An Pagkamoot ki Jehova Binubuhay an Tunay na Pagsamba
“Iyo ini an boot sabihon kan pagkamoot sa Dios, na kuyogon niato an saiyang mga kapagbootan.”—1 JUAN 5:3.
1, 2. May anong motibo na kita maninigong maglingkod ki Jehova?
AN SARONG grupo nin 80 bisita hale sa Hapon namamasyar sa Assembly Hall nin mga Saksi ni Jehova sa California, E.U.A. An kawiliwiling palibot, pati an sarong hardin na igwa pa nin mga gamgam na blue jay, salampati, asin hummingbird, orog na nagparani sainda sa saindang Kaharohalangkaweng Kaglalang, si Jehova Dios. Dai nahaloy narealisar kan nagpapasyar sa sainda na an haros gabos sa grupo naglilingkod bilang payunir. Kaya pakatapos, hinapot an grupo kan parateng ihinahapot: “Taano ta kadakol kan payunir sa Hapon?” Sa kadikit na panahon daing nakagirong. Dangan nagboluntaryong sumimbag an sarong hoben na babae: “Huli ta namomotan mi si Jehova.”
2 Pagkamoot ki Jehova—ini nakapahihiro nanggad sato na magmaigot sa paglilingkod sa saiya! Totoo, bakong gabos makapagpapayunir. Sa katunayan, an mayoriya sa labing apat na milyon niatong mga parahayag kan Kahadean dai natatawan nin lugar an pribilehiyong ini. Alagad an dakol na an mga kamugtakan nagtotogot naghihingoang aboton iyan. An kadaklan sa sato puwede man na ‘manarig ki Jehova asin gumibo nin marahay,’ na ipinaheheling an satong pagkamoot paagi sa pakikikabtang sa paggibo nin disipulo. (Salmo 37:3, 4) Asin an gabos na nagdusay na parasamba ki Jehova makakapakikabtang sa pagpalakop sa espiritu nin pagpapayunir, na tinatawan nin mamomoton na pagsuportar an mga nagpapayunir.—Mateo 24:14; 28:19.
3. Ano an pagkakalaen sa pag-oltanan nin kadaklan na naghihingakong Kristiano asin kan mga Saksi ni Jehova?
3 Bakong arog kan kadaklan na naghihingakong Kristiano, na para sa kapasilan ibinibilang sanang bakong gayong mahalagang kabtang kan saindang buhay an relihiyon, an mga Saksi ni Jehova nagpapaheling nin malaad na pagkamoot sa Dios na nagmomotibar sainda na padagos na “hanapon nguna an kahadean asin an saiyang katanosan.” Ini nagkaipo nin pagsasakripisyo, pero kapakipakinabang nanggad an sakripisyong iyan! (Mateo 6:33; 16:24) Iyan kaoyon kan enot na dakulang togon, na enot na isinabi ni Moises asin inotro ni Jesu-Cristo: “Si Jehova na satong Dios sarong Jehova, asin mamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.”—Marcos 12:29, 30; Deuteronomio 6:4, 5.
4, 5. Sairisay an ikabibilang na maimbod, asin paano ikapaheheling an kaimbodan?
4 An saro sa mga nagtatrabaho sa opisina prinsipal kan mga Saksi ni Jehova kasuarin pa sana nagkomento ki F. W. Franz, an 98-anyos na presidente kan Watch Tower Society na labi nang 70 taon sa bilog na panahon na paglilingkod: “Nagin kamong marahay na halimbawa sa kaimbodan, Tugang na Franz.” Asin si Tugang na Franz nagsimbag: “Iyo! Kaipuhan kang magmaimbod.” Iyan an sumaryo sa bagay. Sa ano man na kabtang kan aktibidad sa Kahadean kita naglilingkod, puwede kitang magmaimbod.—1 Corinto 4:2; Galacia 3:9.
