Lubos na Makinabang sa “Banal na Pagtotokdo” na Pandistritong Kombension sa 1993
1 “Tokdoi ako, O Jehova.” (Sal. 86:11) Ini an maninigong odok sa boot na pakimaherak nin lambang nagdusay na lingkod nin Dios. Determinado kita na nungkang pumondo sa pag-adal asin nungkang pumondo sa pag-aplikar kan nanonodan niato. Sa panapanahon kinakaipuhan kitang maliwat giraray, arog kan ginibo kan salmista, nagkakaipo kitang makimaherak sa Dios na pagsararoon an satong puso tanganing iyan dai mabanga. An programa sa “Banal na Pagtotokdo” na Pandistritong Kombension magtatao nin praktikal na instruksion asin pagliwat giraray na kinakaipuhan niato tanganing maimbod na makapaglingkod ki Jehova sa tahaw nin mga pangigipit kan palakaw na ini nin mga bagay.
2 Apat na Aldaw na Kombension: An programa itatao sa 36 na lugar sa bilog na Pilipinas. An tolo sa mga kombension na ini sa Metro Manila asin gigibohon poon sa Nobyembre 4-7, 1993, mantang an iba pang 33 gigibohon sa huring semana kan Disyembre asin sa enot na semana kan Enero. Mapoon an programa sa Huwebes ala 1:20 n.h. asin matatapos sa Domingong hapon poko mas o menus alas 4:15 n.h. Pasabot: Parareho an mga programa sa gabos na 36 na lugar, kabale na an nasa Manila. An pagkakalaen sana iyo an presensia sa Manila nin mga delegado na tagaibang nasyon.
3 Ano daw an itinatagama para sa sato? Abundang solidong espirituwal na pagkakan na itatao sa laen-laen na paagi: mga pahayag, demonstrasyon, interbio, asin duwang drama. Dai paglihisan an ano man na mahalagang pagtotokdong ini! Dugang pa, naglalaom kita na makaiba giraray an dating mga kamidbid asin magkaigwa nin dakol pang bago. An mga misyonero na naglilingkod sa mga teritoryo sa ibang nasyon tibaad umatender sa saindong kombension. Aprobetsaran an oportunidad na makamidbid an maimbod na mga tugang na lalaki asin babae na ini. Kun kamo magurang, iiba an saindong mga aki sa pag-orolay. An magayagaya asin mapagsakripisyo sa sadiri na espiritu kan mga misyonerong ini puwedeng magtogdok kan pundasyon para sa saindong sadit na mga aki na isip-isipon an karera sa pambilog na panahon na paglilingkod.
4 Dadarahon daw Nindo an Gabos na Ikasampulong Kabtang sa Tambobong? Sa Malaquias 3:10, nanuga si Jehova sa mga Israelita na kun boot nindang baloon sia asin darahon an gabos na ikasampulong kabtang sa tambobong, iuula nia an bendisyon sagkod na mayo na nin kulang.
5 Para sa nagkapira, an pagbalo ki Jehova mangangahulogan nin pagdolok sa saindang among sa pinakamadaling panahon tanganing humagad nin bakasyon o panahon na dai malaog tanganing umatender sa kombension. Kun minsan an mga tugang nagduwaduwa na gibohon ini, na ipinamumugtak na nungka sindang totogotan kan saindang among na umatender nin kombension. Alagad sa mga bagay na dai kalabot an espirituwal na mga bagay, tibaad kakadikit o mayong kadepisilan nindang ipinaaaram sa saindang among an boot nindang gibohon.
6 Maninigong hapoton ta an satong sadiri: Kun an sarong katood kakasalon sa ibang lugar, dai daw kita madolok sa satong among asin mahagad nin aldaw na dai malaog tanganing umatender sa kasal? Asin kun garo sia nagduduwaduwa, dai daw niato magalang na ipaliliwanag kun gurano kahalaga sa sato na makaduman? Siertong mas importante na matokdoan ni Jehova kisa umatender nin kasal! Kun kita talagang kombensido na mahalaga an programa sa kombension sa satong espirituwal na pagtalubo, magigin mas pasil na kombensiron an satong among na togotan kita na dai lumaog tanganing umatender nin kombension.—Sant. 1:7, 8.
