Pagtabang sa Iba na Manodan an mga Kahagadan nin Dios
“Iyan kaipuhan na gibohon ko. Sa katotoohan, herak man sa sako kun dai ako maghulit kan maogmang bareta!”—1 CORINTO 9:16.
1, 2. (a) Sa anong may duwang kabtang na gibohon hinahagad ni Jehova na makikabtang kita? (b) Ano an dapat na manodan kan mga tawo na sadiosan an puso tanganing magin mga sakop kan Kahadean nin Dios?
SI Jehova igwa nin maogmang bareta para sa katawohan. Sia igwa nin Kahadean, asin gusto nia na madangog kan mga tawo sa gabos na lugar an manongod dian! Oras na manodan niato an maogmang bareta na ini, hinahagad nin Dios na ihiras niato iyan sa iba. May duwang kabtang na gibohon ini. Enot, kaipuhan niatong ibalangibog an maogmang bareta kan Kahadean nin Dios. Sa saiyang hula manongod sa “pagtatapos kan palakaw nin mga bagay,” si Jesus nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:3, 14.
2 An ikaduwang aspekto kan gibohon na ini may labot sa pagtotokdo sa mga naghihimate sa pagbalangibog kan Kahadean. Pakatapos na sia buhayon liwat, si Jesus nagsabi sa sarong dakulang grupo kan saiyang mga disipulo: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan palakaw nin mga bagay.” (Mateo 28:19, 20) An ‘mga bagay na ipinagboot ni Cristo’ bakong hale sa saiya; tinokdoan nia an iba na otobon an mga pagboot, o mga kahagadan, nin Dios. (Juan 14:23, 24; 15:10) An pagtotokdo sa iba na ‘otobon an mga bagay na ipinagboot ni Cristo’ sa siring may labot sa pagtabang sa sainda na manodan an mga kahagadan nin Dios. An mga tawong sadiosan an puso kaipuhan na aboton an mga kahagadan nin Dios tanganing magin mga sakop kan saiyang Kahadean.
3. Ano an Kahadean nin Dios, asin ano an gigibohon kaiyan na nagpapangyari na an mensahe nin Kahadean magin maogmang bareta?
3 Ano an Kahadean nin Dios? Asin ano an gigibohon kaiyan na nagpapangyari na an mensahe nin Kahadean magin maogmang bareta? An Kahadean nin Dios sarong langitnon na gobyerno. Iyan mahalagang marhay sa puso ni Jehova, huli ta paagi kaiyan papakangbanalon nia an saiyang ngaran, na hinahale an gabos na katuyawan dian. An Kahadean iyo an instrumentong gagamiton ni Jehova tanganing magibo an saiyang kabotan digdi sa daga kun paano sa langit. Iyan an dahelan na tinokdoan kita ni Jesus na ipamibi na dumatong logod an Kahadean nin Dios asin sinadol kita na enoton iyan sa satong buhay. (Mateo 6:9, 10, 33) Nasasabotan daw nindo kun taano ta mahalagang marhay para ki Jehova na itokdo niato sa iba an manongod sa saiyang Kahadean?
Sarong Angat Alagad Bakong Pagabat
4. Paano ikaiilustrar na an satong obligasyon na maghulit kan maogmang bareta bakong pagabat?
4 Pagabat daw na ihulit an maogmang bareta na ini? Bako nanggad! Sa pag-ilustrar: An ama igwa nin obligasyon na sustentohan an saiyang pamilya sa materyal. An dai paggibo kaini garo man sana pagsayuma sa Kristianong pagtubod. Si apostol Pablo nagsurat: “Tunay na kun an siisay man dai nagsusustento sa mga sadiri nia, asin orog na sa kairiba nia sa harong, sia nagpainda kan pagtubod asin orog pa karaot sa tawong dai nin pagtubod.” (1 Timoteo 5:8) Alagad an obligasyon daw na iyan pagabat sa sarong Kristianong lalaki? Bako kun namomotan nia an saiyang pamilya, huli ta sa kasong iyan gusto niang sustentohan sinda.
5. Minsan ngani obligasyon an paghuhulit asin paggibo nin mga disipulo, taano ta maninigo kitang maogmang makikabtang dian?