5 Totoo, dakol an boot na gumibo nin orog pa sa paglilingkod ki Jehova, pero tibaad nalilimitaran sinda nin Makakasuratan na mga paninimbagan o mga problema sa salud. Pero, an mga dai kayang magpayunir dai dapat na ibilang na kulang nin kaimbodan. An iba nagdanay na maimbod sa irarom kan pinakamasakit na mga kamugtakan asin sa parate sa laog nin kadakol na taon. Iyo, sinda nagmaimbod! Sinda nagpaheling nin pagkamoot ki Jehova asin maimbod na naglingkod na may bilog na pusong pagsuportar sa saiyang teokratikong mga areglo. Nagpaheling sinda nin makosog na interes sa aktibidad nin mga payunir asin nagpakosog sa may potensial na magpayunir, sa parate an saindang mga aki, na maghingoa pasiring sa pagpapayunir bilang karera sa buhay na nakalalabi sa gabos pang iba.—Ikomparar an Deuteronomio 30:19, 20.
6, 7. Paano an arogan na yaon sa 1 Samuel 30:16-25 minaaplikar ngonyan?
6 An mamomoton na pagkasararo sa paghiro kan bilog na banwaan nin Dios ngonyan ikaiilustrar kan tala sa 1 Samuel 30:16-25. Sa pakikilaban tumang sa mga Amalequita, “linugad sinda ni David magpoon kan maagahon sagkod kan banggi” asin nakakua nin dakol na samsam. Kan bumalik sa kampo, an iba sa mga parapakilaban ni David naghagad na dai tawan kan samsam an mga dai uminiba sa sainda sa pakikilaban. Alagad ta si David nagsimbag: “Siisay an madangog saindo manongod sa tataramon na ini? Huli ta kun ano an kabtang nin saro na nakilaban siring man an kabtang nin saro na nagbantay sa mga abastos. An gabos parareho an kabtang.”
7 Aplikado man an siring na prinsipyo ngonyan. An mga payunir nangengenotan sa satong espirituwal na pakikilaban. Pero an gabos na iba pa sa kongregasyon nagtatao nin bilog na puso, maimbod na pagsuportar. Asin an dakulang resulta kan saindang sararong gibohon kan 1991 ipinaheheling sa kasunod na tsart.
Sarong Pambihirang Report
8. (a) Ano an ipinaheheling kan pambilog na kinaban na report manongod sa total na parahayag asin oras na ginamit ninda sa paglilingkod ki Jehova? (b) Anong mga puntong interesante an naririsa ninda sa mga nasyon na ngonyan pa sana naglataw sa report?
8 Iyo, an minasunod na apat na pahina kan magasin na ini nagpapaheling kun paano an nagkakasararong paghihingoa kan gabos na maigot na parasamba ki Jehova nakakontribuwir sa makaoogmang pambilog na kinaban na pag-oswag kan 1991. Makangangalas na bagong peak na 4,278,820 parahayag kan Kahadean an nasa rekord—6.5-porsientong pag-oswag. An mga ini nagdusay nin 951,870,021 oras (haros sarong bilyon!) sa paglilingkod. Asin helinga an pambihirang paghihingoa kan satong mga tugang sa mga nasyon na dati pinangangaladan pero ngonyan naglataw sa pambilog na kinaban na report—Bulgaria, Cameroon, Czechoslovakia, Ethiopia, Mozambique, Nicaragua, Rwanda, asin U.S.S.R.
9, 10. (a) Ano an reaksion nin mga payunir sa angat nin masakit na mga panahon? (b) Anong pagpakosog an itinatao para sa paglaog sa pagpapayunir?
9 Sa nakaaagi pa sanang mga taon naglakop an espiritu nin pagpapayunir sa bilog na kinaban. Minsan sa mga nasyon na bago pa sanang itao an katalingkasan sa pagsamba, nagdadakol an payunir. An masakit na buhay dai nakaoolang sa marigon na mga Saksing ini sa pagdusay kan gabos na nasa sainda sa pagsamba ki Jehova. (Ikomparar an 2 Corinto 11:23, 27.) Bulan-bulan poko mas o menus 14 porsiento kan gabos na parahayag sa Kahadean an nagpapayunir. An pinakahalangkaw na kabilangan nin payunir 780,202, na marahayon na 18 porsiento kan gabos na parahayag.