7 Sa Israel an ikasampulong kabtang binibilog nin materyal na pagsuportar sa lugar nin pagsamba ni Jehova. Sa satong aldaw an ikasampulong kabtang nagrerepresentar sa panahon, kosog, asin mga pinansial na direktang ginagamit sa paglilingkod ki Jehova asin sa pagsuportar kan gibohon na pan-Kahadean. An ikasampulong kabtang kabale an panahon na ginagamit niato sa mga pagtiripon, asamblea, asin mga kombension, siring man sa pagmantenir asin paglinig kan satong mga lugar sa pagtiripon. An “Banal na Pagtotokdo” na Pandistritong Kombension magtatao sato nin dakol na oportunidad na darahon an ikasampulong kabtang sa espirituwal na tambobong ni Jehova. Ano an pira sa mga ini?
8 Puwede niatong darahon an ikasampulong kabtang paagi sa atentong paghinanyog sa programa kan kombension, paagi sa entusiastikong pakikabtang sa pag-awit kan kada awit na pan-Kahadean, asin paagi sa maingat na pagdangog sa kada pamibi, tanganing ikadugang niato an satong odok sa pusong amen.
9 An satong pag-oswag sa katotoohan minadepende sa pinakamahiwas na sokol sa kun paano kita naghihinanyog. Sa sarong mahiwas na auditorium o istadiyum, madali sanang madistorbo sa ginigibo nin iba na nasa palibot niato, asin huli sa rason na iyan kaipuhan na papagdanayon niato an satong kaisipan sa pagsubaybay. Siertohon na dumuman sa kombension na biyong preparado, dara an saindong Biblia, songbook, panurat asin papel na susuratan, patin isyu kan Torrengbantayan na pag-aadalan sa semanang iyan. Nakatatabang na kumua nin nota nin mga punto asin teksto na ginagamit kan kada espiker. Magkaigwa sana nin halipot na mga nota; an pagkua nin kadakoldakol na nota tibaad makaolang sa pagkonsentrar. An sadit na mga aki maninigo man na sanayon na magin atentong mga parahinanyog. Puwedeng darahon nin mga aki an ikasampulong kabtang kaibanan kan saindang mga magurang paagi sa pagsubaybay na marhay sa programa.
10 Iinaareglo kan ibang magurang an matoninong na panahon sa harong sa kada aldaw na an saindang mga aki linalaoman na bumasa o magheling nin mga retrato sa saro sa mga publikasyon kan Sosyedad. An marahay na pagsasanay na ini ginigibong mas pasil para sa mga aki na matoninong na tumukaw durante kan mga pagtiripon asin kombension. An mga magurang na nakapadakula nin arogan na mga aki nagsabi na nungka nindang tinotogotan an saindang mga aki na magdara nin mga kawatan o kinokoloran na mga libro sa mga pagtiripon. Minsan an mga akion pa puwedeng makanood na an dahelan para sa pag-atender nin mga pagtiripon sambahon si Jehova. An mga magurang na tinotokdoan an saindang mga aki kun ano an kahulogan para sainda na darahon an gabos na ikasampulong kabtang sa tambobong tunay na dapat komendaran!
11 Puwede man na darahon ta an ikasampulong kabtang paagi sa pagboboluntaryo kan satong panahon asin kosog na tumabang sa pag-organisar kan kombension. Sa kadaklan na lugar an bago pa kombension na paglinig iiniiskedyul saro o duwang aldaw bago pumoon an kombension. Kun kamo nag-iistar sa harani, taano ta dai iareglo na an bilog na pamilya makapakikabtang? An ibang tugang iiniba an saindang nag-ooswag na mga inaadalan sa Biblia tanganing minsan bago pa kan saindang bautismo an mga bagohan na ini makanood kun ano an kalabot sa pagsuportar sa pagsamba ki Jehova. Igwa nin dakol na gigibohon tanganing seguradohon na husay na madalagan an kombension. Taano ta dai magboluntaryo bilang sarong pamilya?