5 Sa kaagid na paagi, an paghuhulit asin paggibo nin mga disipulo sarong obligasyon, sarong kahagadan, na dian an satong buhay nakadepende. Arog kaini an pagkasabi dian ni Pablo: “Iyan kaipuhan na gibohon ko. Sa katotoohan, herak man sa sako kun dai ako maghulit kan maogmang bareta!” (1 Corinto 9:16; ikomparar an Ezequiel 33:7-9.) Minsan siring, an satong motibo sa paghuhulit pagkamoot, bako sanang paninimbagan. Sa pangenot kita namomoot sa Dios, alagad namomotan ta man an satong mga kataed, asin aram niato kun gurano kaimportante na madangog ninda an maogmang bareta. (Mateo 22:37-39) Tinatawan sinda kaiyan nin paglaom sa ngapit. Sa dai na mahahaloy itatanos kan Kahadean nin Dios an mga inhustisya, hahaleon an gabos na pan-aapi, asin ibabalik an katoninongan asin pagkasararo—an gabos para sa daing katapusan na bendisyon kan mga nagpapasakop sa matanos na pamamahala kaiyan. Dai daw kita naoogma, iyo nawiwili, na ihiras an siring na maogmang bareta sa iba?—Salmo 110:3.
6. Taano ta nag-aatubang nin tunay na angat an paghuhulit asin paggibo nin mga disipulo?
6 Kasabay kaiyan, an paghuhulit asin paggibo nin mga disipulo na ini nagtatao nin tunay na angat. An mga tawo magkakalaen. Bakong gabos igwa nin parehong mga interes o abilidad. May nagkapirang edukadong marhay, mantang an iba kakadikit kan edukasyon. An pagbasa—na kaidto sarong paboritong aling-alingan—ngonyan ibinibilang nang sarong trabaho. An termino sa Ingles na aliteracy, na tinawan nin kahulogan na “an kualidad o kamugtakan nin pagigin tataong bumasa alagad bakong interesado sa paggibo kaiyan,” sarong nagdadakulang problema, dawa sa mga nasyon na iinoorgolyo an halangkaw na kabilangan nin mga tataong bumasa asin sumurat. Kun siring, paano niato matatabangan an mga tawo na may siring kalaenlaen na pinaghalean asin interes na manodan an kahagadan nin Dios?—Ikomparar an 1 Corinto 9:20-23.
Sinangkapan nin Igo na Tumabang sa Iba
7. Paano kita sinangkapan kan “fiel asin madonong na oripon” na tabangan an iba na manodan an mga kahagadan nin Dios?
7 An mapan-angat na gibohon nagigin pasil na gibohon kun igwa kamo kan tamang mga kagamitan o kasangkapan. An sarong kagamitan na angay sa sarong partikular na trabaho ngonyan tibaad liwaton o salidahan pa ngani nuodma huli sa nagbabagong mga pangangaipo. Iyan nakaaagid sa sugo sa sato na ibalangibog an mensahe manongod sa Kahadean nin Dios. Sa nag-aging mga taon, “an fiel asin madonong na oripon” nagtagama sa sato kan kinakaipo nanggad na mga kagamitan, mga publikasyon na espesyalmenteng dinisenyo para magamit sa pagkondukta nin mga pag-adal sa Biblia sa harong. (Mateo 24:45) Sa siring kita sinangkapan na tabangan an mga tawo kan “gabos na nasyon asin tribo asin . . . tataramon” na manodan an mga kahagadan nin Dios. (Kapahayagan 7:9) Sa panapanahon, itinatao an bagong mga instrumento tanganing mapanigoan an nagbabagong mga pangangaipo sa langtad kan kinaban. Estudyaran niato an nagkapirang halimbawa.
8. (a) Ano an nagin kabtang kan librong “Mamidbid Logod na an Dios Totoo” sa pagpaoswag kan edukasyon sa Biblia? (b) Anong instrumento para sa pag-adal sa Biblia an itinao kan 1968, asin paano iyan espesyalmenteng dinisenyo? (c) Paano nakatabang an librong Katotoohan sa paggibo nin mga disipulo?