10 Sa pakamasid sa mga kagayagayahan na nakakamtan kan mga payunir, nadadagka man an iba na lumaog sa paglilingkod na ini. Kun dai pa kamo nagpapayunir, mapahihiro daw kamo kan saindong pagkamoot ki Jehova na magsabi, arog kan mababasa niato sa Isaias 6:8, “Uya ako! Sugoa ako”? O paagi sa saindong maimbod na pag-adal sa Biblia, puwede daw na palaadon kan Tataramon nin Dios an kamawotan sa saindong puso, tanganing dai nindo mapogolan na lumaog sa pagpapayunir? Minsan sa masakit na panahon, si Jeremias pinukaw kan tataramon ni Jehova, kaya dai sia nakapagpogol.—Jeremias 20:9.
Mamomoton na Paglilingkod sa Katawohan
11. Paano nag-oswag an aktibidad na pag-adal sa Biblia?
11 An saro sa pambihirang bagay sa report kan taon iyo an pagdakol kan daing bayad na pag-adal sa Biblia, na 3,947,261, an ginigibo nin regular kada bulan sa bilog na kinaban. Ini mamomoton na areglo na orog pang tinatabangan nin mga Saksi ni Jehova an mga interesadong nanompongan ninda sa saindang pagharongharong. Ikinaoogma niatong adalan sa Biblia an mga tawo hale sa gabos na nasyonalidad asin rasa, na ipinaheheling an kaigotan na arog ki apostol Pablo. An saiyang ‘lubos na pagpatotoo sa mga Judio asin Griego’ daing duwa-duwa na nangaipo nin dakol na oras na pagtotokdo kan katotoohan. (Gibo 20:20, 21) Iyo man ngonyan. Tinatabangan nin mga Saksi ni Jehova “an gabos na klase nin tawo [na] makaligtas asin makaabot sa tamang kaaraman kan katotoohan.”—1 Timoteo 2:4.
12-14. Anong magayagayang report an naghahale sa Europa?
12 Makaoogma nanggad an report na nadugangan an pag-adal sa Biblia sa Sirangan na Europa! Sa laog nin dakol na taon an mga tugang niato duman kinaipuhan na magtiripon sa saradit na grupo, na tibaad sasaro an nagigisi na, kinopya sa mimeograpo na daan na Torrengbantayan para sa bilog na grupo. Pero ngonyan nagbabaha an Biblia asin mga babasahon sa Biblia sa mga nasyon na iyan. Ipinagigirumdom kaiyan sa saro an Awit ni Salomon 2:4, King James Version: “Dinara nia [Cristo Jesus] ako sa [espirituwal na] harong nin bangkete, asin an saiyang bandera na suminakop sakuya pagkamoot.” Huling may personal nang kopya kan mga magasin, dakol an nasasangkapan na gamiton “an tataramon kan katotoohan sa tamang paagi.”—2 Timoteo 2:15.
13 An sarong kongregasyon na may 103 na parahayag sa St. Petersburg, Rusya, bago pa sanang nagreport nin labing 300 na pag-adal sa Biblia. Bilang bunga kan paghihingoang ini sa pag-adal sa Biblia, 53 na bagong Saksi an nabautismohan sa laog sana nin walong bulan. Labi sa kabanga kan kongregasyon an walong bulan pa sana o mayo pa sa katotoohan! Asin mayo sinda nin kamagurangan—saro sanang ministeryal na lingkod na mag-aataman sa saindang espirituwal na pag-oswag.
14 An sarong parahayag kan Kahadean sa Estonia hinapot nin sarong inaadalan sa Biblia kun baga puwede niang imbitaran an pira niang katood sa pag-adal. Kan umabot an Saksi sa harong kan sumunod na semana, nanompongan nia na 50 katawo an tiripon! Siyempre, kinaipuhan an espesyal na mga areglo tanganing padagos na maataman an gabos na interesado.