12 An satong pinansial na pagsuportar sa kombension saro pang paagi nin pagdara kan ikasampulong kabtang. Sa pagsurat kun paano an materyal na mga regalo gigibohon tanganing suportaran an dalisay na pagsamba, pinagbotan ni Jehova an banwaan nin Israel: “Mayo nin maninigong dumolok sa atubangan ni Jehova na mayo nin dara. An regalo kan kamot nin lambang saro maninigong magin kasokol kan bendisyon ni Jehova na saimong Dios na itinao sa saimo.” (Deut. 16:16, 17) Baga man an mga tawo kayang magtao nin dakol o dikit, an saindang mga atang, na iinandam nin patienot, nakapaoogma ki Jehova. Siring man, an dakol na tugang nagtatao nin mapagngayongayong kaisipan sa kontribusyon na gigibohon ninda, baga man paagi sa kuwarta o sa tseke. Tinotogotan daw nindo an saindong mga aki na magholog sa kahon nin kontribusyon?
13 Samnohan an Katokdoan kan Satong Paraligtas, an Dios: Paagi sa satong marahay na mga ugale asin satong marahay na gawe, puwede niatong “masamnohan . . . an katokdoan kan satong Paraligtas, an Dios, sa gabos na bagay.” (Tito 2:10) Sa ibang pagtaram, duman mismo sa kombension, ikapaheheling niato na an banal na pagtotokdo iinaaplikar sa satong buhay.
14 Kumusta man an satong mga ugale? An pagkonsiderar sa iba bibihira sa kinaban ngonyan. Pero an banwaan ni Jehova, na ginigiyahan nin Makakasuratan na mga prinsipyo, nag-iisip, bakong kan saindang ikararahay, kundi kan ikararahay kan saindang kapwa. (Fil. 2:4) Nagmamakolog kita sa iba na nasa palibot niato. Dai kita nagsusurusuan o nagsisirikohan kun naglilinya para sa pagkakan o mga publikasyon. Makonsiderasyon kita sa mga gurang asin sa saradit na mga aki na tibaad naghahalat sa linya kaiba kan saindang mga magurang na puwedeng madali sanang masiko nin mga adulto na tibaad dai sinda maheling. Sa mga restawran kita magalang asin marahay an ugale sa mga nagtatrabaho, bakong daing modo o eksido kun an serbisyo dai nakaaabot sa satong mga linalaoman.
15 An satong diosnon na ugale igwa nin tunay na epekto sa mga nasa palibot niato. Sa sarong kombension sa siudad kan nakaaging taon, an sarong pulis na naglilingkod sa laog nin 21 taon na nagsabi nin arog kaini: “Naghanga ako sa disiplina kan mga tawo nindo. [Sinda] ekselente; pinupurot ninda an mga basura na mayo nin siisay man na nagsasabi sainda asin sinda areglado asin an saindong kombension organisadong marhay.” Idinugang pa nia: “Kun naheheling kami kan mga tawo nindo, minahuyom sinda. Iyan sarong marahay na tanda. Linalaoman mi iyan. Iyan tanda nin pagigin makikatood asin mayo nin ano man na itinatago. Asin namangno mi man na an mga aki kaiba kan saindang mga magurang asin disiplinadong marhay. Maniwala kamo sako, naghanga akong marhay. Nakaoogma na iasignar digdi.”
16 Personal daw nindong sasamnohan an pagtotokdo kan satong Paraligtas, an Dios, paagi sa saindong arogan na ugale? Uya an nagkapirang paagi na puwedeng gibohon ini:
Paggubing Asin Pag-alinyar: Durante sa panahon na nag-aatender kita nin kombension, dai niato maninigong ibilang an satong sadiri na nagbabakasyon. Imbes, ipinipresentar niato an satong sadiri ki Jehova tanganing tokdoan nia. Mantang iyan an kamugtakan, dai daw kita maninigong maggubing siring sa kun kita nag-aatender sa mga pagtiripon sa Kingdom Hall? (1 Tim. 2:9, 10) Dugang pa, maninigo kitang magtao nin maingat na paghorophorop kun ano an satong isusulot pakatapos kan mga sesyon. Pakabalik sa satong mga dinadagusan, magigin angay daw para sa sato na salidahan an satong mabini, kagalanggalang na gubing sa kombension nin gubing na magtatao sato kan itsura nin daing kahusayan na mga kinabanon? Dai daw ini magtatao nin impresyon na an satong mga gubing sa pagtiripon garo sana sarong costume imbes na magpaheling kan satong paagi nin pamumuhay? Girumdoma, dinadara niato an ngaran ni Jehova, asin an kada saro sa sato kaipuhan na magbantay na dai makadolot nin lehitimong akusasyon tumang sa dalan kan katotoohan.
