Hinihidaw Kamo!

¹ Sa panapanahon tibaad mapaltahan niato an saro o pirang mga pagtiripon sa kongregasyon, na nagsasaboot na ‘mayo man nin maghihidaw sa sako; dai ngani ninda maririparo na mayo ako duman.’ Bakong totoo iyan! Kapareho kan arin man na kabtang kan satong pisikal na hawak, an lambang saro sa sato may mahalagang marhay na papel sa pagpunsionar kan kongregasyon. (1 Cor. 12:12) An pagpalta niato sa sarong semanal na pagtiripon puedeng makaapektar sa espirituwal na ikararahay kan ibang nag-aatender. Kun kamo mayo, makasisierto kamo​—hinihidaw kamo!

² An Mahalagang Marhay na Papel Nindo: Nagmawot si Pablo na makaasosyar an saiyang mga tugang. An Roma 1:​11, 12 nagpapaliwanag kun taano: “Tanganing makawaras ako sa saindo nin espirituwal na mga balaog . . . tanganing magkaigwa nin pagriribayan nin pagparigon sa boot dian sa saindo, an lambang saro huli sa pagtubod nin iba, an saindo asin an sako man.” Kaagid kaiyan, paagi sa satong mga komento, sa satong mga kabtang sa pagtiripon, asin sa sato mismong presensia, dakol an nagigibo niato tanganing magpakinorosogkosogan sa fiel na dalan.​—1 Tes. 5:11.

³ Dai daw nindo hinihimuyawot na maheling an iba sa mga pagtiripon sa kongregasyon? Maingat nindong hinanyogon an saindang mga komento asin apresyaron an saindang mga kapahayagan nin pagtubod. An saindang espirituwal na mga balaog nagkokontribwir sa pagparigon sa saindo. Kun sinda mayo sa pagtiripon, mamamatean nindo na may importanteng bagay na kulang. Siring man kaiyan an namamatean manongod sa saindo kan saindong mga tugang na lalaki asin babae kun mayo kamo.

⁴ An Mahalagang Marhay na Papel kan mga Pagtiripon: An Torrengbantayan minsan nagkomento manongod sa pagigin mahalagang marhay kan mga pagtiripon para sa satong espirituwal na pagdadanay na buhay na nagsasabi: “Sa pano nin kariribokan, inmoral na kinaban na ini, an Kristianong kongregasyon sarong tunay na espirituwal na pailihan . . . , lugar nin katoninongan asin pagkamoot. Kun siring, magin regular na paraatender sa gabos na pagtiripon kaiyan.” (w93-BI 8/15 11) Aroaldaw, kita napapaatubang sa mga situwasyon na hinahalean kita nin kosog sa espirituwal. Kun kita bakong maingat, kita puedeng mabangkag na marhay sa satong sadiring mga kahaditan kaya tibaad malingawan na niato an mas mahalagang espirituwal na intereses. Kita minadepende sa lambang saro para sa pagparigon sa boot na kaipuhan niato tanganing magdanay na nagkakasararo asin maigot sa paglilingkod sa Dios.​—Heb. 10:​24, 25.

⁵ Mahalagang marhay an pag-atender niato sa mga pagtiripon. An helang o pagkanorongod tibaad makapogol sa sato paminsanminsan. Laen dian, kita magin determinado pirme na mapabilang sa tahaw kan tiripon na mga kadaklan na iribang nag-oomaw ki Jehova!​—Sal. 26:12.