Kaipuhan daw Niato an Biblia?
SI Oxa na, daragang taga-Rusya, naogma kan maheling nia an iinaalok na Biblia kan sarong paratinda nin libro sa bangketa sa Moscow. An kaiba nia, si John, na hale sa sarong nasyon kun saen madaling nakukua an mga Biblia, naghanga sa entusiasmo ni Oxa na. “Ako—ateista—gusto kong bakalon iyan para sa saiya,” sabi nia. Minsan ngani sa enot nagsayuma si Oxa na, sa katapustapusi inako nia an regalo ni John.
An dakol, arog ni Oxa na, igwa nin dakulang pagmawot na magkaigwa nin Biblia. Ini nangorognang totoo sa mga nasyon kun saen ipinagbawal iyan sa laog nin dakol na taon. Halimbawa, an mga kagpublikar kan magasin na ini nagmamaigot na marhay na masuplayan an pedido para sa mga Biblia sa dating mga republikang Sobyet, siring man sa iba pang parte kan kinaban. Sa kaenot-enote, an dakol na tawo sa mga lugar na ini igwa nin oportunidad na gumibo nin tamang pagsiyasat kan Biblia—asin an dakulang bilang naaakit kan makosog na mensahe kaiyan.
Mga Kritiko Asin Nagdududa
Sa ibong na lado, partikularmente sa amihanan na Europa, an Biblia dai na binabasa kundi pinababayaan na maalpogan sa estante nin libro. “Gadan na kasaysayan!” an sabi nin iba, na idinudugang, “Isinurat iyan para sa ibang panahon. Mayo iyan nin koneksion sa modernong tawo.” Minsan an prominenteng mga klerigo guminibo nin pampublikong mga kapahayagan na nakahale nin kredito sa Biblia. An Anglikanong arsobispo na si Desmond Tutu ibinareta sa The Star, sarong diaryo sa Aprika del Sur, na nagsabing: “May mga kabtang kan Biblia na mayo nin permanenteng kapakinabangan.” An mga kapahayagan na arog kaini nagin dahelan na dakol an maghorophorop kun baga gurano kaodok sa boot nindang aakoon an Biblia.
An Pangangaipo Para sa Giya
An mga kritiko asin siring man an mga nagtutubod kinakaipuhan na akoon na, orog kisa kasuarin man, an kinaban nangangaipo nin mga solusyon na epektibo. “Sagkod na an tawo dai tolos makanood na kontrolon an rikas nin pagbabago sa saiyang personal na buhay-buhay siring man sa sosyedad sa kabilogan,” an surat ni Al vin Toff ler sa saiyang librong Future Shock, “kita itinalaga sa sarong lagduan na . . . pagkagaba.” An patanid na iyan ilinuwas labi nang 20 taon an nakaagi. An pagkagaba na sinabi ni Toff ler malinaw na nangyayari na ngonyan.
Mantang an siglong ini harani na sa katapusan kaiyan, an mga pag-oswag sa teknolohiya asin pilosopiya nin tawo nasudya na magtao nin kasarigan sa kinaban. An dai pa sana nahahaloy na mga paglaom para sa sarong bagong areglo nin kinaban sinalidahan na nin pagkadisganar, asin an buhay nin dakol nagin na sanang pan-aroaldaw na pakikilaban para mabuhay.
Ipinaheheling kan estadistika na an pagkakalaen sa ekonomiya sa pag-oltanan kan mayaman asin dukha nagin garo ampas kararom. Ipinaririsa kan dai pa sana nahahaloy na pagsiyasat na an 82.7 porsiento kan kayamanan nin kinaban kapot kan 20 porsiento sana kan populasyon kaiyan. Ngangalasan daw na an guerra, gutom, helang, kariribokan, asin anarkiya lakop sa dakol na nasyon? An pangigipit na makapanggana sa nagluluyang kuwalidad nin buhay causa nin grabeng tension sa emosyon nin mga tawo. Bilang resulta, minsan an pinakasadit na kabtang nin sosyedad, an pamilya, nalalapa.
Minsan ngani an dakol, arog ni Toff ler, nagsusuherir na paninimbagan nin tawo na “humanap nin biyong bagong mga paagi tanganing sia magin masarig asin tiwasay,” an ebidensia nagpapatunay na an mga tawo dai kayang makatao nin sadiring mga solusyon ninda.
An Solamenteng Solusyon
An Banal na Biblia, na an pagsurat dian pinonan mga 3,500 na taon na an nakaagi, dai pa nagbago sa laog nin mga dekada. An mga prinsipyo kaiyan dai nagliliwat. Halimbawa, an mga tataramon sa Jeremias 10:23 napatunayan na totoo ngonyan kisa kasuarin pa man: “Bakong sadiri nin tawo an saiyang dalan. Mayo sa tawong naglalakaw an kakayahan na giyahan an saiyang lakad.” Kun dai kayang giyahan nin mga tawo an saindang dalan, siisay an may kakayahan? Itinotokdo kan Biblia an solamenteng tunay na Gikanan nin giya: “Ako, si Jehova, an saimong Dios, an Saro na nagtotokdo saimo na pakinabangon an saimong sadiri, an Saro na nagpapangyari saimo na maglakaw sa dalan na maninigo mong lakawan.”—Isaias 48:17.
Paagi sa mga pahina kan Biblia, tinotokdoan kita ni Jehova Dios na tabangan an satong sadiri. An mga iyan pano-pano nin sadol na nagpapaheling sato kan dalan na dapat niatong lakawan. An mga hatol kaiyan arog kahalaga ngonyan kaidtong aldaw na iyan isinurat. Pag-oolayan sa minasunod na artikulo an pagigin praktikal kan Biblia para sa satuyang modernong panahon. Sa laen-laen na bagay, magpoon sa salud sagkod sa kayamanan, buhay pampamilya, asin personal na paggawe, maheheling nindo na an Biblia tunay nanggad na garo gapo kasarig sa tahaw nin bakong masarig na mga kamugtakan kan kinaban ngonyan.
[Ritrato sa pahina 4]
An Biblia sarong angkla nin kasarigan sa maribok na kinaban ngonyan