An Satong mga Pandistritong Kombension—Mapuersang Patotoo sa Katotoohan
1. An mga kapiestahan nagtaong oportunidad sa mga Israelita na horophoropon asin pag-olayan an anong mahahalagang espirituwal na katotoohan?
1 An suanoy na mga Israelita tolong beses sa sarong taon na nagtitiripon para sa mga kapiestahan. Dawa ngani mga lalaki sana an obligadong mag-atender, sa parate bilog na pamilya an nagpapa-Jerusalem para sa darakulang pagtiripon na ini. (Deut. 16:15, 16) An mga okasyon na iyan nagtaong oportunidad na horophoropon asin pag-olayan an mahahalagang espirituwal na katotoohan. Ano an nagkapira sa katotoohan na ini? An saro iyo na si Jehova bukas-palad asin mamomoton na Paratao. (Deut. 15:4, 5) An saro pa iyo na sia masasarigan para sa paggiya asin proteksion. (Deut. 32:9, 10) Puede man na horophoropon kan mga Israelita na bilang banwaan para sa ngaran ni Jehova, dapat nindang ipabanaag nin tama an katanosan nia. (Deut. 7:6, 11) Nakikinabang man kita ngonyan sa taonan na pandistritong kombension.
2. Paano an programa sa pandistritong kombension nagtataong liwanag sa katotoohan?
2 An Programa Nagtataong Liwanag sa Katotoohan: Sa kombension niato, may mga pahayag, drama, demonstrasyon, asin interbio na nagtataong liwanag sa mahahalagang marhay na katotoohan sa Biblia. (Juan 17:17) An organisasyon ni Jehova nag-andam nin programa na espesipikong dinisenyo tanganing tawan nin atension an pangangaipo ngonyan kan mga tawo sa bilog na kinaban. (Mat. 24:45-47) Gustong-gusto na daw nindong mahiling asin madangog an mga ipepresentar?
3. Ano an dapat tang gibohon tanganing makinabang sa programa?
3 Siempre, makikinabang sana kita kun kita presente asin maghihinanyog na marhay sa bilog na tolong aldaw. Kun dai pa nindo nagibo, kaolayon na nindo an saindong among dapit sa bakasyon sa trabaho. Siertohon nindo na may supisyente kamong torog kada banggi tanganing magin atentibo durante kan programa. An pagpokus kan mata sa nagpapahayag asin pagkua nin haralipot na nota nakakatabang sa dakol na magdanay na atentibo. Dai dapat makadisturbo sa saindo o sa iba an cell phone nindo. Durante kan programa, likayan an pakiestoryahan asin pag-text, saka pagkakan o pag-inom—kun bakong huli sa medikal na dahilan o mainit na panahon.
4. Paano matatabangan nin mga magurang an mga aki na makinabang sa kombension?
4 Sa mga taon nin Sabbath, kun nagtitiripon an mga pamilyang Israelita tanganing magdangog kan pagbasa sa Ley sa Kapiestahan nin mga Payag-Payag, kaiba ninda an saradit na ‘aki tanganing maghinanyog asin mag-adal.’ (Deut. 31:12) Nakakaparigon nanggad na mahiling an mga pamilya na magkataraed sa kombension asin an saradit na aki na nagdadanay na mata asin naghihinanyog na marhay! Kada banggi, taano ta dai hilingon an nota nindo asin iribang pag-olayan an mga punto na nagustohan nindong marhay sa programa? “An kakablasan nagagakot sa puso kan barobata,” kaya maninigong bantayan nin mga magurang an mga aki pati an mga tin-edyer na, kun pahingalo sa udto asin kun nasa dinadagosan ninda, imbes na ‘pabayaan’ sinda.—Tal. 22:15; 29:15.
5. Paano nasasamnohan an katotoohan huli sa satong paggawe, pagbado asin pagpakarhay sa sadiri mantang nasa lugar kan kombension?
5 Nasasamnohan an Katotoohan Huli sa Marahay na Paggawe Niato: Nasasamnohan an katotoohan huli sa marahay na paggawe niato sa kombension. (Tito 2:10) Kun nakakabit sa bado an badge card niato, bako sanang ikinakapaisi kaini an kombension asin namimidbid kita nin ibang delegado kundi nakakatao man ini nin patotoo sa mga nagmamasid. Maoobserbaran nin mga tawo sa lugar kan kombension na malinig asin mabini magbado an mga may badge card, bakong arog sa daing kahusayan saka mapang-akit na estilo na komun sa kinaban. (1 Tim. 2:9, 10) Kun siring, maninigo tang tawan nin atension an pagbado asin pagpakarhay sa sadiri mantang nasa lugar kan kombension. Dawa kun sa istadyum gigibohon an kombension, maninigong may dignidad an bado niato. Kun pagkatapos kan programa masangli kita huling makakan kita sa restawran, maninigo tang girumdomon na delegado pa man giraray kita asin dai dapat magbado nin sobra kaimpormal.
