Ubwina Lebi

1 Kabili Yehova aitile Mose no kusosa kuli ena mu cikuulwa ca kukumaninako,+ ati: 2 “Sosa ku bana ba kwa Israele+ auti, ‘Umuntu nga alefwaya ukutuula umutuulo kuli Yehova ukufuma pa fitekwa fyakwe, afwile ukubuula pa ng’ombe shakwe nangu pa mpaanga shakwe.

3 “‘Nga ca kutila apeela ing’ombe yakwe ukuti ibe umutuulo wa koca,+ iyo ing’ombe ikabe ing’ombe iilume kabili iisuma.+ Akailete pa mwinshi wa cikuulwa ca kukumaninako mu kuitemenwa ku cinso ca kwa Yehova.+ 4 E lyo akabike iminwe pa mutwe wa mutuulo wakwe ku kuba umutuulo wa koca, na o ukapokelelwa+ bwino bwino nge cifuta mulandu.+

5 “‘E lyo akepaye ing’ombe iilume iinono ku cinso ca kwa Yehova; kabili abana ba kwa Aarone, bashimapepo,+ bakapalamike umulopa no kusansa umulopa ukushingulusha pa ciipailo,+ icabela pa mwinshi wa cikuulwa ca kukumaninako. 6 Kabili ico aletuula ku kuba umutuulo wa koca bakacifunde no kuciputaula mu filundwa.+ 7 Kabili abana ba kwa Aarone, bashimapepo, bakabike umulilo pa ciipailo+ no kuteyanya inkuni pa mulilo.+ 8 Kabili abana ba kwa Aarone, bashimapepo, bakateyanye ifilundwa,+ umutwe na mafuta bakabike pa nkuni ishili pa mulilo wa pa ciipailo. 9 Kabili amala+ na molu akafisamfye mu menshi; na shimapepo akafyoce pa ciipailo ku kuba umutuulo wa koca, uwa pa mulilo kabili uwakuleta akacena kasuma kuli Yehova.+

10 “‘Kabili umutuulo wakwe uwa koca nga ufumine pa mpaanga,+ nangu pa bana ba basukusuku nelyo pa mbushi, akatuule iilume+ kabili iisuma.+ 11 Kabili ikepaiwe ku mbali ya ciipailo ku kapinda ka ku kuso ku cinso ca kwa Yehova, kabili abana ba kwa Aarone, bashimapepo, bakasanse umulopa wa nama ukushingulusha iciipailo.+ 12 Kabili akaciputaule mu fipande no mutwe wa iko na mafuta, na shimapepo akafibike pa nkuni ishili pa mulilo pa ciipailo.+ 13 Kabili amala+ na molu+ akafisamfye mu menshi; na shimapepo akafyoce+ pa ciipailo. Mutuulo wa koca, uwa pa mulilo kabili uwakuleta akacena kasuma kuli Yehova.+

14 “‘Lelo, nga ca kutila fyuni e fyo atuula ukuti fibe umutuulo wakwe uwa koca kuli Yehova, akatuule ifipele+ nangu utwana twa nkunda.+ 15 Kabili shimapepo akatuule ico cuni pa ciipailo no kuceka+ umukoshi wa ciko no kucoca pa ciipailo, lelo umulopa wa ciko ukapongolwelwe ku lubali lwa ciipailo. 16 Kabili akafumyeko icibukulo ca ciko na masako no kufipoosa mu mbali ya ciipailo, lubali ku kabanga, uko betila imito ya mafuta.+ 17 Kabili akacilepaule mu mapindo lelo ukwabulo kucipandaula.+ E lyo shimapepo akacoce pa ciipailo pa nkuni ishili pa mulilo. Mutuulo wa koca,+ uwa pa mulilo kabili uwakuleta akacena kasuma kuli Yehova.+

2 “‘Kabili umuntu nga alefwaya ukutuula umutuulo+ wa ngano kuli Yehova, shifwile ukuba ishapeleka;+ kabili afwile ukwitulwilapo na mafuta no kubikapo libani. 2 Kabili akautwale ku bana ba kwa Aarone, bashimapepo, na shimapepo akabuulepo ulupi lumo ulwa buunga ubwapeleka na mafuta ayalipo na libani kumo; kabili akoce uyu mutuulo pa ciipailo ku kuba ica kwibukishishako,+ umutuulo wa pa mulilo uwa kuleta akacena kasuma kuli Yehova. 3 Ne cashalapo ku mutuulo wa ngano ca kwa Aarone na bana+ bakwe, cena ca mushilo+ nga nshi ukufuma pa mituulo ya kuli Yehova iya pa mulilo.

4 “‘Kabili nga watuula umutuulo wa ngano, uwa mukate uwapangilwa mu citofu, ufwile ukuba uwa buunga bwapeleka, imikate+ ishatutumuka umwasakana amafuta nangu imikate yapaapaatala iishatutumuka+ iyasubwako amafuta.+

5 “‘Kabili umutuulo obe nga mutuulo wa ngano ukufuma pa ca kocelapo,+ ufwile ukuba wa buunga bwapeleka ubwasakanamo amafuta, umwabula icitutumushi. 6 Ukaumokaule, no kwitulwilapo amafuta.+ Uyu e mutuulo wa ngano.

7 “‘Kabili umutuulo obe nga mutuulo wa ngano isha pa ca kusalwilapo, ufwile ukufuma ku buunga bwapeleka ubwasakanamo amafuta. 8 Kabili ukalete kuli Yehova uyu mutuulo wa ngano uwafuma kuli fi fintu; kabili ukautwale kuli shimapepo na o akaupalamike ku ciipailo. 9 Kabili shimapepo akabuulepo bumo pa mutuulo wa ngano pa kuti bukabe ica kwibukishishako+ uyo mutuulo kabili akabocele pa ciipailo, pa kuti bukabe umutuulo wa pa mulilo uwa kuleta akacena kasuma kuli Yehova.+ 10 Kabili ubukashalako ku mutuulo wa ngano bwa kwa Aarone na bana bakwe, bwa mushilo nga nshi, ukufuma pa mituulo ya pa mulilo+ iya kuli Yehova.

11 “‘Umutuulo onse uwa buunga bwa ngano uo mwatuula kuli Yehova wikabamo icitutumushi,+ pantu tamufwile ukoca icitutumushi no buci ku kuba umutuulo wa pa mulilo kuli Yehova.

12 “‘Mukatuule kuli Yehova umutuulo wa fisabo fyabalilapo ukupya,+ kabili uyu mutuulo taufwile ukubikwa pa ciipailo ku kuba icena cisuma.

13 “‘Kabili umutuulo onse uwa buunga bwa ngano mukalungemo umucele;+ kabili mwikatala amulaba ukulunga umucele wa cipangano+ ca kwa Lesa wenu mu mutuulo wenu uwa buunga bwa ngano. Umutuulo wenu onse uo muletuula mukalebikapo no mucele.

14 “‘Kabili nga ulefwaya ukutuula kuli Yehova umutuulo wa ngano uwa fisabo fyabalilapo ukupya, ufwile ukutuula imitwe ya ngano iishilakosa iyasalulwa pa mulilo, ifisense fya ngano sha nomba line, e fyo utuule fibe umutuulo wa ngano uwa fisabo fyabalilapo ukupya.+ 15 Kabili ukabikepo amafuta no kubikapo libani. Uyu e mutuulo+ wa ngano. 16 Kabili shimapepo afwile ukoca ica kwibukishishako+ uyo mutuulo, ifisense fimo na mafuta, na libani onse, e mutuulo wa pa mulilo kuli Yehova.

3 “‘Kabili umutuulo wakwe nga lilambo lya mutende,+ nga wafuma pa ng’ombe iilume nelyo iikota, iisuma+ e yo akatuule kuli Yehova. 2 Kabili akabike minwe pa mutwe+ wa mutuulo wakwe, kabili akepaile ing’ombe pa mwinshi wa cikuulwa ca kukumaninako; kabili abana ba kwa Aarone, bashimapepo, bakasanse umulopa ukushingulusha pa ciipailo. 3 Kabili akabuulepo fimo pa mutuulo wakwe uwa mutende no kufipeela kuli Yehova, e kutila, amafuta+ ayafimba ku mala, na mafuta yonse aya ku mala,+ 4 ne mfyo+ shibili na mafuta ya shiko, e lyo na ya ku musana wa iko. Lelo insongo ya libu, akaifumishe kumo ne mfyo. 5 Kabili abana+ ba kwa Aarone bakafyocele+ pa ciipailo, pa mutuulo wa koca uuli pa nkuni+ ishili pa mulilo, ku kuba umutuulo wa pa mulilo uwakuleta akacena+ kasuma kuli Yehova.

6 “‘Kabili umutuulo wakwe nga ufumine pa mukuni wa mpaanga, akatuule iilume nelyo iikota, iisuma+ ku kuba ilambo lya mutende kuli Yehova. 7 Nga mwana wa mpaanga aleeta, afwile ukutuula uyu mutuulo ku cinso ca kwa Yehova.+ 8 Kabili akabike minwe pa mutwe+ wa nama, no kuipaila+ pa ntanshi ya cikuulwa ca kukumaninako; kabili abana ba kwa Aarone bakasanse umulopa wa iko ukushinguluka iciipailo. 9 Kabili kwi lambo lya mutende akafumyeko amafuta ukuti yakabe umutuulo wa pa mulilo kuli Yehova.+ Umucila+ onse uwanona uo akaputwila apo walundanina no mongololo, na mafuta ayafimba ku mala, na mafuta fye yonse aya ku mala,+ 10 ne mfyo shibili na mafuta ya shiko, e lyo na ya ku musana yene. Lelo insongo+ ya libu, akaifumishe kumo ne mfyo. 11 Kabili shimapepo akafyocele+ pa ciipailo kwati fya kulya,+ umutuulo wa pa mulilo kuli Yehova.

12 “‘Kabili umutuulo wakwe nga ni mbushi,+ akaituule kuli Yehova. 13 Kabili akabike iminwe yakwe pa mutwe+ wa iko, no kuipaila+ pa ntanshi ya cikuulwa ca kukumaninako; kabili abana ba kwa Aarone bakasanse umulopa wa iko ukushinguluka iciipailo. 14 Kabili akatuule umutuulo wakwe, umutuulo wa pa mulilo kuli Yehova, amafuta ayafimba ku mala, na mafuta yonse aya ku mala,+ 15 ne mfyo shibili na mafuta ya shiko, e lyo na ya ku musana wa iko. Lelo insongo ya libu, akaifumishe kumo ne mfyo. 16 Kabili shimapepo akafyocele pa ciipailo kwati fya kulya, umutuulo wa pa mulilo uwakuleta akacena akasuma. Amafuta yonse ya kwa Yehova.+

17 “‘Ifunde ili lya muyayaya ku nkulo shenu, mu mekalo yenu yonse: Te kwesha ukulya amafuta yonse no mulopa+ onse.’”

4 Kabili Yehova akonkenyepo ukusosa kuli Mose, ati: 2 “Sosa ku bana ba kwa Israele, auti, ‘Ngo muntu+ abembuka mu kukanaishiba,+ acita cimo pa fyo Yehova akaanya ukucita:

3 “‘Nga shimapepo, uwasubwa,+ abembuka+ ulubembu lwa kuletelela abantu, akatuule kuli Yehova ing’ombe iilume iinono kabili iisuma pa lubembu+ lwakwe ulo acitile, e mutuulo wa pa lubembu. 4 Kabili akalete ing’ombe iilume pa mwinshi wa cikuulwa ca kukumaninako+ ku cinso ca kwa Yehova no kubika iminwe yakwe pa mutwe wa ng’ombe,+ kabili akepaile iyo ing’ombe ku cinso ca kwa Yehova. 5 Kabili shimapepo, uwasubwa,+ akabuulepo umulopa wa iyo ing’ombe iilume no kuwingisha mu cikuulwa ca kukumaninako; 6 kabili shimapepo akatumpike umunwe+ wakwe mu mulopa no kusansa uyu mulopa imiku+ cinelubali (7) ku cinso ca kwa Yehova pa ntanshi ya nsalu iyacingilila umuputule wa mushilo. 7 Kabili shimapepo akabike umulopa umo ku nsengo+ sha ku ciipailo isha ca kufutumwinapo ifyanunkila kuli Yehova, icaba mu cikuulwa ca kukumaninako, kabili umulopa onse uwa ng’ombe iilume uwashalapo akaupongolwele pe samba+ lya ciipailo ca mutuulo wa koca, icabela pa mwinshi wa cikuulwa ca kukumaninako.

8 “‘Kabili kuli iyi ine ing’ombe iya mutuulo wa pa lubembu akafumyeko amafuta yonse, e kutila amafuta ayafimba ku mala, na mafuta fye yonse aya ku mala,+ 9 ne mfyo shibili na mafuta ya shiko, e lyo na ya ku musana. Lelo insongo ya ku libu, akaifumishe kumo ne mfyo.+ 10 Akacite nga filya fine acita ku ng’ombe iilume iye lambo lya mutende.+ Kabili shimapepo akafyocele pa ciipailo ca mutuulo wa koca.+

11 “‘Lelo umukupo wa ng’ombe no munofu wa iko onse pamo no mutwe ne myendo na mala na mafi,+ 12 e kutila ing’ombe fye yonse, akaifumishe ku nse ya nkambi+ pa ncende ya busaka apo betila imito+ ya mafuta, kabili akayoce pa nkuni mu mulilo.+ Apo betila imito e po akocele ing’ombe.

13 “‘Nomba ulukuta lonse ulwa kwa Israele nga lwabembuka+ kabili umulandu wafiswa ku menso ya lukuta mu kuti bacita cimo pa fyo Yehova atile tafifwile ukucitwa kabili baba no mulandu,+ 14 no lubembu ulo bacitile lwaishibikwa,+ ulukuta lukatuule ng’ombe iilume iinono ukuba umutuulo wa pa lubembu kabili bakailete pa ntanshi ya cikuulwa ca kukumaninako. 15 Kabili abakalamba ba lukuta bakabike minwe yabo pa mutwe+ wa ng’ombe ku cinso ca kwa Yehova, kabili ing’ombe ikepaiwe ku cinso ca kwa Yehova.

16 “‘E lyo shimapepo, uwasubwa,+ akabuule umulopa wa ng’ombe iilume no kuwingisha mu cikuulwa ca kukumaninako.+ 17 Kabili shimapepo akatumpike umunwe wakwe mu mulopa no ku-usansa imiku cinelubali (7) ku cinso ca kwa Yehova pa ntanshi ya nsalu+ iyacingilila umuputule wa mushilo. 18 Kabili shimapepo akabuulepo umulopa no ku-ubika pa nsengo+ sha ku ciipailo icili ku cinso ca kwa Yehova, icaba mu cikuulwa ca kukumaninako; kabili umulopa onse uwa ng’ombe iilume uwashalapo akaupongolwele mwi samba lya ciipailo ca mutuulo wa koca,+ icabela pa mwinshi wa cikuulwa ca kukumaninako. 19 Kabili akatuule amafuta yonse aya iko, no kuyocela pa ciipailo.+ 20 E fyo akacite kuli iyi ng’ombe iilume nga filya fine acitile kuli ilya iya mutuulo wa pa lubembu. E fyo akacite kuli yena; kabili shimapepo akabafutile+ pa fibi fyabo, e lyo bakelelwa. 21 Kabili akafumishe ing’ombe ku nse ya nkambi no kuyoca, filya fine aocele iya pa kubala.+ Uyu e mutuulo wa pa lubembu uwa lukuta.+

22 “‘Umukalamba+ wa mukowa nga abembuka no kucita mu kukanaishiba cimo pa fyo Yehova Lesa atile tafifwile ukucitwa,+ kabili aba no mulandu, 23 nelyo nga kwaba uwamweba ukuti nabembuka,+ akatuule umutuulo wakwe, e kutila umwana wa mbushi,+ umusuma. 24 Kabili akabike minwe pa mutwe+ wa mwana wa mbushi no kumwipaila apepailwa umutuulo wa koca ku cinso ca kwa Yehova.+ Wena mutuulo wa pa lubembu.+ 25 Kabili shimapepo akabuulepo umulopa wa pa mutuulo wa pa lubembu ku munwe wakwe no ku-ubika pa nsengo+ sha ku ciipailo ca mutuulo wa koca, no mulopa wa uko uwashala akaupongolwele mwi samba lya ciipailo ca mutuulo wa koca. 26 Kabili akoce amafuta yonse pa ciipailo nga filya fine oca amafuta ye lambo lya mutende;+ kabili shimapepo akamufutile ulubembu+ lwakwe, e lyo akelelwa.

27 “‘Nga ca kutila umuntu uuli onse uwa mu calo abembuka ukwabulo kwishiba pa kucita cimo pa fyo Yehova atile tafifwile ukucitwa kabili aba no mulandu,+ 28 nelyo nga kwaba uwamweba ukuti nabembuka, akatuule umutuulo, e kutila umwana wa mbushi umukota,+ umusuma, uwa pa lubembu lwakwe ulo abembuka. 29 Kabili akabike minwe pa mutwe+ wa nama ya mutuulo wa pa lubembu no kwipaya inama ya pa lubembu palya pene apepailwa inama ya mutuulo wa koca.+ 30 Kabili shimapepo akabuulepo umulopa wa nama ku munwe wakwe no ku-ubika pa nsengo+ sha ku ciipailo ca mutuulo wa koca, no mulopa wa uko uwashala akaupongolwele mwi samba lya ciipailo.+ 31 Kabili akafumye amafuta+ yonse, filya fine afumishe na mafuta pe lambo lya mutende;+ kabili shimapepo akayocele pa ciipailo ku kuba akacena kasuma kuli Yehova;+ kabili shimapepo akamufutileko, e lyo akelelwa.+

32 “‘Lelo nga aleta umwana wa mpaanga+ ukuti e mutuulo wakwe uwa pa lubembu, afwile ukuleta iikota kabili iisuma.+ 33 Kabili akabike iminwe pa mutwe wa nama iyo aletuulila pa lubembu no kuipaya apepailwa+ lyonse umutuulo wa koca ku kuba umutuulo wa pa lubembu. 34 Kabili shimapepo akabuulepo umulopa wa nama ya mutuulo wa pa lubembu ku munwe wakwe no ku-ubika pa nsengo sha ku ciipailo ca mutuulo wa koca,+ no mulopa wa uko uwashala akaupongolwele mwi samba lya ciipailo. 35 Kabili akafumye amafuta yonse, filya fine afumya amafuta pe lambo lya mutende ilya mwana wa mpaanga, kabili shimapepo akayocele pa ciipailo, pa mutuulo wa kuli Yehova uwa pa mulilo;+ kabili shimapepo akamufutile+ ulubembu lwakwe ulo abembuka, e lyo akelelwa.+

5 “‘Nomba umuntu+ nga ni kambone nelyo alimweneko nelyo naishibapo fimo, kabili ilyo aumfwa imbila+ akana no kusokolola+ ulubembu ulo umuntu umbi acitile, ninshi uyu muntu nabembuka kabili akaba no mulandu pa cilubo cakwe.

2 “‘Nelyo umuntu nga akumya icakowela, icitumbi ca nama ya mu mpanga iyakowela nangu icitumbi ca citekwa icakowela nangu icitumbi ca fisenya icakowela,+ nangu ca kutila teshibe,+ na lyo line nakowela kabili ali uwa mulandu.+ 3 Nelyo nga mu kukanaishiba akumya icikowesha icifuma ku muntu, conse icakowela+ icingamukowesha, e lyo aisaishiba pa numa, ninshi ali no mulandu.

4 “‘Nelyo umuntu nga asosa fye icisosesose+ amashiwi ya mulapo ilyo alapa ku milomo yakwe ukucita icibi+ atemwa icisuma, ukulingana na conse ico umuntu engangufyanya ukulapa,+ nangu ca kutila tacishibikwe kuli ena, lelo aisaishiba pa numa, ninshi ali no mulandu muli cimo ica muli ifi fintu.

5 “‘Kabili nga ca kutila ali no mulandu muli cimo ica ifi fintu, akayebelele+ ulubembu acitile. 6 Kabili afwile ukuleta umutuulo wakwe uwa pa mulandu+ kuli Yehova pa lubembu lwakwe ulo abembwike, e kutila, umwana wa mpaanga umukota nangu umwana wa mbushi umukota,+ ku kuba umutuulo wa pa lubembu; kabili shimapepo afwile ukumufutila ulubembu+ lwakwe.

7 “‘Nomba nga takwete impaanga,+ akalete kuli Yehova ifipele+ fibili atemwa utwana twa nkunda tubili ku kuba umutuulo wakwe uwa pa mulandu+ pa lubembu ulo abembwike, icuni cimo mutuulo wa pa lubembu e lyo cimbi mutuulo wa koca. 8 Kabili akafilete kuli shimapepo, na o akabalilepo ukutuula ica pa lubembu no kuceka+ pa lutwe lwa mukoshi wa ciko, lelo tafwile ukuputulako umutwe ku mukoshi. 9 Kabili akasanse umulopa uwa mutuulo wa pa lubembu ku lubali lwa ciipailo, lelo umulopa uwashalamo akauminsulwile mwi samba lya ciipailo.+ Uyu e mutuulo wa kufuta pa lubembu. 10 Ne cuni ca bubili akacipeela ku kuba umutuulo wa koca nga pe;+ kabili shimapepo akamufutile+ ulubembu ulo abembwike, e lyo akelelwa.+

11 “‘Lelo nga takwete+ ifipele fibili atemwa abana ba nkunda babili, akalete ulupe*+ lwa buunga ubwapeleka ku kuba umutuulo wakwe uwa pa lubembu. Tafwile ukubikapo amafuta+ kabili tafwile ukubikapo libani, pantu mutuulo wa pa lubembu.+ 12 Kabili akatwale kuli shimapepo, na shimapepo akabuulepo ulupi lumo ku kuba ica kwibukishishako+ uyu mutuulo kabili akabocele pa ciipailo ca mutuulo wa kuli Yehova uwa pa mulilo.+ Uyu e mutuulo wa pa lubembu.+ 13 Kabili shimapepo akamufutile+ ulubembu lwakwe ulo abembuka, ulubembu lonse pali ishi, e lyo akelelwa; kabili ubuunga ubukashalapo bukaba bwa kwa shimapepo+ nga filya fine ciba ku mutuulo wa ngano.’”

