Magin Nakapakokosog
1 Mantang kita nabubuhay sa “delikadong mga panahon na masakit pakibagayan,” gabos kita nangangaipo nin pampakosog. (2 Tim. 3:1) Nakaaaram na marhay kan pangangaipong ini minsan sa saiyang panahon, si Pablo nagmawot na gayong gamiton an pakiaasosyar sa saiyang mga tugang bilang oportunidad para sa “pagriribayan nin pagpakosog.” Sinadol nia an saiyang mga tugang na “sunodon . . . an mga bagay na nagpapakosog sa lambang saro.” (Roma 1:11, 12; 14:19) An mga pagmamaigot na ini nakahimong ‘pakosogon an kalag kan mga disipulo, na sinasadol sinda na magdanay sa pagtubod.’ (Gibo 14:22) Talagang kaipuhan niato an siring na klaseng pampakosog ngonyan.
2 Kita puedeng magin nakapakokosog sa iba paagi sa satong sinasabi. Kun ginagamit nin tama, an satong mga tataramon puedeng magin “siring sa mga mansanas na bulawan sa mga inukit na pirak.” (Tal. 25:11) Paagi sa pakikikabtang sa mga pagtiripon, ‘nagpapakosog kita’ sa lambang saro. (Heb. 10:25) An satong dila puedeng gamiton sa positibong paagi kun kita nagsasaysay nin mga eksperyensia, nagtatao nin komendasyon, o nakikipag-olay dapit sa espirituwal na mga bagay. An siring na kapakipakinabang na paggamit kan dila ‘marahay para sa pagpakosog, na nagtatao nin karahayan sa mga nagdadangog.’—Efe. 4:29.
3 Magtaram Manongod sa mga Bagay na Nakapakokosog: Sa Filipos 4:8, si Pablo nagtao nin nakatatabang na mga giya sa satong pagtaram. Sinabi nia na maninigong horophoropon niato an ano man na bagay na totoo, seryoso, matanos, malinig, makawiwili, marahay an dangog, marahay, asin inoomaw. Danay kitang makaseseguro na an sinasabi niato magigin totoo asin mapakikinabangan nin iba kun iyan basado sa Tataramon nin Dios. (Juan 17:17) An satong Kristianong pagdusay, an mga bagay na nanonodan niato sa mga pagtiripon sa kongregasyon, an paagi na lubos niatong inootob an satong ministeryo, asin iba pang siring na bagay seryoso. An nakapakokosog na pag-orolay manongod sa mga pamantayan asin prinsipyo kan Tataramon nin Dios seguradong matabang sato na magin ‘madonong para sa kaligtasan.’ (2 Tim. 3:15) Puede niatong ipahayag an pag-apresyar sa mabining ugale kan mga yaon sa malinig na organisasyon ni Jehova. Puede niatong omawon an makawiwiling mga gibo nin kabootan kan satong mga tugang. (Juan 13:34, 35) Kaiba sa mga bagay na marahay an dangog an kapakipakinabang na Kristianong mga kualidad nin pagtubod, kagayagayahan, katoninongan, asin pakatios na maoobserbaran niato sa satong mga tugang. An pag-orolay manongod sa siring na mga bagay ‘marahay para sa pagpakosog’ sa iba.—Roma 15:2.
4 Aroaldaw, napaaatubang kita sa nakapanluluyang mga kahaditan kan kinaban. Nakarerepresko nanggad na ipagilid an mga bagay na ini asin makikabtang sa mamomoton na asosasyon kaibahan an satong mga tugang! Taano ta dai umabot nin amay sa Kingdom Hall tanganing magibo ini? Sa giraray, pakatapos kan pagtiripon igwa kita nin dugang pang oportunidad na pakosogon an lambang saro. An mahalagang panahon na ini na kita nagkakairibahan sarong kayamanan na papakangmahalon. Kun kita perming nagpaparigon asin nagpapakosog, an iba tunay na masabi dapit sa sato: “Tinawan ninda nin kaginhawahan an sakong espiritu.”—1 Cor. 16:18.