Puede daw Kamong Makikabtang sa Pagpatotoo sa Banggi?

1. Segun sa sarong nag-espesyalisar sa Biblia, noarin naghaharongharong si apostol Pablo?

¹ Segun sa librong Daily Life in Bible Times, ugale na ni apostol Pablo na magharongharong “poon alas 4 nin hapon sagkod matangang banggi.” Dai niato aram kun baga ini talaga an iskedyul ni Pablo, pero an aram niato andam siang ‘gibohon an gabos na bagay dahil sa ebanghelyo’ o maogmang bareta. (1 Cor. 9:19-23) Kaiba digdi an pag-areglo kan saiyang mga aktibidad tanganing makapagharongharong sa panahon na pinakamabunga an paggibo kaiyan.

2. Taano ta marahay na makikabtang sa ministeryo sa mga oras nin banggi?

² An mga parahayag sa dakol na lugar napagkatodan nang magharongharong kada semana sa mga oras nin aga. Minsan siring, iyan pa daw an pinakamarahay na oras sa teritoryo nindo? An sarong payunir nagsabi dapit sa teritoryo nia: “Haros mayong tawo sa mga harong kun aga asin hapon. Pero nasa harong an kadaklan na tawo kun banggi.” An pagpatotoo sa banggi tibaad iyo an pinakamarahay na oportunidad na mapaabotan kan maogmang bareta partikularmente an mga lalaki. Sa parate, mas relaks an mga kagharong asin andam na makipag-olay. Kun kapakipakinabang na gibohon iyan, maninigong iareglo kan mga elder an mga pagtiripon bago maglingkod sa banggi.

3. Paano niato ikakapahiling an pagigin mapagrisa kun nagpapatotoo sa banggi?

³ Magin Mapagrisa: Mahalaga an pagigin mapagrisa kun nagpapatotoo sa banggi. Halimbawa, kun nagkataon na bakong kombenyente an oras kan pagdalaw nindo, arog baga kun an saro namamanggi na, mas marahay na sabihon na mabalik na sana kamo pagtaodtaod. Kun madiklom, tumindog kun saen mahihiling kamo kan kagharong, saka magpamidbid tolos asin sabihon an katuyohan kan pagdalaw nindo. Madonong man na magpatotoo nin manduwaduwa o bilang grupo asin magdanay sa mga tinampo na maliwanag na dian dai kamo napapasuway. Dai magdalaw kun banggihon na tanganing dai madisturbo an mga kagharong na nag-aandam nang magtorog. (2 Cor. 6:3) Kun delikado an teritoryo pag madiklom na, maghulit dian sa amay na oras nin banggi.—Tal. 22:3.

4. Ano an mga bendisyon sa pagpatotoo sa banggi?

⁴ Mga Bendisyon: Orog na nanggad na nakakagayagaya an ministeryo kun nakakapagpatotoo kita. Asin mientras na mas dakol an ginigibo tang pagpatotoo, mas dakol man an oportunidad niatong tabangan an iba na “makaligtas asin makaabot sa pakasabot kan katotoohan.” (1 Tim. 2:3, 4) Puede daw nindong areglaron an saindong iskedyul tanganing makapagpatotoo sa banggi?