Maninigong pagirumdomon an mga kandidato na bakong angay sa siring na sagradong okasyon na magsulot nin mga T-shirt na may kinabanon na mga sarabihon, logo, o mga anunsio sa komersio. An mga magurang maninigong siertohon na an mga hapot sa bautismo repasohon nin marhay nin patienot asin na an kada kandidato sabihan sa tamang panahon kun baga sia aprobado para sa bautismo o dai. (Kun rinerepaso an mga hapot, puwedeng angay na panahon ini na magtao nin mga suhestion manongod sa angay, mabining gubing para sa bautismo.) Dai kinakaipuhan para sa mga kandidato sa bautismo na inaprobaran na kan mga magurang na magpalista sa kombension.
Pagpapadanay sa Satong Palibot na Malinig: Arog kan nasambit kasubago, dakol an nagkokomento manongod sa kalinigan kan banwaan ni Jehova sa mga kombension. Pagdanayon niato an halangkaw na pamantayan na iyan, na dai nag-aapon nin papel, mga patos nin dulse, o iba pang lalagan, sa salog. Bago humale sa banggi, helingon an palibot kan saindong tukawan asin puroton an ano man na basura na nasa salog asin ibugtak iyan magsalang sa angay na mga basurahan o darahon iyan sa harong tanganing duman iapon. Girumdomon na an hall nin kombension iyo an satong Kingdom Hall sa laog nin apat na aldaw asin maninigong trataron arog sa satong lokal na Kingdom Hall.
Sekular na Trabaho: Nag-aatender kita nin kombension tanganing umako nin espirituwal na pagkakan. Kun siring bako ini an panahon na gumibo nin sekular na trabaho o gumibo nin ano man na magaganansiahan, na inaaprobetsaran an darakulang grupo na nag-aatender. Sa giraray boot niamo na pagirumdomon an gabos na mayo nin personal na mga bagay an itotogot sa laog nin kombension, asin an mga bagay sana kan Sosyedad an itotogot sa bookroom o iba pang departamento kan kombension.
Mga Kagamitan sa Pagrekord: Mantang itinotogot an mga video camera, aram mi na magigin makonsiderasyon kamo sa iba. Bakong mamomoton na lipodan an kapwa kombensionista mientras na kinukuanan an programa. Kun makarerekord kamo nin maingat sa saindong tukawan, mayo nin kontra sa gigibohon nindo. Alagad girumdomon tabi na mayo nin mga camera o kagamitan sa pagrekord an ikakokonektar sa mga electrical o sa sound system sa kombension, ni maninigong ibugtak an mga kagamitan sa mga pasilyo o sa mga agihan.
Tukawan: Tabi girumdomon na AN MGA TUKAWAN IKARERESERBA SANA PARA SA MGA MIEMBRO KAN SAINDONG PAMILYA ASIN SA SIISAY MAN NA KAIBA NINDO SA BIYAHE. Tabi magin makonsiderasyon sa mga gurang. Kan nakaaging mga panahon, kinaipuhan nin gurang na mga tugang na humanap nin mga tukawan sa bakong kombenienteng mga lugar huli ta an mga hobenes tinukawan an lugar na irineserba para sa mga gurang.
Personal na mga Gamit: Isinusuherir na limitaran sana nindo an ano man na personal na mga gamit na dadarahon nindo sa kombension. Kun an gamit dai magkahusto sa irarom kan saindong tukawan, mas marahay pang iwalat iyan sa harong o sa likod kan lunadan. An darakulang gamit dai itinotogot sa mga agihan tanganing dai makadisgrasya, asin kun iyan ibubugtak sa tukawan na kataed nindo, tibaad igwang dai makatukaw.
17 Sa mamomoton na konsiderasyon sa iba, iplano na umabot nin amay sa kada aldaw, nangorogna sa Huwebes na posibleng mas haloy kisa dati na humanap nin paradahan asin tukawan.
18 Dakulaon na pribilehiyo na kita tokdoan ni Jehova! An satong paggamit nin panahon, kosog, asin materyal na mga rogaring tanganing suportaran an “Banal na Pagtotokdo” na Pandistritong Kombension ngonyan na taon magbubunga nin daing sagkod na espirituwal na mga pakinabang kapwa sa satong sadiri asin sa satong mga pamilya.