15. Ano an masasabi manongod sa mga nag-atender sa Memorial asin bautismo?
15 An dakol na nag-aadal enot na nakakanamit nin Kristianong asosasyon paagi sa pag-atender sa Memorial kan kagadanan ni Jesus. Kan nakaaging taon, sa enot na pangyayari labi sa 10,000,000 an nag-atender, na 10,650,158 an nagtiripon sa bilog na kinaban sa 66,207 kongregasyon para sa magayagayang okasyon na ini. Sa dakol na nasyon sa Latin-Amerika, Aprika, asin Sirangan na Europa, may mga kabilangan nin nag-atender na tolo o apat na doble kan mga parahayag kan Kahadean. Ngonyan kaipuhan na pumoon na kita sa pag-andam para sa Memorial na gigibohon ngonyan na taon sa Biyernes, Abril 17. Linalaoman na an dakulang bilang nin bagong mga inaadalan sa Biblia na maatender sa Memorial padagos na maoswag pasiring sa bautismo. Kun dapit sa bautismo, kan 1991 naheling giraray niato an labing 300,000 na sinimbolohan an saindang pagdusay ki Jehova Dios paagi sa bautismo sa tubig.
Mga Mamomoton sa Diosnon na Katalingkasan
16. Anong makaoogmang mga report an naghahale sa “Mga Mamomoton sa Katalingkasan” na Pandistritong mga Kombension?
16 An sarong lataw na kabtang kan 1991 taon nin paglilingkod iyo an serye nin “Mga Mamomoton sa Katalingkasan” na Pandistritong mga Kombension, na ngonyan tapos na sa Northern Hemisphere pero magpapadagos pa sagkod 1992 sa Southern Hemisphere. Sa enot na pangyayari, an kompletong programa kan kombension ginibo sa nagkapirang nasyon sa Sirangan na Europa, na duman an satong mga tugang naggagayagaya na gamiton an bago nindang katalingkasan sa ikaoomaw ni Jehova. Kan Oktubre 1991 an total na nag-atender na ikinareport sagkod ngonyan sa enot na 705 na kombension sa 54 nasyon 4,774,937.
17, 18. (a) Anong mga katalingkasan an nakakamtan asin linalaoman kan mga parasamba ki Jehova? (b) Paano napapalaen an diosnon na katalingkasan sa kinabanon na mga katalingkasan?
17 Sinabihan ni Jesus an saiyang mga disipulo: “Bubutasan kamo kan katotoohan.” (Juan 8:32) Ngonyan, an minilyon binutasan kan katotoohan sa Biblia sa mga doktrina nin Kakristianohan. Nanodan kan minilyon na ini na papangyayarihon kan probisyon ni Jehova na pantubos na atang ni Jesus na an katawohan ‘mabutasan hale sa kaoripnan nin kalapaan asin magkaigwa kan mamuraway na katalingkasan kan mga aki nin Dios.” (Roma 8:19-22) Kanigoan kamakangangalas na katalingkasan iyan—an mabuhay sagkod lamang sa sarong paraisong daga sa laog kan tamang mga linderos na mamomoton na ibinugtak ni Jehova!—Isaias 25:6-8; ikomparar an Gibo 17:24-26.
18 An mga katalingkasan na nakakamtan ngonyan kan mga Saksi ni Jehova, asin linalaoman na mas abundang kamtan sa bagong palakaw nin mga bagay nin Dios, gikan sa satong Dios, si Jehova. (2 Corinto 3:17) Iyan dai nasasarig sa ano man na politikal o rebolusyonaryong mobimiento. (Santiago 1:17) Tanganing malikayan an ano man na salang pagsabot sa puntong ini, an convention badge para sa 1991 na ginamit kan mga Saksi ni Jehova sa pirang nasyon sa Sirangan na Europa igwa kan mga tataramon na “Mga Mamomoton sa Diosnon na Katalingkasan” imbes na simple sanang “Mga Mamomoton sa Katalingkasan.”