8 Poon 1946 sagkod 1968, an librong “Mamidbid Logod na an Dios Totoo” ginamit bilang sarong mapuersang instrumento para sa pag-edukar sa Biblia, asin mga 19,250,000 na kopya an ipinublikar sa 54 tataramon. Ilinuwas kan 1968, an librong An Katotoohan na Minagiya Pasiring sa Buhay na Daing Sagkod epektibong ginamit sa dakol na taon sa pag-adal sa Biblia kaiba an mga interesado. Kaidto, komon na para sa nagkapira na makipag-adal sa Mga Saksi ni Jehova sa dakol na taon na dai nababautismohan. Alagad an instrumentong ini dinisenyo na ilabot an estudyante, na pinaririgon an saiyang boot na iaplikar an saiyang nanonodan. An resulta? An librong Jehovah’s Witnesses—Proclaimers of God’s Kingdom nagsasabi: “Sa laog kan tolong taon nin paglilingkod na nagpoon kan Setyembre 1, 1968, asin natapos kan Agosto 31, 1971, an total na 434,906 katawo nabautismohan—labing doble kan nabautismohan sa nakaaging tolong taon nin paglilingkod!” Poon kan iyan iluwas, an librong Katotoohan nagkaigwa nin makangangalas na distribusyon—labing 107,000,000 sa 117 tataramon.
9. Anong espesyal na kabtang an yaon sa librong Mabuhay Sagkod Lamang, asin nagkaigwa iyan nin anong epekto sa mga parabalangibog kan Kahadean?
9 Kan 1982 an librong Puwede Kamong Mabuhay Sagkod Lamang sa Paraiso Digdi sa Daga nagin pangenot na librong ginagamit sa pagkondukta nin mga pag-adal sa Biblia. An kagamitan na ini igwa nin labing 150 ilustrasyon, na an kada saro may makahulogan na paliwanag na sa halipot nagtatampok kan nagtotokdong punto kan mga retrato. An Pebrero 1983 na isyu kan An Satong Ministeryo sa Kahadean nagsabi: “Sa laog kan mga 20 taon na an ‘Mamidbid Logod na an Dios Totoo’ an satong pangenot na librong pinag-aadalan (poon 1946 sagkod sa kabangaan kan mga 1960) labing 1,000,000 na bagong parabalangibog kan Kahadean an nakadugang sa sato. Dangan 1,000,000 pang parahayag an nakadugang kan An Katotoohan na Minagiya Pasiring sa Buhay na Daing Sagkod magin an satong pangenot na librong pinag-aadalan pakatapos na iyan iluwas kan 1968. Sa paggamit kan satong bagong librong pag-aadalan, an Puwede Kamong Mabuhay Sagkod Lamang sa Paraiso Digdi sa Daga, makakaheling daw kita nin kaparehong pagdakol kan mga parahayag sa Kahadean? Segurado, kun ini an kabotan ni Jehova!” Malinaw na idto kabotan ni Jehova, huli ta poon 1982 sagkod 1995, labing 2,700,000 an nakadugang sa mga parabalangibog kan Kahadean!
10. Anong bagong kagamitan an itinao kan 1995, asin taano ta papangyayarihon kaiyan an mga estudyante sa Biblia na magkaigwa nin medyo marikas na espirituwal na pag-oswag?
10 “An anihon mahiwas, alagad an mga paraani kakadikit,” sabi ni Jesus. (Mateo 9:37) An anihon mahiwas nanggad. Kadakol na kaipuhan pang gibohon. Sa nagkapirang kadagaan an mga tawo kaipuhan na magpalista kaiba kan mga naghahalat nin pag-adal sa Biblia. Kaya sa katuyohan na ilakop an kaaraman manongod sa Dios nin mas marikas, kan 1995 “an fiel asin madonong na oripon” nagtao nin sarong bagong kagamitan, an 192 na pahinang libro na may titulong Kaaraman na Minagiya Pasiring sa Buhay na Daing Katapusan. An mahalagang instrumentong ini dai nagkokonsentrar sa falsong mga doktrina. Iinaatubang kaiyan an mga katotoohan sa Biblia sa positibong paagi. Linalaoman na iyan mapangyari sa mga estudyante sa Biblia na magkaigwa nin medyo marikas na espirituwal na pag-oswag. An librong Kaaraman nagkakaigwa na nin epekto sa langtad kan kinaban na igwa nang naimprentang 45,500,000 na kopya sa 125 tataramon asin tinatradusir sa 21 dugang pang tataramon sa presente.