14 Kabili Yehova akonkenyepo ukweba Mose ati:15 “Umuntu nga abulwa icishinka kabili akowesha ifya mushilo fya kwa Yehova+ mu kukanaishiba, akalete kuli Yehova umwana wa mpaanga umusuma ku kuba umutuulo wa pa mulandu,+ ukulingana no mutengo wapimwa uwa mashekele+ ya silfere, amashekele ya mu muputule wa mushilo, ukuti abe umutuulo wa pa mulandu. 16 Kabili akapeela icifuta mulandu ica lubembu lwakwe ulwa kubembukila umwa mushilo kabili akalundeko ne ca pali fisano+ ica ciko, kabili akafipeele kuli shimapepo, pa kuti shimapepo akamufutile+ ku mwana wa mpaanga uuli umutuulo wa pa mulandu, e lyo akelelwa.+

17 “Kabili umuntu nga abembuka, e kutila acita cimo pa fyo Yehova asosele ukuti tafifwile ukucitwa, nangu ca kutila taishibe,+ umulandu wena ali na o kabili akashingamwa icilubo cakwe.+ 18 Kabili akalete kuli shimapepo umwana wa mpaanga umusuma ukufuma pa mukuni wa mpaanga ukulingana no mutengo wa mutuulo wa pa mulandu;+ kabili shimapepo akamufutile+ icilubo cakwe ico acitile mu kukanaishiba, nangu ca kutila umwine taishibe, e lyo akelelwa.+ 19 Uyu e mutuulo wa pa mulandu. Pantu cine cine ali no mulandu+ kuli Yehova.”

6 E lyo Yehova atile kuli Mose: 2 “Umuntu nga abembuka pa mulandu wa kukanaba ne cishinka kuli Yehova+ kabili abepa+ umunankwe ulwa caseekeshiwa kuli ena nangu icikatilo+ nangu amwibila nangu afinsha umunankwe,+ 3 nelyo asange caluba+ lelo abepa no kulapo bufi+ pali cimo ica muli fyonse ifyo umuntu engacita no kubembuka; 4 nomba nga abembuka no kuba uwa mulandu,+ akabweshe ico aibile atemwa ico afinshishe atemwa icaseekeshiwe kuli ena atemwa icalubile ico asangile, 5 atemwa conse ico alapilepo mu bufi, kabili afwile ukulipila icifuta mulandu+ icituntulu, kabili akalundepo ica pali fisano. Akacipeele ku mwine ubushiku umulandu wakwe ukashininkishiwa. 6 Kabili akalete kuli Yehova umwana wa mpaanga+ umusuma ukufuma pa mukuni ukulingana no mutengo wapimwa, akalete kuli shimapepo, ku kuba umutuulo wa pa mulandu.+ 7 Na shimapepo akamufutile+ umulandu ku cinso ca kwa Yehova, e lyo akelelwa fyonse ifyo aali no kubelapo uwa mulandu.”

8 Kabili Yehova akonkenyepo ukweba Mose ati: 9 “Eba Aarone na bana bakwe, auti, ‘Ili e funde lya mutuulo wa koca:+ Umutuulo wa koca ukaba pe shiko pa ciipailo ubushiku bonse ukufika ulucelo, kabili umulilo wa pa ciipailo ukala-aka. 10 Kabili shimapepo akafwale ica kufwala+ cakwe ica bushimapepo, akafwale na kaputula mu kati+ uwa kufimba umubili wakwe. E lyo akakuse imito ya mafuta+ iya mutuulo wa koca iyo umulilo oca lyonse pa ciipailo, kabili akaibike ku mbali ya ciipailo. 11 Kabili akafuule ifya kufwala+ fyakwe no kufwala ifya kufwala fimbi, kabili akafumishe mito ya mafuta ku nse ya nkambi+ pa ncende ya busaka. 12 Lelo umulilo wa pa ciipailo ufwile ukutwalilila ukwaka. Taufwile ukushima. Kabili shimapepo akalebikapo inkuni+ cila lucelo, kabili akaleteyanyapo no mutuulo wa koca, no kocelapo+ amafuta ya malambo ya mutende. 13 Umulilo+ ukaletwalilila ukwaka pa ciipailo. Taufwile ukushima.

14 “‘Nomba ili e funde lya mutuulo wa ngano:+ Imwe mwe bana ba kwa Aarone, muleutuula ku cinso ca kwa Yehova ku ntanshi ya ciipailo. 15 Kabili umo pa bana ba kwa Aarone akabuulepo ubuunga ubwapeleka mu lupi lwakwe ubwa mutuulo wa ngano na mafuta na libani onse uuli pa mutuulo wa ngano, kabili akafyocele pa ciipailo ku kuba ica kwibukishishako+ no kuleta akacena kasuma kuli Yehova. 16 Ne fyashalapo Aarone na bana bakwe bakalye.+ Bakaliile mu muputule wa mushilo filya fiine balya umukate ushatutumuka.+ Bakafiliile mu lubansa lwa cikuulwa ca kukumaninako. 17 Te kwesha ukubikamo icitutumushi+ pa kupanga umukate. Ifi e fyo nabapeelako pa mituulo yandi iya pa mulilo.+ Fya mushilo nga nshi,+ ukupala umutuulo wa pa lubembu no mutuulo wa pa mulandu. 18 Umwaume+ onse mu bana ba kwa Aarone akalyeko. Ici e cipope ca muyayaya+ ku nkulo shenu icafuma ku mituulo ya pa mulilo iya kwa Yehova. Conse icakumya kuli iyi mituulo cikaba ica mushilo.’”

19 Kabili Yehova akonkenyepo ukweba Mose ati: 20 “Uyu e mutuulo+ wa kwa Aarone na bana bakwe uo bakatuula kuli Yehova pa bushiku akasubwa:+ ulupe+ lumo ulwa buunga bwapeleka e umutuulo wa ngano+ uo bakalatuula lyonse, hafu bakaletuula ulucelo na hafu bakaletuula icungulo. 21 Bakakandilemo amafuta no kupangamo utupaapaatu pa ca kocelapo.+ Nga mwabukumbawila bwino bwino e lyo mukalete. Mukatuule utupaapaatu twa mutuulo wa ngano utwamokaulwa ku kuleta akacena kasuma kuli Yehova. 22 Kabili shimapepo, uwasubwa ukumupyana ukufuma mu bana+ bakwe, e o akatuule. Ici cipope ca muyayaya. Ukaleba+ umutuulo uutuntulu uwa kocela Yehova. 23 Kabili umutuulo onse uwa ngano uwa kwa shimapepo+ ufwile ukuba uutuntulu. Te kwesha uku-ulya.”

24 Kabili Yehova akonkenyepo ukweba Mose ati: 25 “Sosa kuli Aarone na ku bana bakwe, auti, ‘Ili e funde lya mutuulo wa pa lubembu:+ Mukepaile Yehova inama ya kutuula umutuulo wa pa lubembu pa ncende+ apo bepaila lyonse inama ya kutuula umutuulo wa koca. Yena ya mushilo nga nshi.+ 26 Shimapepo uwatuula inama ya pa lubembu e ukailya.+ Akailiile umwa mushilo,+ mu lubansa+ lwa cikuulwa ca kukumaninako e mo akaliile.

27 “‘Conse icakumya umunofu wa iko cikaba ica mushilo,+ kabili umuntu nga asansa umulopa wa iko pa ca kufwala,+ umwa mushilo e mo mukacapile ico asanshileko umulopa.+ 28 Kabili icipe ce bumba+ umo yaipikilwa cikatobaulwe. Lelo nga mwaipikila mu cipe ca mukuba mukacikuuse no kucisukulula mu menshi.

29 “‘Umwaume onse shimapepo, akalyeko.+ Yena ya mushilo nga nshi.+ 30 Lelo, tabafwile ukulya inama ya kutuula umutuulo wa pa lubembu iyo batwala umulopa+ wa iko mu cikuulwa ca kukumaninako. Ifwile ukocewa mu mulilo.

7 “‘Kabili ili e funde lya mutuulo wa pa mulandu:+ Wa mushilo nga nshi.+ 2 Mukepaile inama ya kutuula umutuulo wa pa mulandu apo+ bepaila inama ya kutuula umutuulo wa koca, no mulopa+ wa iko mukausanse+ ukushingulusha pa ciipailo. 3 Lelo amafuta+ ya iko yonse, shimapepo akatuulako umucila wanona na mafuta ayafimba ku mala, 4 ne mfyo shibili na mafuta ayaliko e lyo na ya ku musana. Kumfwa insongo ya libu, akaifumyeko pamo pene ne mfyo.+ 5 Kabili shimapepo akafyocele pa ciipailo ku kuba umutuulo wa pa mulilo kuli Yehova.+ Mutuulo wa pa mulandu. 6 Umwaume onse uli ni shimapepo akalyeko.+ Umwa mushilo e mo bakaliile. Wa mushilo nga nshi.+ 7 Ifili umutuulo wa pa lubembu, e fili no mutuulo wa pa mulandu. Kuli fye ifunde limo kuli fyonse fibili.+ Shimapepo uwatuula icifuta mulandu, inama ikaba yakwe.

8 “‘Kabili shimapepo uwatuulila umuntu onse umutuulo wa koca, umukupo+ wa nama ya mutuulo wa koca iyo atuulile kuli shimapepo ukaba wakwe.

9 “‘Kabili umutuulo onse uwa ngano uwafumbikwa mu citofu+ na onse uwapangilwa mu cisalwilo,+ na pa ca kocelapo,+ wa kwa shimapepo uwatuula uyo mutuulo. Ukaba wakwe.+ 10 Lelo umutuulo onse uwa buunga bwa ngano ubwasakanamo amafuta,+ nelyo fye uwa buunga bwauma+ ukaba wa bana baume bonse aba kwa Aarone, ukubalinganya fye.

11 “‘Kabili ili e funde lye lambo lya mutende,+ ilyo umuntu engatuula kuli Yehova:12 Nga atuula ilambo lya kutootela,+ akatuule no mukate uushatutumuka uwasakanamo amafuta, no tumikate twayanguka utushatutumuka utwasubwako amafuta+ no mukate uwasakanamo amafuta uwapangwa ku buunga bwapeleka ubo bakandile bwino. 13 Akabikepo no mukate uwatutumuka+ e lyo akatuule umutuulo wakwe ne lambo lya kutootela ilya malambo yakwe aya mutende. 14 Kabili ukufuma pali fi akatuulepo cimo ica pa mutuulo wakwe ku kuba ica mushilo kuli Yehova;+ kumfwa shimapepo uwasansa umulopa wa malambo ya mutende, yakabe yakwe.+ 15 Kabili umunofu we lambo lya kutootela ilya malambo yakwe aya mutende ukaliiwe pa bushiku bwine ubwa mutuulo. Ekashapo nangu cimo ukufika ku lucelo.+

16 “‘Kabili ilambo lyakwe ilyo aletuula nga mutuulo wa mulapo+ atemwa uwa kuitemenwa,+ ilambo ninshi lifwile ukuliiwa pa bushiku alituula, kabili icashalapo kuti caliiwa ulucelo lukonkelepo. 17 Lelo icashalapo ica munofu we lambo ukufika ku bushiku ubwalenga shitatu cikocewe mu mulilo.+ 18 Kabili umunofu we lambo lyakwe ilya mutende nga waliiwa pa bushiku ubwalenga shitatu, uwatuula ilyo lambo takapokelelwe.+ Talyakapendelwe pamo ne lambo lyakwe.+ Umunofu ukabe cinangwa, no muntu uwalyako akaba no mulandu.+ 19 Kabili umunofu uwakumya icakowela+ conse te wa kulya. Mukaoce fye mu mulilo. Lelo umunofu umbi, onse uwasanguluka kuti alyako.

20 “‘Kabili umuntu uwalya umunofu wa pe lambo lya mutende ilya kwa Yehova, ilyo ali uwakowela, uyo muntu afwile ukwipaiwa.+ 21 Kabili umuntu nga akumya kuli conse icakowela, ukukowela kwa muntu,+ atemwa icinama icakowela,+ atemwa conse ica kuselausha icakowela,+ kabili alyako umunofu we lambo lya mutende ilya kwa Yehova, uyo muntu afwile ukwipaiwa.’”

22 Kabili Yehova akonkenyepo ukweba Mose ati:23 “Sosa ku bana ba kwa Israele, auti, ‘Ukulya mwilalya amafuta+ yonse aya ng’ombe iilume atemwa aya mwana wa mpaanga nelyo aya mbushi. 24 Nomba amafuta ya nama iifwile kale na mafuta ya nama iyataakaniwa+ kuti yabomfiwa ku mulimo onse uo mulefwaya, lelo ukulya kwena te kwesha. 25 Pantu onse uwalya amafuta ya mu nama iyo atuulile ukuba umutuulo wa pa mulilo kuli Yehova, uyo muntu uwalyako afwile ukwipaiwa.+

26 “‘Kabili umulopa+ onse, uwa cuni nangu uwa nama, te kwesha ukulya monse umo muleikala. 27 Umuntu onse uwalya umulopa wa musango onse, uyo muntu afwile ukwipaiwa.’”+

28 Kabili Yehova akonkenyepo ukweba Mose ati:29 “Sosa ku bana ba kwa Israele, auti, ‘Uuletuula ilambo lyakwe ilya mutende kuli Yehova akatuula umutuulo wakwe kuli Yehova ukufumya pe lambo lyakwe ilya mutende.+ 30 Iminwe yakwe e yo ikalete umutuulo wa pa mulilo uwa kwa Yehova kabili akalete amafuta+ ne cisao. Icisao akalete ku kucisunsha ku kuleka cibe umutuulo wa kusunsha+ ku cinso ca kwa Yehova. 31 Kabili shimapepo akoce+ amafuta pa ciipailo, lelo icisao cikabe ca kwa Aarone na bana bakwe abaume.+

32 “‘Kabili umwendo wa ku kulyo mukaleupeela shimapepo ku kuba icipande+ ca mushilo ukufuma pa malambo yenu aya mutende. 33 Uwa mu bana baume ba kwa Aarone uwatuula umulopa wa malambo ya mutende na mafuta, e o akapeelwe umwendo wa ku kulyo pa kuti ukabe wakwe.+ 34 Pantu icisao ica mutuulo wa kusunsha+ no mwendo wa cipande ca mushilo nimbuula ku bana ba kwa Israele, pa malambo yabo aya mutende, kabili nkafipeela kuli Aarone shimapepo na ku bana bakwe abaume, ku kube cipope ca muyayaya, ukufuma ku bana ba kwa Israele.

35 “‘Ici e cipande ca bushimapepo ica kwa Aarone kabili e cipande ca bushimapepo ica bana bakwe abaume icafuma ku mutuulo wa pa mulilo uwa kwa Yehova, pa bushiku bapeelwemo+ ku kuba bashimapepo kuli Yehova, 36 nge fyo Yehova asosele ukupeela kuli bena pa bushiku abasubile+ pa bana ba kwa Israele. Cipope ca muyayaya ku nkulo+ shabo.’”

37 Ili e funde lya mutuulo wa koca,+ umutuulo wa ngano+ no mutuulo wa pa lubembu+ no mutuulo wa pa mulandu+ ne lambo lya pa kulaashikwa+ ne lambo lya mutende,+ 38 nge fyo Yehova aebele Mose mu Lupili lwa Sinai+ mu bushiku aebelemo abana ba kwa Israele ukutuula imituulo yabo kuli Yehova mu matololo ya Sinai.+

8 Kabili Yehova akonkenyepo ukweba Mose ati: 2 “Buula Aarone na bana bakwe abaume+ ne fya kufwala+ na mafuta ya kusubilako+ ne ng’ombe iilume iya kutuula umutuulo wa pa lubembu+ na basukusuku babili no museke wa mikate iishatutumuka,+ 3 kabili webe no lukuta lonse ukulongana+ pa mwinshi wa cikuulwa ca kukumaninako.”+

4 Awe Mose acitile ifyo Yehova amwebele, kabili ulukuta lwalongene pa mwinshi+ wa cikuulwa ca kukumaninako. 5 Nomba Mose atile ku lukuta: “Ifi e fyo Yehova anjebele ukucita.”+ 6 E ico Mose apalamike Aarone na bana bakwe abaume no kubasamba+ mu menshi.+ 7 E lyo amufwikile ica kufwala+ no kumukaka umushipi+ mu musana, amufwikile ne ca kufwala cabula amaboko,+ amufwika na efode+ kabili amukakile icimushipi+ mu musana ica pali efode no kucikakisha. 8 E lyo amufwikile tumba wa pa cifuba+ no kubikamo Urimu na Tumimu.+ 9 E lyo amupombenye insalu+ ku mutwe na pa ntanshi ya citebo abikilepo akapaapaatu kabeeka aka golde, icishibilo ca mushilo ica kuipeela,+ ukulingana ne fyo Yehova aebele Mose.

10 Kabili Mose abuulile amafuta ya kusubilako+ kabili asubile icikuulwa ca mushilo na conse icalimo no kufisangulula. 11 E lyo asanshile amafuta yamo pa ciipailo imiku cinelubali (7) kabili asubile ne ciipailo+ ne fipe fya ciko fyonse ne ca kubikamo amenshi ya kusamba ne ca kucitekapo pa kuti afisangulule. 12 Na mu kulekelesha aitiile amafuta ya kusubilako yamo pa mutwe wa kwa Aarone no kumusuba pa kuti amusangulule.+

13 E lyo Mose apalamike+ abana ba kwa Aarone no kubafwika amalaya no kubakaka imishipi+ mu misana no kubapombela ifya kufwala ku mutwe,+ ukulingana ne fyo Yehova aebele Mose.

14 E lyo apalamike ing’ombe+ iilume iya mutuulo wa pa lubembu kabili Aarone na bana bakwe abaume babikile iminwe yabo pa mutwe+ wa ng’ombe ya mutuulo wa pa lubembu. 15 E lyo Mose aipeye+ ing’ombe, abuulile umulopa+ no ku-ushinga ku nsengo sha pa ciipailo ukushingulusha no kusangulule ciipailo ku lubembu, no washelepo awitiile mwi samba lya ciipailo, pa kuti acisangulule no kupeelelapo ilambo lya cifuta mulandu.+ 16 Kabili Mose abuulile amafuta yonse ayali ku mala, ne nsongo ya libu ne mfyo shibili na mafuta ya shiko no kufyocela pa ciipailo.+ 17 Lelo ing’ombe iilume no mukupo wa iko no munofu wa iko na mafi ya iko afyocele mu mulilo ku nse ya nkambi,+ ukulingana ne fyo Yehova aebele Mose.

18 E lyo nomba apalamike sukusuku uwa mutuulo wa koca, kabili Aarone na bana bakwe abaume babikile iminwe yabo pa mutwe wa kwa sukusuku.+ 19 Na o Mose aipeye sukusuku no kusansa umulopa ukushingulusha iciipailo.+ 20 Kabili aputawile sukusuku fipimfya fipimfya,+ kabili Mose aocele umutwe ne fipimfya na mafuta. 21 Kabili amala na molu afisamfishe mu menshi, e lyo Mose aocele sukusuku onse pa ciipailo.+ Wali mutuulo wa koca uwa kuleta akacena kasuma.+ Wali mutuulo wa pa mulilo kuli Yehova, ukulingana ne fyo Yehova aebele Mose.

22 E lyo apalamike sukusuku uwalenga bubili, sukusuku wa pa kupeela bushimapepo,+ kabili Aarone na bana bakwe abaume babikile iminwe yabo pa mutwe wa kwa sukusuku. 23 Na o Mose aipeye sukusuku no kubuulapo umulopa no ku-ushinga pa kalebelebe ka ku kutwi ukwa kwa Aarone ukwa ku kulyo na pa cikumo cakwe ica ku kulyo na pa cikondo ica ku kulyo.+ 24 E lyo Mose apalamike abana ba kwa Aarone no kushinga umulopa umo pa tulebelebe twa ku matwi yabo aya ku kulyo na pa fikumo fya ku kulyo na pa fikondo fya ku kulyo; kabili Mose asanshile umulopa uwashelepo ukushingulusha pa ciipailo.+

25 E lyo abuulile amafuta no mucila uwanona na mafuta yonse ayali ku mala,+ ne nsongo ya ku libu ne mfyo shibili na mafuta ya shiko no mwendo wa ku kulyo.+ 26 Kabili mu museke wa mukate uushatutumuka uwa ku cinso ca kwa Yehova abuulilemo umukate umo uushatutumuka+ no mukate+ uwabikwako amafuta na kapaapaatu+ kamo aka mukate. E lyo afibikile pa fipimfya fya mafuta na pa mwendo wa ku kulyo. 27 Kabili fyonse afibikile mu ndupi sha kwa Aarone na mu ndupi sha bana bakwe abaume e lyo alafisunsha pa kuti fibe umutuulo wa kusunsha kuli Yehova.+ 28 E lyo Mose afibuulile pa ndupi shabo no kufyoca pa ciipailo pa muulu wa mutuulo wa koca.+ Fyena e lambo lya pa kupeela bushimapepo+ ilya kuleta akacena kasuma.+ Uyu mutuulo wa pa mulilo kuli Yehova.+

29 Kabili Mose abuulile icisao+ ca kwa sukusuku no kucisunsha pa kuti cibe umutuulo wa kusunsha kuli Yehova.+ Ici cisao icafumine ku mpaanga ya pa kupeela bushimapepo e cali ica kwa+ Mose, ukulingana ne fyo Yehova aebele Mose.

30 E lyo Mose abuulile amafuta yamo aya kusubilako+ no mulopa umo uwali pa ciipailo kabili asanshile Aarone no kusansa ku fya kufwala fyakwe kabili umbi asanshile abana bakwe abaume no kusansa ku fya kufwala fya bana bakwe abaume abo aali na bo. E fyo asangulwile+ Aarone ne fya kufwala fyakwe na bana+ bakwe ne fya kufwala fya bana bakwe abo aali na bo.

31 Kabili Mose aebele Aarone na bana bakwe abaume, ati: “Ipikileni+ inama pa mwinshi wa cikuulwa ca kukumaninako, kabili e po muiliile+ no mukate uuli mu museke uwa pa kupeela bushimapepo, ifyo naebelwe, ukuti, ‘Aarone na bana bakwe abaume e bo bakalye.’32 Inama yashalako no mukate, moce mu mulilo.+ 33 Kabili mwikafuma pa mwinshi wa cikuulwa ca kukumaninako pa nshiku cinelubali (7),+ ukufikila inshiku sha kumupeela bushimapepo shikapwe, pantu ukumupeela bushimapepo+ kukasenda inshiku cinelubali. 34 Ifi nacita lelo, e fyo Yehova asosele ukuti nkacite pa kumufutila umulandu.+ 35 Kabili muleikala pa mwinshi wa cikuulwa ca kukumaninako akasuba no bushiku pa nshiku cinelubali (7),+ kabili mulekonka icipope ca kwa Yehova ica kulalonda,+ pa kuti mwifwa; pantu e fyo anjebele.”

