An Kakristiyanuhan Daw an Antitipiko kan Jerusalem?

Sinasabi kaidto sa mga publikasyon ta na an Kakristiyanuhan an antitipiko kan apostatang Jerusalem. An mga kamugtakan sa bakong maimbod na Jerusalem—kaiba na an idolatriya saka an lakop na karatan—siguradong nagpapagirumdom sa sato kan mga nangyayari sa Kakristiyanuhan. Pero sa nakaagi pa sanang mga taon, dai na ginagamit sa satong mga publikasyon—kaiba na an librong binabasa mo ngunyan—an tipiko saka antitipikong paagi nin pagpaliwanag sa mga propesiya, apuwera na sana kun may malinaw ining basehan sa Bibliya. Igwa daw nin masarig na basehan sa Kasuratan na nagsasabing an Kakristiyanuhan iyo an antitipiko kan Jerusalem? Mayo.

Pag-isipan ini: Nagin sentro kaidto nin dalisay na pagsamba an Jerusalem; kan huri, nagin apostata an mga nakaistar diyan. Pero an Kakristiyanuhan dai nuarin man nagsagibo nin dalisay na pagsamba. Puon pa sa kapinunan kan Kakristiyanuhan kan ikaapat na siglo C.E., palsong mga doktrina na an pirming itinutukdo kaini.

Saro pa, pagkatapos laglagon kan mga Babilonyo an Jerusalem, binendisyunan giraray ni Jehova an siyudad asin nagin sentro giraray iyan kan tunay na pagsamba. Pero an Kakristiyanuhan dai nuarin man inuyunan nin Diyos, asin pag linaglag na iyan durante kan dakulang kasakitan, dai na iyan nuarin man maeksister.

Sigun sa mga puntong nasambitan, ano an maikokongklusyon niyato? Pag siniyasat ta an mga propesiya sa Bibliya na nautob sa bakong maimbod na Jerusalem, puwedeng masabi niyato, ‘Kapareho iyan kan nahihiling ta ngunyan sa Kakristiyanuhan.’ Pero minalataw na mayo nin basehan sa Kasuratan para sabihon na an Kakristiyanuhan iyo an antitipiko kan Jerusalem.