Dakulaon na Pagkamoot ki Jehova
19. Paano kita masususteniran nin pakikidayupot ki Jehova paagi sa pamibi?
19 An satong pagkamoot ki Jehova asin an satong pagsarig sa saiya magpapangyari sato na magdanay na dayupot sa saiya sa pamibi. An pakikidayupot na ini ki Jehova an nakatabang sa satong mga tugang na matagalan an dakol na kasakitan asin paglamag. (Salmo 25:14, 15) Sa oras kan pinakamakuring pagbalo sa saiya, si Jesus nagdanay na dayupot sa saiyang Ama paagi sa pamibi. (Lucas 22:39-46) An siring na pakikidayupot ki Jehova paagi sa pamibi nakasustenir ki Esteban sa sakit kan saiyang pagkagadan bilang martir. Sa pagtangad sa langit bago sia gapoon sagkod na magadan, sia nagsabi: “Uya! Naheheling kong bukas an kalangitan asin an Aki nin tawo [si Jesus] nagtitindog sa too nin Dios.”—Gibo 7:56.
20-22. Paano ipinag-iilustrar nin sarong eksperyensia na dinadangog nin Dios an mga pamibi?
20 Siring sa parateng naeksperyensiahan nin mga nagsasamba ki Jehova, si Jehova sinisimbag an mga pamibi na oyon sa saiyang kabotan. Halimbawa, sa sarong nasyon sa Aprika na prohibido an gibohon kan mga Saksi, an sarong espesyal payunir na nakasakay sa awto panorte may ihahatod na dakulang sako na may laog na mga babasahon na pan-Kahadean asin mga sobre. An konduktor na nagkakarga sa awto hinapot an tugang: “Ano an laog kan sako?” Isinabi kan tugang an enot na suminabong sa isip nia: “Mga surat.”
21 Sa biyahe, linihisan kan awto an sarong checkpoint sa tinampo, asin linapag kan pulis-trapiko an awto asin pinapondo iyan, sa paghona na iyan may kargang kontrabando. Ipinagboot ninda na bumaba sa awto an gabos na pasahero asin inspeksionon an gabos na karga. Krisis ini! An tugang ruminayo nin kadikit sa naggugurumodgumod na kadaklan asin, sa pagluhod, namibi ki Jehova. Kan sumalak sia sa kadaklan, binubukasan an karga kan kada biyahero asin maingat na sinisiyasat. Kan bubukasan na an sako kan tugang, silensio siang nag-arang nin tabang ki Jehova.
22 “Kiisay an sakong ini, asin ano an laog kaini?” an kurahaw kan pulis. Bago nakataram an tugang, an konduktor kan awto nagsimbag asin nagsabi: “Mga surat iyan hale sa post office pasiring sa post office.” “Areglado,” sabi kan pulis. Inalsa nia an sako asin itinao iyan sa konduktor. “Seguradohon mong ibugtak iyan sa ligtas na lugar sa saindong pagbiyahe,” an togon nia saiya. Luminuhod liwat an espesyal payunir sa pagpasalamat sa Paradangog nin pamibi.—Salmo 65:2; Talinhaga 15:29.
23. Ano an ipinaheling ni Jehova, pero taano ta may beses na itinotogot niang matapos an paglamag?
23 Pero dai ini nangangahulogan na an mga parasamba ki Jehova lubos na ligtas sa kapahamakan. Sa nagkapirang situwasyon, kapwa kaidtong mga panahon kan Biblia asin ngonyan, ipinaheling ni Jehova na kaya niang iligtas an saiyang banwaan. Alagad kaoyon sa paghusay sa isyu nin integridad, kun beses minalataw na pinababayaan niang matapos an paglamag. (Ikomparar an Mateo 26:39.) Saro pa, bakong direktang iniingatan ni Jehova an saiyang banwaan sa mga aksidente, sibil na kariribokan, o sa krimen, maski ngani mahalaga na sunodon an basado sa Bibliang praktikal na kadonongan. (Talinhaga 22:3; Eclesiastes 9:11) Pero makasasarig kita na baga man kita iligtas sa masakit na mga kamugtakan o dai, an satong kaimbodan sagkod sa katapusan babalosan sa pagbuhay liwat.—Mateo 10:21, 22; 24:13.