6. Ano an sarong paagi na makikinabang kita sa satong Kristianong pagkasararo durante kan kombension?
6 Sa mga kapiestahan kan mga Israelita, nagkaigwa sinda nin nakakapakusog na pakikiasosyar sa mga kapwa parasamba hale sa ibang parte kan nasyon asin kinaban, saka orog ining nakapagpasararo sa sainda. (Gui. 2:1, 5) Durante kan kombension, nahihiling nanggad kan gabos an satong daing kaagid na Kristianong kasararoan nin magturugang. An magayon na aspektong ini kan espirituwal na paraiso parateng hinahangaan nin mga nagmamasid. (Sal. 133:1) Imbes na maghale sa pasilidad sa udto tanganing magbakal nin kakanon, mas marahay na magbalon nin simple sana asin aprobetsaran an oportunidad na makamidbid saka makaolay an mga tugang na harani sa tukawan niato!
7. Kun nasa kamugtakan kita, ano an mga dahilan na magboluntaryo?
7 An mga nagmamasid parateng hanga sa organisadong marhay asin aregladong kombension niato, lalo na kun naaaraman nindang mga boluntaryo an gabos na nagtatrabaho. Kamo daw “gikan sa boot” na makakapagboluntaryo? (Sal. 110:3, NW) Sa parate, bilog na pamilya an nagboboluntaryo bilang paagi na sanayon an mga aki na magin mapagsakripisyo. Kun masusupgon, an pagboluntaryo marahay na paagi na makamidbid an ibang delegado. An sarong sister nagsabi: “Apuera sa pamilya mi asin pirang katood ko, kadikit sana an kabisto ko duman. Pero kan magtabang ako sa paglinig, dakol akong nakamidbid na tugang. Maogmahon nanggad!” Magtatao sa sato nin dakulang kagayagayahan an pagkaigwa nin dakol na katood paagi sa pagtabang sa kombension. (2 Cor. 6:12, 13) Kun dai pa lamang kamo nakapagboluntaryo, hapoton an mga elder kun paano kamo makukualipikar dian.
8. Paano niato iimbitaran an iba na umatender sa kombension?
8 Imbitaran an Iba na Madangog an Katotoohan: Arog kan nakaaging mga taon, tolong semana bago an kombension, makikikabtang kita sa kampanya na mag-imbitar sa iba. Bobooton kan mga kongregasyon na makobrehan sagkod sa mapupuede an enterong teritoryo ninda. (Hilingon an kahon na “Paano Niato Itatao an Imbitasyon?”) An mga natadang imbitasyon dapat darahon sa kombension. Gagamiton ini nin mga delegado sa impormal na pagpatotoo sa lugar kan kombension.
9. Magsaysay nin mga eksperyensia na nagpapatunay na may marahay na resulta an taonan na kampanya sa pag-imbitar.
9 Naghihimate daw an mga tawo sa taonan na kampanyang ini? Sa sarong kombension, tinabangan nin attendant an sarong mag-agom na humanap nin tukawan. Natawan daa sinda nin imbitasyon asin sabi ninda “garo magayon iyan.” Kaya nagbiahe sinda nin labing 320 kilometros tanganing makaatender! Sarong sister man na naghaharongharong an nagtao nin imbitasyon sa sarong lalaki na garo gustong maaraman an dapit sa kombension. Kaya nagtao sia nin panahon na ipakipag-olay sa lalaki an imbitasyon. Pakalihis nin pirang aldaw mantang nasa kombension, nahiling kan sister an lalaki asin an katood kaini na kapot an saro sa bagong luwas na publikasyon!
10. Taano ta mahalaga an satong pag-atender sa taonan na pandistritong kombension?
10 An mga kapiestahan kaidto mamomoton na probisyon hale ki Jehova tanganing tabangan an mga Israelita na ‘paglingkodan sia nin daing sala asin sa katotoohan.’ (Jos. 24:14, NW) Kaagid kaiyan, an pag-atender sa satong taonan na pandistritong kombension nakakatabang na padagos kitang ‘maglakaw sa katotoohan’ asin iyan mahalagang marhay na kabtang kan pagsamba niato. (3 Juan 3) Bendisyonan logod ni Jehova an paghihingoa kan gabos na namomoot sa katotoohan na makaatender asin lubos na makinabang!
[Blurb sa pahina 3]
Nasasamnohan an katotoohan huli sa marahay na paggawe niato sa kombension
[Blurb sa pahina 3]
Tolong semana bago an kombension, makikikabtang kita sa kampanya na mag-imbitar sa iba
[Kahon sa pahina 4]
Paano Niato Itatao an Imbitasyon?
Tanganing makobrehan an teritoryo niato, maninigong halipot sana an pakikipag-olay niato. Puede tang sabihon an arog kaini: “Maray na aldaw. Nakikikabtang kami sa pambilog na kinaban na pagdistribwir kan imbitasyon na ini. Uni an kopya nindo. Mahihiling nindo dian an iba pang detalye.” Magin entusiastiko. Kun nagdidistribwir sa mga katapusan kan semana, maninigo man nindong ialok an mga magasin kun angay.