11. Anong epektibong kagamitan an itinao tanganing tabangan an mga dai tataong bumasa asin sumurat o mga maluyang bumasa, asin paano iyan nakakontribwir na marhay sa satong pambilog na kinaban na programa sa pagtotokdo?
11 Sa panapanahon, ‘an fiel na oripon’ nagtatao nin mga kagamitan na dinisenyo para sa sarong espesipiko o limitadong parabasa. Halimbawa, kumusta an mga tawong tibaad nangangaipo nin espesyal na tabang huli sa saindang pinaghalean na kultura o relihion? Paano niato sinda tatabangan na manodan an mga kahagadan nin Dios? Kan 1982 naresibi niato an satong kaipuhan talaga—an 32 na pahina na brosyur na Enjoy Life on Earth Forever! An pano nin ilustrasyon na publikasyon na ini nagin epektibong kagamitan sa pagtotokdo sa mga dai tataong bumasa asin sumurat o daing gayo tataong bumasa. Iyan igwa nin simpleng marhay asin pasil saboton na pag-atubang kan pundamental na mga katokdoan sa Kasuratan. Poon kan iyan iluwas, an brosyur na Life on Earth nakakontribwir na marhay sa satong pambilog na kinaban na programa sa pagtotokdo. Labing 105,100,000 na kopya an naimprenta sa 239 tataramon, na nagpapangyari na iyan magin an publikasyon kan Watch Tower Society na trinadusir sa pinakadakol na tataramon sagkod sa panahon na ini!
12, 13. (a) Poon kan 1990, anong bagong paagi an itinao kan ‘fiel na oripon’ tanganing maabot an mga tawo sa dakol na lugar? (b) Paano niato magagamit an mga video kan Sosyedad sa satong ministeryo sa langtad? (c) Anong bagong kagamitan an itinao dai pa sana nahahaloy tanganing makatabang sa satong paggibo nin mga disipulo?
12 Dugang pa sa inimprentang mga publikasyon, poon kan 1990 ‘an fiel na oripon’ nagtao sa sato nin paagi nin pagtotokdo na nag-aalok nin bagong paagi na aboton an mga tawo sa dakol na lugar—an mga videocassette. Kan Oktubre kan taon na idto, an 55 minutos an lawig na video na Jehovah’s Witnesses—The Organization Behind the Name ilinuwas—an kaenot-enoteng video na prinodusir kan Watch Tower Society. An magayon, nakapagtotokdong presentasyon, na makukua sa 35 tataramon, nagpapaheling kan pambilog na kinaban na organisasyon kan dusay na banwaan ni Jehova na nag-ootob kan pagboot ni Jesus na ibalangibog an maogmang bareta sa bilog na daga. An video espesyalmenteng dinisenyo na makatabang sa satong paggibo nin mga disipulo. An mga parahayag kan Kahadean tolos-tolos na ginamit an bagong kagamitan na ini sa ministeryo sa langtad. An nagkapira dara-dara iyan sa saindang bag na laagan nin libro, na perming andam na ipaheling o ipasubli iyan sa interesadong mga tawo. Dai nahaloy pakatapos na iyan iluwas, an sarong nagbibiaheng paraataman nagsurat: “An mga video nagin paagi na aboton an isip asin puso kan minilyon na tawo sa ika-21 siglo, kaya linalaoman ta na an video na ini magigin enot sana sa dakol pang video na gagamiton kan Sosyedad sa pagpaoswag kan pan-Kahadean na gibohon sa bilog na kinaban.” Tunay nanggad, itinao an dugang pang mga video, kabale na an may tolong kabtang na serye na The Bible—A Book of Fact and Prophecy asin Jehovah’s Witnesses Stand Firm Against Nazi Assault. Kun an mga video kan Sosyedad makukua sa saindong tataramon, ginamit na daw nindo an mga iyan sa saindong ministeryo sa langtad?a
13 Dai pa sana nahahaloy itinao an sarong bagong kagamitan, an brosyur na Ano an Kahagadan sa Sato nin Dios?, tanganing makatabang sa satong paggibo nin mga disipulo. Taano iyan ta ipinublikar? Paano iyan gagamiton?
