“Padagos na Gibohon Nindo Ini”
Iseselebrar an Memorial sa Abril 5
1. Taano ta mahalaga an pagselebrar kan Memorial?
1 “Padagos na gibohon nindo ini sa paggirumdom sa sako.” (Luc. 22:19, NW) Paagi sa mga tataramon na iyan, pinagbotan ni Jesus an mga parasunod nia na girumdomon an saiyang kagadanan bilang atang. Huli sa gabos na nagibo kan pantubos, mayong aldaw na mas importante o pinakamamahal para sa mga Kristiano kisa sa taonan na pagselebrar kan Memorial. Mantang nagdadangadang an selebrasyon sa taon na ini sa Abril 5, paano niato ikakapaheling an satong pasasalamat ki Jehova?—Col. 3:15.
2. Kun dapit sa pag-adal asin paghorophorop, paano niato ikakapaheling an satong pagpahalaga sa Memorial?
2 Mag-andam: Sa parate, nag-aandam kita para sa mga bagay na ibinibilang niatong mahalaga. Puede tang andamon an satong puso para sa Memorial paagi sa pagkonsiderar bilang pamilya kan mga pangyayari durante kan huring mga aldaw ni Jesus digdi sa daga asin paagi sa paghorophorop kaiyan. (Esd. 7:10) Maheheling sa kalendaryo asin sa Pagsiyasat sa Kasuratan Aroaldaw an parsial na lista nin mga teksto, mantang an mas kompletong lista, kaiba an katimbang na kapitulo sa librong Greatest Man, maheheling sa pahina 23-24 kan The Watchtower na Pebrero 1, 2011.
3. Kun dapit sa pagdugang niato kan satong pakikikabtang sa ministeryo, paano niato ikakapaheling an satong pagpahalaga sa Memorial?
3 Maghulit: Ikakapaheling ta man an satong pagpahalaga paagi sa lubos na pakikikabtang sa ministeryo. (Luc. 6:45) An pambilog na kinaban na kampanya tanganing imbitaran an iba sa Memorial mapoon sa Sabado, Marso 17. Puede mo daw na areglaron an saimong iskedyul tanganing magtao nin mas dakol na oras sa ministeryo, tibaad bilang auxiliary payunir? Taano ta dai iyan pag-olayan bilang pamilya sa sunod nindong Pampamilyang Pagsamba?
4. Anong mga pakinabang an nakakamtan niato sa pagselebrar kan Memorial?
4 Nakikinabang nanggad kita sa pag-atender sa selebrasyon kan Memorial taon-taon! Minaorog an satong kagayagayahan asin pagkamoot sa Dios mantang hinohorophorop niato an pagkabukas-palad ni Jehova sa pagtao kan saiyang bugtong na Aki bilang pantubos. (Juan 3:16; 1 Juan 4:9, 10) Pinapahiro kita kaini na dai na mabuhay para sa satong sadiri. (2 Cor. 5:14, 15) Pinupukaw man kaini an satong pagmawot na omawon si Jehova nin hayagan. (Sal. 102:19-21) Tunay nanggad, may pagmawot na inaantisipar ta bilang mapagpasalamat na mga lingkod ni Jehova an magigin oportunidad niato na ‘ibalangibog an kagadanan kan Kagurangnan’ sa pagselebrar kan Memorial sa Abril 5.—1 Cor. 11:26.