36 Kabili Aarone na bana bakwe abaume bacitile fyonse ifyo Yehova asosele ukupitila muli Mose.

9 Nomba pa bushiku bwalenga cinekonsekonse (8)+ e po Mose aitile Aarone na bana bakwe na bakalamba ba mu Israele. 2 E lyo aebele Aarone, ati: “Buule ng’ombe iilume iinono ibe umutuulo wa pa lubembu+ na sukusuku abe umutuulo wa koca, + shonse ishisuma, kabili ushituule kuli Yehova.+ 3 Lelo ku bana ba kwa Israele usose, auti, ‘Buuleni sawe+ abe umutuulo wa pa lubembu no mwana wa ng’ombe na sukusuku,+ shonse ishili no mwaka umo, ishisuma, kabili shibe umutuulo wa koca, 4 e lyo ing’ombe iilume na sukusuku fibe amalambo ya mutende+ aya kuninika kuli Yehova, no mutuulo wa buunga bwa ngano+ uwasakanamo amafuta, pantu buno bushiku Yehova alemoneka kuli imwe.’”+

5 Awe batwele ku ntanshi ya cikuulwa ca kukumaninako ifyo Mose asosele. E lyo ulukuta lonse lwapaleme no kwiminina ku cinso ca kwa Yehova.+ 6 Kabili Mose atile: “Ici e co Yehova asosele ukuti mulecita, pa kuti ubukata bwa kwa Yehova bumoneke kuli imwe.”+ 7 Kabili Mose atile kuli Aarone: “Palama ku ciipailo no kutuula umutuulo obe uwa pa lubembu+ no mutuulo obe uwa koca, no kuifutila+ umulandu we mwine no kufutila aba mu ng’anda yobe; e lyo utuule umutuulo wa bantu,+ no kubafutilako,+ ukulingana ne fyo Yehova asosele.”

8 Ilyo line fye Aarone apaleme ku ciipailo no kwipaya umwana wa ng’ombe uwa mutuulo wakwe uwa pa lubembu.+ 9 E lyo abana baume aba kwa Aarone bamuletele umulopa+ na o atumpike umunwe wakwe mu mulopa,+ no ku-ushinga pa nsengo+ sha ku ciipailo, no mulopa uwashelepo awitiile mwi samba lya ciipailo. 10 Kabili aocele amafuta+ pa ciipailo+ ne mfyo ne nsongo ya libu ukufuma pa mutuulo wa pa lubembu, ukulingana ne fyo Yehova aebele Mose. 11 Kabili umunofu no mukupo afyocele mu mulilo ku nse ya nkambi.+

12 E lyo aipeye inama ya kutuula umutuulo wa koca na bana ba kwa Aarone bamupeele umulopa na o ausanshile ukushingulusha iciipailo.+ 13 Kabili bamupeele umutuulo wa koca fipimfya fipimfya pamo no mutwe, na o afyocele pa ciipailo.+ 14 Awe, asamfishe amala ne myendo no kufyoca pa muulu wa mutuulo wa koca pa ciipailo.+

15 E lyo nomba atuulile umutuulo wa bantu+ kabili abuulile imbushi ya mutuulo wa pa lubembu lwa bantu no kuipaya kabili aituulile ukuba umutuulo wa pa lubembu nga filya acitile ku mutuulo wa ntanshi. 16 Kabili atuulile umutuulo wa koca no kucita ukulingana ne fyo bafwile ukucita.+

17 E lyo aletele umutuulo wa ngano+ kabili abuulilepo mu lupi no kocela pa ciipailo, ukufumyako fye umutuulo wa koca uwa lucelo.+

18 E lyo aipeye ing’ombe iilume na sukusuku uwe lambo lya mutende+ ilya bantu. Kabili abana ba kwa Aarone bamupeele umulopa na o ausanshile ukushingulusha iciipailo.+ 19 Lelo ifipimfya fya mafuta+ ifya ng’ombe iilume no mucila uwanona+ uwa kwa sukusuku na mafuta ayafimba ku mala ne mfyo ne nsongo ya libu, 20 abana ba kwa Aarone babikile ifipimfya fya mafuta pa cisao,+ e lyo aocele ifipimfya fya mafuta pa ciipailo. 21 Lelo icisao no mwendo wa ku kulyo Aarone afisunshishe+ ku cinso ca kwa Yehova, ukulingana ne fyo Mose asosele.

22 E lyo Aarone aimishe amaboko ayalosha ku bantu no kubapaala+ kabili aikile+ ukufuma ku kutuula umutuulo wa pa lubembu no mutuulo wa koca na ku kuninika amalambo ya mutende. 23 E lyo Mose na Aarone baingile mu cikuulwa ca kukumaninako kabili balifuminemo no kuyapaala abantu.+

Kabili ubukata+ bwa kwa Yehova bwamoneke ku bantu bonse, 24 kabili umulilo wafumine ku cinso ca kwa Yehova+ no koca umutuulo wa koca ne fipimfya fya mafuta ifyali pa ciipailo. Ilyo abantu bonse bamwene ici conse, balyawile+ no kuwa ubukupeme.

10 Nomba abana ba kwa Aarone, Nadabu na Abihu,+ cila muntu aikete ica kufutumwinamo+ cakwe, abikilemo no mulilo, babikilemo ne fyanunkila,+ kabili batampile ukutuulila Yehova umutuulo wa pa mulilo uo bashasuminishiwe,+ uo ashabebele. 2 Awe kwafumine umulilo ku cinso ca kwa Yehova no kuboca,+ na bo bafwilile ku cinso ca kwa Yehova.+ 3 E lyo Mose atile kuli Aarone: “Yehova asosele ati, ‘Mu bapalama kuli ine+ e mo ndecindikilwa,+ na pa cinso ca bantu bonse e po ndepeelelwa ubukata.’”+ Na Aarone aikele fye tondolo.

4 E ico Mose aitile Mishaele na Elsafani, abana baume ba kwa Usiele,+ wishi mukalamba wa kwa Aarone, no kubeba ati: “Palameni, sendeni bamunyinenwe bafumyeni pa ncende ya mushilo, batwaleni ku nse ya nkambi.”+ 5 Awe balipaleme no kubasenda ninshi nabafwala na malaya yabo babatwala ku nse ya nkambi, ukulingana ne fyo Mose asosele.

6 Nomba Mose atile kuli Aarone na kuli Eleasari na Itamari abana bakwe bambi: “Mwilalekelesha umushishi wenu,+ kabili mwilepula ifya kufwala fyenu, epali mwafwa no bukali bwa kwa Lesa bwaimina ulukuta lonse;+ lelo bamunyinenwe aba mu ng’anda ya kwa Israele e bo balooshe pa mulilo uo Yehova ocele. 7 Kabili mwifuma pa mwinshi wa cikuulwa ca kukumaninako epali mwafwa,+ pantu amafuta ye paalo aya kwa Yehova yali pali imwe.”+ Awe bacitile ukulingana ne fyo Mose asosele.

8 Kabili Yehova akonkenyepo ukweba Aarone ati: 9 “Ilyo waisa ku cikuulwa ca kukumaninako, wilanwa umwangashi nangu ifya kunwa fimbi ifikola,+ iwe na bana bobe abaume abali pamo na iwe, epali mwafwa. Ili e funde lya muyayaya ku nkulo shenu, 10 pa kuti mulelekanya ica mushilo ne ca fye kabili icakowela ne casanguluka,+ 11 kabili pa kuti mulesambilisha abana ba kwa Israele+ ifipope fyonse ifyo Yehova abebele ukupitila muli Mose.”

12 E lyo Mose asosele kuli Aarone na kuli Eleasari na Itamari, abana bakwe abaume abashelepo, ati: “Buuleni umutuulo wa ngano+ uwashele ku mituulo ya pa mulilo iya kwa Yehova kabili mu-uliile mupepi ne ciipailo, mu-ulye uushatutumuka, pantu wa mushilo nga nshi.+ 13 Kabili umwa mushilo+ e mo muleuliila, pantu e co wapeelwa kabili e capeelwa ku bana bobe ica pa mutuulo wa kwa Yehova uwa pa mulilo; pantu e fyo anjebele. 14 Kabili umwa busaka e mo mukaleliila icisao ca mutuulo wa kusunsha+ no mwendo wa cipande ca mushilo,+ iwe na bana bobe abaume na bana bobe abanakashi abo uli na bo,+ pantu fipeelwe ku kube fipande fyobe na bana bobe abaume ukufuma pa malambo ya mutende aya bana ba kwa Israele. 15 Bakulaletela pamo umwendo wa ca mushilo ne cisao ca mutuulo wa kusunsha+ no mutuulo wa pa mulilo, uwa fipimfya fya mafuta, ku kusunsha umutuulo wa kusunsha ku cinso ca kwa Yehova; kabili ici e cipande+ cobe ica muyayaya kabili e cipande ca bana bobe abaume abali pamo na iwe, nge fyo Yehova asosele.”

16 Kabili Mose afwaile nga nshi imbushi ya mutuulo wa pa lubembu,+ kabili, moneni! nayocewa. E ico akalipile Eleasari na Itamari, abana baume ba kwa Aarone abashelepo, ati: 17 “Nga kanshi cinshi ico mushililiile umutuulo wa pa lubembu umwa mushilo,+ apo wena wa mushilo nga nshi kabili aupeele kuli imwe ku kushingamwa imembu sha lukuta ku kubafutila umulandu ku cinso ca kwa Yehova?+ 18 Moneni! Umulopa wa uko tabauletele umwa mushilo mu kati.+ Ukulya nga mwaciliila umwa mushilo, ukulingana ne fyo anjebele.”+ 19 E lyo Aarone asosele kuli Mose ati: “Moneni! Lelo nabatuula umutuulo wabo uwa pa lubembu no mutuulo wabo uwa koca ku cinso ca kwa Yehova,+ ilyo ifintu nge fi fyacitampa ukumponena; kabili ndya umutuulo wa pa lubembu lelo, bushe nga caciba bwino mu menso ya kwa Yehova?”+ 20 Ilyo Mose aumfwile ci, e lyo caweme mu menso yakwe.

11 Kabili Yehova asosele kuli Mose na kuli Aarone, no kubeba ati: 2 “Soseni ku bana ba kwa Israele, amuti, ‘Ifi e fya mweo ifyo mwingalya,+ pa nama shonse isha pano isonde: 3 Inama yonse iyalepuka amabondo kabili iyapanduka amabondo pabili kabili iibukula insaku, e yo mulelya.+

4 “‘Pa nama ishibukula insaku nangu ishalepuka amabondo isho mushifwile ukulya ni shi: ingamila, pantu ilabukula insaku lelo tayalepuka amabondo. Muleimona ukuti yalikowela.+ 5 Pati+ na o mwilalya, pantu alabukule nsaku lelo talepuka amabondo. Mulemumona ukuti alikowela. 6 Mwilalya akalulu,+ pantu kalabukule nsaku, lelo takalepuka mabondo. Mulekamona ukuti kalikowela. 7 Mwilalya ne nkumba,+ pantu yalilepuka amabondo kabili yalipanduka amabondo pabili, lelo taibukula insaku nakalya. Muleimona ukuti yalikowela. 8 Umunofu wa ishi nama mwilalya, ne fitumbi+ fya shiko mwilakumyako. Mulefimona ukuti fyalikowela.+

9 “‘Ifi e fyo mulelya pa fya mu menshi fyonse:+ Conse icili no tulebelebe na mamba+ ica mu menshi, muli babemba na mu milonga, mulelya. 10 Na conse ica muli babemba na mu milonga icishili no tulebelebe na mamba, pali fyonse ifisenya mu menshi, kabili pali fyonse ifya mweo ifili mu menshi, mulefimona ukuti fya bunani. 11 Awe mulefimona nge fya bunani. Umunofu+ wa fiko mwilalya, ne fitumbi fya fiko mulefimona ukuti fya bunani. 12 Conse ica mu menshi icishaba no tulebelebe na mamba mulecimona ukuti ca bunani.

13 “‘Kabili pa fyuni, ifi e fyo mulemona ukuti fya bunani.+ Tamufwile ukufilya. Fya bunani: kapumpe,+ ne kubi likalamba, ne kubi linono, 14 na pungwa wakashika na pungwa wafiita+ mu misango yakwe yonse, 15 na bamwankole+ bonse mu misango yabo, 16 na mwakatala+ ne cipululu na petrele no lukoshi mu musango wa luko, 17 na kapululu na bumba, ne ntitimushi,+ 18 ne shipi na mukanga ne kubi,+ 19 na kabaso, ne misango yalekanalekana iya nkooba, na puupuute na kasusu.+ 20 Fyonse ifisenya ifyakwata amapindo ifyendela ku molu yane mulefimona ukuti fya bunani.+

21 “‘Ifi fyeka e fyo mwingalya pali fyonse ifisenya ifyakwata amapindo ifyendela ku molu yane, ifyakwata amolu ya kutolaukilako ayalepa ukucila aya kwendelako. 22 Ifi e fyo mwingalya pali ifyo: makanta+ mu misango yakwe, na mapantankolo+ mu misango ya yako, ne nyense mu misango ya shiko, ne nshonkonono+ mu misango ya shiko. 23 Lelo ifisenya fimbi ifyakwata amapindo, ifyakwata amolu yane, mulefimona ukuti fya bunani.+ 24 Ifi kuti fyamukowesha. Onse uwakumya ku fitumbi fya fiko akaba uwakowela ukufika ku cungulo.+ 25 Kabili onse uwasenda icitumbi ca fiko akacape+ ifya kufwala fyakwe, kabili akaba uwakowela ukufika ku cungulo.

26 “‘Icinama conse icalepuka amabondo lelo tacapanduka amakasa pa kati kabili tacibukule nsaku, mulecimona ukuti calikowela. Onse uwacikumya akakowela.+ 27 Kabili ica mweo conse icendela ku fisansa, mu nama shonse ishendela ku molu yane, mulecimona ukuti calikowela. Onse uwakumya ku citumbi ca ishi inama akakowela ukufika ku cungulo. 28 Kabili uwasenda icitumbi+ ca ishi nama, akacape ifya kufwala fyakwe,+ kabili akaba uwakowela ukufika ku cungulo. Muleshimona ukuti shalikowela.

29 “‘Kabili ifi e fyo mufwile ukumona ukuti fyalikowela pa fya mweo fyonse ifisenya pano isonde:+ imfuko ne mpuku+ na bamulinso mu misango yabo, 30 na kolyokolyo ne mbulu ne nsamba ne nkulumushi na lufwinyemba. 31 Ifi e fyo mulemona ukuti fyalikowela pa fya mweo fyonse ifisenya.+ Onse uwakumya ku fitumbi fya fiko akaba uwakowela ukufika ku cungulo.+

32 “‘Kabili nga cafwa, ponse apo icitumbi caponena ninshi pakowela, nangu ni pa cipe+ conse ica cimuti nangu pa ca kufwala nangu pa mukupo+ nangu pa nsamu.+ Icipe conse ica musango onse icibomfiwa, cikabikwe mu menshi, kabili cikaba icakowela ukufika icungulo e lyo cikasanguluka. 33 Kabili icipe+ conse ice bumba umwaponena ifi ifyakowela, conse icilimo ninshi cakowela, kabili mukacitobaule.+ 34 Ifya kulya fyonse ifyo ayo menshi yengatonenako ninshi fyakowela, ne fya kunwa fyonse ifyo banwena muli ico cipe fikaba ifyakowela. 35 Kabili icintu conse apo ifyo fitumbi fyaponena ninshi cakowela. Nampo nga ni pa citofu atemwa pa mutondo, ico cintu cikonaulwe. Ninshi nafikowela, kabili mukalefimona ukuti nafikowela. 36 Lelo akamfukumfuku napamo icilindi umo basungila amenshi fyena fikatwalilila ukuba ifyasanguluka, lelo onse uwakumya kuli ifyo fitumbi akaba uwakowela. 37 Kabili ifyo fitumbi nga fyaponena pa mbuto shonse isha kubyala, imbuto shikaba ishasanguluka. 38 Lelo nga ca kuti imbuto nashibomba kabili ifyo fitumbi fyaponenapo, isho mbuto mukashimone ukuti nashikowela.

39 “‘Kabili nga ca kuti inama imo pa sho balya yafwa, uwakumya ku citumbi ca iko akaba uwakowela ukufika ku cungulo.+ 40 Kabili uwalyako+ iyo nama iyafwa akacape ifya kufwala fyakwe kabili akaba uwakowela ukufika ku cungulo; no wasende citumbi ca iko akacape ifya kufwala fyakwe, kabili akaba uwakowela ukufika ku cungulo. 41 Kabili icintu conse icisenya pano isonde ca bunani.+ Te kwesha ukulya. 42 Conse icendela pe fumo+ na conse icendela ku molu yane na conse icaba na makasa ayengi, conse icisenya pano isonde, mwilalya, pantu fya bunani.+ 43 Mwilaleka ifisenya filemulenga ukuba aba bunani, kabili mwilaikoweshako no kuleka filemukowesha.+ 44 Pantu ine ndi Yehova Lesa wenu;+ e ico muleisangulula no kuba aba mushilo,+ pantu ine ndi wa mushilo.+ E ico mwilaikowesha ku cisenya conse icikulika pano isonde. 45 Pantu nine Yehova uwamufumishe mu calo ca Egupti ukuti mbe Lesa wenu;+ na imwe muleba aba mushilo,+ pantu ndi wa mushilo.+

46 “‘Aya e mafunde ya pa nama na pa fyuni na pa fya mweo fyonse ifya mu menshi,+ na pa fisenya fyonse pano isonde, 47 aya kumwafwa ukulekanya+ icakowela ku casanguluka kabili ukulekanya ica mweo ico mwingalya ku ca mweo ico mushingalya.’”

12 Kabili Yehova aebele Mose ati: 2 “Sosa ku bana ba kwa Israele, auti, ‘Umwanakashi nga aimita+ no kupaapa umwana umwaume, akaba uwakowela inshiku cinelubali (7); akaba uwakowela nga mu nshiku sha makowesha ilyo aba ku mweshi.+ 3 Kabili pa bushiku bwalenga cinekonsekonse (8) inkanda ya mubili iya pa mpela iya mwana ikasembululwe.+ 4 E lyo nyina akekale pa ng’anda inshiku amakumi yatatu na shitatu (33) mpaka akasanguluke ku mulopa wakwe. Tafwile ukwikata ku ca mushilo icili conse, kabili tafwile ukwingila mu ncende ya mushilo mpaka inshiku sha kusanguluka kwakwe shikapwe.+

5 “‘Lelo nga apaapa umwana mwanakashi, ninshi akaba uwakowela pa nshiku ikumi limo na shine (14), filya fine akowela ilyo aba ku mweshi. Ninshi akekala pa ng’anda inshiku na shimbi amakumi mutanda na mutanda (66) mpaka akasanguluke ku mulopa wakwe. 6 Kabili ilyo inshiku sha kukanasanguluka kwakwe pa mulandu wa kufyala umwana mwaume nangu umwana mwanakashi shikapwa, e lyo akalete umwana wa mpaanga uwa mwaka umo ku kuba umutuulo wakwe uwa koca,+ na kana ka nkunda napamo icipele+ ku kuba umutuulo wa pa lubembu kuli shimapepo ku mwinshi wa cikuulwa ca kukumaninako. 7 Na o akautuule kuli Yehova no kumufutila ulubembu, e lyo akaba uwasanguluka ku kamfukumfuku ka mulopa+ wakwe. Ili e funde lya wafyala umwana umwaume atemwa umwana umwanakashi. 8 Lelo nga takwete impaanga, akalete ifipele fibili nelyo utwana twa nkunda+ tubili, kamo ka mutuulo wa koca kambi na ko ka mutuulo wa pa lubembu, na shimapepo akamufutileko,+ e lyo akasanguluka.’”

13 Kabili Yehova aebele Mose na Aarone ati: 2 “Pa nkanda ya muntu nga pafuluma fimo nangu nga patumba ifilemoneka nge cikokotolo ca pa cilonda+ napamo nga palemoneka ifyapala cisongo, na fyo fyasanguka ifibashi,+ uyo muntu akaletwe kuli Aarone shimapepo, nangu kuli umo pa bana bakwe bashimapepo.+ 3 Na o shimapepo akalolekeshe ifili pa nkanda.+ Ubupipi ubulipo nga nabusanguka ubwabuuta kabili nga nafingila sana pa nkanda yakwe, ninshi fibashi. Kabili shimapepo akafilolekeshe, e lyo akamwebe ukuti nakowela. 4 Lelo ifyapala cisongo nga filemoneka ifyabuuta pa nkanda ya mubili wakwe kabili filemoneka ukuti tafingile sana pa nkanda no bupipi tabwalwike ubwabuuta, shimapepo akamubike eka+ inshiku cinelubali (7). 5 Kabili shimapepo akamumone mu bushiku ubwalenga cinelubali (7), kabili nga fyamoneka kwati nafipwa, tafisalangene pa nkanda, e lyo shimapepo akamubike eka+ inshiku na shimbi cinelubali.

6 “Kabili shimapepo akamumone umuku walenga bubili pa bushiku bwalenga cinelubali (7), kabili nga fileya filepwa kabili tafisalangene pa nkanda, e lyo shimapepo akalande ukuti nasanguluka. Ninshi cali fye cikokotolo nge ca pa cilonda. Na o akacape ifya kufwala fyakwe, no kusanguluka. 7 Lelo nga nacisalangana pa nkanda, pa numa ya kumonekela kuli shimapepo, pa kuti cishibikwe nga ali uwasanguluka, e lyo akamonekele na kabili kuli shimapepo umuku walenga bubili,+ 8 na o shimapepo akalolekeshe; kabili nga ca kuti nacisalangana pa nkanda, e lyo shimapepo akalande ukuti nakowela. Ninshi fibashi.+

9 “Ubulwele bwa fibashi nga bwaba mu muntu, e lyo bakamulete kuli shimapepo. 10 Na o shimapepo akamumone;+ kabili nga pa nkanda yakwe napafuluma ifyabuuta, na fyo nafyalula ubupipi ukuba ubwabuuta, ne fi ififulwime nga nafipanga icilonda icibishi,+ 11 ninshi fibashi ifya mutatakuya+ ifili pa nkanda yakwe; kabili shimapepo akalande ukuti nakowela. Ekamubika eka,+ pantu nakowela. 12 Kabili ifibashi nga fyasalangana pa nkanda, ne fibashi fyaba pa nkanda yonse iya mulwele ukutula ku mutwe no kufika ku makasa yakwe, monse umwamoneka kuli shimapepo;13 kabili shimapepo nga amona, asanga no kuti ifibashi fili pa mubili wakwe onse, e lyo akatile uyu musango wa fibashi te kuti wambukile bambi. Inkanda yonse nayaluka iyabuuta. Ena ali uwasanguluka. 14 Lelo ubushiku camoneka pali ena icilonda icibishi, ninshi nakowela. 15 Kabili shimapepo+ akalolekeshe icilonda icibishi, akalande ukuti nakowela. Uuli ne cilonda icibishi alikowela. Fibashi.+ 16 Napamo icilonda icibishi cabwela no kubuuta cabuuta, e lyo uwa cilonda akese kuli shimapepo. 17 Na o shimapepo akamumone,+ kabili ubulwele nga nabwaluka icabuuta, ninshi shimapepo akebe umulwele ukuti nasanguluka. Ena nasanguluka.

