“Papagdanayon na Marahay an Saindong Paggawi sa Tahaw kan mga Nasyon”

1. Taano ta mahalagang papagdanayon niyato an marahay na paggawi sa panahon nin pangrehiyon na kumbensiyon?

¹ Taon-taon sa panahon nin satong mga kumbensiyon, nakukua ta an atensiyon kan mga tawo, kaya mahalaga na an satong paggawi angay na nagrerepresentar sa Diyos na sinasamba niyato. (Lev. 20:26) An satong marahay na ugali pati na an satong pagbado asin pagpakarhay sa sadiri dapat na malinaw na nagpapamidbid sa sato bilang tunay na mga parasunod ni Cristo. Sa pag-atender sa maabot na pangrehiyon na mga kumbensiyon, paano niyato ‘mapagdadanay na marahay an satong paggawi sa tahaw kan mga nasyon’ asin sa siring makapagtao nin kaumawan sa satong langitnon na Ama?​—1 Ped. 2:12, NW.

2. Sa panahon nin kumbensiyon, sa anong mga pagkakataon niyato maipapahiling an Kristiyanong personalidad?

² Ipahiling an Kristiyanong Personalidad: An pagkamuot ta sa lambang saro asin an pagtratar niyato ‘sa mga nasa luwas’ lain na marhay sa nangingibabaw na espiritu kan kinaban. (Col. 3:10; 4:5; 2 Tim. 3:1-5) Maninigo na kita magin mabuot asin mapasensiya pag nagkakakan sa restawran dawa magkaproblema. Pagpahiling man nin marahay na ugali an pagtao nin tip sa mga empleyado na nagtatao nin serbisyo.

3. Ano an pagirumdom sa mga magurang, asin taano?

³ Dapat na bantayan na marhay kan mga magurang an saindang mga aki pag nasa lugar kan kumbensiyon, restawran, asin sa saindang dinadagusan. (Tal. 29:15) Sarong manager nin restawran an nagsabi sa sarong mag-agom: “Gustuhon mi kamo. Magalang saka marahayon an ugali nindo pati na an mga aki. Pinag-uulayan kamo kan mga empleyado digdi saka gusto mi kuta pirmi kamong yaon digdi pag Sabado pati Domingo.”

4. Mantang nasa lugar kun sain ginigibo an kumbensiyon, ano an dapat tang tandaan sa satong pagbado asin hitsura?

⁴ Magbado nin Mabini: Sa panahon nin kumbensiyon, an satong pagbado dapat na angay asin mabini, bakong arog kan sobrang mga istilo na uso sa kinaban. (1 Tim. 2:9) Dawa sa panahon nin pamamasyar bago asin pakatapos kan mga sesyon, linilikayan ta na magin sobra kakaswal o bakong husay an satong hitsura. Sa siring, dai kita masusupog na isulot an satong badge asin magpatotoo pag may oportunidad. An satong hitsura asin marahay na paggawi sa panahon nin kumbensiyon dai sana makakaakit sa mga tawong sadiyosan an puso na akuon an nagliligtas buhay na mensahe kan Bibliya, kundi makakapaugma man iyan ki Jehova.​—Sof. 3:17.