo sa pahina 3. Mangnoha an mga tataramon na: “Paagi sa Kahadean, dai na mahahaloy tatapuson nin Dios an mga guerra, gutom, helang, asin krimen.” Hapoton an kagharong kun arin sa mga problemang ini an namamate niang pinakaseryoso.
5 An mga hobenes man epektibong makapag-aatubang kan mensahe nin Kahadean, minsan sa mga maedad na.
Sa pag-introdusir kan Isaias 65:21-23, puwedeng sabihon kan hoben na mga parahayag:
◼ “Aram ko na bilang maedad na mas eksperyensiado kamo sa buhay kisa sa sako, pero an kasuratan na ini nakararanga sa sato gabos.”
6 Siertohon na gumibo nin maingat na rekord nin ano man na ikinapasakamot, kabilang na an espisipikong brochure o magasin na iwinalat. Kakaipuhanon nindo an impormasyon na ini kun kamo bumalik tanganing kultibaron an interes.