18 “Kabili nga pa nkanda paba icipute,+ kabili capola, 19 na paali icipute pafuluma ifyabuuta nelyo paba ifyapala cisongo ifyakashikila, e lyo akailange kuli shimapepo. 20 Na o shimapepo akalolekeshe,+ kabili, nga camoneka ukuti nafingila sana pa nkanda, no bupipi nabwaluka ubwabuuta, e lyo shimapepo akalande ukuti nakowela. Ninshi fibashi. Fyafuma mu cipute. 21 Lelo shimapepo nga amonapo, kabili, moneni, tapali ubupipi bwabuuta kabili tafingile sana pa nkanda lelo fileya filepwa, e lyo shimapepo akamubike eka+ inshiku cinelubali (7). 22 Kabili nga asanga ukuti nafisalangana pa nkanda, shimapepo akatile nakowela. Ninshi fibashi. 23 Lelo ifyapala cisongo nga fili fye pamo pene, tafisalangene, ninshi cipute fye cifimbile;+ e lyo shimapepo akatile nasanguluka.+

24 “Napamo umuntu nga apya pa nkanda, na pa cilonda cakwe icibishi paba ifilemoneka ifyakashikila nelyo ifyabuuta, 25 e lyo shimapepo akamonepo; kabili ubupipi ubulipo nga nabwaluka ubwabuuta kabili nga palemoneka ukuti napengila sana, ninshi fibashi. Fyafuma pa cilonda ca mulilo, na shimapepo akatile uyo muntu nakowela. Ninshi bulwele bwa fibashi. 26 Lelo shimapepo nga amonapo, kabili, moneni, tapali ubupipi ubwabuuta kabili tapengile sana lelo pali eyefilya, shimapepo akamubike eka inshiku cinelubali (7). 27 Kabili shimapepo akamumone pa bushiku bwalenga cinelubali (7). Nga filya fyalemonekapo nafisalangana pa nkanda, e lyo shimapepo akatile nakowela. Ninshi bulwele bwa fibashi. 28 Lelo nga fili fye pamo pene, tafisalangene pa nkanda, kabili filemoneka ifyafitulukila, ninshi cibala fye icilepangika; na shimapepo akatile nasanguluka, pantu cibala fye ica cilonda ca mulilo.

29 “Kabili umwaume napamo umwanakashi nga aba no bulwele mu mutwe napamo ku kalefulefu, 30 e lyo shimapepo+ akamone ubulwele; kabili nga bwamoneka ukwingila sana pa nkanda, paba no mushishi wa mutuntula kabili uwa patali patali, e lyo shimapepo akatile nakowela. Uku kulukuta kwa mushishi takuibelele fye.+ Fibashi fya ku mutwe napamo ifya ku kalefulefu. 31 Lelo tutile shimapepo alolekesha ubulwele bwa kulukuta kwa mushishi, kabili, moneni! tabumoneke ukwingila sana pa nkanda no mushishi uwafiita takuli, shimapepo akabike umulwele wa kulukuta kwa mushishi eka+ inshiku cinelubali (7).+ 32 Kabili shimapepo akamone ubulwele pa bushiku bwalenga cinelubali (7); kabili ukulukuta+ kwa mushishi nga takulundulwike, kabili tapali mushishi wa mutuntula uumenene apalukwite umushishi, tapamoneke no kwingila sana, 33 e lyo uwa bulwele akaibeye ulukuuso, lelo apalukuta umushishi pena ekabeyapo ulukuuso;+ kabili shimapepo akabike uo umushishi ulelukuta eka, pa nshiku na shimbi cinelubali (7).

34 “Pa bushiku bwalenga cinelubali (7) shimapepo akalolekeshe apo umushishi ulelukuta; kabili ukulukuta kwa mushishi nga takusalanganine pa nkanda, kabili takulemoneka ukwingila sana, e lyo shimapepo akatile nasanguluka,+ na o akacape ifya kufwala fyakwe no kuba uwasanguluka. 35 Lelo ukulukuta kwa mushishi pa nkanda nga kwasalangana pa numa ya kumweba ukuti nasanguluka, 36 e lyo shimapepo+ akamumone; kabili ukulukuta kwa mushishi nga nakusalangana pa nkanda, shimapepo tafwile no kumona nga kuli umushishi wa mutuntula; uyu muntu nakowela. 37 Lelo nga camoneka ukuti ukulukuta kwa mushishi takutwalilile kabili pamena no mushishi wafiita, ubulwele bwa kulukuta kwa mushishi ninshi nabupola. Nasanguluka, kabili shimapepo akatile nasanguluka.+

38 “Kabili nga pa nkanda ya mwaume napamo umwanakashi pali ifilemoneka ifyakashikila+ nelyo ifyabuuta, 39 shimapepo+ afwile ukufilolekesha; kabili nga fili ifyabuutulukila, ninshi fya kufuluma fye e fitumbile pa nkanda. Bena bali abasanguluka.

40 “Kabili umuntu, nga aseba ipala,+ lipala fye. Ena ali uwasanguluka. 41 Kabili nga asebela pa ntanshi, ninshi lipala fye ilya pa ntanshi. Ena ali uwasanguluka. 42 Lelo nga mwi pala lya pa kati ka mutwe atemwa ilya pa ntanshi mwaba ifilemoneka ifyakashikila, ninshi fibashi ifiletumba mwi pala lyakwe ilya pa kati ka mutwe napamo ilya pa ntanshi. 43 Kabili shimapepo+ akamumone; kabili nga pali icifimfi pe pala lyakwe ilya pa kati ka mutwe nelyo ilya pa ntanshi icakashikila icilemoneka kwati fibashi pa nkanda yakwe, 44 ninshi alwele ifibashi. Ali uwakowela. Shimapepo akalande ukuti nakowela. Mu mutwe wakwe muli ubulwele. 45 Kabili uulwele ifibashi, ifya kufwala fyakwe fikalepulwe,+ no mushishi wa ku mutwe wakwe ukabe fye uwasakalala,+ kabili akafimbe pa mwefu wa pa muulu wa kanwa+ kakwe no kulabilikisha, ati, ‘Ninkowela, ninkowela!’+ 46 Inshiku shonse isho akaba no bu bulwele akaba uwakowela. Ena nakowela. Afwile ukwikala eka. Ku nse ya nkambi+ e kukaba ubwikalo bwakwe.

47 “Kabili mu ca kufwala nga mwaba ifibashi, nampo nga ni mu ca kufwala ca masako ya mpaanga atemwa ca nsalu iya kolokondwe, 48 nangu mu bushishi bwa mu butali+ nangu mu bwa mu bwipi ubwa ca kufwala, nangu mu mpapa atemwa mu cili conse icapangilwa ne mpapa,+ 49 kabili nga mwamoneka ifyafiitulukila napamo ifyakashikila mu ca kufwala napamo mu mpapa nangu mu bushishi bwa mu butali atemwa ubwa mu bwipi ubwa ca kufwala napamo mu cipe icili conse ica mpapa, ninshi fibashi, kabili mukalange shimapepo. 50 E lyo shimapepo+ akafilolekeshe, kabili akafibike fyeka+ ku nse pa nshiku cinelubali (7). 51 Ilyo afilolekesha pa bushiku bwalenga cinelubali (7), asanga no kuti filya ifyalemoneka ifyakashikila nelyo ifyabuuta nafisalangana mu ca kufwala nangu mu bushishi bwa mu butali atemwa ubwa mu bwipi+ ubwa ca kufwala nangu mu mpapa te mulandu no mulimo impapa yapangilwa, ninshi fibashi fyabipisha.+ Ninshi ica kufwala nacikowela. 52 Akoce ne ca kufwala+ nangu bushishi bwa mu butali atemwa ubwa mu bwipi ubwa ca kufwala, nangu ca masako ya mpaanga napamo ica kolokondwe, napamo icipe conse ica mpapa umuli ifyakashikila nelyo ifyabuuta, pantu fyena fibashi fyabipisha.+ Bakacocele mu mulilo.

53 “Nomba shimapepo nga amonapo, kabili, moneni, tafisalangene mu ca kufwala nangu mu bushishi bwa mu butali atemwa ubwa mu bwipi ubwa ca kufwala napamo mu cipe conse ica mpapa,+ 54 e lyo shimapepo akabebe ukuti bakacape ica kufwala ico, kabili akacibike ceka inshiku na shimbi cinelubali (7). 55 Kabili shimapepo akalolekeshe na kabili ukumona nga e mo fili pa numa ya kucisukulula, kabili nga filemoneka fye cimo cine kabili tafisalangene, ninshi nacikowela. Mukacocele mu mulilo. Ciseseya icisebeke mu kati nangu ku nse ya ciko.

56 “Lelo shimapepo nga alolesha, kabili, moneni, filiko eyefilya pa numa ya kusukululwa, e lyo akafisembululepo pa ca kufwala napamo pa mpapa nangu pa bushishi bwa mu butali atemwa ubwa mu bwipi ubwa ca kufwala. 57 Lelo nga ficili filemoneka mu ca kufwala nangu mu bushishi bwa mu butali atemwa ubwa mu bwipi+ ubwa ca kufwala napamo mu cipe icili conse ica mpapa, ninshi fileya pa ntanshi. Ukoce+ mu mulilo conse icikwete ifilemoneka ifyakashikila nelyo ifyabuuta. 58 Lelo ica kufwala nangu bushishi bwa mu butali atemwa ubwa mu bwipi ubwa ca kufwala napamo icipe icili conse ica mpapa ico wacapa, ilyo ifi fintu fyafumamo, ucicape umuku walenga bubili; e lyo calasanguluka.

59 “Aya e mafunde ya pa bulwele bwa fibashi mu ca kufwala ca masako ya mpaanga napamo mu ca kolokondwe,+ nangu mu bushishi bwa mu butali atemwa ubwa mu bwipi ubwa ca kufwala, napamo mu cipe icili conse ica mpapa, pa kuti mumone nga nacisanguluka atemwa nacikowela.”

14 Kabili Yehova akonkenyepo ukusosa kuli Mose, ati: 2 “Ili e funde lya pa mulwele wa fibashi+ ilyo mulekonka pa bushiku bwa kushininkisha nga nasanguluka. Mufwile ukumutwala kuli shimapepo.+ 3 Kabili shimapepo akafumine ku nse ya nkambi, e ko shimapepo akamumwene; kabili umulwele wa fibashi nga napola,+ 4 shimapepo akamwebe; kabili akabuule ifyuni+ fibili ifya mweo ifyasanguluka ku kuisangulwilako no musambo wa cimuti ca mukedari+ no bushishi ubwakashika ce+ na husope.+ 5 Kabili shimapepo akalande ifya kucita, ne cuni cimo bakacipaile mu cipe ce bumba pa menshi ayalepita.+ 6 Icuni ca mweo akacisende no musambo wa cimuti ca mukedari no bushishi ubwakashika ce na husope, kabili akafitumpike kumo ne cuni ca mweo mu mulopa wa cuni icacipaiwa pa menshi ayalepita. 7 E lyo akasanse+ pa ulesangululwa ku fibashi imiku cinelubali (7)+ kabili akatile nasangululwa,+ e lyo akaleke icuni ca mweo cikaye mu mpanga.+

8 “Kabili uuleisangulula akacape fya kufwala+ fyakwe no kubeya umushishi wakwe onse no kusamba+ mu menshi e lyo akasanguluka, kabili pa numa kuti aingila mu nkambi. Lelo akekale ku nse ye tenti lyakwe inshiku cinelubali (7).+ 9 Kabili pa bwalenga cinelubali (7) e lyo akabeye umushishi wakwe onse ku mutwe+ no mwefu wa ku kalefulefu ne fikumbi fya pa menso. Awe akabeye umushishi wakwe onse, kabili akacape ifya kufwala fyakwe no kusamba mu menshi umubili onse; e lyo akasanguluka.

10 “Kabili pa bwalenga cinekonsekonse (8)+ akabuule basukusuku babili abanono no mwana wa mpaanga umo umukota+ umusuma, uwa mwaka umo, akabuule indupe shitatu isha buunga ubwapeleka bwino ku kuba umutuulo wa ngano+ uwasakanamo amafuta na kapu umo uwa mafuta;+ 11 kabili shimapepo uuleshininkisha ukuti nasanguluka akalete umuntu uuleisangulula pamo ne fi, ku cinso ca kwa Yehova pa mwinshi wa cikuulwa ca kukumaninako. 12 Kabili shimapepo akabuule umwana wa mpaanga umo no kumutuula umutuulo wa pa mulandu+ pamo pene na kapu+ umo uwa mafuta kabili akafisunshe ku kuba umutuulo wa kusunsha+ ku cinso ca kwa Yehova. 13 Kabili akepaile umwana wa mpaanga apo+ bepaila lyonse inama ya mutuulo wa pa lubembu ne ya mutuulo wa koca, mu ncende ya mushilo,+ pantu nga filya umutuulo wa pa lubembu waba, umutuulo wa pa mulandu, wa kwa shimapepo.+ Wa mushilo nga nshi.

14 “Kabili shimapepo akabuulepo umulopa wa mutuulo wa pa mulandu, kabili akaushinge ku kalebelebe ka kutwi kwa ku kulyo ukwa uleisangulula na pa cikumo cakwe ica ku kulyo na pa cikondo ica lukasa lwakwe ulwa ku kulyo.+ 15 Kabili shimapepo akabuulepo kapu+ umo uwa mafuta no kuyetulwila pa lupi lwakwe ulwa ku kuso. 16 Kabili shimapepo akatumpike umunwe wakwe uwa ku kulyo mu mafuta ayali mu lupi lwakwe ulwa ku kuso kabili akasanse amafuta yamo ukubomfya umunwe wakwe imiku cinelubali (7)+ ku cinso ca kwa Yehova. 17 Kabili amafuta ayashalapo ayali mu lupi lwakwe, shimapepo akashinge yamo ku kalebelebe ka kutwi kwa ku kulyo ukwa uleisangulula na pa cikumo cakwe ica ku kulyo na pa cikondo cikalamba ica lukasa lwakwe ulwa ku kulyo pa muulu wa mulopa wa mutuulo wa pa lubembu.+ 18 Kabili amafuta ayashalapo ayali mu lupi lwa kwa shimapepo akayetile pa mutwe wa uleisangulula, kabili shimapepo akamufutileko+ ku cinso ca kwa Yehova.

19 “E lyo shimapepo akatuule umutuulo wa pa lubembu+ no kufutilako uuleisangulula ku kukowela kwakwe, na pa numa e lyo akepaye inama ya mutuulo wa koca. 20 Kabili shimapepo akatuule umutuulo wa koca no mutuulo wa ngano+ pa ciipailo, kabili shimapepo+ akamufutileko;+ e lyo akasanguluka.+

21 “Lelo nga mupiina,+ afilwa no kusanga ifi fyonse,+ e lyo akabuule umwana wa mpaanga umo ku kuba umutuulo wa pa mulandu e o ukabe umutuulo wa kusunsha ku kumufutilako umulandu no lupe lumo ulwa buunga ubwapeleka ubwasakanamo amafuta ku kuba umutuulo wa ngano akabuule na kapu umo uwa mafuta, 22 ne fipele+ fibili nangu utwana twa nkunda tubili, ukulingana ne fyo engakwata, kabili cimo cikabe umutuulo wa pa lubembu na cimbi cikabe umutuulo wa koca. 23 Kabili pa bwalenga cinekonsekonse (8)+ akafilete kuli shimapepo pa kuti ukusanguluka+ kwakwe kukeshibikwe pa mwinshi wa cikuulwa ca kukumaninako+ ku cinso ca kwa Yehova.

24 “Na o shimapepo akabuule umwana wa mpaanga uwa mutuulo wa pa mulandu+ na kapu umo uwa mafuta, kabili shimapepo akafisunshe ngo mutuulo wa kusunsha ku cinso ca kwa Yehova.+ 25 Kabili akepaye umwana wa mpaanga uwa mutuulo wa pa mulandu, kabili shimapepo akabuulepo umulopa umo uwa mutuulo wa pa mulandu no ku-ushinga ku kalebelebe ka kutwi kwa ku kulyo ukwa uleisangulula na pa cikumo ca kuboko kwakwe ukwa ku kulyo na pa cikondo cikalamba ica lukasa lwakwe ulwa ku kulyo.+ 26 Kabili shimapepo aketulwile amafuta yamo mu lupi lwakwe ulwa ku kuso.+ 27 Kabili shimapepo akasanse+ ku munwe wakwe uwa ku kulyo amafuta yamo ayali mu lupi lwakwe ulwa ku kuso imiku cinelubali (7) ku cinso ca kwa Yehova. 28 Kabili shimapepo akashinge amafuta yamo ayali mu lupi lwakwe ku kalebelebe ka ku kutwi kwa ku kulyo ukwa uleisangulula na pa cikumo cakwe ica ku kulyo na pa cikondo cikalamba ica lukasa lwakwe ulwa ku kulyo pa muulu wa mulopa wa mutuulo wa pa mulandu.+ 29 Kabili amafuta ayashalapo ayali mu lupi lwa kwa shimapepo akayetulwila pa mutwe+ wa uleisangulula ku kumufutilako ku cinso ca kwa Yehova.

30 “Kabili shimapepo akatuule icipele cimo atemwa akana ka nkunda ukulingana ne fyo uuleisangulula akwete,+ 31 cimo cikabe mutuulo wa pa lubembu+ na cimbi cikabe mutuulo wa koca+ pamo pene no mutuulo wa ngano; kabili shimapepo akafutileko+ uuleisangulula ku cinso ca kwa Yehova.

32 “Ili e funde pa muntu uwalwele ubulwele bwa fibashi uushingakumanisha ukusanga fimo pa kusangululwa kwakwe.”

33 Kabili Yehova akonkenyepo ukusosa kuli Mose na kuli Aarone, ati:34 “Ilyo mukafika mu calo ca Kanaani,+ ico ndemupeela,+ kabili nga nabika ubulwele bwa fibashi mu ng’anda imo iya mu calo ndemupeela,+ 35 e lyo umwine wa ng’anda akese-eba shimapepo, ati, ‘Nimona ifyapala ifibashi mu ng’anda.’36 Na o shimapepo akalande ifya kucita, kabili bakafumye fili mu ng’anda ilyo shimapepo ashilaingilamo ku kumona ifyapala ifibashi, epali asosa ati conse icili mu ng’anda nacikowela; e lyo shimapepo akengilemo ku kumone ng’anda. 37 Ilyo amona ifyapala ifibashi, kabili nga fili ku fibumba fya ng’anda, umwafonka umulemoneka umwafiitulukila atemwa umwakashikila, kabili mulemoneka umwatobonkela mu cibumba, 38 e lyo shimapepo akafume mu ng’anda no kuyaisala ku mwinshi wa ng’anda no kusha aisala+ ing’anda pa nshiku cinelubali (7).

39 “Kabili shimapepo akabwele pa bushiku bwalenga cinelubali (7) e lyo akalolekeshe;+ nomba ifyapala ifibashi nga nafisalanganina mu fibumba fya iyo ng’anda, 40 e lyo shimapepo akabebe ifya kucita, na bo bakafumye+ amabwe umuli ifyapala ifibashi, kabili bakayapoose ku nse ya musumba ukwakowela. 41 Kabili bakapale iyo ng’anda mu kati monse, kabili baketile iloba ilyo bakapala ku nse ya musumba ukwakowela. 42 Kabili bakabuule amabwe yambi no kuyengisha umwali kale amabwe; kabili akabuule indaka imbi, no kumasa ing’anda.

43 “Lelo nga ca kutila ifyapala ifibashi fyabwela no kupona mu ng’anda pa numa ya kufumya amabwe na pa numa ya kupale ng’anda no kuimasa, 44 e lyo shimapepo+ akengilemo no kulolekesha; kabili ifyapala ifibashi nga nafisalangana mu ng’anda, ninshi fibashi fyabipisha+ ifili mu ng’anda. Iyo ing’anda naikowela. 45 E lyo akebe aba kubongolola ing’anda pamo na mabwe ya iko ne fimuti fya iko ne loba lyonse ilya ng’anda kabili bakafifumishe ku nse ya musumba ukwakowela.+ 46 Kabili uwaingila mu ng’anda pa bushiku bonse ilyo yaisalwa+ akaba uwakowela ukufika ku cungulo;+ 47 no wasendama muli iyo ng’anda akacape ifya kufwala+ fyakwe, no waliila muli iyo ng’anda akacape ifya kufwala fyakwe.

48 “Lelo, shimapepo nga aisa no kulolekesha, kabili moneni, ifyapala ifibashi tafisalangene mu ng’anda pa numa ya kumase ng’anda, shimapepo akalande ukuti ing’anda naisanguluka, pantu ifyapala ifibashi nafipwa.+ 49 Kabili pa kusangulula ing’anda ku lubembu akabuule ifyuni+ fibili ne cimuti ca mukedari+ no bushishi ubwakashika ce+ na husope. 50 Kabili akepaile icuni cimo mu cipe ce bumba pa menshi ayalepita.+ 51 Kabili akabuule icimuti ca mukedari na husope+ no bushishi ubwakashika ce ne cuni ca mweo no kufitumpika mu mulopa wa cuni ico epeye na mu menshi ayalepita, kabili akasanse+ ku ng’anda imiku cinelubali (7).+ 52 Kabili akasangulule ng’anda ku lubembu ukubomfya umulopa wa cuni na menshi ayalepita ne cuni ca mweo ne cimuti ca mukedari na husope no bushishi ubwakashika ce. 53 Kabili akaleke cuni ca mweo cikaye ku nse ya musumba mu mpanga no kufutilako+ ing’anda; e lyo ikasanguluka.

