An Gibohon na Pinakaimportante
1. An satong hararom na apresasyon sa ministeryo mapahiro sa sato na gumibo nin anong mga sakripisyo?
1 Taano ta regular kitang dinadagka na gamiton an satong panahon, kosog, asin mga rekurso sa ministeryo? Huling mayo na nin ibang gibohon na mas importante! An paghorophorop sa dakulang mga epekto kaiyan mapakosog kan satong pagmawot na makikabtang sa gibohon na ini na nungka nang maootro.—Gibo 20:24.
2. Paano nakakatabang an satong paghuhulit sa pagpakangbanal sa dakulang ngaran ni Jehova?
2 Pinapakangbanal an Ngaran ni Jehova: Idinodoon kan paghuhulit na an Kahadean ni Jehova paagi ki Cristo Jesus iyo an masalida sa gabos na gobyerno nin tawo asin maresolber sa gabos na problema nin katawohan. (Mat. 6:9, 10) Ibinabantog kaiyan an kadakulaan ni Jehova bilang an solamenteng makakapagligtas sa sato sa helang asin kagadanan. (Isa. 25:8; 33:24) Huling dara niato an saiyang ngaran, tibaad pamurawayon sia kan mga nakakamasid kan satong marahay na paggawe asin kaigotan. (1 Ped. 2:12) Nakakakontento nanggad na ipamidbid niato sa bilog na daga an ngaran kan Soberanong Kagurangnan na Jehova!—Sal. 83:18.
3. Anong mga bendisyon an aakoon kan mga naghihimate sa mensahe kan Kahadean?
3 Nagliligtas nin Buhay: Si Jehova ‘dai nagmamawot na an siisay man malaglag kundi mawot nia na an gabos makapagsolsol.’ (2 Ped. 3:9) Pero, kun mayo nin magtotokdo sa mga tawo, paano pa daw ninda maaaraman kun ano an ibinibilang ni Jehova na angay o bakong angay na paggawe? (Jon. 4:11; Roma 10:13-15) Kun naghihimate an mga indibiduwal sa maogmang bareta, minarahay an kalidad kan saindang buhay mantang binabayaan ninda an nakakadanyar na mga gibo. (Miq. 4:1-4) Apuera kaini, nagkakaigwa sinda kan magayagayang paglaom na buhay na daing katapusan. An satong aktibong paghuhulit asin pagtotokdo magliligtas sa sato asin sa mga naghihinanyog sa sato. (1 Tim. 4:16) Dakulaon nanggad an satong onra na makikabtang sa pinakaimportanteng gibohon na ini!
4. Taano ta dapat na aktibo kitang nakikikabtang sa paghuhulit kan Kahadean asin paggibo nin mga disipulo?
4 Dai na mahahaloy, biglang tataposon kan dakulang kahorasaan an bakong matanos na kinaban na ini. An mga yaon sa kampi ni Jehova makakaligtas. Huli kaini, an paghuhulit asin paggibo nin mga disipulo iyo an pinakaapurado, pinakaimportante, asin pinakakapakipakinabang na gibohon na nangyayari ngonyan. Gibohon niato iyan na pangenot sa satong buhay!—Mat. 6:33.