24. Ano an mamomoton na mga balaog na itinao ni Jehova, asin paano niato mababalosan an saiyang pagkamoot?
24 Kanigoan kamakangangalas kan mamomoton na mga balaog ni Jehova! An balaog nia sa katawohan na daga asin gabos na yaon dian pambihirang kapahayagan kan saiyang pagkamoot. (Salmo 104:1, 13-16; 115:16) Asin an maheherakon na balaog nin Dios na saiyang Aki, si Jesu-Cristo, tanganing tumubos sa katawohan sa kasalan asin kagadanan iyo an pinakamamomoton na balaog. “Huli kaini nahayag sa sato an pagkamoot nin Dios, huli ta sinugo nin Dios an saiyang Aking bugtong sa kinaban tanganing kita magkamit nin buhay paagi sa saiya. An pagkamoot sa bagay na ini, bakong huli ta kita namoot sa Dios, kundi na sia namoot sato asin isinugo an saiyang Aki bilang pantubos na atang para sa satong mga kasalan.” (1 Juan 4:9, 10) Bilang balos sa pagkamoot na iyan, kita logod makombensir “na ni an kagadanan ni an buhay ni an mga anghel ni an mga gobyerno ni an mga bagay na yaon na digdi ngonyan ni an mga bagay na madatong pa ni an mga kapangyarihan ni an kalangkawan ni an kararoman ni an arin man na ibang linalang makakapasuhay sa sato hale sa pagkamoot nin Dios na yaon dian ki Cristo Jesus na satong Kagurangnan.”—Roma 8:38, 39.
Sa Pagrepaso kan Artikulong Ini
◻ Ano an boot sabihon kan pagigin maimbod?
◻ Sa anong mga aktibidad na ikapaheheling niato an pagkamoot ki Jehova?
◻ Anong mga kabtang kan report sa taon nin paglilingkod an nakapukaw kan pinakadakula nindong interes?
◻ Paano niato ikapaheheling an pag-apresyar sa mamomoton na mga balaog ni Jehova?
[Kahon sa pahina 22]
Taano ta Kadakol kan Payunir?
Sono sa report, sa laog nin 2,600 na taon an mga Hapones sinserong mga parasamba sa saindang mga emperador. Sa mga guerra sana sa ika-20 siglong ini, labing tolong milyon na parapakilaban na Hapones an isinakripisyo an saindang buhay, ta an paghona ninda dai nang maorog pang onra kisa magadan para sa saindang emperador-dios. Alagad ta an militarismong Budhista-Shinto nasudya kan Guerra Mundial II, asin pakalihis kaidto tinalikdan kan emperador an saiyang pagkadios. Ano daw an makasasalida sa relihiyosong pagkabakanteng ini? Makaoogma, an mga pag-adal sa Biblia na pinangenotan nin mga misyonero kan mga Saksi ni Jehova asin kan huri nin mga Saksing tagaduman nakatabang sa dakol na manompongan an tunay na Dios, si Jehova, asin idusay an saindang buhay sa saiya. Dakula an halaga kan pagdusay na ini para sa mga Saksing Hapones. Kun kaidto andam sindang isakripisyo an saindang buhay para sa sarong emperador-dios, may orog nanggad na kaigotan na idinudusay ninda ngonyan an saindang kosog bilang payunir sa pagsamba sa nabubuhay na Dios asin Kaglalang kan uniberso—an Soberanong Kagurangnan na Jehova!
[Tsart sa pahina 18-21]
REPORT KAN 1991 TAON NIN PAGLILINGKOD KAN MGA SAKSI NI JEHOVA SA BILOG NA KINABAN
(Hilingon an publikasyon)
[Ritrato sa pahina 23]
Mga mamomoton sa diosnon na katalingkasan—mga parasamba ki Jehova sa sarong kombension sa Prague, Agosto 9-11, 1991