Tabangan na Makasabot an mga Daing Kabatidan
1 Sa satong paggibo nin mga disipulo, tinotokdoan niato an iba kan kahagadan nin Dios sa sainda. (Mat. 28:19, 20) An kapangganahan sa gibohon na ini dai nasosokol paagi sa oras na ginamit, ikinapasakamot na babasahon, o naponan na mga pag-adal sa Biblia. Nagigibo niato an satong katuyohan kun nasasabotan asin minahiro an mga tawo sono sa saindang nanonodan.
2 An pagtabang sa iba sa espirituwal kalabot an ‘pagpasabot sa mga daing kabatidan.’ (Sal. 119:130) Natataros an mga puso asin namomotibar sana an mga tawo kun ‘nasasabotan ninda iyan.’ (Mat. 15:10) Mantang naghihiwas an satong gibohon, orog niatong nasasabotan an pangangaipo na magtaram asin magtokdo nin simple. Iyan an dahelan kun taano ta ipinublikar kan Sosyedad an brosyur na Ano an Kahagadan sa Sato nin Dios? Halipot an mga leksion, bakong komplikado an mga tataramon, asin pasil na masabotan an itinotokdo.
3 Itatampok an brosyur na ini kaiba an mga magasin ngonyan na bulan nin Abril asin sa Mayo. Irinerekomendar na iareglo nindong ialok an mga magasin na parateng ginigibo kun mga Sabado alagad itampok an brosyur sa ibang mga aldaw kan semana. Darahon an brosyur sa mga tawo na nag-ako nin babasahon kan nakaagi. Girumdomon na iyan nangorognang magigin kapakipakinabang sa pagtokdo sa mga aki asin sa mga limitado an abilidad sa pagbasa.
4 Gumamit nin Simpleng Pagdolok: Kun iinaatubang an brosyur na Kahagadan, buksan sa pahina 2, na dian ipinaliliwanag kaiyan na “an pulyetong ini dinisenyo bilang kurso sa pag-adal sa Biblia.” Itokdo an parapo 3 na nasa pahina 3 tangani na ipaheling kun taano an saro ta kaipuhan na mag-adal sa Biblia. Pukawon an saiyang interes sa nagkapira kan titulo kan mga leksion na naghahayag kan simpleng mga katotoohan sa Biblia. Idemonstrar kun paano ginigibong maogma kan brosyur na ini an pag-adal, asin alokon na personal siang tatawan nin tabang.
5 Magkondukta nin Progresibong Pag-adal: An satong pasohan iyo na gumibo nin labi pa kisa sa pagkondukta sana nin mga pag-adal—boot niatong gumibo nin mga disipulo na magigin marigon na mga parasuportar nin tunay na pagsamba. Puedeng matapos an brosyur sa laog nin pira sanang semana asin maninigong darahon tolos sa pag-adal sa librong Kaaraman. (Helingon an nota sa ibaba na nasa pahina 31.) Tolos-tolos sa pagpoon, tabangan an estudyante na mamidbid an organisasyon ni Jehova. (Helingon an librong Reasoning, pahina 283-4.) Idoon an halaga kan mga pagtiripon sa kongregasyon, asin ipaliwanag na an pag-atender dian nagtatao nin kompletong pakasabot sa kun paano magibo nin tunay na pagsamba.—Heb. 10:24, 25.
6 An lubos na pakikikabtang sa espesyal na gibohon na ini ngonyan na Abril asin sa Mayo magtatao sa sato nin kagayagayahan mantang tinatabangan niato an mga sinsero na ‘magkua nin pakasabot’ na minagiya pasiring sa buhay.—Tal. 4:5.