Epektibong Konklusyon

TIBAAD maingat nindong siniyasat asin inorganisar an materyales para sa mayor na parte kan saindong pahayag. Tibaad nag-andam man kamo nin introduksion na nakapupukaw nin interes. Pero, may saro pang kaipuhan​—an epektibong konklusyon. Dai pagpasaditon an halaga kaiyan. An huri nindong sinabi parate na iyong pinakahaloy na nagigirumdoman. Kun maluya an konklusyon, tibaad pati an naenot na mga iinatubang mawaran kan dakulang epekto kaiyan.

Estudyare an minasunod: Sa paghinanapos kan saiyang buhay, si Josue nagtao nin dai malilingawan na diskurso sa kamagurangan na lalaki kan nasyon nin Israel. Pakasaysayan kan tratamiento ni Jehova sa Israel poon kan kaaldawan ni Abraham, inotro sana daw na sabihon ni Josue an tampok na mga kabtang bilang sumaryo? Dai. Imbes, may makosogon na pagsaboot na sinadol nia an banwaan: “Matakot kamo ki Jehova asin paglingkodan sia nindo nin daing sala asin sa katotoohan.” Basaha mismo nindo an konklusyon ni Josue na nasusurat sa Josue 24:14, 15.

An saro pang pahayag na mahalagang mangnohon, na yaon sa Gibo 2:14-​36, itinao ni apostol Pedro sa sarong kadaklan sa Jerusalem sa Kapiestahan nin Pentecostes kan 33 C.⁠E. Enot iineksplikar nia na naheheling ninda an kaotoban kan hula ni Joel mapadapit sa pagbubo kan espiritu nin Dios. Sumunod ipinaliwanag nia kun paano ini konektado sa Mesiyanikong mga hula sa Salmo na naghula kan pagkabuhay liwat ni Jesu-Cristo asin kan pagpamuraway sa saiya sa too nin Dios. Dangan, sa konklusyon nia, malinaw na sinabi ni Pedro an isyu na kaipuhan na atubangon kan lambang saro sa mga nagdadangog sa saiya. Sabi nia: “Kun siring maaraman logod kan bilog na kamag-anakan nin Israel na may kasiertohan na ginibo sia nin Dios na magin Kagurangnan sagkod Cristo, an Jesus na ini na saindong ipinako.” Naghapot an mga yaon: “Mga lalaki, mga tugang, ano an gigibohon mi?” An simbag ni Pedro: “Magsorolsol kamo, asin an lambang saro logod sa saindo mabautismohan sa ngaran ni Jesu-Cristo.” (Gibo 2:37, 38) Kan aldaw na idto mga 3,000 sa mga nagdadangog sa saiya, na napahirong marhay kan nadangog ninda, an maogmang nag-ako kan katotoohan manongod ki Jesu-Cristo.

Mga Puntong Dapat Isaisip. An sasabihon nindo sa saindong konklusyon maninigo na direktamenteng konektado sa pinakatema kan saindong pahayag. Iyan maninigo na kasunod bilang lohikong konklusyon sa prinsipal na mga punto na saindong ipinaliwanag. Minsan tibaad gusto nindong iiba an nagkapirang terminong makahulogan hale sa pinakatema nindo, opsional kun baga iyan direkta nindong sasabihon giraray.

Sa ordinaryong kamugtakan, an katuyohan nindo sa pagtaram enkaminaron an iba na gumibo nin aksion basado sa impormasyon na iinaatubang nindo. An saro sa prinsipal na mga katuyohan kan konklusyon itokdo sa sainda an dapat na gibohon. Kan pilion nindo an pinakatema nindo asin an prinsipal na mga punto, maingat daw nindong inestudyaran kun taano ta magigin importante sa mga magdadangog sa saindo an materyales asin kun ano an magigin obheto nindo sa pagpahayag kaiyan? Kun iyo, aram nindo an aksion na gusto nindong gibohon ninda. Ngonyan kaipuhan na ieksplikar nindo kun ano an aksion na iyan asin tibaad kun paano ninda iyan gigibohon.

Apuera sa pagtokdo sa mga nagdadangog sa saindo kun ano an gigibohon, an konklusyon nindo maninigong magtao nin motibasyon. Dapat na iyan may kaibang marahay na mga dahelan sa paggibo nin aksion asin puede man na mga pakinabang na ibubunga kan paggibo kaiyan. Kun maingat na inisip asin marahay an pagkasabi kan ultimong sentence, dudugangan kaiyan nin puersa an entero nindong pahayag.

