Pag-alok kan Librong Revelation
1 Huli sa satong masakit na mga panahon, kadakol kan nariribaraw asin nagmamawot nin nakakokontentong mga simbag dapit sa ngapit. Kun siring, angay nanggad na dagkahon niato sinda na basahon an librong Revelation! An publikasyon na ini nagtatao nin banal na giya paagi sa pagpaliwanag kan mga pangyayari sa satong aldaw sa liwanag kan mga hula sa Kapahayagan. An minasunod mga suhestion na magagamit niato sa pag-alok kaini sa mga tawo ngonyan na bulan.
2 Sa mga Relihiyoso: Nagdadakol ngonyan an nag-aadal nin Biblia. Kun nakanonompong nin siring na mga tawo, an direktang pagdolok epektibo.
Puwede nindong sabihon:
◼ “Hinahapot niamo an samong kataraed: Hinohona daw nindo na an libro nin Kapahayagan katuyohan na ipasabot, o magdadanay na sarong misteryo? [Pakomentohon.] Siring man kaiyan an pagmansay nin dakol. Helinga kun ano an mismong sinasabi kan Biblia sa Kapahayagan 1:3.” Dangan puwede nindong sambiton an introduksion sa pahina 9 kan libro manongod sa “Interpreting the Scriptures.”
3 Sa mga Nahahadit sa mga Kamugtakan sa Kinaban: Marahay na gamiton an nakapupukaw na mga ilustrasyon sa librong Revelation kun iinaalok ini sa mga nahahadit dapit sa mga problema sa kinaban.
Halimbawa, puwede nindong sabihon:
◼ “Nagdadalaw kami tanganing ipakipag-olay an kahulogan kan nangyayari sa palibot niato sa kinaban ngonyan. An nagkapirang lider sa kinaban naghohona na palaog kita sa sarong bagong panahon nin katoninongan. Hinohona daw nindo na totoo ini? [Pakomentohon.] Minsan siring, sa ibong nin pagkabigo kan mga gobyerno nin tawo, sa 2 Pedro 3:13 sinisierto sato kan Biblia an sarong bagong daganon na sosyedad na mapunsionar sa irarom nin sarong langitnon na gobyerno. [Basahon an kasuratan asin buksan an librong Revelation sa pahina 302.] Ano an nakaaakit saindo sa retrato? [Pasimbagon.] Manongod sa mga kamugtakan na mag-ieksister sa daga, an Biblia nagsasabi man sa Kapahayagan 21:4 [basahon an kasuratan na yaon sa pahina 303, parapo 6]. Maski an kagadanan dai na nanggad makararaot sa katoninongan na iestablisaron nin Dios.”
4 Sa mga Nahahadit Dapit sa Polusyon Asin sa Palibot: An ilustrasyon sa pahina 174 kan libro puwedeng gamiton kaiba an Kapahayagan 11:18.
Halimbawa, pakatapos kan saindong introduksion puwede nindong sabihon:
◼ “Sa pakikipag-olay sa samong kataraed, dakol an nahahadit sa kun paano an satong aire, tubig, asin kakanon inaatian. [Ipaheling an ilustrasyon sa pahina 174.] Sa paghona daw nindo kaya pa nin mga gobyerno na pondohon ini? [Pakomentohon.] Nakadadagkang maaraman an sinasabi kan Biblia na mangyayari sa mga naglalaglag kan daga.” Basahon an Kapahayagan 11:18 sa libro sa pahina 173, dangan ipaheling an katuyohan nin Dios sa daga sa pahina 302.
5 An mga hula sa Kapahayagan dakulang gikanan nin kagayagayahan. Pagmaigotan niatong ialok an librong Revelation ngonyan na bulan tanganing an gabos puwedeng magiyahan kan madonong na pagdidirehir ni Jehova.