[Kahon sa pahina 5]
Mga Pagirumdom sa Pandistritong Kombension Para sa 2012
◼ Oras kan Programa: An programa mapoon nin alas 8:20 nin aga sa bilog na tolong aldaw. Mabukas an pasilidad nin alas 7:00 nin aga. Kun ipaisi na mapoon na an pambukas na musika, kita gabos maninigo nang tumukaw tanganing an programa makapoon na may dignidad. An programa matatapos nin alas 3:55 nin hapon sa Biernes asin Sabado saka alas 2:45 nin hapon sa Domingo.
◼ Parking: Sa gabos na lugar kan kombension, an enot na maarabot an may prioridad sa parking. Huling sa parate limitado iyan, sagkod sa mapupuede mag-iribanan na sana sa lunadan imbes na darahon an kanya-kanyang lunadan.
◼ Pagreserba nin Tukawan: An mga tukawan puede sanang ireserba para sa mga kaibanan nindo sa harong, sa lunadan, o tinotokdoan nindo ngonyan sa Biblia.—1 Cor. 13:5.
◼ Pangudtohan: Magbalon tabi nin pangudtohan imbes na magkakan sa luwas o magbakal kaiyan durante kan pahingalo sa udto. Puedeng gumamit nin sadit na cooler na ikakabugtak sa irarom nin tukawan. Dai itinotogot an darakulang picnic cooler asin mga lalagan na mapapasaon.
◼ Donasyon: Ikakapahiling niato an satong pag-apresyar sa mga areglo kan kombension paagi sa boluntaryong pagdonar sa lugar nin kombension para sa pambilog na kinaban na gibohon. An ano man na tsekeng idodonar maninigong gibohon na payable to “Watch Tower.”
◼ Aksidente Asin Emerhensia: Kun may mangyaring medikal na emerhensia sa lugar kan kombension, ipaaram tabi sa pinakaharaning attendant, na iyo an mapaisi tolos-tolos sa First Aid tanganing matantsar kan satong kualipikadong mga boluntaryo dian kun gurano kaseryoso kan situwasyon asin makatao nin tabang. Kun kaipuhan, maapod sinda sa pinakaharaning ospital.
◼ Bolong: Kun may tinotomar kamong bolong na reseta nin doktor, siertohon tabi na magdara nin supisyente, huling mayo kaiyan sa kombension. Peligroso an mga hiringgilya asin pang-ineksion na ginamit nin mga may diabetes, kaya kaipuhan na iapon iyan sa tamang basurahan, bako sa mga basurahan na nasa kombension.
◼ Sapatos: Kada taon, dakol an nadadanyaran huli sa sulot na sapatos. Pinakamarahay na magsulot nin tama sana asin komportableng sapatos tanganing pasil kamong makalakaw sa mga rampa, hagyan, gratings, asin iba pa.
◼ Pagrekord: An mga recorder dai dapat ikonektar sa elektrisidad o sound system kan pasilidad asin puede sanang gamiton sa paagi na dai makakadisturbo sa iba.
◼ Pagretrato: Kun maretrato kamo durante kan mga sesyon, dai tabi maggamit nin flash o dai paglipodan an mga nag-aatender.
◼ Please Follow Up (S-43) Form: Maninigong gamiton ini para sa mga nagpahiling nin interes sa impormal na pagpatotoo niato durante kan kombension. Maninigong magdara an mga parahayag nin saro o duwa kaini. An filled-out form puedeng itao sa Book Room o sekretaryo kan kongregasyon nindo.—Hilingon An Satong Ministeryo sa Kahadean na Nobyembre 2009, pahina 4.
◼ Restawran: Tawan nin onra an ngaran ni Jehova paagi sa marahay na paggawe nindo kun nasa restawran. Magtao nin tip kun pinagkatodan ini sa saindong lugar.
◼ Badge Card: Gamiton tabi nindo iyan mantang nasa kombension asin kun nagbibiahe paduman asin papuli. Makukua sana iyan sa kongregasyon nindo. Dai na maghalat nin ultimo ora tanganing kumua kaiyan para sa saindong sadiri asin sa mga kapamilya nindo.
◼ Bautismo: An mga kandidato sa bautismo maninigong tumukaw na sa designadong mga tukawan bago magpoon an programa sa Sabadong aga. An lambang saro maninigong magdara nin tuwalya asin mabining bado na gagamiton sa bautismo. Tanganing masierto na an isusulot kan mga babautismohan angay para sa okasyon, maninigo ining ipakipag-olay sa sainda kan mga elder na marepaso kan mga hapot sa librong Organisado.
◼ Volunteer Service: Magigin orog pa ngani an kaogmahan niato sa pag-atender kun kita maboluntaryo sa mga gibohon sa kombension. (Gui. 20:35) An siisay man na gustong magboluntaryo maninigong magduman sa Volunteer Service Department. An mga aki na mayo pang 16 anyos puede man magboluntaryo basta kaiba kan saindang magurang o nag-aataman o ibang adulto na aprobadong magbantay sa sainda.