54 “Ili e funde lya kukonka pa bulwele bonse ubwa fibashi+ no kuliiwa kwa mushishi+ 55 na pa fibashi fya ku ca kufwala+ ne fya mu ng’anda, 56 na pa fya kufuluma na pa cikokotolo icapala ica pa cilonda na pa fyapala cisongo,+ 57 ku kulanga+ ilyo icintu cili icakowela na lintu cili icasanguluka. Ili e funde lya pa fibashi.”+

15 Kabili Yehova akonkenyepo ukusosa kuli Mose na kuli Aarone, ati: 2 “Sosa ku bana ba kwa Israele, no kubeba ati, ‘Umwaume nga aletonya+ fimo ku fya mfwalo ninshi nakowela. 3 Kabili icikalenga ukuti abe uwakowela pa mulandu wa kutonya kwakwe ni ci: Nga ku fya mfwalo kulefuma fimo nelyo nga nakucilikwa pa mulandu wa filefuma, ninshi nakowela.

4 “‘Ubusanshi bonse ubo uuletonya fimo asendamapo bukaba ubwakowela, na conse ico aikalapo cikaba icakowela. 5 Kabili umuntu uwakumya ku busanshi bwakwe akacape ifya kufwala fyakwe, no kusamba mu menshi kabili akabe uwakowela ukufika icungulo.+ 6 No waikala apacikala uuletonya fimo akacape+ ifya kufwala fyakwe, kabili akasambe mu menshi no kuba uwakowela ukufika icungulo. 7 Kabili onse uwakumya+ uuletonya fimo akacape ifya kufwala fyakwe, kabili akasambe mu menshi no kuba uwakowela ukufika icungulo.+ 8 Kabili uuletonya fimo nga afwishila amate umuntu uwasanguluka, na o akacape ifya kufwala fyakwe no kusamba mu menshi no kuba uwakowela ukufika icungulo. 9 Kabili ica kwikalapo pa lwendo+ conse ico uuletonya fimo acikalapo cikaba icakowela. 10 Na onse uwakumya kuli conse ico acikalapo akaba uwakowela ukufika icungulo; no wasenda ifi fintu akacape ifya kufwala fyakwe, kabili akasambe mu menshi no kuba uwakowela ukufika icungulo. 11 Kabili onse uo bakumya ku uletonya+ fimo ilyo tasambile iminwe yakwe mu menshi akacape ifya kufwala fyakwe no kusamba mu menshi no kuba uwakowela ukufika icungulo. 12 Kabili icipe ce bumba ico uuletonya fimo akumyako cikatobaulwe;+ ne cipe conse ica cimuti+ cikasukululwe mu menshi.

13 “‘Lelo uuletonya fimo nga apola, akapende inshiku cinelubali (7) pa kuti asanguluke,+ kabili akacape ifya kufwala fyakwe no kusamba mu menshi ayalepita;+ e lyo akaba uwasanguluka. 14 Kabili pa bwalenga cinekonsekonse (8) akabuule ifipele+ fibili nangu utwana twa nkunda tubili, kabili akapalame ku cinso ca kwa Yehova ku mwinshi wa cikuulwa ca kukumaninako no kufipeela kuli shimapepo. 15 Kabili shimapepo akafituule, cimo cikabe mutuulo wa pa lubembu na cimbi cikabe mutuulo wa koca;+ kabili shimapepo akamufutileko ku cinso ca kwa Yehova pa mulandu wa fya kutonya fyakwe.

16 “‘Kabili umwaume nga afumya amenshi ya bwaume,+ akasambe umubili onse mu menshi no kuba uwakowela ukufika icungulo. 17 Kabili ica kufwala conse ne mpapa yonse apo amenshi ya bwaume yatonena cikacapwe mu menshi no kuba icakowela ukufika icungulo.+

18 “‘Kabili umwanakashi nga asendama no mwaume na menshi ya bwaume yafuma, bonse babili bakasambe mu menshi no kuba abakowela+ ukufika icungulo.

19 “‘Kabili umwanakashi nga ali ne filekonkoloka, kabili casangwa ukuti ifilekonkoloka mulopa,+ akatwalilila ukuba uwakowela+ ku makowesha+ yakwe pa nshiku cinelubali (7), na onse uwamukumya akaba uwakowela ukufika icungulo. 20 Na conse ico asendamapo mu makowesha yakwe cikaba icakowela,+ na conse ico aikalapo cikaba icakowela. 21 Na onse uwakumya ubusanshi bwakwe akacape ifya kufwala fyakwe, kabili akasambe mu menshi no kuba uwakowela ukufika icungulo.+ 22 Na onse uwakumya kuli conse ico acikalapo akacape ifya kufwala fyakwe, kabili akasambe mu menshi no kuba uwakowela ukufika icungulo.+ 23 Kabili nga acikala pa busanshi nangu pa cintu cimbi, umuntu nga acikumyamo+ akabe uwakowela ukufika icungulo. 24 Kabili umwaume nga asendama nankwe kabili amakowesha yakwe yatonena pali ena,+ akabe uwakowela inshiku cinelubali (7), no busanshi bonse ubo asendamapo bukaba ubwakowela.

25 “‘Kabili ngo mulopa wa mwanakashi watwalilila ukufuma fye inshiku ishingi+ ilyo taili ni nshita yakwe iya makowesha iya ku mweshi,+ atemwa aba no kukonkoloka ukucila pa nshita yakwe iya kuba ku mweshi iya makowesha, inshiku shonse isha kukowela kwakwe pa mulandu wa fya kukonkoloka shikabe nge nshiku sha makowesha yakwe isha ku mweshi. Ena nakowela. 26 Ubusanshi bonse apo engasendama inshiku shonse isho ali ne filekonkoloka bukaba ngo busanshi bwa makowesha ilyo ali ku mweshi,+ kabili conse ico aikalapo cikaba icakowela ngo kukowela kwa makowesha yakwe aya ku mweshi. 27 Kabili onse uwafikumya+ akaba uwakowela, kabili akacape ifya kufwala fyakwe no kusamba mu menshi no kuba uwakowela ukufika icungulo.

28 “‘Lelo nga ifilekonkoloka fyaleka, e lyo akapende nshiku cinelubali (7), na pa numa e lyo akabe uwasanguluka.+ 29 Na pa bwalenga cinekonsekonse (8) akabuule ifipele+ fibili nangu utwana twa nkunda tubili, no kuleta kuli shimapepo pa mwinshi wa cikuulwa ca kukumaninako.+ 30 Kabili shimapepo akacite cimo ukuba umutuulo wa pa lubembu na cimbi umutuulo wa koca;+ kabili shimapepo akamufutileko+ ku cinso ca kwa Yehova pa mulandu wa kukowela kwakwe ku fya kukonkoloka.

31 “‘E fyo mukapaatule abana ba kwa Israele ku kukowela kwabo, epali bafwila mu kukowela kwabo pa kukowesha icikuulwa candi ica mushilo, icili mu kati kabo.+

32 “‘Aya e mafunde ya kukonka ku mwaume uuletonya+ fimo no mwaume uwafumya amenshi ya bwaume+ no kuikowesha kuli fi fintu;33 kabili e mafunde ya kukonka ku mwanakashi uuli ku mweshi+ mu kukowela kwakwe, na onse uuli ne filekonkoloka+ mu mubili wakwe, umwaume atemwa umwanakashi, no mwaume uwasendama no mwanakashi wakowela.’”

16 Kabili Yehova akonkenyepo ukusosa kuli Mose pa numa ya mfwa ya bana baume babili aba kwa Aarone ilyo bapaleme ku cinso ca kwa Yehova no kufwa.+ 2 Yehova atile kuli Mose: “Sosa kuli Aarone munonko, auti elaisa fye apo alefwaila mu muputule wa mushilo+ uuli ku numa ya nsalu ya kucingilako,+ ku ntanshi ya nkupiko iili pa Cipao, epali afwa;+ pantu nakulamonekela mwi kumbi+ pa muulu wa nkupiko ya cipao.+

3 “Ifi e fyo Aarone aleisa na fyo pa kwingila umwa mushilo:+ ing’ombe iilume iinono ku kuba umutuulo wa pa lubembu+ na sukusuku ku kuba umutuulo wa koca.+ 4 Alefwala ica kufwala+ ca nsalu iisuma ica mushilo, no kufwala kaputula wa mu kati,+ kabili alekaka no mushipi+ no kupomba ku mutwe insalu.+ Fya kufwala fya mushilo.+ Kabili alesamba mu menshi+ no kufifwala.

5 “Kabili ku lukuta lwa bana ba kwa Israele+ alebuulako utwana twa mbushi utulume tubili ku kuba umutuulo wa pa lubembu+ no mwana wa mpaanga umo ku kuba umutuulo wa koca.+

6 “E lyo Aarone akatuule ing’ombe iilume iya mutuulo wa pa lubembu, uwakwe umwine,+ kabili akaifutile+ umwine no kufutilako+ aba ng’anda yakwe.+

7 “Kabili akabuule imbushi shibili no kushiimika ku cinso ca kwa Yehova pa mwinshi wa cikuulwa ca kukumaninako. 8 Kabili Aarone akapendule+ pa mbushi shibili, aka kupendwilako kamo ka kwa Yehova na ka kupendwilako kambi ka kwa Asasele.*+ 9 E lyo Aarone akatuule imbushi iyo aka kupendwilako+ ka kwa Yehova kaponenapo, kabili ikabe umutuulo wa pa lubembu.+ 10 Lelo imbushi iyo aka kupendwilako ka kwa Asasele kaponenapo ikemikwe iya mweo ku cinso ca kwa Yehova ku kuifutilako, no kuileka+ iye mu matololo kuli Asasele.+

11 “Kabili Aarone akatuule ing’ombe iilume ku kuba umutuulo wa pa lubembu, uwakwe umwine, ku kuifutila umwine na ba mu ng’anda yakwe; kabili akepaye ing’ombe iilume ku kuba umutuulo wa pa lubembu, uwakwe umwine.+

12 “Kabili akabuule cifutumwino+ icaisulamo amalasha ayaleaka ayafuma pa ciipailo+ icili ku cinso ca kwa Yehova, ne ndupi+ shakwe shibili ishaisulamo ifyanunkila,+ kabili akafingishe mu muputule uwa ku numa ya nsalu.+ 13 Akabike ne fyanunkila pa mulilo ku cinso ca kwa Yehova,+ ne cushi ca fyanunkila cikafimbe pa nkupiko ya Cipao,+ umuli amabwe ya Cipangano,+ epali afwa.

14 “Kabili akabuulepo umulopa+ wa ng’ombe iilume no ku-usansa ku munwe wakwe pa ntanshi ya nkupiko lwa ku kabanga, kabili akasanse+ umulopa umo ku munwe wakwe imiku cinelubali (7) pa ntanshi ya nkupiko.+

15 “Kabili akepaye imbushi ya mutuulo wa pa lubembu lwa bantu,+ kabili akalete umulopa wa iko mu muputule uwa ku numa ya nsalu+ no kucita ku mulopa+ wa iko ifyo acicita ku mulopa wa ng’ombe iilume; kabili akausanse lwa ku nkupiko, pa ntanshi ya nkupiko.

16 “Kabili akafutile umwa mushilo pa mulandu wa kukowela+ kwa bana ba kwa Israele na pa mulandu wa bumpulamafunde bwabo mu membu shabo shonse;+ kabili e fyo akacite na ku cikuulwa ca kukumaninako, icaba mu kati ka aba bantu bakowela.

17 “Kabili tamufwile ukuba umuntu umbi mu cikuulwa ca kukumaninako ilyo aingila umwa mushilo ku kutuula ilambo lya cifuta mulandu mpaka afumamo; kabili akaifutile umwine+ no kufutilako aba ng’anda yakwe no lukuta lonse ulwa kwa Israele.+

18 “Kabili akafume no kuya ku ciipailo,+ icili ku cinso ca kwa Yehova, no kucifutilako, kabili akabuulepo umulopa umo uwa ng’ombe iilume no wa mbushi no ku-ushinga ku nsengo sha pa ciipailo ukushingulusha.+ 19 Kabili akasansepo+ umulopa umo ku munwe wakwe imiku cinelubali (7) no kucisangulula no kucilenga ukuba ica mushilo ku fya kukowela fya bana ba kwa Israele.

20 “Ilyo apwa ukufutilako+ umwa mushilo ne cikuulwa ca kukumaninako ne ciipailo, e lyo akatuule ne mbushi iya mweo.+ 21 Kabili Aarone akabike amaboko+ yakwe yabili pa mutwe wa mbushi ya mweo no kusokolwela+ pa mbushi ifilubo+ fyonse ifya bana ba kwa Israele na bumpulamafunde bwabo bonse ne membu shabo shonse,+ kabili akafibike pa mutwe wa mbushi+ no kuleka umuntu uusontelwe aitwale+ mu matololo.+ 22 Kabili imbushi ikasende membu+ shabo shonse no kutwala mu ciswebebe,+ na o akaleke iyo mbushi iye mu matololo.+

23 “Kabili Aarone akengile mu cikuulwa ca kukumaninako no kufuula ifya kufwala fya kolokondwe ifyo acifwala ilyo acingila umwa mushilo, kabili akafibike pa nshi mulya mwine.+ 24 Kabili umwa mushilo+ mwine e mo akasambe mu menshi+ no kufwala ifya kufwala+ fyakwe no kufumamo no kutuula umutuulo wakwe uwa koca+ no mutuulo wa koca uwa bantu+ no kuifutilako umwine no kufutilako abantu.+ 25 Kabili akoce pa ciipailo amafuta ya mutuulo wa pa lubembu.+

26 “Kabili uwacitwala+ imbushi kuli Asasele,+ akacape ifya kufwala fyakwe no kusamba mu menshi,+ e lyo akengile mu nkambi.

27 “Lelo akafumishe ku nse ya nkambi ing’ombe iilume iya mutuulo wa pa lubembu ne mbushi iya mutuulo wa pa lubembu, ifyo umulopa wa fiko baletele umwa mushilo ku kufutilako umulandu; kabili bakoce mu mulilo imikupo ya fiko ne minofu na mafi ya fiko.+ 28 Kabili uwafyoca akacape ifya kufwala fyakwe, kabili akasambe mu menshi, e lyo akengile mu nkambi.

29 “Kabili ici cileba kuli imwe icipope ca muyayaya:+ Mu mweshi walenga cinelubali (7) pa bushiku bwe kumi (10) mu mweshi+ mukacushe imyeo yenu,*+ kabili mwikabomba umulimo nangu umo,+ umwana calo atemwa umulebeshi uuleikala mu kati kenu. 30 Pantu pali ubu bushiku e po bakulamutuulila ilambo lya cifuta mulandu+ ku kumusangulula. Mukasangululwa ku membu shenu shonse ku cinso ca kwa Yehova.+ 31 Bwena lisabata+ kuli imwe ilya kutuushamo kuli fyonse, kabili mukalecusha imyeo yenu. Ici cipope ca muyayaya.

32 “Kabili shimapepo uukasubwa+ kabili uukasontwa ukuba shimapepo+ ku kupyana+ pali wishi akatuule ilambo lya cifuta mulandu no kufwala ifya kufwala fya kolokondwe.+ Fya kufwala fya mushilo.+ 33 Kabili akafutileko umuputule wa mushilo nga nshi,+ ne cikuulwa+ ca kukumaninako ne ciipailo;+ na bashimapepo na bantu bonse mu lukuta akabafutileko.+ 34 Kabili ici cileba kuli imwe icipope ca muyayaya,+ ku kufutilako abana ba kwa Israele pa mulandu wa membu shabo shonse umuku umo mu mwaka.”+

Kabili acitile ukulingana ne fyo Yehova aebele Mose.

17 Kabili Yehova asosele kuli Mose ati: 2 “Sosa kuli Aarone na ku bana bakwe abaume na ku bana ba kwa Israele bonse, no kubeba ati, ‘Yehova atile:

3 “‘“Umuntu onse uwa mu ba ng’anda ya kwa Israele uwaipaya ing’ombe iilume nangu umwana wa mpaanga nangu imbushi mu nkambi nelyo ku nse ya nkambi 4 kabili taletele iyo nama ku mwinshi wa cikuulwa ca kukumaninako+ ku kuituula umutuulo kuli Yehova pa ntanshi ya cikuulwa ca mushilo ica kwa Yehova, uyo muntu akaba no mulandu wa mulopa. Nasuumya umulopa, kabili uyo muntu akepaiwe,+ 5 pa kutila abana ba kwa Israele bakaleleta amalambo yabo, ayo baleipaila mu mpanga,+ kabili bakayalete kuli Yehova ku mwinshi wa cikuulwa ca kukumaninako, kuli shimapepo,+ e lyo bakayatuule kuli Yehova, yakabe amalambo ya mutende.+ 6 Kabili shimapepo akasanse umulopa pa ciipailo+ ca kwa Yehova pa mwinshi wa cikuulwa ca kukumaninako, kabili akoce amafuta+ aya kuleta akacena kasuma kuli Yehova.+ 7 Belatuula na kabili amalambo yabo ku fibanda fimoneka nge mbushi+ ifyo balecita na fyo bucilende.+ Ici cileba icipope ca muyayaya kuli imwe, ku nkulo shenu shonse.’”

8 “Kabili utile kuli bena, ‘Umuntu onse uwa mu ba ng’anda ya kwa Israele nelyo uwa mu balebeshi abekala mu kati kenu uwatuula umutuulo wa koca+ nelyo ilambo 9 lelo taliletele ku mwinshi wa cikuulwa ca kukumaninako ku kulituula kuli Yehova,+ uyo muntu akepaiwe.+

10 “‘Kabili umuntu onse uwa mu ba ng’anda ya kwa Israele nelyo uwa mu balebeshi abekala mu kati kenu uwalya umulopa+ wa musango onse, nkaloshe cinso candi pa muntu+ uwalya umulopa, kabili nkamwipaya. 11 Pantu umweo wa ca mweo conse waba mu mulopa+ wa ciko, kabili ine naupeela kuli imwe pa ciipailo ukuti muleifutilako,+ pantu umulopa+ e ufutilako,+ ico umweo waba mu mulopa. 12 Ni pali ici nsosele ku bana ba kwa Israele, nati: “Umuntu onse muli imwe tafwile ukulya umulopa kabili umulebeshi uwikala mu kati+ kenu tafwile ukulya umulopa.”+

13 “‘Kabili umuntu onse mu bana ba kwa Israele nelyo mu balebeshi abekala mu kati kenu uwaipaye nama nelyo icuni iciliiwa, afwile ukupongololamo umulopa+ wa ciko no kushiikapo iloba.+ 14 Pantu umweo wa ca mweo conse mulopa wa ciko pantu umweo waba mu mulopa. E co naebele abana ba kwa Israele, nati: “Mwilalya umulopa wa ca mweo conse, pantu umweo wa ca mweo conse mulopa+ wa ciko. Onse uwalya umulopa akepaiwa.”+ 15 Kabili umuntu onse uwalye nama iyaifwila nelyo iyataakaniwa ku ciswango,+ atemwa umwana calo nelyo umulebeshi, akacape ifya kufwala fyakwe no kusamba mu menshi no kuba uwakowela ukufika icungulo;+ e lyo akaba uwasanguluka. 16 Lelo nga tacapile ifya kufwala fyakwe kabili tasambile umubili wakwe, akashingamwa imembu shakwe.’”+

18 Kabili Yehova akonkenyepo ukusosa kuli Mose ati: 2 “Sosa ku bana ba kwa Israele, no kubeba ukuti, ‘Nine Yehova Lesa wenu.+ 3 Mwilacita+ filya bacita mu calo ca Egupti, umo mwaikele; kabili mwilacita+ filya bacita mu calo ca Kanaani, icalo ico ndemutwalako; kabili mwilakonka ifipope fyabo. 4 Ubupingushi+ bwandi, ne fipope+ fyandi e fyo mulekonka no kwendelamo.+ Nine Yehova Lesa wenu. 5 Kabili mulesunga ifipope fyandi no kukonka ubupingushi bwandi, ifya kuti umuntu nga alefikonka, akaba no mweo.+ Nine Yehova.+

6 “‘Umwaume onse muli imwe elapalama kuli lupwa lwakwe onse uwapalamisha no kulaala nankwe.+ Nine Yehova. 7 Te kwesha ukulaala na wiso+ kabili te kwesha ukulaala na noko. Ni noko. Taufwile ukulaala nankwe.

8 “‘Te kwesha ukulaala na muka wiso.+ Pantu ni muka wiso.

9 “‘Wilalaala na nkashi yobe, umwana mwanakashi wa kwa wiso nelyo umwana mwanakashi wa kwa noko, uwafyalwa mu ng’anda imo ine na iwe nelyo uwafyalwa ku nse, te kwesha ukulaala na bo.+

10 “‘Te kwesha ukulaala no mwishikulu obe umwanakashi uwafyalwa mu mwana obe umwaume nelyo umwana obe umwanakashi, te kwesha ukulaala nankwe, pantu mwishikulu obe.

11 “‘Wilalaala no mwana mwanakashi wa kwa muka wiso, uwafyalwa kuli wiso, ni nkashi yobe, te kwesha ukulaala nankwe.

12 “‘Te kwesha ukulaala na nkashi ya kwa wiso. Mulopa umo wine na wiso.+

13 “‘Te kwesha ukulaala na nkashi mbiye na noko, pantu mulopa umo wine na noko.

14 “‘Te kwesha ukulaala na munyina wa kwa wiso. Wipalama ku mukashi wakwe. Ni noko.+

15 “‘Te kwesha ukulaala na nokofyala.+ Mukashi wa mwana obe. Wilalaala nankwe.

16 “‘Te kwesha ukulaala na muka+ munonko. Ni muka munonko.

17 “‘Nga waupa umwanakashi te kwesha ukulaala+ no mwana wakwe umwanakashi. Te kwesha ukulaala no mwishikulu wakwe umwanakashi uwa mu mwana wakwe umwaume atemwa uwa mu mwana wakwe umwanakashi. Bena mulopa umo wine. Ukucita ifi lishiku.+

18 “‘Kabili te kwesha ukuupa umwanakashi pamo ne nkashi mbiye ku kuba umukashi mubiye+ no kulaala nankwe, ilyo acili no mweo.

