Pakinabangon an Iba Paagi sa Paggamit nin mga Magasin
1 Kanigoan an kaogmahan niato na maresibi an pinakahuring mga luwas kan Torrengbantayan asin Awake! Pinahahalagahan niato an oportunidad na basahon iyan sa pinakamadaling panahon tanganing makinabang kita sa impormasyon na itinatao. Dugang pa sa paghanap nin materyal na puwedeng personal na makatabang sato, marahay na ideya na hanapon an mga punto na puwedeng gamiton sa pag-alok kan mga magasin sa iba. Tibaad booton niatong markahan an mga kabtang na nangorognang nakakaakit sa mga nasa teritoryo kan satong kongregasyon o gumibo pa ngani nin mga nota sa pagirilid kan satong kopya tanganing pagirumdomon an satong sadiri manongod sa mapag-oolayan na mga punto asin kun paano puwedeng iatubang an artikulo sa lokal.
2 Igwa nin nagdadanay na halaga an satong mga babasahon. Minsan ngani tibaad enot niatong tinatawan nin atension an pag-atubang kan bagong mga magasin, dai kaipuhan na iapon an daan na mga luwas, mantang an mismong impormasyon dai nagigin lihis na sa panahon. Sarayon an daan na mga luwas sa saindong bag tanganing magamit iyan kun nagpapatotoo. An mga ini puwedeng magin nangorognang kapakipakinabang kun an espisipikong pangangaipo kan kagharong aram na.