Gamiton Iyan sa Lambang Pagkakataon
1. Sa anong gibohon kapakipakinabang an tract na Maaraman an Katotoohan?
1 Dinisenyo an tract na Gusto daw Nindong Maaraman an Katotoohan? tanganing tabangan kitang makapoon nin mga pag-adal sa Biblia. Alagad iyan epektibo man na kasangkapan na magagamit niato tanganing ikasabwag an mga banhi nin katotoohan. (Par. 11:6) Uya an nagkapirang suhestion na matabang sa sato na magamit iyan nin epektibo.
2. Paano niato magagamit an tract tanganing makapoon nin pakikipag-olay?
2 Pagpoon nin Pakikipag-olay: Puede nindong itao an tract sa kagharong, itokdo an anom na hapot sa tutob, asin ihapot: “Arin sa mga hapot na ini an napag-isip-isip na nindo?” Pagkasimbag kan kagharong, gamiton an tract tanganing ipakipag-olay an simbag kan Biblia sa saro sa mga hapot nia asin basahon an saro sa sitadong mga teksto. Basahon o sumaryohon an likod na pahina, asin ialok an librong Itinotokdo kan Biblia. Dawa kun dai nia akoon an libro, inako nia man an tract, na tibaad makatabang na makagamot sa puso nia an katotoohan.—Mat. 13:23.
3. Ano an puede niatong gibohon kun sibot an kagharong?
3 Kun Sibot an Kagharong: Puede mong sabihon: “Huling sibot kamo, iwawalat ko na lang tabi an tract na ini. Nakalista digdi an anom na pundamental na hapot na ihinahapot kan kadaklan sa sato, asin sa kada saro kaini, igwa digdi nin direktang simbag hale sa Biblia. Pagbalik ko, boot kong maaraman kun ano an masasabi nindo sa tract na ini.”
4. Ano an puede niatong sabihon kun iinaalok an tract mantang naghuhulit sa tinampo?
4 Kun Naghuhulit sa Tinampo: Puede nindong sabihon: “Kumusta? Ihinapot na daw nindo an arin man sa mga hapot na ini? [Pasimbagon.] Ipinapaheling kaini an maliwanag asin nakakakontentong mga simbag na nasa Biblia.” Kun dai naghihidali an tawo, tibaad puede nindong ipakipag-olay an saro sa mga simbag sa tract asin ialok pa ngani an librong Itinotokdo kan Biblia.
5. Paano niato magagamit paminsanminsan an tract sa mga harong na mayo nin tawo?
5 Sa mga Harong na Mayo nin Tawo: Sa nagkapirang teritoryo, kun mayo nin tawo sa harong, an mga parahayag parateng nagwawalat nin literatura sa lugar na dai naheheling nin iba. Kun iyan an ginigibo sa saindong kongregasyon, taano ta dai magwalat paminsanminsan nin tract na Maaraman an Katotoohan? Pagbalik nindo, puede nindong sabihon: “Mayo kamo kan magdigdi kami, kaya nagwalat kami nin arog kaining tract sa pinto nindo. Arin sa mga hapot na ini an gusto nindong masimbag?”
6. Taano ta sarong epektibong kasangkapan sa paghuhulit an tract na Maaraman an Katotoohan?
6 Sa tract na Maaraman an Katotoohan, simple asin deretso sa punto an pagkapresentar kan katotoohan. Magugustohan iyan kan mga tawo ano man an saindang relihion asin kultura. Madali an pagpresentar kaiyan; ikakaalok iyan dawa nin hoben asin bagohan na mga parahayag. Ginagamit daw nindo iyan sa lambang angay na pagkakataon?