19 “‘Kabili te kwesha ukupalama ku mwanakashi no kulaala nankwe+ ilyo ali na makowesha ya ku mweshi.+

20 “‘Kabili te kwesha ukufumisha amenshi yobe aya bwaume mu mukashi wa munobe ku kuikowesha kuli yena.+

21 “‘Kabili wilapeela+ abana bobe kuli Moleke.+ Wilasaalula+ ishina lya kwa Lesa obe pa kucita ico. Nine Yehova.+

22 “‘Kabili te kwesha ukusendama no mwaume+ munobe filya usendama no mwanakashi.+ Ici ca bunani.

23 “‘Kabili te kwesha ukufumisha amenshi yobe aya bwaume mu nama+ iili yonse ku kuikoweshako, kabili umwanakashi tafwile ukwiminina ku cinso ca nama ku kusendama na yo.+ Ici capusana ne cifyalilwa.

24 “‘Mwilaikowesha muli fyonse fi, pantu ni muli ifi fyonse inko isho ndetamfya ku cinso cenu shaikowesha.+ 25 Awe icalo calikowela, na ine ndi no kukande ci calo pa membu sha ciko, ne calo cikaluka abekashi ba ciko.+ 26 Lelo imwe mulekonka ifipope fyandi no bupingushi bwandi,+ kabili mwilacita ifya bunani fyonse ifi, umwana calo nelyo umulebeshi uwikala na imwe.+ 27 Pantu ifi fyonse ifya bunani e fyalecita+ abantu abaleikala muli cino calo, casuke calo cakowela. 28 Nga mwakulakonka ifipope fyandi, icalo tacakamuluke ifyo cikaluka inko ishamutangilile+ pa kucikowesha. 29 Umuntu uwacita cimo pali ifi fyonse ifya bunani, uyo muntu akepaiwe.+ 30 Kabili mulesunga amafunde yandi no kukanakonka intambi sha bunani isho balekonka ilyo tamulaisa,+ epali shamukowesha. Nine Yehova Lesa wenu.’”

19 Kabili Yehova akonkenyepo kusosa kuli Mose ati: 2 “Sosa ku lukuta lonse ulwa bana ba kwa Israele, no kubeba ati, ‘Muleba aba mushilo,+ pantu ine ne Yehova Lesa wenu ndi wa mushilo.+

3 “‘Umuntu onse pali imwe aletiina nyina na wishi,+ na masabata yandi muleyasunga.+ Nine Yehova Lesa wenu. 4 Mwila-alukila kuli balesa ba fye,+ kabili mwilapanga balesa aba kwenga.+ Nine Yehova Lesa wenu.

5 “‘Kabili nga mwaipaila Yehova ilambo lya mutende,+ mukamwipaile mu musango wa kuti mukapokelelwe.+ 6 Pa bushiku bwe lambo lyenu na pa bwakonkapo e po likaliiwe, lelo ilyashalako pa bushiku bwalenga shitatu mukoce mu mulilo.+ 7 Lelo ukuliiwa nga lyaliiwa pa bushiku bwalenga shitatu, ninshi nalyonaika.+ Talyakapokelelwe.+ 8 Kabili uwalyako akashingamwa imembu shakwe,+ pantu ninshi nasuula ica mushilo ca kwa Yehova; kabili uyo muntu afwile ukwipaiwa.

9 “‘Kabili ilyo mulelobolola ifilimwa fya mu calo cenu, mwikapwisha ukulobolola fye fyonse na mu mbali ye bala lyenu, kabili mwikatolelesha fye tonse mu kulobolola kwenu.+ 10 Kabili, mwikalonganika imyangashi iyashalako+ mwi bala lyenu, kabili mwikalatoola imyangashi iyasalangana mwi bala lyenu. Mukaleshiila umulanda no mulebeshi.+ Nine Yehova Lesa wenu.

11 “‘Mwilaiba,+ kabili mwilabepa,+ kabili mwilacenjesha abanenu.+ 12 Kabili mwilalapila mwi shina lyandi mu bufi,+ pantu kuti mwasaalula ishina lya kwa Lesa wenu. Nine Yehova. 13 Mwilafyenga abanenu,+ kabili mwilapokolola ifya bene.+ Wilasunga amalipilo ya mubomfi ubushiku bonse ukufika ulucelo.+

14 “‘Mwilalapisha nkomamatwi, kabili mwilabikila impofu ifya kuti iipununeko;+ lelo muletiina Lesa wenu.+ Nine Yehova.

15 “‘Mwilafyenga ilyo mulepingula. Mwilawila ku mulanda,+ kabili mwilatemwapo umukankaala.+ Muleba no mulinganya ilyo mulepingula umunenu.

16 “‘Wilapitana mu bantu bobe ku kucita ulwambo.+ Wilaiminina ku kushinina umunobe ku kufwaya umulopa wakwe.+ Nine Yehova.

17 “‘Wilapata munonko mu mutima obe.+ Ukukalipila ulekalipila umunobe,+ epali wakumako ku lubembu lwakwe.

18 “‘Wilalandula+ kabili wilapata abana ba bantu bobe;+ lelo uletemwa umunobe nge fyo waitemwa we mwine.+ Nine Yehova.

19 “‘Mulesunga ifipope fyandi: Mwilaleka ifitekwa fyenu ifya misango ibili iyapusana ukutamfyanya. Mwilatanda imbuto sha misango+ ibili iyapusana mwi bala lyenu, kabili mwilafwala ica kufwala ca misango ibili iya bushishi bwatobenkana.+

20 “‘Nomba umwaume nga asendama no mwanakashi no kufumya amenshi ya bwaume, ilyo uyo mukashana ni kanakashi wa mwaume umbi, kabili ukulubulwa talubulwa nangu kupeelwa ubuntungwa, kukabe ukulubulula. Tabafwile ukwipaiwa, pantu kanakashi talaba umuntungwa. 21 Kabili umwaume akalete umutuulo wakwe uwa pa mulandu kuli Yehova pa mwinshi wa cikuulwa ca kukumaninako, e kutila sukusuku uwa mutuulo wa pa mulandu.+ 22 Kabili shimapepo akamufutile ku mwana wa mpaanga uwa mutuulo wa pa mulandu ku cinso ca kwa Yehova pa lubembu lwakwe ulo acitile; e lyo ulubembu ulo acitile lukelelwa.+

23 “‘Kabili ilyo mukafika mu calo, no kulimba imiti yonse iya kumwenamo ifya kulya, mukalemona ifisabo fya iko ukuti fyalikowela fili nge fishasembululwa. Pa myaka itatu mukalefimona nge fyo mumona uushasembululwa. Tafifwile ukuliiwa. 24 Lelo mu mwaka walenga bune ifisabo+ fya iko fyonse fikabe fya mushilo ifya kutashishako Yehova pa mutebeto.+ 25 Kabili mu mwaka walenga busano kuti mwalyako ifisabo fya iko pa kuti imupeele icibwesha ca iko.+ Nine Yehova Lesa wenu.

26 “‘Te ca kwesha ukuliila icintu icili conse kumo no mulopa.+

“‘Mwilabuka,+ kabili mwilacita ifinjelengwe.+

27 “‘Mwilabeya umushishi wa mu mbali ya mitwe yenu, kabili mwilabeya umwefu wenu pa mpela.+

28 “‘Kabili mwilaiteta umubili umuntu nga afwa,+ nangu ukukoma inembo pa mibili yenu. Nine Yehova.

29 “‘Wilasaalula umwana obe umwanakashi pa kumucita cilende,+ epali icalo cacita bucilende kabili icalo cafulamo imibele ya kuilekelesha.+

30 “‘Mulesunga+ amasabata yandi, kabili muleba na katiina ku ncende yandi iya mushilo.+ Nine Yehova.

31 “‘Mwilaya ku bomfwana ne mipashi,+ kabili mwilaipusha ku basobela ifintu,+ epali bamukowesha. Nine Yehova Lesa wenu.

32 “‘Ku wa mfwi uleima,+ kabili ulecindika umukote,+ no kutiina Lesa obe.+ Nine Yehova.

33 “‘Kabili ngo mulebeshi aleikala na iwe mu calo cenu, mwilamucusha.+ 34 Umulebeshi uuleikala na imwe mulemumona ngo mwana calo; kabili mulemutemwa nge fyo mwaitemwa,+ pantu mwali abalebeshi mu calo ca Egupti.+ Nine Yehova Lesa wenu.

35 “‘Mwilaba na lufyengo ilyo mulepingula,+ ilyo mulepima+ ubukulu bwa fintu atemwa ukufina kwa fiko, nangu ilyo mulepima icili conse. 36 Muleba ne fya kupiminako ifyalungama,+ amabwe aya kupiminako ukufina ayalungama, itepe ilyalinga na galoni iyalinga. Nine Yehova Lesa wenu, uwamufumishe mu calo ca Egupti. 37 E ico mulesunga amafunde yandi yonse no kukonka ubupingushi bwandi bonse, kabili mulecita ifi fine.+ Nine Yehova.’”

20 Kabili Yehova akonkenyepo ukweba Mose ati: 2 “Utile ku bana ba kwa Israele, ‘Umuntu onse mu bana ba kwa Israele, no mulebeleshi onse uwikala mu Israele, uwapeelapo umwana wakwe kuli Moleke,+ ukwipaiwa akepaiwe. Abantu ba mu calo bakamupoole amabwe. 3 Ine nkaloshe cinso candi pali uyo muntu, no kumwipaya,+ pantu apeela umwana wakwe kuli Moleke ku kukowesha umwa mushilo+ mwandi no kusuula ishina lyandi ilya mushilo.+ 4 Kabili abantu ba mu calo ukufisa nga bafisa amenso yabo ukuyafumya kuli uyo muntu ilyo apeelapo umwana wakwe kuli Moleke no kukanamwipaya,+ 5 e lyo ine nkalosha icinso candi pali uyo muntu na pa lupwa lwakwe,+ no kumwipaya kabili nkepaya na bonse abacita bucilende+ na Moleke pamo nankwe.

6 “‘Kabili umuntu uwayalukila ku bomfwana ne mipashi+ na bakasobela+ ba fintu no kukanaba ne cishinka kuli ine, nkalosha icinso candi pali uyo muntu no kumwipaya.+

7 “‘E ico muleisangulula no kuba aba mushilo,+ pantu nine Yehova Lesa wenu. 8 Mulesunga amafunde yandi no kuyakonka.+ Nine Yehova uulemusangulula.+

9 “‘Ngo muntu onse atuka wishi na nyina,+ ukwipaiwa akepaiwe.+ Natuka wishi na nyina. Umulopa wakwe ukabe pali ena.+

10 “‘Umwaume uwacita ubucende no mukashi wa mwaume umbi, uyu mwaume uwacita ubucende no mukashi wa munankwe,+ ukwipaiwa bakepaiwe bonse babili umwaume no mwanakashi abacitile ubucende.+ 11 Kabili umwaume uwasendama na muka wishi ninshi naseebanya wishi.+ Ukwipaiwa bakepaiwe bonse babili. Umulopa wabo ukabe pali bena. 12 Kabili umwaume nga asendama na nafyala, umukashi wa mwana wakwe, ukwipaiwa bakepaiwe bonse babili.+ Nabacita icishili ca cifyalilwa. Umulopa wabo ukabe pali bena.+

13 “‘Kabili umwaume nga asendama no mwaume mubiye filya umuntu asendama no mwanakashi, bonse babili nabacita ica bunani.+ Ukwipaiwa bakepaiwe. Umulopa wabo ukabe pali bena.

14 “‘Kabili umwaume nga aupa umwanakashi pamo na nyina wa uyo mwanakashi, cena lishiku.+ Bakaboce mu mulilo+ bonse, pa kutila mwikaba ice shiku+ mu kati kenu.

15 “‘Kabili umwaume nga afumisha amenshi yakwe aya bwaume mu nama,+ ukwipaiwa akepaiwe, kabili mukepaye ne yo nama. 16 Kabili umwanakashi uwapalama ku nama yonse ku kuulungana na yo,+ mukepaye uyo mwanakashi ne nama. Ukwipaiwa bakepaiwe. Umulopa wabo ukabe pali bena.

17 “‘Kabili umwaume nga abuula nkashi yakwe, umwana mwanakashi wa kwa wishi napamo umwana mwanakashi wa kwa nyina, no kulaala nankwe, ca nsoni.+ Bakalofiwe ku menso ya bana ba bantu babo. Pantu aleele na nkashi yakwe. Akashingamwa imembu shakwe.

18 “‘Kabili umwaume nga asendama no mwanakashi uuli ku mweshi ninshi bonse babili tabacindike umulopa wakwe.+ E ico bonse babili bakepaiwe.

19 “‘Kabili te kwesha ukulaala na nkashi mbiye ya kwa noko+ na nkashi ya kwa wiso,+ pantu ni lupwa wa mulopa umo wine uo ulelaala nankwe.+ Mukashingamwa imembu shenu. 20 Kabili umwaume uwasendama na muka nalume ninshi naseebanya nalume.+ Bakashingamwa ulubembu lwabo. Bakafwa imbula bana.+ 21 Kabili umwaume nga abuula muka munyina, ca bunani.+ Ninshi aseebanya munyina. Bakaba imbula bana.

22 “‘Mulesunga amafunde+ yandi yonse no kulakonka ubupingushi+ bwandi bonse, epali icalo ico ine ndemutwalako ku kwikalamo camuluka.+ 23 Kabili mwilakonka amafunde ya nko isho ndetamfya ku cinso cenu,+ pantu bena balacita ifi fyonse na ine nalibapata.+ 24 Natile kuli imwe:+ “Imwe mukapoka icalo cabo, kabili ine nkacipeela kuli imwe ukuti cikabe cenu, icalo umwaba umukaka no buci.+ Nine Yehova Lesa wenu, uwamupaatula ku bantu na bantu.”+ 25 E ico mulelekanya inama iyasanguluka ku yakowela ne cuni icakowela ku casanguluka;+ kabili mwilailenga mwe bene ukuba aba bunani+ ku nama na ku cuni nangu conse icisenya pa nshi ico namweba ukuti calikowela. 26 Kabili muleba aba mushilo kuli ine,+ pantu ine ne Yehova ndi wa mushilo;+ kabili ndemupaatula ku bantu na bantu pa kuti mube abantu abandi.+

27 “‘Kabili umwaume napamo umwanakashi uumfwana ne mipashi nangu uubuka,+ ukwipaiwa bakepaiwe.+ Bakabapoole amabwe mpaka fye bakafwe. Umulopa wabo ukabe pali bena.’”+

21 Kabili Yehova atile kuli Mose: “Sosa kuli bashimapepo, abana ba kwa Aarone, no kutila kuli bena, ‘Shimapepo elaikowesha ku muntu uwafwa mu bantu bakwe.+ 2 Kano fye uwa ku mulopa wakwe uwapalamisha kuli ena, nyina nangu wishi no mwana wakwe umwaume no mwana wakwe umwanakashi nangu munyina 3 nangu nkashi yakwe, nacisungu uwapalamisha kuli ena, uushilaupwa, kuli ena kuti aikoweshako. 4 Elaikowesha ku mwanakashi uwaba no mulume mu bantu bakwe epali aisaalula. 5 Belabeya amapala ku mitwe+ yabo, belaputula ne myefu yabo pa mpela,+ kabili belaikoma inembo mu mibili yabo.+ 6 Baleba aba mushilo kuli Lesa wabo,+ kabili belasaalula ishina lya kwa Lesa wabo,+ pantu e batuula imituulo ya pa mulilo kuli Yehova, ifya kulya fya kwa Lesa wabo;+ e ico baleba aba mushilo.+ 7 Bekoopa umwanakashi cilende+ nangu uo balya icisungu; kabili bekoopa+ umwanakashi uo baleka+ ku mulume wakwe, pantu shimapepo wa mushilo kuli Lesa wakwe. 8 E fyo ukamusangulule,+ pantu e utuula ifya kulya fya kwa Lesa obe. Ukalemumona ukuti wa mushilo,+ pantu ne Yehova, uulemusangulula ndi wa mushilo.+

9 “‘Kabili umwana mwanakashi wa kwa shimapepo, nga aisaalula pa kucita bucilende, ninshi asaalula wishi. Akocewe mu mulilo.+

10 “‘Kabili shimapepo mukalamba pali bamunyina uo baitile+ amafuta ya kusuba pa mutwe wakwe no kulaashikwa ku kufwale fya kufwala+ fya bushimapepo, elalekelesha umushishi wakwe,+ ne fya kufwala fyakwe elafilepaula.+ 11 Kabili elaya ukuli umuntu uwafwa.+ Nangu ni kuli wishi nangu ni kuli nyina elaikoweshako. 12 Kabili elafuma umwa mushilo no kusaalula umwa mushilo mwa kwa Lesa wakwe,+ pantu icishibilo ca kuipeela, e kutila amafuta ya kusubilako aya kwa Lesa wakwe,+ cili pali ena. Nine Yehova.

13 “‘Kabili ena, afwile ukuupa umwanakashi nacisungu.+ 14 Ekoopa mukamfwilwa nangu umwanakashi uo baleka nangu uo balya icisungu, nangu cilende, lelo akoope nacisungu ukufuma mu bantu bakwe e o akabe umukashi wakwe. 15 Kabili ekalenga abana abakafuma muli ena ukusaalulwa mu bantu bakwe,+ pantu nine Yehova uulemusangulula.’”+

16 Kabili Yehova akonkenyepo ukusosa kuli Mose ati: 17 “Sosa kuli Aarone, auti, ‘Umwaume onse uwa mu bana bobe ukulingana ne nkulo shabo, uukwete akalema+ elapalama ku kutuula ifya kulya fya kwa Lesa wakwe.+ 18 Umwaume onse uwaba na kalema, elapalamako: uwapofula nangu uwalemana nangu uwalepuko moona nangu uwalepapo icilundwa,+ 19 nangu mwaume uwaba no lukasa ulwafunika napamo ukuboko ukwafunika, 20 nangu uwa ng’ongo nangu uwatusa nangu uwalwala amenso, nangu ukwete ifilemoneka nge cikokotolo ca pa cilonda pa nkanda yakwe nangu uwa fiseseya nangu uwatungulwa.+ 21 Umwaume onse uwa mu bana bwa kwa Aarone shimapepo uwaba na kalema elapalama ku kutuula imituulo ya pa mulilo kuli Yehova.+ Pantu wa kalema. Elapalama ku kutuula ifya kulya fya kwa Lesa wakwe.+ 22 Ifya kulya fya kwa Lesa wakwe ifyafuma pa fya mushilo nga nshi+ e lyo na pa fya mushilo+ kuti alyako. 23 Lelo, ku nsalu+ iyacinga umuputule wa mushilo nga nshi elaingilako, na ku ciipailo elapalamako,+ pantu aba na kalema;+ pa kuti esaalula umwa mushilo mwandi,+ pantu nine Yehova uulebasangulula.’”+

24 E fyo Mose asosele kuli Aarone na ku bana bakwe na ku bana bonse aba kwa Israele.

22 Kabili Yehova asosele kuli Mose ati: 2 “Eba Aarone na bana bakwe, ukuti belapalama ku fya mushilo fya bana ba kwa Israele no kukanasaalula ishina lyandi ilya mushilo+ mu fyo balempeela.+ Nine Yehova. 3 Ubebe auti, ‘Ku nkulo shenu umuntu onse uwa mu bana benu bonse uwapalama ku fya mushilo, ifyo abana ba kwa Israele bakacindikilako Yehova, ilyo ali uwakowela,+ uyo muntu akepaiwe ku cinso candi. Nine Yehova. 4 Umwaume onse uwa mu bana ba kwa Aarone nga alwala ifibashi+ nangu uo ku fya mfwalo kuletona fimo+ elalyako ifya mushilo mpaka asanguluka,+ nangu ni ulya uwakumya onse uwaikowesha pa kwikata umuntu uwafwa+ nangu uwakumya umuntu uufumishe amenshi ya bwaume,+ 5 nangu uwakumya umuntu uukumishe icisenya conse icakowela+ nangu uwakumya umuntu uwakowela.+ 6 Umuntu uwakumya cimo pali ifi akaba uwakowela ukufika ku cungulo kabili tafwile ukulyako ifya mushilo fyonse, lelo afwile ukusamba mu menshi.+ 7 Ilyo akasuba kawa, e lyo akasanguluka, na pa numa kuti alyako ifya mushilo, pantu e fya kulya fyakwe.+ 8 Kabili elalya conse icifwile kale nelyo icataakaniwa ku fiswango epali fyamukowesha.+ Nine Yehova.

9 “‘Kabili bakalekonka ifyo nandile, ukuti bekashingamwa ulubembu lwa kukanakonka ifyo nsosele no kufwilapo+ pa mulandu wa kusaalula ifya mushilo. Nine Yehova uulebasangulula.

10 “‘Kabili umbi umbi elalyako ifya mushilo fyonse.+ Uwikala na shimapepo nangu umubomfi elalyako ifya mushilo fyonse. 11 Lelo shimapepo nga ashita umuntu, ukubomfya indalama shakwe, uyo muntu kuti alyako. Kabili abasha abafyalilwa mu ng’anda yakwe, na bo kuti balyako ifya kulya fyakwe.+ 12 Kabili umwana mwanakashi wa kwa shimapepo nga aupwa ku mwaume umbi umbi, umwana mwanakashi uyo elalyako umusangulo wa mushilo. 13 Lelo umwana mwanakashi wa kwa shimapepo nga aba mukamfwilwa napamo bamuleka ilyo ashilakwata abana, kabili abwelela ku ng’anda ya kwa wishi nga ku bukashana bwakwe,+ kuti alyako ifya kulya fya kwa wishi;+ lelo umbi umbi elalyako.

14 “‘Nomba umuntu nga alyako ica mushilo mu kukanaishiba,+ alundepo ica pali fisano+ ca ciko, no kupeele ca mushilo kuli shimapepo. 15 Awe bashimapepo belasaalula ifya mushilo fya bana ba kwa Israele, ifyo basangwila Yehova,+ 16 no kulenga abantu ukushingamwa imembu ishileta umulandu ilyo balye fya mushilo; pantu nine Yehova uulebasangulula.’”