Pagsiyasat sa Sarong Bagong Kagamitan
14, 15. Para kiisay dinisenyo an brosyur na Kahagadan, asin ano an laog kaiyan?
14 An bagong publikasyon na Ano an Kahagadan sa Sato nin Dios? dinisenyo para sa mga tawo na nagtutubod na sa Dios asin iginagalang an Biblia. An nagbibiaheng mga paraataman siring man an sinanay sa Gilead na mga misyonero na may dakol na taon na eksperyensia sa nagpoprogreso pa sanang kadagaan nagtabang sa pag-andam kan brosyur na ini. Igwa iyan nin kompletong kurso sa pag-adal, na kinokobrehan an pundamental na mga katokdoan kan Biblia. An ginamit na tataramon mainit, simple, asin direkta. Kadungan kaiyan, an materyal bakong sobra kasimple. Iyan nag-aatubang nin bako sanang “gatas” kundi siring man “matagas na kakanon” hale sa Tataramon nin Dios sa paagi na masasabotan kan kadaklan na tawo.—Hebreo 5:12-14.
15 Sa dai pa sana nahahaloy na mga taon an mga parahayag kan Kahadean sa manlaenlaen na kadagaan naghagad nin siring nanggad kaiyan na publikasyon. Halimbawa, an sanga kan Watch Tower Society sa Papua New Guinea nagsurat: “An mga tawo nariribong sa nagkokorontrahan na mga katokdoan nin relihion. Sinda nangangaipo nin diretso sa puntong mga kapahayagan nin katotoohan, na suportado nin nagkapirang teksto sa Biblia na puede nindang helingon sa saindang sadiring Biblia. Kaipuhan ninda an malinaw asin espesipikong pag-atubang kun ano an kahagadan nin Dios sa tunay na mga Kristiano asin kun arin na mga kostumbre asin paggawe an dai nia inaako.” An brosyur na Kahagadan an talagang kaipuhan niato tanganing tabangan an mga siring na manodan an mga kahagadan nin Dios.
16. (a) Siisay partikularmente an puedeng makinabang sa simpleng mga paliwanag sa bagong brosyur? (b) Paano puedeng makinabang an mga yaon sa saindong teritoryo sa brosyur na Kahagadan?
16 Paano nindo puedeng gamiton an bagong instrumentong ini? Enot, iyan puedeng gamiton sa pakipag-adal sa mga tawo na nasasakitan na bumasa o daing gayo nasosonoan an pagbasa.b An siring na mga indibiduwal puedeng makinabang sa simpleng mga paliwanag sa brosyur. Pakatapos na repasohon an enot na kopya kan publikasyon na ini, an mga sanga kan Watch Tower nagsurat kan minasunod: “An brosyur magigin kapakipakinabang sa dakol na parte kan nasyon kun saen an mga tawo daing gayo nasosonoan na magbasa nin dakol.” (Brazil) “Dakol na dayo an dai tataong bumasa kan sadiri nindang tataramon asin nadedepisilan pang bumasa nin Pranses. An brosyur na ini puedeng gamiton na pantabang sa pakipag-adal sa mga siring.” (Pransia) Makaiisip daw kamo nin mga tawo sa saindong teritoryo na tibaad makinabang sa brosyur na Kahagadan?
17. Paano puedeng magin kapakipakinabang an bagong brosyur sa dakol na kadagaan, asin taano?
17 Ikaduwa, sa dakol na kadagaan an brosyur magagamit sa pagpoon nin mga pag-adal sa Biblia sa mga tawong may takot sa Dios ano man an inabot nindang edukasyon. Siempre, maninigong gumibo nin paghihingoa na maponan an pag-adal sa librong Kaaraman na Minagiya Pasiring sa Buhay na Daing Katapusan. Alagad sa nagkapirang kaso tibaad mas pasil na ponan an pag-adal sa sarong brosyur. Dangan sa igong panahon, an pag-adal maninigong ibalyo sa librong Kaaraman, an satong pangenot asin mas gustong pantabang sa pag-adal. Manongod sa paggamit na ini kan brosyur na Kahagadan, an mga sanga kan Watch Tower nagsurat: “An pagpoon nin mga pag-adal sa Biblia masakit, asin an mga oportunidad na makapoon nin sarong pag-adal garo mas marahay kun an mga parahayag nagpopoon sa sarong brosyur.” (Alemania) “An brosyur na siring kaini magigin pinakaepektibo sa pagpoon nin bagong mga pag-adal sa Biblia, na puedeng ipadagos sa librong Kaaraman.” (Italia) “Minsan ngani halangkaw an edukasyon kan mga Hapon, an kadaklan limitadong marhay an kaaraman sa Biblia asin sa pundamental na mga katokdoan kaiyan. An brosyur magigin sarong marahay na tangga pasiring sa librong Kaaraman.”—Hapon.