Girumdomon na patapos na an pahayag. Iyan maninigong iparisa kan sinasabi nindo. Maninigo na tama man an rikas nindo. Dai magtaram nin marikason sagkod sa katapusan dangan bigla na sanang pumondo. Sa ibong na lado, dai man basta na sana paluwayon an boses nindo. An kosog kan boses nindo maninigong supisyente alagad bakong sobra. An huring pirang sentence nindo maninigo na magkaigwa nin tono nin pagtatapos. An pagpahayag nindo kaiyan maninigong magparisa nin pagigin odok asin nin kombiksion. Kun inaandam an saindong pagpahayag, dai paglingawan na ensayohon an saindong konklusyon.

Gurano dapat kalawig an konklusyon? Iyan dai sana madedeterminaran kan relo. Dai maninigong maghaloy an konklusyon. An pagigin tama kan lawig kaiyan madedeterminaran kan epekto kaiyan sa mga nagdadangog. Pirmeng inaapresyar an simple, direkta, positibong konklusyon. An medyo mas halawig na may halipot na ilustrasyon puede man na magin epektibo kun iyan maingat na plinano. Ikomparar an halipot na konklusyon sa enterong libro nin Eclesiastes, na yaon sa Eclesiastes 12:13, 14, sa mas halipot na Sermon sa Bukid, na nasusurat sa Mateo 7:24-​27.

Sa Ministeryo sa Langtad. Mayo na nin ibang lugar na kamo mas parateng mapapaatubang sa pangangaipo nin konklusyon kisa sa ministeryo sa langtad. Paagi sa pag-andam asin mamomoton na interes sa mga tawo, dakulang karahayan an magigibo nindo. An hatol na itinao sa naeenot na mga pahina ikaaaplikar nin kapakipakinabang dawa kun ibinabagay sa kamugtakan na saro sana an kaolay.

Puedeng halipoton an orolay. Tibaad sibot an tawo. Tibaad saro sanang minuto an bilog nindong pagsongko. Kun angay, puede nindong sabihon an arog kaini: “Nasasabotan ko po. Alagad itogot nindo na walatan ko kamo nin sarong nakaparirigon sa boot na punto. Ipinaheheling kan Biblia na an satong Kaglalang may marahayon na katuyohan​—gibohon an dagang ini na lugar na dian puedeng masiraman sa buhay an mga tawo sagkod lamang. Puede kitang mapasa Paraisong iyan, alagad kaipuhan na maaraman niato an mga kahagadan nin Dios.” O puede kamong mag-opresir sana na bumalik sa mas kombenyenteng oras.

Kun napondo an pagsongko ta an kagharong biglang pinutol an orolay​—o bastos pa ngani—​may magigibo pa man giraray na dakulang karahayan. Girumdoma an hatol na yaon sa Mateo 10:12, 13 asin Roma 12:17, 18. An mahoyo nindong simbag tibaad makaliwat sa opinyon nia manongod sa Mga Saksi ni Jehova. Iyan sarong marahay na bagay na nagibo.

Sa ibong na lado, tibaad nagin nakakokontento an pakikipag-olay nindo sa kagharong. Taano ta dai sabihon giraray an prinsipal na punto na gusto nindong magirumdoman nia? Ibanan nin pagmotibar na aksionan nia iyan.

Kun may naheheling kamong oportunidad na mag-orolay pa sa ibang panahon, tawan nin dahelan an tawo na antisiparon iyan. Maghapot​—puedeng hapot na tinotokar sa Reasoning From the Scriptures o sa publikasyon para sa pag-adal sa Biblia. Isaisip an pasohan nindo, na sinabi ni Jesus asin nasusurat sa Mateo 28:19, 20.

Tinatapos daw nindo an sarong pag-adal sa Biblia? An pagsabi giraray kan pinakatema matabang sa inaadalan na magirumdoman an tinokar. An paggamit nin mga hapot sa pagrepaso makatatabang na ikatudok sa isip kan inaadalan an mayor na mga punto, nangorogna kun dai hinihidali an repaso. An hapot mapadapit sa kun paano an pinag-adalan mapakikinabangan kan inaadalan o kun paano nia iyan ikapaaabot sa iba makatatabang sa saiya na mag-isip-isip kun manongod sa praktikal na paggamit kan saiyang nanodan.​—Tal. 4:7.

Girumdoma​—impluwensiado kan konklusyon nindo an pagigin epektibo kan enterong pagtokar nindo.