17 Kabili Yehova akonkenyepo kusosa kuli Mose ati:18 “Sosa kuli Aarone na ku bana bakwe na ku bana bonse aba kwa Israele, no kutila kuli bena, ‘Umuntu onse mu ba ng’anda ya kwa Israele nangu mu balebeshi aba muli Israele, uwatuula umutuulo wakwe,+ napamo uwa pa milapo+ yakwe yonse nelyo umutuulo wakwe onse uwa kuitemenwa,+ uo engatuula kuli Yehova ku kuba umutuulo wa koca, 19 akatuule inama iisuma+ pa kuti mupokelelwe,+ ing’ombe iilume, impaanga iilume iinono nangu imbushi iilume. 20 Yonse iili na kalema, mwilaituula,+ pantu tayakalenge ukuti mupokelelwe.

21 “‘Kabili umuntu nga atuula ilambo lya mutende+ kuli Yehova ilya kufikilisha umulapo+ napamo umutuulo wa kuitemenwa, pa kuti ilambo lipokelelwe inama atuula ilingile ukuba iisuma iya mu ng’ombe nelyo iya mu mpaanga. Taifwile ukuba na kalema nangu panono. 22 Iyapofula napamo iyafunika napamo iyacenwa napamo iya nsundu napamo iya filonda napamo iya fiseseya,+ te kwesha ukutuula kuli Yehova, kabili mwilatuula ishi nama ku kuba umutuulo wa pa mulilo+ pa ciipailo kuli Yehova. 23 Ing’ombe iilume atemwa impaanga iyalepapo icilundwa cimo nelyo iyaipipa icilundwa,+ kuti mwaituula umutuulo wa kuitemenwa; lelo tayakapokelelwe ukuba umutuulo wa pa mulapo. 24 Ne ya kuti intoyo+ shalitobeka atemwa shalitinwa atemwa shalikumpwa atemwa shaliputulwa mwilatuula kuli Yehova, na mu calo cenu te kwesha ukutuula shena. 25 Kabili pali ishi inama shonse mwilatuula ishafuma ku mwina fyalo ukuba ifya kulya fya kwa Lesa wenu, pantu muli shi nama muli akabi. Muli akalema+ muli shena. Tashakalenge ukuti mupokelelwe.’”+

26 Kabili Yehova akonkenyepo ukusosa kuli Mose ati:27 “Ing’ombe iilume nelyo umwana wa mpaanga nelyo imbushi nga fyafyalwa, fikabe kuli nyina inshiku cinelubali (7),+ lelo ukufuma pa bwalenga cinekonsekonse (8) no kuya ku ntanshi kuti fyapokelelwa ku kuba umutuulo, umutuulo wa pa mulilo kuli Yehova. 28 Ing’ombe iilume ne mpaanga, mwilafiipaila pamo no mwana wa fiko pa bushiku bumo bwine.+

29 “Kabili nga mwatuula ilambo lya kutootela kuli Yehova,+ mulelituula mu musango wa kuti mwapokelelwa. 30 Likaliiwe pa bushiku ubo bwine.+ Mwikashapo nangu cimo ukufika ku lucelo.+ Nine Yehova.

31 “Kabili mukalesunga amafunde yandi no kuyakonka.+ Nine Yehova. 32 Kabili te kwesha ukusaalula ishina lyandi ilya mushilo,+ lelo mulencindika mu kati ka bana ba kwa Israele.+ Nine Yehova uulemusangulula,+ 33 uulemufumya ku calo ca Egupti ku kumulanga ukuti nine Lesa wenu.+ Nine Yehova.”

23 Kabili Yehova asosele na kabili kuli Mose ati: 2 “Sosa ku bana ba kwa Israele, auti, ‘Inshita sha mitebeto+ isho Yehova amwebele ukulasefya ni nshiku sha mushilo isha kulonganamo abantu bonse. Mukalebilisha+ iyi mitebeto. Ishi e nshita sha kucitilamo imitebeto yandi:

3 “‘Inshiku mutanda (6) kuti mwabombamo imilimo, lelo pa bushiku ubwalenga cinelubali (7) lisabata lya kutuushamo kuli fyonse,+ kulongana kwa mushilo. Mwikabombamo mulimo nangu umo. Lisabata kuli Yehova mu mekalo yenu yonse.+

4 “‘Ishi e nshita sha mitebeto+ ya kwa Yehova, iya kulongana kwa mushilo,+ iyo mufwile ukubilisha ilyo inshita ya kulongana yafika:+ 5 Mu mweshi wa ntanshi, pa bushiku bwalenga ikumi na shine (14) mu mweshi,+ pa cungulo cinono, e pakalaba ica kucilila+ ca kwa Yehova.

6 “‘Kabili pa bushiku bwalenga ikumi na shisano (15) mu mweshi uyo wine epakalaba umutebeto wa mukate ushatutumuka kuli Yehova.+ Inshiku cinelubali (7) mukalelya umukate ushatutumuka.+ 7 Pa bushiku bwa kubalilapo epo mukalongane ukulongana kwa mushilo.+ Te kwesha ukubombapo umulimo uwakosa. 8 Lelo mukatuule umutuulo wa pa mulilo kuli Yehova inshiku cinelubali (7). Pa bushiku bwalenga cinelubali kukabe ukulongana kwa mushilo. Te kwesha ukubombapo umulimo uwakosa.’”

9 Kabili Yehova akonkenyepo ukusosa kuli Mose ati: 10 “Sosa ku bana ba kwa Israele, no kutila, ‘Ilyo mukengila mu calo ico ndemupeela, kabili mwaseepa no kuseepa, mukaleleta umwanshi wa fyo mwabalilapo+ ukulobolola kuli shimapepo. 11 Na o akasunshe umwanshi uku no ku,+ ku cinso ca kwa Yehova pa kuti mupokelelwe. Pa bushiku ubwakonkapo pa numa ye sabata e lyo shimapepo akausunshe. 12 Kabili pa bushiku ubo mulesunshamo umwanshi mukatuule umwana wa mpaanga umusuma kabili uwa mwaka umo, ku kuba umutuulo wa koca kuli Yehova;13 no mutuulo wa ngano ukabe indupe shibili isha buunga ubwapeleka ubwasakanamo amafuta, ku kuba umutuulo wa pa mulilo kuli Yehova, uwa kuleta akacena kasuma; kabili umutuulo wa mwangashi ukabe amakapu yatatu aya mwangashi. 14 Kabili mwikalya ifya kulya nangu ingano shasalulwa nangu ingano ishipya bukasuke abufika ubu bwine bushiku,+ mukasuke amuleta umutuulo wa kwa Lesa wenu. Ici cipope ca muyayaya ku nkulo shenu mu mekalo yenu yonse.

15 “‘Kabili mukapende ukutula pa bushiku ubwakonkapo pa numa ye sabata, ukutula pa bushiku ubo mwaletelemo umwanshi wa mutuulo wa kusunsha, amasabata cinelubali (7).+ Mulependa imilungu iituntulu. 16 Mukapende inshiku amakumi yasano (50),+ ukufika pa bushiku ubwakonkapo pa numa ye sabata ilyalenga cinelubali (7), e lyo mukatuule umutuulo wa ngano+ uupya kuli Yehova. 17 Mukalete imikate+ ibili iya kusunsha ukufuma mu mekalo yenu. Ikapangwe ukubomfya indupe shibili isha buunga ubwapeleka. Mukabikemo icitutumushi,+ e mikate ya fisabo fyabalilapo ukupya kuli Yehova.+ 18 Kabili mukatuulile pamo ne mikate iyi utwana twa mpaanga cinelubali (7) utulume kabili utusuma,+ utwa mwaka umo, ne ng’ombe iilume iinono ne mpaanga ishilume shibili. Fikabe umutuulo wa koca kuli Yehova pamo no mutuulo wa ngano no mutuulo wa mwangashi ku kuba umutuulo wa pa mulilo, uwa kuleta akacena akasuma kuli Yehova. 19 Kabili mukatuule umwana wa mbushi+ umo ku kuba umutuulo wa pa lubembu no twana twa mpaanga tubili utulume, utwa mwaka umo, ku kube lambo lya mutende.+ 20 Kabili shimapepo akafisunshe uku no ku+ pamo ne mikate ya fisabo fyabalilapo kupya, umutuulo wa kusunsha ku cinso ca kwa Yehova, pamo no twana twa mpaanga tubili utulume. Fikabe ifya mushilo kuli Yehova ifya kwa shimapepo.+ 21 Kabili pali ubu bwine bushiku mukabile mbila;+ kukabe ukulongana kwa mushilo kuli imwe. Te kwesha ukubombapo umulimo uwakosa. Ici cipope ca muyayaya mu mekalo yenu yonse ku nkulo shenu.

22 “‘Kabili ilyo mwaseepa ukuseepa kwa mu calo cenu, mwikapwishishisha ukufika mu mbali ye bala lyenu pa kuseepa, kabili mwikatolelesha ilyo mulelobolola.+ Mukafishiile umupiina+ no mulebeshi.+ Nine Yehova Lesa wenu.’”

23 Kabili Yehova akonkenyepo ukusosa kuli Mose ati:24 “Sosa ku bana ba kwa Israele, auti, ‘Mu mweshi walenga cinelubali (7),+ pa bushiku bwa ntanshi ubwa uyo mweshi, mukaletushamo kuli fyonse, bushiku bwa kwibukisha ubukatendeka no kulila kwa mapenga,+ ubwa kulongana kwa mushilo.+ 25 Te kwesha ukubombamo umulimo onse uwakosa, kabili mukatuule umutuulo wa pa mulilo kuli Yehova.’”

26 Kabili Yehova akonkenyepo ukusosa kuli Mose ati:27 “Lelo pa bushiku bwalenga ikumi (10) mu mweshi uyu wa cinelubali (7) bushiku bwa kutuula icifuta mulandu.+ Mukalongane ukulongana kwa mushilo, kabili mukacushe imyeo yenu+ no kutuula umutuulo+ wa pa mulilo kuli Yehova. 28 Kabili te kwesha ukubombamo umulimo onse muli ubu bushiku, pantu bushiku bwa kufutilamo+ imwe ku cinso ca kwa Yehova Lesa wenu;29 pantu umuntu onse uushakaicushe pali ubu bushiku akepaiwa.+ 30 Kabili umuntu uukabomba umulimo onse pali ubu bushiku, nkepaya uyo muntu.+ 31 Tamufwile ukubombamo umulimo+ nangu umo. Ici cipope ca muyayaya ku nkulo shenu mu mekalo yenu yonse. 32 Lisabata kuli imwe ilya kutuushamo kuli fyonse,+ kabili mukacushe imyeo yenu+ icungulo pa bushiku bwalenga pabula (9) mu mweshi. Mukasunge isabata lyenu ukutula pa cungulo ukufika ku cungulo.”

33 Kabili Yehova akonkenyepo kusosa kuli Mose ati:34 “Sosa ku bana ba kwa Israele, auti, ‘Pa bushiku ubwalenga ikumi na shisano (15) muli uyu mweshi wa cinelubali (7) mutebeto wa nsakwe uwa nshiku cinelubali kuli Yehova.+ 35 Pa bushiku bwa ntanshi mukalongane ukulongana kwa mushilo. Te kwesha ukubombamo umulimo onse uwakosa. 36 Inshiku cinelubali (7) mukatuule umutuulo wa pa mulilo kuli Yehova. Na pa bushiku bwalenga cinekonsekonse (8) mukalongane ukulongana kwa mushilo,+ kabili mukatuule umutuulo wa pa mulilo kuli Yehova. Kwena kulongana kwacindamisha.* Te kwesha ukubombamo umulimo onse uwakosa.

37 “‘Ishi e nshita sha mitebeto+ ya kwa Yehova, iyo mukabilisha ukuti kulongana kwa mushilo,+ iya kutuulamo umutuulo wa pa mulilo+ kuli Yehova: umutuulo wa koca+ no mutuulo wa ngano+ uutuulilwa pamo ne lambo lya nama ne mituulo ya mwangashi+ icintu conse pa bushiku bwa ciko, 38 ukulunda pa masabata ya kwa Yehova+ na pa fya bupe fyenu+ na pa milapo yenu yonse,+ na pa mituulo yenu yonse iya kuitemenwa,+ iyo mufwile ukupeela kuli Yehova. 39 Lelo, pa bushiku bwalenga ikumi na shisano (15) mu mweshi wa cinelubali (7), ilyo mwaseepa ifisabo fya mu calo, mukasefye umutebeto+ wa kwa Yehova inshiku cinelubali.+ Pa bushiku bwa ntanshi mukatuushe kuli fyonse na pa bushiku bwalenga cinekonsekonse (8) na po mukatuushe kuli fyonse.+ 40 Kabili pa bushiku bwa ntanshi mukasabe ifisabo ku miti yawamisha, mukateme imisambo ya tuncindu+ ne mpanda sha miti iyapikana no muarabimu wa mu mikonko, kabili mukasekelele+ ku cinso ca kwa Yehova Lesa wenu inshiku cinelubali (7). 41 Kabili mukasefye umutebeto wa kwa Yehova inshiku cinelubali (7) mu mwaka.+ Ici cipope ca muyayaya ku nkulo shenu, umutebeto ukabe mu mweshi wa cinelubali. 42 Mukekale inshiku cinelubali (7) mu nsakwe.+ Abekala calo bonse aba mu Israele bakekale mu nsakwe,+ 43 pa kuti aba mu nkulo shenu bakeshibe+ ukuti mu nsakwe e mo nalengele abana ba kwa Israele ukwikala ilyo nalebafumya mu calo ca Egupti.+ Nine Yehova Lesa wenu.’”

44 Awe Mose aebele abana ba kwa Israele ulwa ishi nshita sha mitebeto+ ya kwa Yehova.

24 Kabili Yehova asosele kuli Mose ati: 2 “Eba abana ba kwa Israele ukuti balete kuli iwe amafuta ya muolife ayalengama, ayatwiwa aya cengelo,+ ku kusanika inyali lyonse.+ 3 Ku nse ya nsalu ya kucingilako icipao ca Cipangano, mu cikuulwa ca kukumaninako, e ko Aarone akaleteyanye nyali pa kuti ileaka lyonse ukutula pa cungulo ukufika ku lucelo ku cinso ca kwa Yehova. Ici cipope ca muyayaya ku nkulo shenu. 4 Pa ca kutekapo inyali+ ica golde uwalopololwa akaleteyanya pe inyali+ ku cinso ca kwa Yehova.+

5 “Kabili ukalebuula ubuunga ubwapeleka no kupangamo imikate ikumi na ibili (12). Umukate umo umo ukapangilwe ku buunga bwa mu ndupe shibili. 6 Kabili ukaletantika umukate mu mitande ibili, mu mutande+ umo, ikabemo mutanda (6) na mu ubiye ikabemo mutanda, pe tebulo lya golde uwalopololwa ku cinso ca kwa Yehova.+ 7 Kabili ukalebika na libani uwalengama pa mutande umo na umo, no kuleka ube umukate wa cibukisho,+ umutuulo wa pa mulilo kuli Yehova. 8 Pe sabata lyonse e fyo akaleuteyanya pe ku cinso ca kwa Yehova.+ Cipangano ca muyayaya ku bana ba kwa Israele. 9 Kabili ukabe wa kwa Aarone na bana bakwe abaume,+ kabili baleuliila umwa mushilo,+ pantu uyu mukate wa mushilo nga nshi kuli ena ukufuma pa mituulo ya pa mulilo iya kwa Yehova, ku kube cipope ca muyayaya.”

10 Awe kwali umwana mwaume uwa mwanakashi umwina Israele, lelo wishi ali mwina Egupti.+ Uyu mwana aile mu kati ka bana ba kwa Israele. Umwana mwaume wa mwanakashi umwina Israele no mwaume umwina Israele batampile ukulwa+ mu nkambi. 11 Kabili umwana mwaume wa mwanakashi umwina Israele aponteele Ishina+ lya kwa Lesa no kulilapisha.+ Awe bamutwele kuli Mose.+ Ishina lya kwa nyina ni Shelomiti, umwana mwanakashi wa kwa Dibri uwa mu mukowa wa kwa Dani. 12 Kabili balimulindike+ ukufikila bomfwe bwino bwino ifyo Yehova aali no kubeba.+

13 Kabili Yehova asosele kuli Mose ati:14 “Fumisha uwatukene ku nse ya nkambi;+ kabili bonse abamuumfwile babike iminwe+ yabo pa mutwe wakwe, no lukuta lonse lumupoole amabwe.+ 15 Kabili usose ku bana ba kwa Israele, auti, ‘Umuntu onse nga atuka Lesa, akashingamwa ulubembu lwakwe. 16 E ico uwapontela ishina lya kwa Yehova ukwipaiwa akepaiwe.+ Ulukuta lonse lukamupoole amabwe. Umulebeshi no mwana calo cimo cine bakepaiwe pa kupontela Ishina lya kwa Lesa.+

17 “‘Kabili umuntu nga aipaya umuntu, na o wine bakamwipaye.+ 18 No waipaya icitekwa akapyanikishepo cimbi, icitekwa pa citekwa.+ 19 Kabili umuntu nga alemanika umunankwe, ifyo acitile, e fyo cikacitwe na kuli ena.+ 20 Ukufuna pa kufuna, ilinso pa linso, ilino pa lino; ubulema bonse ubo alemanikako muntu, e fyo akalemanikwe na o wine.+ 21 Uwaipaya icitekwa+ akapyanikishepo+ cimbi, lelo uwaipaya umuntu, akepaiwe.+

22 “‘Ubupingushi bukaleba fye bumo bwine kuli imwe. Umulebeshi no mwana calo+ bakaleba fye cimo cine, pantu nine Yehova Lesa wenu.’”+

23 E lyo Mose asosele ku bana ba kwa Israele, na bo bafumiishe uwapontele ku nse ya nkambi, kabili bamupoolele amabwe.+ Awe abana ba kwa Israele bacitile filya fine fye Yehova aebele Mose.

25 Kabili Yehova akonkenyepo ukusosa kuli Mose mu Lupili lwa Sinai, ati: 2 “Sosa ku bana ba kwa Israele, no kutila, ‘Ilyo mukafika mu calo ico ndemupeela,+ ico icalo cikalesunga isabata kuli Yehova.+ 3 Imyaka mutanda (6) mukabyale mbuto mu mabala yenu, ne myaka mutanda mukaletungwila imiti ya mu mabala yenu aya myangashi, kabili mukalelonganika ifisabo fya mu calo.+ 4 Lelo mu mwaka walenga cinelubali (7) kukaleba isabata pa kuti umushili ukatuushe,+ lisabata kuli Yehova. Wikabyala imbuto mwi bala lyobe, ne bala lyobe lya myangashi wikatungwilamo. 5 Wikaseepa ifikamena ku fyashele ilyo walelobolola, kabili wikalonganika imyangashi ya ku muti uushatungwilwa. Ukabe mwaka wa kutuushamo umushili. 6 Kabili ifyo umushili wafumya mu nshita ye sabata mukalelya, iwe no mubomfi obe umwaume no mubomfi obe umwanakashi no walembwa incito na balebeshi abekala na iwe, 7 ne fitekwa fyobe ne nama sha mpanga ishili mu calo cobe. Fyonse ifyo umushili ukamesha fikaba fya kulya fyenu.

8 “‘Kabili ukapende amasabata cinelubali (7) aya myaka, imyaka cinelubali ukufushiwa ku miku cinelubali, amasabata cinelubali aya myaka yakabe imyaka amakumi yane na pabula (49). 9 Kabili ukalishe+ ntandala iililisha mu mweshi walenga cinelubali (7) pa bushiku bwalenga ikumi (10);+ pa bushiku bwe lambo lya cifuta mulandu+ mukalishe ntandala mu calo conse. 10 Mukalemona umwaka walenga amakumi yasano (50) ukuti wa mushilo kabili mukalebila ukulubuka mu calo ku bekashi ba ciko bonse.+ Ukaba mwaka wa Buntungwa+ kuli imwe, e lyo umuntu onse akabwelele ku mpanga yakwe kabili umuntu onse akabwelele ku lupwa lwakwe.+ 11 Umwaka walenga amakumi yasano (50) ukaleba mwaka wa Buntungwa.+ Te kwesha ukubyala imbuto nangu ukuseepa ifikamena ku fyashele ilyo mwalelobolola nangu ukusaba imyangashi ku miti iishatungwilwa.+ 12 Pantu mwaka wa Buntungwa. Mukaleumona ukuti mwaka wa mushilo. Mukalye ifya mu mabala ifyo umushili ukamesha.+

13 “‘Muli uyu mwaka wa Buntungwa umuntu onse akabwelele ku mpanga yakwe.+ 14 Kabili nga uleshitishapo fimo ku munobe nangu uleshita fimo ku munobe, mwikafyengana.+ 15 Ukashite impanga ku munobe ukulingana ne mpendwa ya myaka pa numa ya mwaka wa Buntungwa; akakushitishe ukulingana ne mpendwa ya myaka ya kulobolola ifisabo iisheleko.+ 16 Imyaka iisheleko nga yafula e fyo akakusheko umutengo wa kushitilapo,+ kabili imyaka iisheleko nga iinono e fyo akaceefyeko umutengo wa kushitilapo, pantu alekushitisha ifisabo ifya myaka iisheleko. 17 Kabili mwikabifyanya no munobe,+ lelo ukabe na katiina kuli Lesa obe,+ pantu nine Yehova Lesa wenu.+ 18 E ico mukalekonka ifipope fyandi kabili mukalekonka no bupingushi bwandi. E lyo mukekala umutelelwe+ mu calo. 19 Kabili icalo cikalatwale fisabo fya ciko,+ na imwe mukalalya no kwikuta no kwikalamo umutelelwe.+

20 “‘Lelo nga mwatila: “Bushe tukalya finshi mu mwaka walenga cinelubali (7) apo tatwakabyalemo imbuto nangu kulonganikamo ifisabo?”+ 21 e lyo nkamutumina ipaalo mu mwaka uwalenga mutanda (6), ne calo cikafumye fisabo fya ciko ifya myaka itatu.+ 22 Kabili mukalebyala imbuto mu mwaka walenga cinekonsekonse (8) no kulyapo ifisabo fya kale ukufika pa mwaka walenga pabula (9). Mukalelya ifya kale mpaka ifisabo fya uyo mwaka fikapye.