18. Ano an maninigo niatong girumdomon manongod sa pag-abot sa mga kahagadan nin Dios?
18 An mga sanga kan Sosyedad sa palibot kan kinaban naghagad kan brosyur na ini, asin itinao an pagtogot na iyan itradusir sa 221 tataramon. Logod na an bagong publikasyon na ini magin kapakipakinabang sa pagtabang sa sato na tabangan an iba na manodan an kahagadan ni Jehova Dios sa sainda. Sa kabtang niato, girumdomon niato na an pag-abot sa mga kahagadan nin Dios, kabale an pagboot na maghulit asin gumibo nin mga disipulo, nagtatao sa sato nin mahalagang marhay na oportunidad na ipaheling ki Jehova kun gurano niato sia kanamomotan. Iyo, an kahagadan nin Dios sa sato bakong pagabat. Iyan an pinakamarahay na paagi na mabuhay!—Salmo 19:7-11.
[Mga Nota sa Ibaba]
a An librong Jehovah’s Witnesses—Proclaimers of God’s Kingdom nagsasabi: “An mga videocassette bako nanggad na pansalida sa babasahon o personal na pagpatotoo. An mga publikasyon kan Sosyedad padagos na may mahalagang kabtang sa pagpalakop kan maogmang bareta. An pagharongharong kan Mga Saksi ni Jehova nagpapadagos na sarong marigon an basehan sa Kasuratan na kabtang kan saindang ministeryo. Minsan siring, an mga videocassette suplemento dian ngonyan bilang mahalagang mga kagamitan sa pagkultibar nin pagtubod sa mahalagang marhay na mga panuga ni Jehova asin pagpukaw nin pag-apresyar sa saiyang ipinagigibo sa daga sa satong aldaw.”
b Para sa paliwanag kun paano makondukta nin pag-adal sa brosyur na Kahagadan, helingon an artikulo na “Sarong Bagong Kagamitan na Matabang sa mga Tawo na Manodan an mga Kahagadan nin Dios,” sa pahina 16-17.
Ikapaliliwanag daw Nindo?
◻ Sa anong may duwang kabtang na gibohon hinahagad ni Jehova na makikabtang an saiyang mga lingkod?
◻ Taano an satong obligasyon na maghulit asin gumibo nin mga disipulo ta bakong pagabat para sa sato?
◻ “An fiel asin madonong na oripon” nagtao nin anong mga kagamitan na magagamit niato sa satong paghuhulit asin paggibo nin mga disipulo?
◻ Para kiisay dinisenyo an brosyur na Kahagadan, asin paano niato iyan gagamiton sa satong ministeryo?
[Retrato sa pahina 24]
An satong paghuhulit asin paggibo nin mga disipulo bakong pagabat
[Mga retrato sa pahina 26]
“Mamidbid Logod na an Dios Totoo” (1946, rinebisar kan 1952): 19,250,000 sa 54 tataramon (Ipinaheheling an Ingles)
“An Katotoohan na Minagiya Pasiring sa Buhay na Daing Sagkod” (1968): 107,000,000 sa 117 tataramon (Ipinaheheling an Pranses)
“Puwede Kamong Mabuhay Sagkod Lamang sa Paraiso Digdi sa Daga” (1982): 80,900,000 sa 130 tataramon (Ipinaheheling an Ruso)
“Kaaraman na Minagiya Pasiring sa Buhay na Daing Katapusan” (1995): 45,500,000 sa 125 tataramon (Ipinaheheling an Aleman)