Pag-apresyar sa Kahulogan kan Presenteng mga Pangyayari
1 “An kamugtakan kan kinaban na ini nagbabago.” (1 Cor. 7:31) Naheheling ini sa marikas an dalagan na mga pangyayari sa presente. Kaiba an gabos na nangyayari sa laog kan organisasyon ni Jehova, ano an kahulogan kaini personalmente saindo?—Luc. 21:28.
2 Nagpapatunay an kaotoban kan hula sa Biblia na an bilog na maraot na palakaw nin mga bagay yaon na sa mga huring aldaw kaiyan. (Mat. 24:3-14; Luc. 21:7-11) Sinabi ni Jesus na “an kapag-arakian na ini dai makalilihis sagkod na dai maotob an gabos na bagay.” (Luc. 21:32) Nasasabotan daw nindo kun ano an kahulogan kaini para sa mga tawo sa saindong teritoryo na dai pa nakadesisyon sa lado ni Jehova? Kun iyo, ano an epekto kaini sa saindong ministeryo sa langtad?—Luc. 21:34-36.
3 Tabangan an Iba Mientras na May Panahon: Dinagka ni Jesus an saiyang mga disipulo na aprobetsaran an paborableng mga kamugtakan tanganing ipaaram an maogmang bareta. (Juan 9:4) Itinao ni apostol Pablo an iyo man sanang sadol kan dagkahon nia an mga tugang sa Colosas na “padagos kamong maglakaw sa kadonongan manongod sa mga nasa luwas, na tinutubos an panahon.”—Col. 4:5.
4 An iba naghinanyog nin marhay sa sadol kan apostol na tuboson an panahon asin nagin mga regular payunir. Kadakol na hobenes an naglingkod bilang regular payunir mientras na nag-eeskuwela asin nagkaigwa nin marahay na kapangganahan sa paggibo kaiyan. Puwedeng tuboson kan mga hobenes sa eskuwelahan an panahon tanganing tabangan an mga kaklase na masabotan an kahulogan kan nangyayari ngonyan asin an paglaom sa ngapit sakop kan Kahadean nin Dios.—Ecl. 12:1.
5 Magagamit niatong marhay an satong panahon sa paglilingkod sa langtad sa Oktubre paagi sa pagtatampok kan magasin na Awake! sa kada oportunidad. Itinatao kan publikasyon na ini an pakasabot sa tunay na kahulogan kan presenteng mga pangyayari. Ialok iyan sa nahahadit na mga tawo na nanonompongan nindo sa pagharongharong. Ialok iyan sa mga kaklase o sa mga tawo sa saindong trabaho. Itampok an mga tema na puwedeng partikularmenteng makaiinteres sa mga tawo na midbid nindo. Halimbawa, an Awake! na Oktubre 8, 1992 naglalaman nin mga artikulong manongod sa negatibong mga emosyon, na nagpapaheling kun paano an kapurisawan, pagkatakot, kaanggotan, pagkadisganar, asin depresyon puwedeng mapangganahan.
6 Sa pag-introdusir kan Awake!, parateng marahay na helingon an kabtang na “Why Awake! Is Published” sa pahina 4 kan kada magasin. Depende sa klase nin tawo na kaolay nindo, puwede nindong idoon na iyan nagtatao nin kaliwanagan para sa bilog na pamilya, ipinaheheling kaiyan kun paano mapanggaganahan an mga problema (arog kan ipinaheheling kan luwas na Oktubre 8), asin bako sanang irinireport kaiyan an mga bareta kundi itinotokdo kaiyan an tunay na kahulogan sa likod kan presenteng mga pangyayari, alagad dai minakampi sa politika. An mapaghorophorop na mga tawo siertong aapresyaron na an mga kabtang na ini ginibo an Awake! na tunay na mahalaga sa sainda.
7 Ini makaoogmang mga panahon tanganing maglingkod ki Jehova. An katunayan na ini magpahiro logod sa sato na aprobetsaran an mga oportunidad ngonyan na bulan tanganing matabangan an mas dakol pang sinserong tawo na maheling an tunay na kahulogan sa likod kan presenteng mga pangyayari.