23 “‘Kabili te kuti mushitishe impanga umuyayaya,+ apo ni mpanga yandi.+ Pantu kuli ine imwe muli balebeshi kabili abeni.+ 24 Kabili impanga yonse iyo mwapeelwa, mwishibe ukuti umwine nakwata insambu sha kwisaishita na kabili.+

25 “‘Nga munonko aba umupiina kabili ashitishako impanga yakwe, e lyo lupwa lwakwe uwapalamisha, uuli ni kalubula, akese no kushita impanga iyo munyina ashitishe.+ 26 Kabili umuntu nga takwete kalubula lelo asanga indalama kabili akwata ne shalinga ukulubwilako iyo mpanga, 27 akapende imyaka ukufuma apo ashitishishe impanga no kubwesha indalama ishashalako ku muntu uo ashitisheko, e lyo akabwelele ku mpanga yakwe.+

28 “‘Lelo nga tasangile ishalinga isha kumubwesesha, impanga iyo ashitishe ikatwalilila ukuba iya waishitile ukufika ku mwaka wa Buntungwa;+ kabili ikapokololwe mu mwaka wa Buntungwa, na o akabwelele ku mpanga yakwe.+

29 “‘Nomba umuntu nga ashitisha ing’anda ya kwikalamo iyaba mu musumba we linga, akaba ne nsambu sha kulubula+ iyo ing’anda ukutula pa bushiku bwa kuishitisha ukufika apo umwaka ukapwila; insambu shakwe isha kuishita na kabili shikaba fye isha mwaka umo. 30 Kabili nga tabailubwile ukufika pa kupwa kwa mwaka uutuntulu, e lyo ing’anda ya mu musumba we linga ikabe ku waishitile umuyayaya na ku nkulo shakwe. Taifwile ukupokololwa na mu mwaka wa Buntungwa. 31 Lelo, amayanda ya mu mishi iyabula amalinga yakaba fye kwati mabala ya mu calo. Umwine wa ng’anda akatwalilila ukuba ne nsambu sha kuilubula,+ kabili mu mwaka wa Buntungwa+ yakabwelela ku bene.

32 “‘Lelo imisumba ya bena Lebi pamo na mayanda ya mu misumba yabo,+ insambu sha kuyalubula shikaba sha bena Lebi umuyayaya.+ 33 Kabili nga impanga ya bena Lebi tabailubwile, ing’anda iyashitishiwa mu musumba wakwe na yo ine ikapokwe mu mwaka wa Buntungwa;+ pantu amayanda ya mu misumba ya bena Lebi e yo bapeelwa mu kati ka bana ba kwa Israele.+ 34 Kabili, impanga sha mulemfwe+ isha misumba yabo te kuti shishitishiwe, pantu e sho bapeelwa umuyayaya.

35 “‘Kabili munonko uo mwikala nankwe nga aba umupiina kabili abulwa indalama,+ ukamwafwe.+ Filya fine wingafwa umulebeshi atemwa umweni.+ 36 Wikamukongwesha isha kaloba nangu ukumulomba isha kulundapo,+ lelo ukabe na katiina kuli Lesa obe;+ kabili ukapusushe munonko pa kuti akabe no mweo pamo na iwe. 37 Wikamukongwesha indalama shobe pa kuti akalundepo shimbi,+ nangu kumupeela ifya kulya fyobe pa kuti akalundepo pa kubwesha. 38 Nine Yehova Lesa wenu, uwamufumishe mu calo ca Egupti pa kuti nkamupeele icalo ca Kanaani,+ no kumulanga ukuti nine Lesa wenu.+

39 “‘Kabili umuntu munobe nga aba umupiina kabili aishitisha kuli iwe,+ wikamubomfya kwati musha.+ 40 Ukalemumona ngo mubomfi uubombela amalipilo,+ ngo mweni. Akakubombele ukufika umwaka wa Buntungwa. 41 Kabili akafume kuli iwe, ena na bana bakwe abaume, akabwelele na ku lupwa lwakwe, kabili akabwelele ku mpanga ya fikolwe fyakwe.+ 42 Pantu bena basha bandi abo nafumishe mu calo ca Egupti.+ Tabafwile ukuishitisha ifyo umusha ashitishiwa. 43 Wikamutekela ku lucu,+ kabili ukabe na katiina kuli Lesa obe.+ 44 Kabili pa basha bobe abaume na banakashi abo ukakwata ukufuma ku nko ishamushinguluka, e po mukashite abasha baume na banakashi. 45 Na ku bana ba balebeshi abekala na imwe,+ e ko mukashite, na ku ndupwa shabo isho mwikala na sho, isho bafyalila mu calo cenu; bena bakabe benu. 46 Kabili mukabashiile na bana benu abakamukonkapo ukuba ica bupyani cabo umuyayaya.+ Aba kuti mwababomfya nga basha, lelo aba muli bamunyinenwe, abana ba kwa Israele, mwikalabatekela ku lucu.+

47 “‘Lelo tutile umulebeshi napamo umwikashi uo mwikala nankwe asange fyuma, kabili munonko uo ekala nankwe abo mupiina no kuishitisha ku mulebeshi napamo ku mwikashi uo wikala na o, nangu ku wa mu lupwa lwa mulebeshi, 48 pa numa ya kuishitisha,+ akatwalilila ukuba ne nsambu sha kulubuka.+ Umo pali bamunyina kuti amulubula.+ 49 Napamo wishi mukalamba nelyo wishi mwaice nangu ndume yakwe muli wishi mukalamba atemwa muli wishi mwaice kuti amulubula, nelyo lupwa uuli onse uwapalamisha,+ kuti amulubula.

“‘Napamo nga asange fyuma, kuti ailubula umwine.+ 50 Kabili akomfwane no wamushitile, ukutula pa mwaka aishitishemo kuli ena ukufika mu mwaka wa Buntungwa,+ kabili isho aishitishishepo shifwile ukulingana ne mpendwa ya myaka.+ Ifyo inshiku sha mubomfi uubombela amalipilo shipendwa e fyo cikabe na kuli ena.+ 51 Lelo nga kucili imyaka iingi, ifyo imyaka ikaba e fyo akabweseshepo isha cilubula cakwe ukufuma pa ndalama isho aishitishishepo. 52 Lelo nga kushele fye imyaka inono ukufika pa mwaka wa Buntungwa,+ akaipendele umwine. Akamulipile isha kuilubula ukulingana ne myaka yakwe iisheleko. 53 Akabe kuli ena ngo mubomfi uubombela amalipilo+ umwaka no mwaka. Ekamutekela ku lucu+ na iwe ulemonako. 54 Lelo, nga afilwa ukuilubula umwine ukubomfya ishi nshila, e lyo akafumeko mu mwaka wa Buntungwa,+ ena na bana bakwe abaume abali nankwe.

55 “‘Pantu kuli ine abana ba kwa Israele basha. Basha bandi+ abo nafumishe mu calo ca Egupti.+ Nine Yehova Lesa wenu.+

26 “‘Mwikaipangila+ tulesa twa fye, kabili mwikemika icipasho icabaswa+ nangu icaimikwa ca mabwe, kabili ilibwe ilyabaswapo ifya kupalanya+ mwikalibika mu calo cenu pa kuti mulekontamako;+ pantu nine Yehova Lesa wenu. 2 Mukalesunga amasabata+ yandi, kabili mukaleba na katiina ku mwa mushilo mwandi. Nine Yehova.

3 “‘Nga mwakulaendela mu fipope fyandi na mafunde yandi mwakulayasunga no kuyakonka,+ 4 nkalamupeela imfula pa nshita ya iko,+ ne calo cikalafumya ubulimi bwa ciko,+ ne miti ya mu mabala ikalatwala ifisabo fya iko.+ 5 Kabili ukupuula kwenu kukalafika ku kusaba imyangashi, no kusaba imyangashi kukalafika ku kubyala imbuto shimbi; kabili mukalalya ifya kulya fyenu no kwikuta+ no kwikala umutelelwe mu calo cenu.+ 6 Nkalapeela no mutende mu calo,+ na imwe mukalasendama ukwabula uwa kumutiinya;+ kabili nkalenga ne fiswango fya mu mpanga ukupwa mu calo,+ no lupanga talwakapite mu calo cenu.+ 7 Kabili mukafulumuna abalwani benu,+ na bo bakafwa ku lupanga pa ntanshi yenu. 8 Kabili abantu basano pali imwe bakafulumuna abantu umwanda umo (100), na bantu umwanda umo pali imwe bakafulumuna abantu amakana ikumi (10,000), kabili abalwani benu bakafwa ku lupanga pa ntanshi yenu.+

9 “‘Kabili nkaalukila kuli imwe+ no kumupeela abana abengi no kumufusha,+ kabili nkafikilisha icipangano candi kuli imwe.+ 10 Kabili mukalalya ifya kale ifya mwaka wapwile,+ kabili mukalafumya ifya kale ilyo mushilafumya ifipya. 11 Kabili nkabika icikuulwa candi ica mushilo mu kati kenu,+ kabili nshakamupate.+ 12 Kabili nkalaendauka mu kati kenu no kumulanga ukuti ine ndi Lesa wenu,+ na imwe mukalaba abantu bandi.+ 13 Nine Yehova Lesa wenu, uwamufumishe mu calo ca Egupti pa kuti mwilaba abasha ku bena Egupti,+ kabili naputwile ikoli lyenu no kumulenga ukwenda abaololoka.+

14 “‘Lelo, nga tamwakaleumfwa kuli ine, nangu nga tamwakalekonka amafunde yonse aya,+ 15 kabili nga mukalasuula ne fipope+ fyandi, ne mitima yenu nga ikapata ubupingushi bwandi no kukanakonka amafunde yandi yonse, no kufulunganya icipangano candi,+ 16 e lyo ine nkacita ifi kuli imwe pa kumukanda, nkamulenga ukusakamikwa ilyo nkaleta pali imwe ubulwele bwa TB*+ no kukabo mubili, nkalenga amenso yenu ukuleko kumona+ kabili nkalenga no mubili wenu ukupwa.+ Kabili mukalaicusha fye nga mwabyala imbuto, pantu abalwani benu e bakalashilya.+ 17 Kabili nkalosha icinso candi pali imwe, na imwe mukacimfiwa ku balwani benu;+ kabili abamupata bakamunyantaula,+ na imwe mukafulumuka apabula uulemufulumuna.+

18 “‘Lelo nga tamwakomfwe kuli ine, te mulandu ne fi fintu, ninshi nkalundapo ukumulimuna imiku cinelubali (7) pa membu shenu.+ 19 Kabili nkamupwisha icilumba no kulenga umuulu wenu ukuba nge cela+ ne calo cenu ngo mukuba. 20 Na maka yenu yakalaonaika fye, pantu icalo cenu tacakafumye ubulimi bwa ciko,+ ne miti ya mu calo tayakatwale ifisabo fya iko.+

21 “‘Lelo nga mwakulapusana na ine no kukaana ukuumfwa kuli ine, nkalunda pali imwe impumo cinelubali (7) ukulingana ne membu shenu.+ 22 Kabili nkamutumina ifiswango fya mu mpanga,+ na fyo fikamulenga ukufwilwa abana+ no kulofya ifitekwa fyenu no kumulenga ukuba abanono, na mu misebo yenu tamwakabe abantu.+

23 “‘Lelo nga tamwakaaluke ilyo nkaleta ifi fintu pali imwe+ kabili mwalapusana fye na ine, 24 na ine nkalapusana na imwe;+ kabili nkamuuma imiku cinelubali (7) pa membu shenu.+ 25 Kabili nkaleta pali imwe ulupanga lwa cilandushi+ ca cipangano;+ na imwe mukafulumuka pa kuti mukayebelama mu misumba yenu, na ine nkatuma icikuko mu kati kenu,+ kabili mukapeelwa mu minwe ya balwani.+ 26 Ilyo nkafuna inkonto uko mukobeka imikate yenu,+ abanakashi ikumi (10) bakapanga umukate wenu mu citofu cimo no kumupimina umukate wa kumupeela;+ kabili mukalya lelo tamwakekute.+

27 “‘Lelo nga tamwakomfwe kuli ine ilyo nkaleta ifi fintu pali imwe kabili mulepusana fye na ine,+ 28 nkapusana na imwe mu bukali,+ na kabili nkamulimuna imiku cinelubali (7) pa membu shenu.+ 29 Kabili mukalya imibili ya bana benu abaume, no kulya imibili ya bana benu abanakashi.+ 30 Nkonaula na pa kupepela penu+ no konaula ifya kufutumwinapo ifyanunkila no kutuntika ifitumbi fyenu pa fitumbi fya tulubi twenu utwa bunani;+ kabili umutima wandi ukamupata.+ 31 Nkonaula ne misumba yenu ku lupanga+ no konaula umwa mushilo mwenu,+ kabili nshakanunshe akacena kasuma aka malambo yenu.+ 32 Kabili nkonaula icalo,+ na balwani benu abaleikalamo bakapapa icibi pa fyo cikonaulwa.+ 33 Na imwe nkamusalanganishisha mu nko,+ nkasomwena no lupanga pali imwe;+ ne calo cenu cikashala icibolya,+ ne misumba yenu ikonaika.

34 “‘E lyo icalo cikafishapo ukusunga amasabata ya ciko inshiku shonse isho cikashala icibolya, inshiku isho imwe mukaba mu calo ca balwani benu. Pali iyi nshita icalo cikalasunga amasabata, pantu cikafuta amasabata ya ciko.+ 35 Kabili inshiku shonse isho cikashala icibolya cikalasunga amasabata, pa mulandu wa kuti tacasungile amasabata mu masabata yenu ilyo mwaikelemo.

36 “‘Kabili abakashalapo pali imwe,+ nkatuma umwenso mu mitima yabo mu fyalo fya balwani babo; kabili ukulila kwe buula ilileulululwa kukababutusha imbilo, na bo bakafulumuka kwati ni ku lupanga no kuwa ilyo tapali uulebabutusha.+ 37 Kabili bakalapunkana kwati balefulumuka ku lupanga ilyo tapali uulebabutusha, kabili tamwakabe na maka ya kwiminina ku cinso ca balwani benu.+ 38 Lelo mukalobela mu nko,+ ne calo ca balwani benu cikamulya. 39 Kabili abakashalapo pali imwe bakaloba+ pa mulandu wa membu shabo mu calo ca balwani benu. Na kabili bakaloba pa mulandu wa membu sha bashibo,+ nge fyo bashibo balobele. 40 Kabili bakasokolola imembu+ shabo ne membu sha bashibo na bucisanguka ubo bansangukile, ilyo bapusene na ine.+ 41 Na ine nalipusene na bo,+ no kubatwala mu calo ca balwani babo.+

“‘Nalimo pali iyo nshita imitima yabo iishasembululwa+ ikanakilila,+ kabili pali iyo nshita bakafuta pa membu shabo. 42 E lyo nkebukisha icipangano candi na Yakobo+ ne cipangano candi na Isaki+ ne cipangano candi na Abrahamu,+ kabili nkebukisha ne calo. 43 Kabili pali iyi nshita yonse, icalo cikashala fye umwabula umwikashi kabili ilyo cikashala icibolya ukwabula bena cikalasunga amasabata+ ayo cishalesunga na bo bakakandilwa pa membu+ shabo pa mulandu wa kuti bakeene ubupingushi+ bwandi, ne mitima yabo yapatile ifipope fyandi.+ 44 Lelo te mulandu ne fyo bacitile, ilyo bakaba mu calo ca balwani babo, nshakabakaane+ nangu kubapata+ kabili nshakabalofye nangu ukufulunganya icipangano+ ico napangene na bo; pantu nine Yehova Lesa wabo. 45 Kabili nkabebukishisha pa cipangano napangene ne fikolwe+ fyabo ifyo nafumishe mu calo ca Egupti pa menso ya nko,+ ku kubalanga ukuti ndi Lesa wabo. Nine Yehova.’”

46 Ifi e fipope kabili ubu e bupingushi+ na mafunde ifyo Yehova abikile pa kati kakwe na bana ba kwa Israele mu Lupili lwa Sinai ukupitila muli Mose.+

27 Kabili Yehova akonkenyepo ukusosa kuli Mose ati: 2 “Sosa ku bana ba kwa Israele, no kubeba auti, ‘Umuntu nga alapa umulapo waibela+ uwa kutuula abantu kuli Yehova ukulingana no mutengo wapingulwa, 3 umutengo wa mwaume uukwete imyaka amakumi yabili (20) ukufika ku wa myaka amakumi mutanda (60) ufwile ukuba amashekele amakumi yasano (50) aya silfere ukulingana no kufina kwe shekele lya mu muputule wa mushilo. 4 Nomba nga mwanakashi, umutengo ufwile ukuba amashekele amakumi yatatu (30). 5 Kabili nga wa myaka isano ukufika ku wa myaka amakumi yabili (20), umutengo wa mwaume ufwile ukuba amashekele amakumi yabili, nga wa mwanakashi, amashekele ikumi (10). 6 Kabili nga mwaume ukufuma pa uli no mweshi umo ukufika ku wa myaka isano, umutengo ufwile ukuba amashekele yasano+ aya silfere no wa mwanakashi ufwile ukuba amashekele yatatu aya silfere.

7 “‘Nomba nga mwaume ukutula pa uli ne myaka amakumi mutanda (60) no kuya pa muulu, umutengo ufwile ukuba amashekele ikumi na yasano (15), kabili nga mwanakashi ufwile ukuba amashekele ikumi (10). 8 Lelo nga mupiina ica kutila afilwa ukulipila umutengo wapingulwa,+ akemike umuntu ku cinso ca kwa shimapepo na o shimapepo akamupimine umutengo.+ Ukulingana fye ne fyo uwalapile umulapo engalipila,+ e fyo shimapepo akamupimine.

9 “‘Kabili nga citekwa ico abantu batuula kuli Yehova, icili conse ico umuntu engapeela kuli Yehova cikaba ica mushilo.+ 10 Ekapyanikishapo cimbi kabili ekakaabwilamo icisuma mu cibi, nangu icibi mu cisuma. Pantu nga akaabula icitekwa mu citekwa cibiye, ninshi ico citekwa ne cakaabulwamo fikaba fya mushilo. 11 Kabili nga citekwa icili conse icakowela+ pamo nga cilya umuntu ashingatuula kuli Yehova,+ akemike ico citekwa ku cinso ca kwa shimapepo.+ 12 Na o shimapepo akapingule umutengo wa ciko ukulingana ne fyo cilemoneka nampo nga cisuma nelyo cibi. Umutengo shimapepo akapingula,+ e ukaba umutengo wa ico citekwa. 13 Nomba nga alefwaya ukucilubula, akalundepo ica pali fisano+ pa mutengo wapingulwa.

14 “‘Nomba umuntu nga apeela ing’anda yakwe kuli Yehova, shimapepo akapingule umutengo wa iko ukulingana ne fyo ilemoneka nampo nga isuma nelyo ibi.+ Uyo wine umutengo shimapepo akapingula, e ukaba umutengo wa iyo ng’anda. 15 Lelo uwaipeele nga alefwaya ukulubula ing’anda yakwe, akalundepo ica pali fisano ica sha silfere isha mutengo wapingulwa;+ e lyo ikaba yakwe.

16 “‘Kabili umuntu nga apeela Yehova ibala limo pa mabala ayo akwata,+ umutengo we bala ukabe ukulingana ne mbuto ishabyalwamo: nga lidalamu*+ limo ilya barle ninshi umutengo wa liko ukabe amashekele amakumi yasano (50) aya silfere. 17 Nga apeela ibala lyakwe ukutula pa mwaka wa Buntungwa,+ umutengo wa liko ukaba ukulingana no mutengo wapingulwa. 18 Lelo nga ni pa numa ya mwaka wa Buntungwa e po apeela ibala lyakwe, ninshi shimapepo akamupendela umutengo ukulingana ne myaka isheleko ukufika pa mwaka wa Buntungwa uwakonkapo, kabili akufumyeko ku mutengo wapingulwa.+ 19 Lelo uwapeela ibala lyakwe nga alefwaya ukulibwesha, akalundepo ica pali fisano ica mutengo wapingulwa, e lyo likabe lyakwe.+ 20 Nomba nga talubwile ibala kabili balishitisha ku muntu umbi, te kuti lilubulwe. 21 Kabili ibala nga lyalubulwa mu mwaka wa Buntungwa likaba ilya mushilo kuli Yehova, nge bala ilyapeelwa kuli ena.+ Likaba libala lya kwa shimapepo.+

22 “‘Kabili umuntu nga apeela Yehova ibala ilyo ashitile ilishili pa mabala yakwe,+ 23 shimapepo akamupimine umutengo ukulingana ne myaka isheleko pa kufika ku mwaka wa Buntungwa, kabili akalipile umutengo pali bulya bwine bushiku.+ Libala lya mushilo kuli Yehova.+ 24 Mu mwaka wa Buntungwa ibala likabwelele ku o lyashitilweko, ku mwine wa mpanga.+

25 “‘Kabili umutengo onse ukabe mu mashekele ya mu muputule wa mushilo. Ishekele likabe amagera amakumi yabili (20).+

26 “‘Ibeli lya fitekwa lya kwa Yehova,+ umuntu nangu umo ekapeela umbi amabeli ya fitekwa fyakwe. Nampo ilyo ibeli nga ni ng’ombe iilume nelyo impaanga, yonse ya kwa Yehova.+ 27 Lelo nga libeli lya fitekwa ifyakowela+ kabili nga alefwaya ukulilubula ukulingana no mutengo wapingulwa, akalundepo ica pali fisano.+ Lelo nga talilubwilwe, bakalishitishe ukulingana no mutengo wapingulwa.

28 “‘Conse ico umuntu apeela kuli Yehova ukuti cilebomfiwa mu mulimo wa mushilo,+ nampo nga muntu nangu ni nama nangu libala lyakwe, te kuti bacishitishe kabili te kuti bacilubule.+ Ca mushilo nga nshi kuli Yehova. 29 Umuntu onse uwapeelwa ku konaulwa te kuti alubulwe.+ Ukwipaiwa akepaiwe.+

30 “‘Kabili ica pe kumi+ pali fyonse ifya mwi bala, e kuti imbuto sha mwi bala ne fisabo fya ku miti, ca kwa Yehova. Ca mushilo kuli Yehova. 31 Kabili umuntu nga alefwaya ukulubula ica pe kumi cakwe, akalundepo ica pali fisano ca ciko.+ 32 Kabili pa ng’ombe shonse na pa mpaanga shonse, ukabuulepo ica pe kumi, shonse ishipita mwi samba lya nkonto pa kupendwa,+ iyalenga ikumi ikabe iya mushilo kuli Yehova. 33 Ekaibebeta ukumona nga isuma napamo ibi, kabili ekakaabulamo. Lelo ukukaabula nga akaabulamo, ninshi iyo nama ne yakaabulwamo shikabe isha mushilo.+ Te kuti shilubulwe.’”

34 Aya e mafunde+ ayo Yehova apeele Mose mu Lupili lwa Sinai ukuti abana ba kwa Israele balekonka.+